ನವದೆಹಲಿ: ಭಾರತದ ಪ್ರಖ್ಯಾತ ದ್ವಿಚಕ್ರ ವಾಹನ ತಯಾರಕ ಸಂಸ್ಥೆಯಾದ ಹೀರೋ ಮೋಟೋಕಾರ್ಪ್ನ ಎಲೆಕ್ಟ್ರಿಕ್ ವಾಹನ ವಿಭಾಗವಾದ ‘ವಿದಾ’ (Vida), ಮಕ್ಕಳಿಗಾಗಿ ವಿಶೇಷವಾಗಿ ವಿನ್ಯಾಸಗೊಳಿಸಲಾದ ತನ್ನ ಮೊದಲ ಎಲೆಕ್ಟ್ರಿಕ್ ಆಫ್-ರೋಡ್ ಬೈಕ್ ‘ವಿದಾ ಡರ್ಟ್.ಇ ಕೆ3‘ (Vida Dirt.E K3) ಅನ್ನು ಬಿಡುಗಡೆ ಮಾಡಿದೆ. ಈ ಮೂಲಕ ಸಂಸ್ಥೆಯು ಯುವ ಎಲೆಕ್ಟ್ರಿಕ್ ವಾಹನಗಳ ಮಾರುಕಟ್ಟೆಗೆ ಅದ್ಧೂರಿ ಪ್ರವೇಶ ಪಡೆದಿದ್ದು, 4 ರಿಂದ 10 ವರ್ಷದೊಳಗಿನ ಮಕ್ಕಳನ್ನು ಗಮನದಲ್ಲಿಟ್ಟುಕೊಂಡು ಈ ಬೈಕ್ ಅನ್ನು ಸಿದ್ಧಪಡಿಸಲಾಗಿದೆ. ಮೊದಲ ಹಂತದಲ್ಲಿ ಬಿಡುಗಡೆಯಾಗುವ 300 ಯುನಿಟ್ಗಳಿಗೆ 69,990 ರೂ.ಗಳ ಪರಿಚಯಾತ್ಮಕ ಬೆಲೆಯನ್ನು ನಿಗದಿಪಡಿಸಲಾಗಿದೆ.
ಈ ಬೈಕ್ನ ಅತ್ಯಂತ ವಿಶಿಷ್ಟವಾದ ಸಂಗತಿಯೆಂದರೆ ಇದರ ಹೊಂದಾಣಿಕೆ ಮಾಡಬಹುದಾದ ಫ್ರೇಮ್ ತಂತ್ರಜ್ಞಾನವಾಗಿದೆ. ಸಾಮಾನ್ಯವಾಗಿ ಮಕ್ಕಳು ವೇಗವಾಗಿ ಬೆಳೆಯುವುದರಿಂದ, ಪೋಷಕರು ಅವರಿಗೆ ಸೈಕಲ್ ಅಥವಾ ಬೈಕ್ ಖರೀದಿಸಿದರೆ ಕೆಲವೇ ವರ್ಷಗಳಲ್ಲಿ ಅದು ಅವರಿಗೆ ಚಿಕ್ಕದಾಗುತ್ತದೆ. ಆದರೆ ವಿದಾ ಡರ್ಟ್.ಇ ಕೆ3 ಬೈಕ್ನಲ್ಲಿ ಈ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳಲಾಗಿದೆ. ಒಂದೇ ಟೂಲ್ ಅನ್ನು ಬಳಸಿಕೊಂಡು ಬೈಕ್ನ ಫ್ರೇಮ್ ಅನ್ನು ಸಣ್ಣ, ಮಧ್ಯಮ ಮತ್ತು ದೊಡ್ಡ ಗಾತ್ರಕ್ಕೆ (Small, Medium, Large) ಸುಲಭವಾಗಿ ಬದಲಾಯಿಸಬಹುದು. ಹೀಗಾಗಿ ಮಗು ಬೆಳೆದಂತೆ ಬೈಕ್ ಅನ್ನೂ ಅವರ ಎತ್ತರಕ್ಕೆ ತಕ್ಕಂತೆ ಹೊಂದಿಸಿಕೊಳ್ಳಬಹುದು. ಈ ಮೂಲಕ ಪೋಷಕರು ಪದೇ ಪದೇ ಹೊಸ ವಾಹನ ಖರೀದಿಸುವ ಹೊರೆ ತಪ್ಪಲಿದೆ.
ಸ್ಮಾರ್ಟ್ಫೋನ್ನಲ್ಲಿ ನಿಯಂತ್ರಣ
ಮಕ್ಕಳ ಸುರಕ್ಷತೆ ಮತ್ತು ಕಲಿಕೆಯನ್ನು ದೃಷ್ಟಿಯಲ್ಲಿಟ್ಟುಕೊಂಡು ಈ ಬೈಕ್ನಲ್ಲಿ ಮೂರು ವಿಭಿನ್ನ ರೈಡಿಂಗ್ ಮೋಡ್ಗಳನ್ನು ನೀಡಲಾಗಿದೆ. ಆರಂಭಿಕರಿಗಾಗಿ ‘ಬಿಗ್ನರ್ ಮೋಡ್’ ಇದ್ದು, ಇದು ಗಂಟೆಗೆ ಗರಿಷ್ಠ 8 ಕಿ.ಮೀ ವೇಗವನ್ನು ನೀಡುತ್ತದೆ. ಕಲಿಕೆಯಲ್ಲಿ ಮುಂದುವರಿದವರಿಗಾಗಿ ‘ಅಮೆಚೂರ್ ಮೋಡ್’ (16 ಕಿ.ಮೀ/ಗಂಟೆ) ಮತ್ತು ಪರಿಣಿತರಿಗಾಗಿ ‘ಪ್ರೊ ಮೋಡ್’ (25 ಕಿ.ಮೀ/ಗಂಟೆ) ಲಭ್ಯವಿದೆ. ಪೋಷಕರು ತಮ್ಮ ಸ್ಮಾರ್ಟ್ಫೋನ್ನಲ್ಲಿ ‘ವಿದಾ ಆಪ್’ (VIDA App) ಬಳಸುವ ಮೂಲಕ ಬೈಕ್ನ ವೇಗವನ್ನು ನಿಯಂತ್ರಿಸಬಹುದು ಮತ್ತು ರೈಡ್ ಮೋಡ್ಗಳನ್ನು ಲಾಕ್ ಮಾಡಬಹುದು. ಇದು ಪೋಷಕರಿಗೆ ತಮ್ಮ ಮಕ್ಕಳ ಸುರಕ್ಷತೆಯ ಬಗ್ಗೆ ನೆಮ್ಮದಿ ನೀಡುತ್ತದೆ.
ತಾಂತ್ರಿಕವಾಗಿ ನೋಡುವುದಾದರೆ, ಈ ಬೈಕ್ 350W ಸಾಮರ್ಥ್ಯದ ಮೋಟರ್ ಮತ್ತು 360Wh ಸಾಮರ್ಥ್ಯದ ತೆಗೆಯಬಹುದಾದ ಬ್ಯಾಟರಿಯನ್ನು ಹೊಂದಿದೆ. ಒಮ್ಮೆ ಚಾರ್ಜ್ ಮಾಡಿದರೆ ಸುಮಾರು 3 ಗಂಟೆಗಳ ಕಾಲ ಇದನ್ನು ಚಲಾಯಿಸಬಹುದು. ಬ್ಯಾಟರಿಯನ್ನು ಮನೆಯ ಸಾಮಾನ್ಯ ಪ್ಲಗ್ ಪಾಯಿಂಟ್ನಲ್ಲಿ ಚಾರ್ಜ್ ಮಾಡಬಹುದಾಗಿದ್ದು, ಶೂನ್ಯದಿಂದ ನೂರರಷ್ಟು ಚಾರ್ಜ್ ಆಗಲು ಸುಮಾರು 3 ಗಂಟೆ ಬೇಕಾಗುತ್ತದೆ. ಸುರಕ್ಷತೆಯ ಭಾಗವಾಗಿ ಬೈಕ್ ಬಿದ್ದರೆ ತಕ್ಷಣ ಮೋಟಾರ್ ಆಫ್ ಆಗುವಂತಹ ಮ್ಯಾಗ್ನೆಟಿಕ್ ಕಿಲ್ ಸ್ವಿಚ್, ಸಂಪೂರ್ಣ ಸೀಲ್ ಮಾಡಲಾದ ಬ್ಯಾಟರಿ ಕವಚ ಮತ್ತು ಮಕ್ಕಳ ಕೈಗೆಟುಕುವ ಹೈಡ್ರಾಲಿಕ್ ಡಿಸ್ಕ್ ಬ್ರೇಕ್ಗಳನ್ನು ಅಳವಡಿಸಲಾಗಿದೆ.
ಜರ್ಮನಿ ಮತ್ತು ಜೈಪುರದಲ್ಲಿರುವ ಹೀರೋ ಇನ್ನೋವೇಶನ್ ಸೆಂಟರ್ಗಳಲ್ಲಿ ಜಂಟಿಯಾಗಿ ಅಭಿವೃದ್ಧಿಪಡಿಸಲಾದ ಈ ಬೈಕ್, ಈಗಾಗಲೇ ಪ್ರತಿಷ್ಠಿತ ‘ರೆಡ್ ಡಾಟ್ ಡಿಸೈನ್ ಅವಾರ್ಡ್’ ಮತ್ತು ‘ಸಿಇಎಸ್ ಇನ್ನೋವೇಶನ್ ಅವಾರ್ಡ್’ಗಳಿಗೆ ಭಾಜನವಾಗಿದೆ. ಕೆಂಪು, ನೇರಳೆ ಮತ್ತು ಬಿಳಿ ಬಣ್ಣಗಳಲ್ಲಿ ಲಭ್ಯವಿರುವ ಈ ಬೈಕ್ನ ಮಾರಾಟವು 2026ರ ಜನವರಿ 15 ರಿಂದ ಬೆಂಗಳೂರು, ದೆಹಲಿ, ಪುಣೆ, ಜೈಪುರ ಮತ್ತು ಕಲ್ಲಿಕೋಟೆಯ ಆಯ್ದ ಶೋರೂಮ್ಗಳಲ್ಲಿ ಆರಂಭವಾಗಲಿದೆ. ಆಸಕ್ತರು ಅಲ್ಲಿಗೆ ಭೇಟಿ ನೀಡಿ ಈ ವಿನೂತನ ವಾಹನವನ್ನು ಖರೀದಿಸಬಹುದಾಗಿದೆ.
ಇದನ್ನೂ ಓದಿ; ಮಾರುತಿ ಸುಜುಕಿಯಿಂದ ದೇಶಾದ್ಯಂತ ಉಚಿತ ‘ವಿಂಟರ್ ಕಾರ್ ಚೆಕ್-ಅಪ್’ ಅಭಿಯಾನ ಆರಂಭ
