ವಾಷಿಂಗ್ಟನ್: ರಷ್ಯಾದೊಂದಿಗೆ ಶಾಂತಿ ಮಾತುಕತೆಯಲ್ಲಿ ತೊಡಗುವಂತೆ ಉಕ್ರೇನ್ ಅಧ್ಯಕ್ಷ ವೊಲೊಡಿಮಿರ್ ಜೆಲೆನ್‌ಸ್ಕಿ ಮೇಲೆ ಒತ್ತಡ ಹೇರಲು ಪ್ರಯತ್ನಿಸುತ್ತಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್(Donald Trump) ಸೋಮವಾರ ಉಕ್ರೇನ್‌ಗೆ ಅಮೆರಿಕ ನೀಡುತ್ತಿದ್ದ ಎಲ್ಲ ನೆರವನ್ನೂ ಸ್ಥಗಿತಗೊಳಿಸಿ ಆದೇಶ ಹೊರಡಿಸಿದ್ದಾರೆ. ಶ್ವೇತಭವನದಲ್ಲಿ ಟ್ರಂಪ್ ಮತ್ತು ಜೆಲೆನ್‌ಸ್ಕಿ ನಡುವೆ ವಾಗ್ವಾದ ನಡೆದ ಬೆನ್ನಲ್ಲೇ ಈ ಬೆಳವಣಿಗೆ ನಡೆದಿದೆ.
ಉಕ್ರೇನ್ ಹಾಗೂ ರಷ್ಯಾ ನಡುವೆ ನಡೆಯುತ್ತಿರುವ ಮೂರು ವರ್ಷಗಳ ಯುದ್ಧವನ್ನು ಕೊನೆಗಾಣಿಸುವ ನಿಟ್ಟಿನಲ್ಲಿ ಶಾಂತಿ ಒಪ್ಪಂದ ಕೈಗೊಳ್ಳುವುದು ಟ್ರಂಪ್ ಅವರ ಉದ್ದೇಶವಾಗಿತ್ತು. ಅಲ್ಲದೇ, ಈ ಗುರಿಗೆ ಜೆಲೆನ್‌ಸ್ಕಿ ಬದ್ಧವಾಗಿರಬೇಕೆಂದೂ ಅವರು ಬಯಸಿದ್ದರು. ಈ ಹಿನ್ನೆಲೆಯಲ್ಲಿ ಅಮೆರಿಕವು ಉಕ್ರೇನ್ ಗೆ ನೀಡುತ್ತಿದ್ದ ಎಲ್ಲ ನೆರವನ್ನೂ ಸ್ಥಗಿತಗೊಳಿಸಲು ನಿರ್ಧರಿಸಿದೆ ಎಂದು ಶ್ವೇತಭವನದ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಟ್ರಂಪ್ ಅವರ ಈ ನಿರ್ಧಾರವು ಉಕ್ರೇನ್‌ಗೆ ನೀಡಲಾಗುತ್ತಿದ್ದ ಎಲ್ಲ ಸೇನಾ ಶಸ್ತ್ರಾಸ್ತ್ರಗಳು ಹಾಗೂ ಉಪಕರಣಗಳಿಗೆ ಅನ್ವಯವಾಗುತ್ತದೆ. ಅದರಂತೆ, ಇನ್ನು ಮುಂದೆ ಅಮೆರಿಕದಿಂದ ಉಕ್ರೇನ್‌ಗೆ ಟ್ಯಾಂಕ್ ನಿಗ್ರಹ ಶಸ್ತ್ರಾಸ್ತ್ರಗಳು, ಸಾವಿರಾರು ಫಿರಂಗಿ ರೌಂಡ್ ಗಳು, ರಾಕೆಟ್‌ಗಳಂತಹ ನಿರ್ಣಾಯಕ ಶಸ್ತ್ರಾಸ್ತ್ರಗಳ ರವಾನೆ ಸ್ಥಗಿತಗೊಳ್ಳಲಿದೆ. ಈ ಘೋಷಣೆಯು ಕಳೆದ ವಾರ ಶ್ವೇತಭವನದಲ್ಲಿ ಜೆಲೆನ್‌ಸ್ಕಿ ಅವರ ದುರ್ವರ್ತನೆಗೆ ನೀಡಿರುವ ನೇರ ಪ್ರತಿಕ್ರಿಯೆ ಎಂದು ಶ್ವೇತಭವನದ ಮತ್ತೊಬ್ಬ ಅಧಿಕಾರಿ ಹೇಳಿದ್ದಾರೆ. ಯುದ್ಧ ಕೊನೆಗಾಣಿಸುವ ನಿಟ್ಟಿನಲ್ಲಿ ಸಂಧಾನಕ್ಕೆ ಜೆಲೆನ್‌ಸ್ಕಿ ಮುಂದಾದರೆ ಈ ನಿರ್ಧಾರವನ್ನು ವಾಪಸ್ ಪಡೆಯಲಾಗುವುದು ಎಂದೂ ತಿಳಿಸಿದ್ದಾರೆ.
ಕಳೆದ ವಾರ ಜೆಲೆನ್‌ಸ್ಕಿ ಅವರ ಅಮೆರಿಕ ಭೇಟಿಯ ಸಮಯದಲ್ಲಿ ಟ್ರಂಪ್ ಆಡಳಿತ ಮತ್ತು ಉಕ್ರೇನ್ ಅಧಿಕಾರಿಗಳು ಕೆಲವೊಂದು ಒಪ್ಪಂದಗಳಿಗೆ ಸಹಿ ಹಾಕುವ ನಿರೀಕ್ಷೆಯಿತ್ತು. ಅಮೆರಿಕವು ನೀಡಿದ ನೆರವಿಗೆ ಪ್ರತಿಯಾಗಿ ಉಕ್ರೇನ್ ತನ್ನ ಖನಿಜ ಸಂಪತ್ತಿನ ಕೆಲವು ಭಾಗವನ್ನು ಅಮೆರಿಕಕ್ಕೆ ನೀಡುವ ಒಪ್ಪಂದವೂ ಅದರಲ್ಲಿ ಸೇರಿತ್ತು.
ಇದನ್ನೂ ಓದಿ: ಗಾಜಾ ಪಟ್ಟಿ ಶೀಘ್ರವೇ ಅಮೆರಿಕ ತೆಕ್ಕೆಗೆ: ಟ್ರಂಪ್ ಘೋಷಣೆ
ಆದರೆ, ಉಭಯ ನಾಯಕರ ಮಾತುಕತೆಯು ಹಳಿ ತಪ್ಪಿದ ನಂತರ, ಶ್ವೇತಭವನದ ಅಧಿಕಾರಿಗಳು ಜೆಲೆನ್‌ಸ್ಕಿ ಮತ್ತು ಉಕ್ರೇನ್ ನಿಯೋಗವನ್ನು ಹೊರಹೋಗುವಂತೆ ಸೂಚಿಸಿದ ಕಾರಣ ಈ ಒಪ್ಪಂದ ಸಾಧ್ಯವಾಗಿರಲಿಲ್ಲ.
ನೆರವಿನ ಶಾಶ್ವತ ಅಂತ್ಯವಲ್ಲ
ಉಕ್ರೇನ್‌ಗೆ ಅಮೆರಿಕದ ನೆರವು ಸ್ಥಗಿತ ತಾತ್ಕಾಲಿಕ ನಿರ್ಧಾರವಾಗಿದೆಯೇ ಹೊರತು ಶಾಶ್ವತವಲ್ಲ ಎಂದು ಶ್ವೇತಭವನದ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಜೆಲೆನ್‌ಸ್ಕಿ ಅವರು ಶಾಂತಿ ಮಾತುಕತೆಗೆ ಒಪ್ಪಿ ಮುಂದೆ ಬರುವವರೆಗೂ ಇದು ಚಾಲ್ತಿಯಲ್ಲಿರಲಿದೆ ಎಂದು ಹೇಳಲಾಗಿದೆ.
ರಷ್ಯಾದ ನಿರ್ಬಂಧ ಸಡಿಲಿಕೆ? ಒಂದು ಕಡೆ ಉಕ್ರೇನ್‌ಗೆ ನೆರವು ಸ್ಥಗಿತಗೊಳಿಸಿದರೆ, ಇನ್ನೊಂದೆಡೆ ರಷ್ಯಾದೊಂದಿಗೆ ಸಂಬಂಧ ಪುನಃಸ್ಥಾಪಿಸಲು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮುಂದಾಗಿದ್ದಾರೆ. ಶಾಂತಿ ಮಾತುಕತೆಗೆ ಹೆಜ್ಜೆಯಿಟ್ಟರೆ ಮಾಸ್ಕೋ ಮೇಲೆ ಹೇರಿರುವ ನಿರ್ಬಂಧಗಳನ್ನು ಸಡಿಲಿಸಲೂ ಅವರು ನಿರ್ಧರಿಸಿದ್ದಾರೆ ಎಂದು ಮೂಲಗಳನ್ನು ಉಲ್ಲೇಖಿಸಿ ರಾಯಿಟರ್ಸ್ ವರದಿ ಮಾಡಿದೆ.
ಅಮೆರಿಕ ಮತ್ತು ರಷ್ಯಾ ನಡುವೆ ರಾಜತಾಂತ್ರಿಕ ಮತ್ತು ಆರ್ಥಿಕ ಸಂಬಂಧಗಳನ್ನು ಸುಧಾರಿಸುವ ಬಗ್ಗೆ ಮಾತುಕತೆ ನಡೆಸಲು ಟ್ರಂಪ್ ನಿರ್ಧರಿಸಿದ್ದಾರೆ. ಮುಂಬರುವ ದಿನಗಳಲ್ಲಿ ರಷ್ಯಾದ ಪ್ರತಿನಿಧಿಗಳೊಂದಿಗೆ ಅಮೆರಿಕ ಚರ್ಚಿಸಲಿದ್ದು, ಅದಕ್ಕೂ ಮುನ್ನವೇ ಸಡಿಲಿಸಬಹುದಾದ ನಿರ್ಬಂಧಗಳ ಪಟ್ಟಿಯನ್ನು ಸಿದ್ಧಪಡಿಸುವಂತೆ ಶ್ವೇತಭವನವು ವಿದೇಶಾಂಗ ಮತ್ತು ಖಜಾನೆ ಇಲಾಖೆಗಳಿಗೆ ಸೂಚಿಸಿದೆ ಎಂದು ಮೂಲಗಳು ತಿಳಿಸಿವೆ.
