ಇರಾನ್ ಕ್ಷಿಪಣಿ ನೆಲೆಗಳ ಮೇಲೆ ಅಮೆರಿಕದ ಭೀಕರ ‘ಬಂಕರ್ ಬಸ್ಟರ್’ ಬಾಂಬ್ ದಾಳಿ!

ಟೆಹ್ರಾನ್ | ಜಗತ್ತಿನ ಮಹತ್ವದ ತೈಲ ಸಾರಿಗೆ ಮಾರ್ಗವಾದ ಹೊರ್ಮುಜ್ ಜಲಸಂಧಿಯಲ್ಲಿ ಉದ್ವಿಗ್ನತೆ ಮತ್ತಷ್ಟು ತಾರಕಕ್ಕೇರುವ ಎಲ್ಲ ಲಕ್ಷಣಗಳೂ ಗೋಚರಿಸುತ್ತಿದೆ. ಈ ಪ್ರದೇಶವನ್ನು ತನ್ನ ಹತೋಟಿಗೆ ಪಡೆದುಕೊಂಡಿದ್ದ ಇರಾನ್‌ಗೆ ಪ್ರತ್ಯುತ್ತರ ನೀಡಿರುವ ಅಮೆರಿಕ ಸೇನೆ, ಇಂದು ಹೊರ್ಮುಜ್ ಜಲಸಂಧಿಯ ಸಮೀಪವಿರುವ ಇರಾನ್‌ನ ಪ್ರಬಲ ಕ್ಷಿಪಣಿ ನೆಲೆಗಳ ಮೇಲೆ ಭೀಕರ ಬಾಂಬ್ ದಾಳಿ ನಡೆಸಿದೆ. ಅಮೆರಿಕದ ಶಸ್ತ್ರಾಗಾರದಲ್ಲಿರುವ ಅತ್ಯಂತ ಶಕ್ತಿಶಾಲಿ ಬಾಂಬ್‌ಗಳಲ್ಲಿ ಒಂದಾದ 5,000 ಪೌಂಡ್ (ಸುಮಾರು 2,268 ಕೆಜಿ) ತೂಕದ ‘ಡೀಪ್ ಪೆನೆಟ್ರೇಟರ್’ ಅಥವಾ ‘ಬಂಕರ್ ಬಸ್ಟರ್’ ಬಾಂಬ್‌ಗಳನ್ನು ಈ ದಾಳಿಗೆ ಬಳಸಲಾಗಿದೆ ಎಂದು ಅಮೆರಿಕದ ಸೆಂಟ್ರಲ್ ಕಮಾಂಡ್ (CENTCOM) ಹೇಳಿಕೊಂಡಿದೆ.

ಜಲಸಂಧಿ ಮುಕ್ತಗೊಳಿಸಲು ಕ್ರಮ

ಅಮೆರಿಕ ಮತ್ತು ಇಸ್ರೇಲ್ ವಿರುದ್ಧದ ಯುದ್ಧದ ಹಿನ್ನೆಲೆಯಲ್ಲಿ ಇರಾನ್ ಇತ್ತೀಚೆಗಷ್ಟೇ ಹೊರ್ಮುಜ್ ಜಲಸಂಧಿಯನ್ನು ಬಂದ್ ಮಾಡಿತ್ತು. ವಿಶ್ವದ ಒಟ್ಟು ತೈಲ ಪೂರೈಕೆಯ ಐದನೇ ಒಂದು ಭಾಗ ಈ ಮಾರ್ಗದ ಮೂಲಕವೇ ಸಾಗುವುದರಿಂದ, ಇರಾನ್‌ನ ಈ ನಿರ್ಧಾರವು ಜಾಗತಿಕ ಇಂಧನ ಮಾರುಕಟ್ಟೆಯಲ್ಲಿ ಭಾರೀ ಆತಂಕ ಮೂಡಿಸಿತ್ತು. ಹೊರ್ಮುಜ್ ಕರಾವಳಿಯ ಉದ್ದಕ್ಕೂ ಇರಾನ್ ಅಳವಡಿಸಿದ್ದ ನೌಕೆ ನಿಗ್ರಹ ಕ್ರೂಸ್ ಕ್ಷಿಪಣಿಗಳು ಅಂತಾರಾಷ್ಟ್ರೀಯ ಹಡಗುಗಳ ಸಂಚಾರಕ್ಕೆ ದೊಡ್ಡ ಭೀತಿಯಾಗಿದ್ದವು. ಈ ಅಪಾಯವನ್ನು ಮೆಟ್ಟಿ ನಿಲ್ಲಲು ಮತ್ತು ಜಲಸಂಧಿಯನ್ನು ಪುನಃ ಮುಕ್ತಗೊಳಿಸಲು ಅಮೆರಿಕ ಈಗ ನೇರ ಮಿಲಿಟರಿ ಕಾರ್ಯಾಚರಣೆಗೆ ಇಳಿದಿದೆ.

ಮಿತ್ರರಾಷ್ಟ್ರಗಳ ಅಸಹಕಾರ: ಟ್ರಂಪ್ ಆಕ್ರೋಶ

ಈ ಮಧ್ಯೆ, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ನ್ಯಾಟೋ (NATO) ಸೇರಿದಂತೆ ತನ್ನ ಮಿತ್ರರಾಷ್ಟ್ರಗಳ ವಿರುದ್ಧ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಹೊರ್ಮುಜ್ ಜಲಸಂಧಿಯನ್ನು ಮುಕ್ತಗೊಳಿಸುವ ಕಾರ್ಯದಲ್ಲಿ ಮಿತ್ರರಾಷ್ಟ್ರಗಳು ಸಹಕರಿಸಬೇಕು ಎಂಬ ಟ್ರಂಪ್ ಅವರ ಕರೆಯನ್ನು ಬಹುತೇಕ ರಾಷ್ಟ್ರಗಳು ತಿರಸ್ಕರಿಸಿವೆ. ಇರಾನ್ ವಿರುದ್ಧದ ಈ ಯುದ್ಧವು ಟ್ರಂಪ್ ಅವರ ವೈಯಕ್ತಿಕ ನಿರ್ಧಾರ ಎಂದು ಟೀಕಿಸಲಾಗುತ್ತಿದ್ದು, ಈ ಹಿನ್ನೆಲೆಯಲ್ಲಿ ಯಾವುದೇ ನೆರವು ನೀಡಲು ಮಿತ್ರರಾಷ್ಟ್ರಗಳು ಹಿಂದೇಟು ಹಾಕಿವೆ. ಈ ಬಗ್ಗೆ ಪ್ರತಿಕ್ರಿಯಿಸಿರುವ ಟ್ರಂಪ್, “ನಾವು ನ್ಯಾಟೋಗೆ ಇಷ್ಟೊಂದು ಸಹಾಯ ಮಾಡಿದ್ದೇವೆ, ಆದರೂ ಕನಿಷ್ಠ ಮೈನ್ ಸ್ವೀಪರ್‌ಗಳನ್ನು ಕಳುಹಿಸಿಕೊಡುವ ಸೌಜನ್ಯವನ್ನೂ ಅವರು ತೋರುತ್ತಿಲ್ಲ” ಎಂದು ಕಿಡಿಕಾರಿದ್ದಾರೆ.

ತೀವ್ರ ಸ್ವರೂಪದ ಬಾಂಬ್ ದಾಳಿ

ಈಗ ಹೊರ್ಮುಜ್ ಸಮೀಪದ ದಾಳಿಗೆ ಬಳಕೆಯಾದ ಈ ‘ಬಂಕರ್ ಬಸ್ಟರ್’ ಬಾಂಬ್‌ಗಳು ಭೂಮಿಯ ಆಳದಲ್ಲಿರುವ ಅಥವಾ ಕಾಂಕ್ರೀಟ್‌ನಿಂದ ಭದ್ರಪಡಿಸಿದ ಸುರಕ್ಷಿತ ನೆಲೆಗಳನ್ನು ಕೂಡ ಧ್ವಂಸ ಮಾಡುವ ಸಾಮರ್ಥ್ಯ ಹೊಂದಿವೆ. 2022ರ ವರದಿಗಳ ಪ್ರಕಾರ, ಇಂತಹ ಒಂದೊಂದು ಬಾಂಬ್‌ನ ಬೆಲೆ ಅಂದಾಜು 2,88,000 ಡಾಲರ್‌ಗಳಾಗಿವೆ. ಕಳೆದ ವರ್ಷ ಇರಾನ್‌ನ ಪರಮಾಣು ನೆಲೆಗಳ ಮೇಲೆ ಅಮೆರಿಕ ಪ್ರಯೋಗಿಸಿದ್ದ 30,000 ಪೌಂಡ್‌ನ ಬಾಂಬ್‌ಗಳಿಗೆ ಹೋಲಿಸಿದರೆ ಇವು ಗಾತ್ರದಲ್ಲಿ ಚಿಕ್ಕದಾಗಿದ್ದರೂ, ಕರಾವಳಿ ತೀರದ ಕ್ಷಿಪಣಿ ನೆಲೆಗಳನ್ನು ನಾಶಪಡಿಸಲು ಅತ್ಯಂತ ಪರಿಣಾಮಕಾರಿ ಎಂದು ಹೇಳಲಾಗಿದೆ.

ಇರಾನ್ ವಾದವೇನು?

ಇನ್ನೊಂದೆಡೆ, ತಾನು ಅಣ್ವಸ್ತ್ರಗಳನ್ನು ತಯಾರಿಸುವ ಯಾವುದೇ ಉದ್ದೇಶ ಹೊಂದಿಲ್ಲ ಎಂದು ಇರಾನ್ ಪದೇ ಪದೇ ಸ್ಪಷ್ಟಪಡಿಸುತ್ತಿದೆ. ತನ್ನ ಪರಮಾಣು ಕಾರ್ಯಕ್ರಮವು ಕೇವಲ ವಿದ್ಯುತ್ ಉತ್ಪಾದನೆಯಂತಹ ಶಾಂತಿಯುತ ಉದ್ದೇಶಗಳಿಗಾಗಿ ಮಾತ್ರ ಎಂದು ಅದು ವಾದಿಸುತ್ತಿದೆ. ಆದರೆ, ಇರಾನ್‌ನ ಬೆದರಿಕೆಗಳನ್ನು ಗಂಭೀರವಾಗಿ ಪರಿಗಣಿಸಿರುವ ಟ್ರಂಪ್, ಈ ಸಂಘರ್ಷವನ್ನು ಅಂತ್ಯದವರೆಗೆ ಕೊಂಡೊಯ್ಯುವ ಮುನ್ಸೂಚನೆ ನೀಡಿದ್ದಾರೆ.

ಇದನ್ನೂ ಓದಿ : 5 ನಗರಪಾಲಿಕೆಗಳ ಚೊಚ್ಚಲ ಬಜೆಟ್‌ ಸಿದ್ಧತೆ : ಮಾರ್ಚ್ 30ಕ್ಕೆ ಮಂಡನೆ ಸಾಧ್ಯತೆ..?