ಬೆಂಗಳೂರು | ಮೈ ನಡುಗಿಸೋ ಚಳಿಗಾಲವೇ ಮುಗಿಯಿತಾದರೂ ಇನ್ನೂ ಜಿಬಿಎ ಶಾಲಾ ಮಕ್ಕಳಿಗೆ ಸ್ವೆಟರ್ ಭಾಗ್ಯ ಸಿಗಲೇ ಇಲ್ಲ. ಮೈ ಕೊರೆಯೋ ಚಳಿಯಲ್ಲಿ ಸಾವಿರಾರು ಮಕ್ಕಳು ಶಾಲೆಗೆ ಬರುತ್ತಿದ್ದರು. ಸ್ವೆಟರ್ಗೆ ಹಣ ನೀಡ್ತೀವಿ ಅಂತಾ ಭರವಸೆ ನೀಡಿದ್ದ ಜಿಬಿಎ, ಈವರೆಗೆ ಸ್ವೆಟರೂ ನೀಡಿಲ್ಲ, ಅತ್ತ ಹಣವೂ ಕೊಡಲಿಲ್ಲ. ಹಾಗಾಗಿ ಸ್ವೆಟರ್ ಪೂರೈಕೆಯಲ್ಲಿ ಮತ್ತೊಂದು ಗೋಲ್ಮಾಲ್ ನಡೆದಿದ್ಯಾ ಅನ್ನೋ ಅನುಮಾನಗಳು ಸಾರ್ವಜನಿಕ ವಲಯದಲ್ಲಿ ವ್ಯಕ್ತವಾಗಿದೆ.
ಪ್ರಸಕ್ತ ಶೈಕ್ಷಣಿಕ ವರ್ಷ ಇನ್ನು ಒಂದು ತಿಂಗಳಲ್ಲಿ ಮುಕ್ತಾಯವಾಗಲಿದೆ. ಆದರೆ, ಜಿಬಿಎ ಶಾಲಾ-ಕಾಲೇಜು ಮಕ್ಕಳಿಗೆ ಸ್ವೆಟರ್ ನೀಡುವಲ್ಲಿ ವಿಫಲವಾಗಿದೆ. ಪ್ರತಿ ವರ್ಷ ಜಿಬಿಎ ವತಿಯಿಂದ ಶಾಲಾ-ಕಾಲೇಜು ಮಕ್ಕಳಿಗೆ ಎರಡು ಜೊತೆ ಸ್ವೆಟರ್ ನೀಡಲಾಗುತ್ತಿತ್ತು. ಆದರೆ, ಈ ಬಾರಿ ಖರೀದಿ ಪ್ರಕ್ರಿಯೆಯಲ್ಲಿ ವಿಳಂಬವಾದ ಕಾರಣ, ಸ್ವೆಟರ್ ಬದಲು ಮಕ್ಕಳ ಪೋಷಕರ ಬ್ಯಾಂಕ್ ಖಾತೆಗೆ ಹಣ ಜಮಾ ಮಾಡ್ತಿವಿ ಅಂತಾ ಜಿಬಿಎ 5 ನಗರಪಾಲಿಕೆ ಆಯುಕ್ತರು ಭರವಸೆ ನೀಡಿದ್ದರು. ಆದರೆ, ಶಾಲಾ ಶೈಕ್ಷಣಿಕ ವರ್ಷ ಮುಗಿಯುತ್ತಾ ಬಂದರು ಪೋಷಕರ ಬ್ಯಾಂಕ್ ಖಾತೆಗೆ ಹಣ ಜಮ ಆಗಿಲ್ಲ.
ಜಿಬಿಎ ಶಾಲಾ-ಕಾಲೇಜಿನಲ್ಲಿ ನರ್ಸರಿಯಿಂದ ಪಿಯು ಕಾಲೇಜುವರೆಗೆ 24 ಸಾವಿರ ಮಕ್ಕಳ ವಿಧ್ಯಾಭ್ಯಾಸ ಮಾಡುತ್ತಿದ್ದು, ಪ್ರತಿ ವಿದ್ಯಾರ್ಥಿಗೆ 650 ರೂಪಾಯಿ ವೆಚ್ಚದಲ್ಲಿ ಸ್ವೆಟರ್ ಖರೀದಿಗೆ ಸುಮಾರು 1.80 ಕೋಟಿ ಹಣ ಕಳೆದ ವರ್ಷದ ಬಜೆಟ್ನಲ್ಲಿ ಮೀಸಲಿಡಲಾಗಿತ್ತು. ಆದರೆ, ಈವರೆಗೆ ಯಾರಿಗೂ ಸ್ವೆಟರ್ ನೀಡಿಲ್ಲ. ಅಧಿಕಾರಿಗಳ ನಿರ್ಲಕ್ಷಕ್ಕೆ ಮಕ್ಕಳಿಗೆ ಸ್ವೆಟರ್ ಭಾಗ್ಯ ಈ ವರ್ಷ ಇಲ್ಲದಂತಾಗಿದೆ.
ಈ ಬಗ್ಗೆ ಜಿಬಿಎಯ ಶಿಕ್ಷಣ ಇಲಾಖೆ ಅಧಿಕಾರಿಗಳ ಮಾಹಿತಿ ಪ್ರಕಾರ, ಹಿಂದೆ ಬಿಬಿಎಂಪಿ ಇತ್ತು. ಈಗ 5 ನಗರಪಾಲಿಕೆಯಾಗಿ ಬಿಬಿಎಂಪಿ ವಿಭಜನೆಯಾಗಿದೆ. 5 ನಗರಪಾಲಿಕೆಯ ಆಯುಕ್ತರು ಈ ವರ್ಷ ಮಕ್ಕಳಿಗೆ ಸ್ವೆಟರ್ ನೀಡೋದು ಬೇಡ, ಅನುದಾನ ಇಲ್ಲ, ಮುಂದಿನ ವರ್ಷ ನೋಡೋಣ ಅಂತಾ ಹರಕೆಯ ಉತ್ತರ ನೀಡಿದ್ದಾರೆ ಎಂದು ತಿಳಿದುಬಂದಿದೆ.
ಹಾಗಾದರೇ 24 ಸಾವಿರ ಮಕ್ಕಳಲ್ಲಿ ಸ್ವೆಟರ್ ವಿತರಣೆಗೂ ನಗರಪಾಲಿಕೆಯಲ್ಲಿ ಹಣ ಇಲ್ವ? ಅನ್ನೋ ಪ್ರಶ್ನೆ ಸಾರ್ವಜನಿಕರು ಮಾಡುತ್ತಿದ್ದಾರೆ. ಇನ್ನೂ ಈ
ವಿಚಾರದಲ್ಲಿ ಗೊಂದಲ ಮುಂದುವರಿದಿದ್ದು, ಕ್ರಮ ಕೈಗೊಳ್ಳಬೇಕಾದ ಅಧಿಕಾರಿಗಳೇ ಅಸಹಾಯಕತೆ ವ್ಯಕ್ತಪಡಿಸುತ್ತಿದ್ದಾರೆ ಎನ್ನಲಾಗಿದೆ.
ಇದನ್ನೂ ಓದಿ : ಮಾಜಿ ಸಿಎಂ ಬಸವರಾಜ್ ಬೊಮ್ಮಾಯಿ ಪಿಎಸ್ ಮಗ ಆತ್ಮಹ*ತ್ಯೆ
