ಜಪಾನ್‌ಗೆ ಜುಲೈನಲ್ಲೇ ಅಪ್ಪಳಿಸಿತು ಸುನಾಮಿ: ನಿಜವಾಯಿತೇ “ಜಪಾನ್‌ನ ಬಾಬಾ ವಂಗಾ” ಭವಿಷ್ಯವಾಣಿ?

ಟೋಕಿಯೋ: ಜಪಾನ್‌ನಲ್ಲಿ ಜುಲೈ ತಿಂಗಳಲ್ಲೇ ಸುನಾಮಿ ಅಪ್ಪಳಿಸಿದ್ದು, “ಜಪಾನ್‌ನ ಬಾಬಾ ವಂಗಾ” ಎಂದು ಗುರುತಿಸಿಕೊಂಡಿರುವ ಮಂಗಾ ಕಲಾವಿದೆಯ ಭವಿಷ್ಯವಾಣಿ ನಿಜವಾಯಿತೇ ಎಂಬ ಪ್ರಶ್ನೆ ಮೂಡಿದೆ.

ರೈಯೋ ಟಟ್ಸುಕಿ ಎಂಬ ಕಲಾವಿದೆಯು ತಮ್ಮ 2021ರ ಮಂಗಾ ಪುಸ್ತಕ “ದಿ ಫ್ಯೂಚರ್ ಐ ಸಾ” (The Future I Saw) ನಲ್ಲಿ ಜುಲೈ 5, 2025 ರಂದು ದೊಡ್ಡ ದುರಂತವೊಂದು ಸಂಭವಿಸುತ್ತದೆ ಎಂದು ಭವಿಷ್ಯ ನುಡಿದಿದ್ದರು. ಜುಲೈ 24 ರಂದು ನೈಋತ್ಯ ಜಪಾನ್‌ನ ಟೋಕಾರಾ ದ್ವೀಪಗಳ ಬಳಿ ಸಂಭವಿಸಿದ 5.5 ತೀವ್ರತೆಯ ಭೂಕಂಪ ಸಂಭವಿಸಿ, ಜನರನ್ನು ಬೆಚ್ಚಿಬೀಳಿಸಿತ್ತು. ಈಗ ರಷ್ಯಾ ಮತ್ತು ಜಪಾನ್ ನಲ್ಲಿ ಜುಲೈ ತಿಂಗಳು ಮುಗಿಯುವುದರೊಳಗೆ ಸುನಾಮಿ ಅಪ್ಪಳಿಸುವ ಮೂಲಕ ಮಂಗಾ ಕಲಾವಿದೆಯ ಭವಿಷ್ಯವಾಣಿ ನಿಜವಾಗಿದೆ ಎಂದು ಅನೇಕರು ಸಾಮಾಜಿಕ ಜಾಲತಾಣಗಳಲ್ಲಿ ಅಭಿಪ್ರಾಯ ವ್ಯಕ್ತಪಡಿಸಲಾರಂಭಿಸಿದ್ದಾರೆ.

ಭವಿಷ್ಯವಾಣಿ ಮತ್ತು ಭಯದ ಅಲೆ

ರೈಯೋ ಟಟ್ಸುಕಿ ಈ ಹಿಂದೆ ಹಲವು ಬಾರಿ ನಿಖರವಾದ ಭವಿಷ್ಯವಾಣಿಗಳನ್ನು ನುಡಿದು ಹೆಸರುವಾಸಿಯಾಗಿದ್ದಾರೆ. 2011ರ ಟೋಹೊಕು ಭೂಕಂಪ ಮತ್ತು ಸುನಾಮಿ, ಹಾಗೂ ಇನ್ನಿತರ ಕೆಲವು ಘಟನೆಗಳನ್ನು ಅವರು ಮೊದಲೇ ಊಹಿಸಿದ್ದರು ಎಂದು ಹೇಳಲಾಗುತ್ತದೆ. ಇದೇ ಕಾರಣದಿಂದ, ಅವರ ಇತ್ತೀಚಿನ ಜುಲೈ 5ರ ಭವಿಷ್ಯವು ಜಪಾನ್‌ನಲ್ಲಿ ಮಾತ್ರವಲ್ಲದೆ, ಅಂತರರಾಷ್ಟ್ರೀಯ ಮಟ್ಟದಲ್ಲೂ ಗಮನ ಸೆಳೆದಿತ್ತು.

ಈ ಭವಿಷ್ಯವಾಣಿಯು, ಜಪಾನ್‌ನ ಪ್ರವಾಸೋದ್ಯಮ ಕ್ಷೇತ್ರದ ಮೇಲೆ ಗಮನಾರ್ಹ ಪರಿಣಾಮ ಬೀರಿತ್ತು. ಹಲವು ವಿದೇಶಿ ಪ್ರವಾಸಿಗರು ತಮ್ಮ ಪ್ರವಾಸವನ್ನು ರದ್ದುಗೊಳಿಸಿದ್ದರು ಎಂದು ವರದಿಗಳು ಹೇಳಿವೆ. ಸಾಮಾಜಿಕ ಜಾಲತಾಣಗಳಲ್ಲಿ ಈ ಕುರಿತು ವ್ಯಾಪಕ ಚರ್ಚೆಗಳು ನಡೆದಿದ್ದವು.

ಅಧಿಕಾರಿಗಳ ಮನವಿ: “ಶಾಂತವಾಗಿರಿ, ಸಿದ್ಧರಾಗಿರಿ!”

ಆತಂಕದ ವಾತಾವರಣದ ನಡುವೆಯೂ, ಜಪಾನ್‌ನ ಅಧಿಕಾರಿಗಳು ಮತ್ತು ಮಿಯಾಗಿ ಗವರ್ನರ್ ಯೋಶಿಹಿರೋ ಮುರೈ ಅವರು ಸಾರ್ವಜನಿಕರನ್ನು ಶಾಂತವಾಗಿರುವಂತೆ ಒತ್ತಾಯಿಸಿದ್ದರು. ಯಾವುದೇ ವೈಜ್ಞಾನಿಕ ಸಂಸ್ಥೆಯು ಮಂಗಾ ಆಧಾರಿತ ಭವಿಷ್ಯವಾಣಿಗಳನ್ನು ಬೆಂಬಲಿಸುವುದಿಲ್ಲ ಎಂದು ಅವರು ಸ್ಪಷ್ಟಪಡಿಸಿದ್ದರು. ವೈಜ್ಞಾನಿಕ ಮಾಹಿತಿ ಮತ್ತು ಸಿದ್ಧತೆಗಳ ಮೇಲೆ ಮಾತ್ರವೇ ಗಮನ ಕೇಂದ್ರೀಕರಿಸಿ ಎಂದು ಮನವಿ ಮಾಡಿದ್ದರು.

ಭೂಕಂಪಗಳಿಗೆ ಹೆಚ್ಚು ಒಳಗಾಗುವ ದೇಶವಾಗಿರುವ ಜಪಾನ್, ಭೂಕಂಪ ಸಿದ್ಧತೆಗಳಿಗೆ ಹೆಚ್ಚಿನ ಒತ್ತು ನೀಡುತ್ತದೆ. ಸುಧಾರಿತ ಮುನ್ಸೂಚನಾ ವ್ಯವಸ್ಥೆಗಳು, ಬಲವಾದ ಕಟ್ಟಡ ನಿರ್ಮಾಣ ನೀತಿಗಳು ಮತ್ತು ಸಾರ್ವಜನಿಕ ಶಿಕ್ಷಣದ ಮೂಲಕ ಭೂಕಂಪಗಳ ಪರಿಣಾಮಗಳನ್ನು ತಗ್ಗಿಸಲು ನಿರಂತರವಾಗಿ ಪ್ರಯತ್ನಿಸುತ್ತಿದೆ. ಹೀಗಾಗಿ ಯಾರೂ ಭಯಭೀತರಾಗಬೇಕಿಲ್ಲ ಎಂದಿದ್ದರು.

ಭವಿಷ್ಯವಾಣಿಗಳು ಮತ್ತು ನೈಸರ್ಗಿಕ ವಿಕೋಪಗಳ ನಡುವಿನ ಈ ಕೊಂಡಿಯು ಜನರ ಮನಸ್ಸಿನಲ್ಲಿ ಭಯವನ್ನು ಹುಟ್ಟುಹಾಕಿದ್ದರೂ, ಅಧಿಕಾರಿಗಳು ಸನ್ನದ್ಧತೆ ಮತ್ತು ಶಾಂತತೆಯನ್ನು ಕಾಪಾಡಿಕೊಳ್ಳುವಂತೆ ಕರೆ ನೀಡಿದ್ದರು. ಸಿದ್ಧತೆಯೇ ಮುಖ್ಯ ಹೊರತು, ಭಯವಲ್ಲ ಎಂಬುದನ್ನು ಅವರು ಪುನರುಚ್ಚರಿಸಿದ್ದರು. ಇದೆಲ್ಲದರ ನಡುವೆಯೇ, ಜುಲೈ ಮುಗಿಯುವುದರೊಳಗಾಗಿ ಜಪಾನ್ ಗೆ ಸುನಾಮಿ ಅಪ್ಪಳಿಸಿದ್ದು, ಯುವ ಬಾಬಾ ವಂಗಾ ಭವಿಷ್ಯವಾಣಿ ಮತ್ತೊಮ್ಮೆ ಚರ್ಚೆಗೆ ಗ್ರಾಸವಾಗಿದೆ.