ನವದೆಹಲಿ: ಸರಿಯಾಗಿ ಎರಡು ವರ್ಷಗಳ ಹಿಂದೆ, ಇದೇ ದಿನ (ನವೆಂಬರ್ 19, 2023), ಕೋಟ್ಯಂತರ ಭಾರತೀಯರ ವಿಶ್ವಕಪ್ ಗೆಲ್ಲುವ ಕನಸನ್ನು ಒಬ್ಬಂಟಿಯಾಗಿ ಭಗ್ನಗೊಳಿಸಿದ್ದ ಆಸ್ಟ್ರೇಲಿಯಾದ ಆರಂಭಿಕ ಆಟಗಾರ ಟ್ರಾವಿಸ್ ಹೆಡ್, ಇದೀಗ ಮತ್ತೊಮ್ಮೆ ಭಾರತೀಯ ಕ್ರಿಕೆಟ್ ಅಭಿಮಾನಿಗಳ ಹಳೆ ಗಾಯವನ್ನು ಕೆರೆದಿದ್ದಾರೆ. 2023ರ ವಿಶ್ವಕಪ್ ಫೈನಲ್ನ ಎರಡನೇ ವಾರ್ಷಿಕೋತ್ಸವದಂದು, ತಮ್ಮ ಇನ್ಸ್ಟಾಗ್ರಾಮ್ನಲ್ಲಿ ವ್ಯಂಗ್ಯಭರಿತ ಪೋಸ್ಟ್ ಹಾಕುವ ಮೂಲಕ, ಅಂದಿನ ಹೀನಾಯ ಸೋಲಿನ ನೋವನ್ನು ಮತ್ತೆ ನೆನಪಿಸಿದ್ದಾರೆ.
ಏನಿದು ಹೆಡ್ನ ವ್ಯಂಗ್ಯದ ಪೋಸ್ಟ್?
2023ರ ವಿಶ್ವಕಪ್ ಫೈನಲ್ನಲ್ಲಿ ‘ಪಂದ್ಯಶ್ರೇಷ್ಠ’ ಪ್ರಶಸ್ತಿ ಪಡೆದಿದ್ದ ಟ್ರಾವಿಸ್ ಹೆಡ್, ಆಸ್ಟ್ರೇಲಿಯಾ ತಂಡ ಟ್ರೋಫಿ ಎತ್ತಿ ಸಂಭ್ರಮಿಸುತ್ತಿರುವ ಫೋಟೋವನ್ನು ತಮ್ಮ ಇನ್ಸ್ಟಾಗ್ರಾಮ್ ಸ್ಟೋರಿಯಲ್ಲಿ ಹಂಚಿಕೊಂಡು, ಅದಕ್ಕೆ “ಜನ್ಮದಿನದ ಶುಭಾಶಯಗಳು” (Happy Birthday) ಎಂದು ಬರೆದುಕೊಂಡಿದ್ದಾರೆ. “ಆ ದಿನ ಒಬ್ಬ ಹೊಸ ಟ್ರಾವಿಸ್ ಹೆಡ್ ಹುಟ್ಟಿದ” ಎಂಬರ್ಥದಲ್ಲಿ ಅವರು ಈ ಪೋಸ್ಟ್ ಹಾಕಿದ್ದರೂ, ಇದು 140 ಕೋಟಿ ಭಾರತೀಯರ ಕನಸನ್ನು ಕೊಂದ ದಿನದ ಸಂಭ್ರಮಾಚರಣೆಯಂತಿತ್ತು. ಇದು ಭಾರತೀಯ ಅಭಿಮಾನಿಗಳ ಸ್ವಾಭಿಮಾನಕ್ಕೆ ನೀಡಿದ ಕ್ರೂರ ಪೆಟ್ಟಿನಂತಿತ್ತು ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಆಕ್ರೋಶ ವ್ಯಕ್ತವಾಗಿದೆ.
ಮರೆಯಲಾಗದ ಆ ಕರಾಳ ದಿನ
2023ರ ವಿಶ್ವಕಪ್ನಲ್ಲಿ ಟೀಮ್ ಇಂಡಿಯಾ ಅಕ್ಷರಶಃ ಅಜೇಯವಾಗಿತ್ತು. ಸತತ 10 ಪಂದ್ಯಗಳನ್ನು ಗೆದ್ದು, ಫೈನಲ್ಗೆ ಲಗ್ಗೆ ಇಟ್ಟಿತ್ತು. ಅಹಮದಾಬಾದ್ನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ನಡೆದ ಫೈನಲ್ನಲ್ಲಿ, ನಾಯಕ ರೋಹಿತ್ ಶರ್ಮಾ ಸ್ಪೋಟಕ ಆರಂಭ ನೀಡಿದ್ದರು. ಆದರೆ, ಮಿಂಚಿನ ವೇಗದಲ್ಲಿ ಓಡಿಬಂದು, ರೋಹಿತ್ ಅವರ ಅದ್ಭುತ ಕ್ಯಾಚ್ ಹಿಡಿದಿದ್ದ ಹೆಡ್, ಪಂದ್ಯದ ಗತಿಯನ್ನೇ ಬದಲಿಸಿದ್ದರು.
ಬಳಿಕ, ಬ್ಯಾಟಿಂಗ್ನಲ್ಲೂ ಅಬ್ಬರಿಸಿದ ಅವರು, 120 ಎಸೆತಗಳಲ್ಲಿ 137 ರನ್ಗಳನ್ನು ಸಿಡಿಸಿ, ಭಾರತದ ಕೈಯಲ್ಲಿದ್ದ ಪಂದ್ಯವನ್ನು ಏಕಾಂಗಿಯಾಗಿ ಕಸಿದುಕೊಂಡಿದ್ದರು. ಅಂದು, ಆಸ್ಟ್ರೇಲಿಯಾ ತಮ್ಮ 6ನೇ ವಿಶ್ವಕಪ್ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಂಡರೆ, ಇಡೀ ಭಾರತ ಕಣ್ಣೀರಲ್ಲಿ ಕೈತೊಳೆಯಿತು. ರೋಹಿತ್ ಶರ್ಮಾ, ವಿರಾಟ್ ಕೊಹ್ಲಿ ಸೇರಿದಂತೆ ಇಡೀ ತಂಡ ಮೈದಾನದಲ್ಲೇ ಕಣ್ಣೀರಿಟ್ಟ ದೃಶ್ಯ ಇಂದಿಗೂ ಮಾಸಿಲ್ಲ.
ಪ್ರತೀಕಾರಕ್ಕಾಗಿ ಕಾಯುತ್ತಿರುವ ರೋಹಿತ್-ಕೊಹ್ಲಿ
ವಿಶೇಷವೆಂದರೆ, 2023ರ ವಿಶ್ವಕಪ್ ಸೋಲಿನ ಪ್ರತೀಕಾರ ತೀರಿಸಿಕೊಳ್ಳುವ ಸಲುವಾಗಿಯೇ ರೋಹಿತ್ ಶರ್ಮಾ ಮತ್ತು ವಿರಾಟ್ ಕೊಹ್ಲಿ, ಟೆಸ್ಟ್ ಮತ್ತು T20 ಮಾದರಿಗಳಿಗೆ ನಿವೃತ್ತಿ ಘೋಷಿಸಿದರೂ, ಏಕದಿನ ಮಾದರಿಯಲ್ಲಿ ಮುಂದುವರೆದಿದ್ದಾರೆ ಎನ್ನಲಾಗಿದೆ. 2027ರ ವಿಶ್ವಕಪ್ ಗೆಲ್ಲುವ ಮೂಲಕ, ಅಂದಿನ ಸೋಲಿಗೆ ಸೇಡು ತೀರಿಸಿಕೊಳ್ಳುವುದು ಈ ಇಬ್ಬರು ದಿಗ್ಗಜರ ಗುರಿಯಾಗಿದೆ. ಹೆಡ್ ಅವರ ಈ ಪೋಸ್ಟ್, ಅವರಲ್ಲಿನ ಸೇಡಿನ ಕಿಚ್ಚನ್ನು ಮತ್ತಷ್ಟು ಹೆಚ್ಚಿಸಿರುವುದರಲ್ಲಿ ಸಂಶಯವಿಲ್ಲ.
ಇದನ್ನೂ ಓದಿ: ಶಮಿ ಯುಗ ಮತ್ತೆ ಆರಂಭ? T20 ವಿಶ್ವಕಪ್ಗೆ ‘ಬಂಗಾಳದ ಸುಲ್ತಾನ’ನ ಕಮ್ಬ್ಯಾಕ್!
