ಎಷ್ಟು ದುಡಿದರೂ ಕೈಯಲ್ಲಿ ಹಣ ನಿಲ್ತಿಲ್ವಾ? ಸ್ಯಾಲರಿ ಹೈಕ್ ಆದ್ರೂ, ಬೋನಸ್ ಸಿಕ್ರೂ ಮಂತ್ ಎಂಡ್ ನಲ್ಲಿ ನೀವು ಪರದಾಡುತ್ತಿದ್ದೀರಾ? ಹೇಗಾದ್ರೂ ಮಾಡಿ, ತಿಂಗಳ ಕೊನೆಯಲ್ಲಿ ಕೈಯಲ್ಲಿ ಹಣ ಇರ್ಬೇಕು, ಯಾರಿಗೂ ಕೈ ಸಾಲ ಕೇಳಬಾರದು ಎಂಬ ಸ್ವಾಭಿಮಾನ ನಿಮ್ಮನ್ನು ಕಾಡ್ತಿದಿಯೇ? ಹಾಗಾದ್ರೆ, ಚಿಂತೆ ಬೇಡ. ತಿಂಗಳ ಸಂಬಳವನ್ನು ಹೇಗೆ ಉಳಿಸಬೇಕು? ತಿಂಗಳ ಕೊನೆಯಲ್ಲೂ ಹೇಗೆ ದುಡ್ಡು ಉಳಿಯೋ ಥರಾ ಪ್ಲಾನ್ ಮಾಡಬೇಕು ಅನ್ನೋದನ್ನ ನಾವ್ ನಿಮ್ಗೆ ಹೇಳ್ತೀವಿ ನೋಡಿ.
ತಿಂಗಳ ಕೊನೆಯಲ್ಲೂ ದುಡ್ಡು ಹೀಗೆ ಉಳಿಸಿ
50-30-20 ರೂಲ್ ಫಾಲೋ ಮಾಡಿ
ಕೈಸಾಲ ಮಾಡೋ ಚಿಂತೆಯನ್ನೇ ಬಿಟ್ಟುಬಿಡಿ
ಮನೆಯಲ್ಲಿ ನಾವು ಹೇಗೆ ಚಿತ್ರಾನ್ನ ಮಾಡಬೇಕಾದ್ರೂ ಪ್ಲಾನ್ ಮಾಡುತ್ತೇವೆಯೋ, ತಿಂಗಳ ಸಂಬಳವನ್ನೂ ಪ್ಲಾನ್ ಮಾಡಬೇಕು. ಪ್ಲಾನ್ ಮಾಡಿ, ಅದರ ಪ್ರಕಾರ ಖರ್ಚು ಮಾಡಿದ್ರೆ ಮಾತ್ರ ಮಂತ್ ಎಂಡ್ ನಲ್ಲಿ ಸಂಬಳ ಉಳಿಯುತ್ತೆ. ಇದಕ್ಕೆ ಅಂತಾನೇ 50-30-20 ರೂಲ್ ಇದೆ. ಇದರ ಪ್ರಕಾರ, ತಿಂಗಳ ಸಂಬಳವನ್ನ ಡಿವೈಡ್ ಮಾಡಿದ್ರೆ, ಅದೇ ರೀತಿ ಖರ್ಚು, ಉಳಿತಾಯ ಮಾಡಿದ್ರೆ ಮಾತ್ರ ತಿಂಗಳ ಕೊನೆಗೂ ನೀವು “ಸಾಲಗಾರ”ನ ಬದಲು “ಸಾಹುಕಾರ” ಆಗ್ತೀರಿ.
ಫಾಲೋ ಮಾಡಿ ರೂಲ್ ನಂಬರ್ 1
ಶೇ.50ರಷ್ಟು ಹಣವನ್ನ ಅಗತ್ಯಕ್ಕೆ ಬಳಸಿ
ತಿಂಗಳ ಖರ್ಚಿಗೆ ಇದನ್ನು ಮೀಸಲಿಟ್ಟುಬಿಡಿ
ನಿಮ್ಮ ಸಂಬಳ ತಿಂಗಳಿಗೆ 50 ಸಾವಿರ ರೂ. ಸಂಬಳ ಅಂತಿಟ್ಟುಕೊಳ್ಳಿ. ಇದರಲ್ಲಿ ಶೇ.50ರಷ್ಟು ಹಣವನ್ನು ಮನೆ ಖರ್ಚು, ಬಾಡಿಗೆ, ವಿಮೆಯ ಮೊತ್ತ, ಪೆಟ್ರೋಲ್ ಖರ್ಚು ಅಂತ ಡಿವೈಡ್ ಮಾಡಿ. ಅಂದ್ರೆ, 25 ಸಾವಿರ ರೂಪಾಯಿಯಲ್ಲೇ ತಿಂಗಳ ಖರ್ಚನ್ನು ನೋಡಿಕೊಳ್ಳಿ. ಅದರ ಪ್ರಕಾರವೇ ಪ್ಲಾನ್ ಮಾಡಿ. ಯಾವುದೇ ಕಾರಣಕ್ಕೂ ಮನೆಯ ಖರ್ಚು 25 ಸಾವಿರ ರೂ. ದಾಟದಂತೆ ಪ್ಲಾನ್ ಮಾಡಿ. ಆಗ ನಿಮಗೊಂದು ಹಣಕಾಸು ಶಿಸ್ತು ರೂಢಿಯಾಗುತ್ತೆ.
30% ಸಂಬಳ ಜೀವನಶೈಲಿಗೆ ಇರಿಸಿ
ಇದರಲ್ಲಿಯೇ ತಿಂಗಳು ಕಳೆಯಿರಿ
ಮನರಂಜನೆಯೂ ಇದರ ವ್ಯಾಪ್ತಿಯಲ್ಲೇ ಇರಲಿ
ಸಂಬಳದ ಶೇ.50ರಷ್ಟು ಅಂದ್ರೆ, 25 ಸಾವಿರ ರೂ. ಮನೆಯ ಖರ್ಚಿಗೆ ಆಯಿತು. ಇನ್ನು ಶೇ.30ರಷ್ಟು ಹಣವನ್ನು ತಿಂಗಳಲ್ಲಿ ಮನರಂಜನೆ, ಸಿನಿಮಾ, ರಸ್ಟೋರೆಂಟ್ ನಲ್ಲಿ ಊಟಕ್ಕಾಗಿ ಮೀಸಲಿಡಿ. ಅಂದ್ರೆ, 15 ಸಾವಿರ ರೂಪಾಯಿಯನ್ನು ತಿಂಗಳಿಗೆ ಬೇಕಾಗುವ ಮನರಂಜನೆ, ಪಾರ್ಟಿ, ಡಿನ್ನರ್ ಗಾಗಿ ಮೀಸಲಿಟ್ಟುಬಿಡಿ. ಯಾವುದೇ ಕಾರಣಕ್ಕೂ ಈ ಮಿತಿಯ ಹಣವನ್ನು ದಾಟದಿರಿ.
ಉಳಿದ ಶೇ.20ರಷ್ಟು ಹಣ ಉಳಿತಾಯ ಮಾಡಿ
ಉಳಿತಾಯದ ಜತೆಗೆ ಸಮರ್ಪಕ ಹೂಡಿಕೆ ಇರಲಿ
ಇದು ಭವಿಷ್ಯದ ನಿಧಿ ಎಂದೇ ಭಾವಿಸಿ
ಇದುವರೆಗೆ 50 ಸಾವಿರ ರೂ. ಸಂಬಳದ ಶೇ.80ರಷ್ಟು ಅಂದ್ರೆ, 40 ಸಾವಿರ ರೂಪಾಯಿ ಮನೆಯ ಖರ್ಚು, ರಿಚಾರ್ಜ್, ಸಿನಿಮಾ, ಹೋಟೆಲ್ ಊಟಕ್ಕೆ ಹೋಯಿತು. ಆದ್ರೆ, ಉಳಿದ 10 ಸಾವಿರ ರೂಪಾಯಿಯನ್ನು ಹೂಡಿಕೆ ಮಾಡೋದನ್ನು ಮರೆಯಬೇಡಿ. 10 ಸಾವಿರ ರೂಪಾಯಿಯಲ್ಲೇ ನಾಲ್ಕು ಭಾಗವನ್ನು ಮಾಡಿ, ಮ್ಯೂಚುವಲ್ ಫಂಡ್ ಎಸ್ಐಪಿಯೋ, ಪೋಸ್ಟ್ ಆಫೀಸ್ ಆರ್ ಡಿಯನ್ನೋ, ಮಕ್ಕಳ ಶಿಕ್ಷಣಕ್ಕಾಗಿ ಉಳಿತಾಯವನ್ನೋ ಮಾಡಿ, ಅದರಲ್ಲಿ ನಿಯಮಿತವಾಗಿ ಹೂಡಿಕೆ ಮಾಡಿ.
ಹೀಗೆ, 50 ಸಾವಿರ ರೂಪಾಯಿ ಮಾತ್ರವಲ್ಲ, 50-30-20 ನಿಯಮವನ್ನು ಎಷ್ಟು ಸಂಬಳ ಇದ್ದವರು ಬೇಕಾದರೂ ಪಾಲಿಸಬಹುದು. ಅದರಲ್ಲೂ, ನಗರ ಪ್ರದೇಶದಲ್ಲಿ ವಾಸಿಸುವವರಿಗಂತೂ ಇಂತಹ ಹಣಕಾಸು ಶಿಸ್ತು ಇದ್ದರೆ ಮಾತ್ರ ಸಾಲ ಮಾಡುವ ಪರಿಸ್ಥಿತಿ ಎದುರಾಗೋದಿಲ್ಲ. ಹಾಗೆಯೇ, ಹೂಡಿಕೆಯ ಮೂಲಕ ಭವಿಷ್ಯವನ್ನೂ ಭದ್ರಗೊಳಿಸಬಹುದಾಗಿದೆ.
