ಜೈಪುರ : ಅದು ಮದುವೆ ಮನೆ. ಎಲ್ಲರೂ ಮದುವೆಯ ಸಂಭ್ರಮದಲ್ಲಿದ್ದರು. ವಧೂ-ವರರು ಫೋಟೋಶೂಟ್ನಲ್ಲಿ ಬ್ಯುಸಿಯಾಗಿದ್ದರು. ಇದೇ ಸಮಯವನ್ನು ನೋಡಿಕೊಂಡ ಸಮಯಸಾಧಕ ಕಳ್ಳನೊಬ್ಬ, ಅತಿಥಿಯ ಸೋಗಿನಲ್ಲಿ ಬಂದು ವಧುವಿನ ಬ್ಯಾಗ್ ಎಗರಿಸಿರುವ ಘಟನೆ ರಾಜಸ್ಥಾನದ ಜೈಪುರದಲ್ಲಿ ನಡೆದಿದೆ. ಈ ದೃಶ್ಯ ಮದುವೆಯ ವಿಡಿಯೋದಲ್ಲಿ ಸೆರೆಯಾಗಿದ್ದು, ಬ್ಯಾಗ್ನಲ್ಲಿದ್ದ ಸುಮಾರು 4 ಲಕ್ಷ ರೂ. ಮೌಲ್ಯದ ಚಿನ್ನಾಭರಣ ಹಾಗೂ ನಗದು ಕಳ್ಳನ ಪಾಲಾಗಿದೆ.
ಜೈಪುರದ ಜಗತ್ಪುರ ಪ್ರದೇಶದ ಚಂದನ್ ಒನ್ ಮ್ಯಾರೇಜ್ ಗಾರ್ಡನ್ನಲ್ಲಿ ಫೆ.7ರಂದು ನವೀನ್ ಕರೋಲ್ ಎಂಬವರ ವಿವಾಹ ಸಮಾರಂಭ ನಡೆಯುತ್ತಿತ್ತು. ರಾತ್ರಿ ಸುಮಾರು 10:15ರ ಸುಮಾರಿಗೆ ವಧು ಮತ್ತು ವರ ವೇದಿಕೆಯ ಮೇಲೆ ಫೋಟೋಶೂಟ್ಗೆ ಪೋಸ್ ನೀಡುತ್ತಿದ್ದರು. ಆಗ ವೇದಿಕೆಯ ಬಳಿ ಟಿಪ್ಟಾಪ್ ಆಗಿ ಡ್ರೆಸ್ ಮಾಡಿಕೊಂಡು ಅತಿಥಿಯಂತೆ ಬಂದ ವ್ಯಕ್ತಿಯೊಬ್ಬ, ಯಾರಿಗೂ ಅನುಮಾನ ಬಾರದಂತೆ ವರ್ತಿಸಿದ್ದಾನೆ.
ಕ್ಯಾಮೆರಾದಲ್ಲಿ ಸೆರೆಯಾದ ಕೃತ್ಯ
ವೇದಿಕೆಯಲ್ಲಿದ್ದ ವಧುವಿನ ಬ್ಯಾಗ್ ಅನ್ನು ಕ್ಷಣಾರ್ಧದಲ್ಲಿ ಎತ್ತಿಕೊಂಡ ಕಳ್ಳ, ಅದನ್ನು ತನ್ನ ಬ್ಲೇಜರ್ ಒಳಗೆ ಬಚ್ಚಿಟ್ಟುಕೊಂಡು ಅಲ್ಲಿಂದ ಕಾಲ್ಕಿತ್ತಿದ್ದಾನೆ. ಮದುವೆಯ ಗದ್ದಲ ಮತ್ತು ಫೋಟೋಶೂಟ್ನಲ್ಲಿ ಮಗ್ನರಾಗಿದ್ದರಿಂದ ಯಾರಿಗೂ ಈ ಕೃತ್ಯದ ಅರಿವಾಗಲಿಲ್ಲ. ಫೋಟೋಶೂಟ್ ಮುಗಿದ ಬಳಿಕ ಬ್ಯಾಗ್ ಕಾಣೆಯಾಗಿರುವುದು ವಧುವಿನ ಗಮನಕ್ಕೆ ಬಂದಿದೆ.
ವಿಡಿಯೋ ಸಾಕ್ಷ್ಯದ ಆಧಾರದ ಮೇಲೆ ದೂರು
ತಕ್ಷಣವೇ ಮದುವೆ ಮಂಟಪದಲ್ಲಿ ಹುಡುಕಾಟ ನಡೆಸಿದರೂ ಬ್ಯಾಗ್ ಪತ್ತೆಯಾಗಲಿಲ್ಲ. ನಂತರ ಮದುವೆಯ ವಿಡಿಯೋವನ್ನು ಪರಿಶೀಲಿಸಿದಾಗ, ವ್ಯಕ್ತಿಯೊಬ್ಬ ಬ್ಯಾಗ್ ಕದಿಯುತ್ತಿರುವ ದೃಶ್ಯ ಸ್ಪಷ್ಟವಾಗಿ ಕಂಡುಬಂದಿದೆ. ವರನ ಸಹೋದರ ನಿತಿನ್ ಕರೋಲ್ ನೀಡಿದ ದೂರಿನ ಮೇರೆಗೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ವಿಡಿಯೋ ಸಾಕ್ಷ್ಯದ ಆಧಾರದ ಮೇಲೆ ಆರೋಪಿಯನ್ನು ಗುರುತಿಸಲಾಗಿದ್ದು, ಬಂಧನಕ್ಕಾಗಿ ಬಲೆ ಬೀಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಇದನ್ನೂ ಓದಿ : ಗದಗದ ಐತಿಹಾಸಿಕ ಶ್ರೀ ತ್ರಿಕೂಟೇಶ್ವರ ದೇವಸ್ಥಾನಲ್ಲಿ ಮಹಾಶಿವರಾತ್ರಿ ಸಂಭ್ರಮ | ಶಿವನ ದರ್ಶನ ಪಡೆದು ಪುನೀತರಾದ ಭಕ್ತರು!
