ಉದಯಪುರ : ರಾಜಸ್ಥಾನದ ಉದಯಪುರದಲ್ಲಿ ವೈವಾಹಿಕ ಜೀವನಕ್ಕೆ ಕಾಲಿಟ್ಟ ದಕ್ಷಿಣ ಭಾರತದ ಚಿತ್ರರಂಗದ ಮೋಸ್ಟ್ ಫೇವರಿಟ್ ಜೋಡಿ ವಿಜಯ್ ದೇವರಕೊಂಡ ಮತ್ತು ರಶ್ಮಿಕಾ ಮಂದಣ್ಣ ಅವರ ಅದ್ಧೂರಿ ಮದುವೆಯ ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿವೆ. ನವಜೋಡಿಯು ತೊಟ್ಟಿದ್ದ ಕೆಜಿಗಟ್ಟಲೆ ತೂಕದ ಚಿನ್ನದ ಆಭರಣಗಳ ಬಗ್ಗೆ ಎಲ್ಲೆಡೆ ಚರ್ಚೆಯೂ ಆಗುತ್ತಿದೆ. ಇಂದು ಮಾರುಕಟ್ಟೆಯಲ್ಲಿ ಮಿನಿಮಲಿಸಂ ಅಥವಾ ಸರಳತೆಯ ಟ್ರೆಂಡ್ ನಡೆಯುತ್ತಿದ್ದರೂ, ಈ ಜೋಡಿ ಮಾತ್ರ ಸಾಂಪ್ರದಾಯಿಕ ‘ಮ್ಯಾಕ್ಸಿಮಲಿಸಂ’ ಶೈಲಿಗೆ ಮರುಜೀವ ನೀಡಿದ್ದಾರೆ.
10 ತಿಂಗಳ ಕಲಾತ್ಮಕ ಶ್ರಮದ ಫಲ
ನವದಂಪತಿ ತೊಟ್ಟಿದ್ದ ಅದ್ಭುತ ಆಭರಣಗಳನ್ನು ವಿನ್ಯಾಸಗೊಳಿಸಿದ್ದು ಹೈದರಾಬಾದ್ ಮೂಲದ ‘ಶ್ರೀ ಜ್ಯುವೆಲರ್ಸ್’ (SHREE Jewellers). ಇದರ ಹಿಂದೆ ಬರೋಬ್ಬರಿ 10 ತಿಂಗಳ ಕಠಿಣ ಪರಿಶ್ರಮವಿದೆ. ಆಭರಣದ ಕಲ್ಪನೆ, ವಿನ್ಯಾಸ, ಕರಕುಶಲತೆ ಮತ್ತು ಹಲವು ಹಂತದ ಪರೀಕ್ಷೆಗಳ ಬಳಿಕ ಈ ಅಪರೂಪದ ಕಲೆ ಸಿದ್ಧಗೊಂಡಿದೆ. “ರಶ್ಮಿಕಾ ಮತ್ತು ವಿಜಯ್ ಅವರ ಕಲೆಗೆ ನಾವು ಯಾವಾಗಲೂ ಅಭಿಮಾನಿಗಳು, ಆದರೆ ಅವರ ಜೀವನದ ಈ ವಿಶೇಷ ಕ್ಷಣದ ಭಾಗವಾಗಿದ್ದು ನಮಗೆ ನಿಜಕ್ಕೂ ಮರೆಯಲಾಗದ ಅನುಭವ,” ಎಂದು ಜ್ಯುವೆಲರ್ಸ್ನ ವ್ಯವಸ್ಥಾಪಕ ನಿರ್ದೇಶಕರಾದ ಅಭಿಷೇಕ್ ಅಗರ್ವಾಲ್ ಮತ್ತು ಕೌಶಿಕ್ ಕುಮಾರ್ ಹರ್ಷ ವ್ಯಕ್ತಪಡಿಸಿದ್ದಾರೆ.
ದೇವತೆಯಂತೆ ಕಂಗೊಳಿಸಿದ ‘ನ್ಯಾಷನಲ್ ಕ್ರಷ್’ ರಶ್ಮಿಕಾ
ದಕ್ಷಿಣ ಭಾರತದ ಶಿಲ್ಪಕಲೆ ಮತ್ತು ವಾಸ್ತುಶಿಲ್ಪದಿಂದ ಸ್ಫೂರ್ತಿ ಪಡೆದು ರಶ್ಮಿಕಾ ಅವರ ಆಭರಣಗಳನ್ನು ತಯಾರಿಸಲಾಗಿತ್ತು. ಒಟ್ಟು 11 ಬಗೆಯ ಆಭರಣಗಳನ್ನು ರಶ್ಮಿಕಾ ತೊಟ್ಟಿದ್ದರು. ಇದರಲ್ಲಿ ಪ್ರಮುಖವಾಗಿ ಚೋಕರ್, ಸಾಂಪ್ರದಾಯಿಕ ಹಾರಗಳು, ಭಾರಿ ಗಾತ್ರದ ಜುಮಕಿ, ಜಡೆ ಬಿಲ್ಲೆ, ಮಾತಾಪಟ್ಟಿ, ಸೊಂಟದ ಪಟ್ಟಿ (ಡಾಬು), ಹಸ್ತಫೂಲ್ ಮತ್ತು ಕಾಲ್ಗೆಜ್ಜೆಗಳು ಸೇರಿದ್ದವು. ಆಂಟಿಕ್ ಮ್ಯಾಟ್ ಫಿನಿಶ್ ಹೊಂದಿದ್ದ ಈ ಆಭರಣಗಳಲ್ಲಿ ರಶ್ಮಿಕಾ ಅವರು ಸಾಕ್ಷಾತ್ ದೇವತೆಯಂತೆ ಕಾಣಿಸುತ್ತಿದ್ದರು. ಪ್ರತಿ ಆಭರಣದ ಮೇಲೆ ಕೆತ್ತಲಾದ ‘ನಕ್ಷಿ’ ಮತ್ತು ‘ರವಾ’ ವಿನ್ಯಾಸವು ದಕ್ಷಿಣದ ಪರಂಪರೆಯನ್ನು ಸಾರುವಂತಿದ್ದವು.
ರಾಜ ಗಾಂಭೀರ್ಯದಲ್ಲಿ ವಿಜಯ್ ದೇವರಕೊಂಡ
ಸಾಮಾನ್ಯವಾಗಿ ವರನ ಅಲಂಕಾರದಲ್ಲಿ ಆಭರಣಗಳು ಸೀಮಿತವಾಗಿರುತ್ತವೆ. ಆದರೆ ವಿಜಯ್ ದೇವರಕೊಂಡ ತಮ್ಮ ಮದುವೆಯಲ್ಲಿ ಮಹಾರಾಜನಂತೆ ಮಿಂಚಿದ್ದು ವಿಶೇಷ. ಅವರ ಆಭರಣಗಳಲ್ಲಿ ಬುದ್ಧಿವಂತಿಕೆಯ ಸಂಕೇತವಾಗಿ ಆನೆ ಮತ್ತು ಚುರುಕುತನದ ಸಂಕೇತವಾಗಿ ಹುಲಿಯ ಚಿತ್ರಗಳನ್ನು ಕೆತ್ತಲಾಗಿತ್ತು. ವಿಜಯ್ ಕಿವಿಯಲ್ಲಿ ನಾಣ್ಯದ ಗಾತ್ರದ ಓಲೆಗಳು, ಕೈಯಲ್ಲಿ ಪುರಾತನ ಶೈಲಿಯ ಕಡಗಗಳು ಹಾಗೂ ಕುತ್ತಿಗೆಯಲ್ಲಿ ಒಂದು ಚಿಕ್ಕ ಮತ್ತು ಒಂದು ಉದ್ದನೆಯ ಭಾರಿ ತೂಕದ ಹಾರಗಳು ಕಂಗೊಳಿಸುತ್ತಿದ್ದವು. ವಿಶೇಷವೆಂದರೆ, ವಿಜಯ್ ಕಾಲಿಗೆ ಚಿನ್ನದ ಕಡಗಗಳನ್ನು ಧರಿಸುವ ಮೂಲಕ ವರನ ಅಲಂಕಾರದಲ್ಲಿ ಹೊಸ ಟ್ರೆಂಡ್ ಸೃಷ್ಟಿಸಿದ್ದಾರೆ.
ಪಾರಂಪರಿಕ ಸೊಬಗು ಮತ್ತು ಟ್ರೆಂಡ್ ಸೆಟ್ಟರ್
“ನಾವು ರಶ್ಮಿಕಾ ಅವರನ್ನು ದೇವತೆಯಂತೆ ಮತ್ತು ವಿಜಯ್ ಅವರನ್ನು ಸಾರ್ವಭೌಮ ರಾಜನಂತೆ ಕಲ್ಪಿಸಿಕೊಂಡು ಈ ಆಭರಣಗಳನ್ನು ಸಿದ್ಧಪಡಿಸಿದ್ದೆವು,” ಎಂದು ಶ್ರೀ ಜ್ಯುವೆಲರ್ಸ್ ಹೇಳಿದೆ. ಅನಾಮಿಕಾ ಖನ್ನಾ ವಿನ್ಯಾಸಗೊಳಿಸಿದ ಸಾಂಪ್ರದಾಯಿಕ ಉಡುಪುಗಳಿಗೆ ಈ ಕೆಜಿಗಟ್ಟಲೆ ತೂಕದ ಚಿನ್ನದ ಆಭರಣಗಳು ಮೆರುಗು ನೀಡಿದ್ದವು. ಸಾಮಾಜಿಕ ಜಾಲತಾಣಗಳಲ್ಲಿ ಈ ಜೋಡಿಯ ಮದುವೆಯ ಫೋಟೋಗಳು ವೈರಲ್ ಆಗುತ್ತಿದ್ದು, ಮುಂಬರುವ ದಿನಗಳಲ್ಲಿ ಭಾರತೀಯ ಮದುವೆಗಳಲ್ಲಿ ಈ ಸಾಂಪ್ರದಾಯಿಕ ಆಭರಣಗಳ ಶೈಲಿಯೇ ಮೇಲುಗೈ ಸಾಧಿಸಲಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ.
ಇದನ್ನೂ ಓದಿ : ಕೋಲ್ಕತ್ತಾದಲ್ಲಿ ಪ್ರಬಲ ಭೂಕಂಪ | ಕಟ್ಟಡದಿಂದ ಓಡೋಡಿ ಹೊರ ಬಂದ ಜನ!
