ಸಣ್ಣ ಬದಲಾವಣೆ, ಬೃಹತ್ ಕಮ್‌ಬ್ಯಾಕ್ : ರವಿ ಬಿಷ್ಣೋಯಿ ಬೌಲಿಂಗ್ ಆಕ್ಷನ್ ಬದಲಾದ ರೋಚಕ ಕಥೆ

ನವದೆಹಲಿ: ಒಂದು ಕಾಲದಲ್ಲಿ ವಿಶ್ವದ ನಂಬರ್ ಒನ್ ಟಿ20 ಬೌಲರ್ ಆಗಿ ಮೆರೆದಿದ್ದ ಭಾರತದ ಲೆಗ್ ಸ್ಪಿನ್ನರ್ ರವಿ ಬಿಷ್ಣೋಯಿ, ಕಳೆದ ಒಂದು ಸೀಸನ್‌ನಲ್ಲಿ ಅಕ್ಷರಶಃ ಕಳೆದುಹೋದಂತಿದ್ದರು. ಆದರೆ ಟಿ20 ವಿಶ್ವಕಪ್‌ಗೂ ಮುನ್ನ ನ್ಯೂಜಿಲೆಂಡ್ ವಿರುದ್ಧದ ಸರಣಿಯಲ್ಲಿ ಸಿಕ್ಕ ಅವಕಾಶವನ್ನು ಎರಡೂ ಕೈಗಳಿಂದ ಬಾಚಿಕೊಂಡಿರುವ ಅವರು, ಮೂರನೇ ಟಿ20 ಪಂದ್ಯದಲ್ಲಿ ನಾಲ್ಕು ಓವರ್‌ಗಳಲ್ಲಿ ಕೇವಲ ಹದಿನೆಂಟು ರನ್ ನೀಡಿ ಎರಡು ವಿಕೆಟ್ ಕಬಳಿಸುವ ಮೂಲಕ ತಾವು ಇನ್ನೂ ರೇಸ್‌ನಲ್ಲಿದ್ದೇವೆ ಎಂಬುದನ್ನು ಸಾಬೀತುಪಡಿಸಿದ್ದಾರೆ.ಅವರ ಈ ‘ವಾವ್’ ಎನಿಸುವಂತ ಕಮ್‌ಬ್ಯಾಕ್ ಹಿಂದೆ ದೊಡ್ಡ ತಾಂತ್ರಿಕ ಬದಲಾವಣೆ ಮತ್ತು ಕಠಿಣ ಪರಿಶ್ರಮದ ಕಥೆಯಿದೆ.

ಕಳೆದ 2025-26ರ ಕ್ರಿಕೆಟ್ ಋತು ರವಿ ಬಿಷ್ಣೋಯಿ ಪಾಲಿಗೆ ದುಃಸ್ವಪ್ನವಾಗಿತ್ತು ಎಂದರೆ ತಪ್ಪಾಗಲಾರದು. ಐಪಿಎಲ್ 2025ರಲ್ಲಿ ಆಡಿದ ಹನ್ನೊಂದು ಪಂದ್ಯಗಳಲ್ಲಿ ಅವರು ಗಳಿಸಿದ್ದು ಕೇವಲ ಒಂಬತ್ತು ವಿಕೆಟ್ ಮಾತ್ರ. ಎದುರಾಳಿ ಬ್ಯಾಟರ್‌ಗಳು ಅವರನ್ನು ಮನಬಂದಂತೆ ದಂಡಿಸಿದ್ದರು. ವಿಕೆಟ್ ಟೇಕಿಂಗ್ ಬೌಲರ್ ಎಂಬ ಖ್ಯಾತಿ ಮಸುಕಾಗಿತ್ತು ಮತ್ತು ಅವರು ಸಹಜವಾಗಿಯೇ ಭಾರತ ತಂಡದಿಂದಲೂ ಹೊರಬಿದ್ದಿದ್ದರು. ಈ ವೈಫಲ್ಯದ ಬಳಿಕ ಎಚ್ಚೆತ್ತುಕೊಂಡ ಬಿಷ್ಣೋಯಿ ತಮ್ಮ ತಪ್ಪುಗಳನ್ನು ತಿದ್ದಿಕೊಳ್ಳಲು ಕೋಚ್‌ಗಳ ಮೊರೆ ಹೋದರು.

ಬೌಲಿಂಗ್ ಆ್ಯಕ್ಷನ್ ಬದಲಾವಣೆ

ಬಿಷ್ಣೋಯಿ ಅವರ ಕೋಚ್ ಶಾರುಖ್ ಅವರು ವಿವರಿಸುವಂತೆ, ಬಿಷ್ಣೋಯಿ ಅವರ ಬೌಲಿಂಗ್ ಆಕ್ಷನ್‌ನಲ್ಲಿ ಪ್ರಮುಖವಾಗಿ ಕೆಲವು ತಾಂತ್ರಿಕ ಸಮಸ್ಯೆಗಳು ಕಂಡುಬಂದಿದ್ದವು. ಸಾಮಾನ್ಯವಾಗಿ ಸ್ಪಿನ್ನರ್‌ಗಳು ಕ್ರೀಸ್‌ನ ಅಗಲವನ್ನು ಬಳಸಿಕೊಂಡು ಓಡಿ ಬರುತ್ತಾರೆ, ಆದರೆ ಬಿಷ್ಣೋಯಿ ನೇರವಾಗಿ ಓಡಿ ಬರುತ್ತಿದ್ದರು. ಇದು ಅವರ ಬಯೋಮೆಕ್ಯಾನಿಕ್ಸ್ ಮೇಲೆ ಪರಿಣಾಮ ಬೀರುತ್ತಿತ್ತು. ಚೆಂಡನ್ನು ಎಸೆಯುವಾಗ ಅವರ ಕೈ ಹನ್ನೊಂದು ಗಂಟೆಯ ಕೋನದಲ್ಲಿರುತ್ತಿತ್ತು (11 o’clock angle), ಇದು ಲೆಗ್ ಸ್ಪಿನ್ನರ್‌ಗಳಿಗೆ ಸೂಕ್ತವಲ್ಲದ ಶೈಲಿಯಾಗಿತ್ತು. ಅಲ್ಲದೆ ಅವರು ಕ್ರೀಸ್ ಬಳಸುವಲ್ಲಿಯೂ ಎಡವುತ್ತಿದ್ದರು.

ಈ ಸಮಸ್ಯೆಗಳನ್ನು ಸರಿಪಡಿಸಲು ಬಿಷ್ಣೋಯಿ ಪಟ್ಟ ಶ್ರಮ ಸಾಮಾನ್ಯವಾದುದಲ್ಲ. ತಾವು ಹಳೆಯ ರವಿ ಬಿಷ್ಣೋಯಿ ಆಗಿರಬಾರದು, ಹೊಸ ಆವೃತ್ತಿಯ ಬೌಲರ್ ಆಗಬೇಕು ಎಂಬ ಹಠಕ್ಕೆ ಬಿದ್ದ ಅವರು, ಪ್ರತಿದಿನ ಬೆಳಿಗ್ಗೆ ಐದು ಗಂಟೆಗೆ ಎದ್ದು ಅಭ್ಯಾಸ ಆರಂಭಿಸುತ್ತಿದ್ದರು. ದಿನಕ್ಕೆ ಎರಡು ಬಾರಿ, ತಲಾ ನಾಲ್ಕು ಗಂಟೆಗಳ ಕಾಲ ಸತತ ಎಂಟು ಗಂಟೆಗಳ ಕಠಿಣ ತಾಲೀಮು ನಡೆಸುತ್ತಿದ್ದರು. ಕೆಂಪು ಚೆಂಡು ಮತ್ತು ಬಿಳಿ ಚೆಂಡು ಎರಡರಲ್ಲೂ ಬೌಲಿಂಗ್ ಅಭ್ಯಾಸ ಮಾಡುವ ಮೂಲಕ ತಮ್ಮ ಲಯ ಕಂಡುಕೊಳ್ಳಲು ಯತ್ನಿಸಿದರು.

ಕೋಚ್‌ಗಳ ಮಾರ್ಗದರ್ಶನದಲ್ಲಿ ಈಗ ಬಿಷ್ಣೋಯಿ ಅವರ ಬೌಲಿಂಗ್ ಶೈಲಿಯಲ್ಲಿ ಮಹತ್ತರ ಬದಲಾವಣೆಯಾಗಿದೆ. ಅವರು ಈಗ ಚೆಂಡನ್ನು ಹನ್ನೆರಡು ಗಂಟೆಯ ಕೋನದಲ್ಲಿ (12 o’clock) ರಿಲೀಸ್ ಮಾಡುತ್ತಿದ್ದಾರೆ. ಈ ಬದಲಾವಣೆಯಿಂದಾಗಿ ಅವರಿಗೆ ಗೂಗ್ಲಿ ಜೊತೆಗೆ ಸಾಂಪ್ರದಾಯಿಕ ಲೆಗ್-ಬ್ರೇಕ್ ಎಸೆತಗಳಲ್ಲೂ ತಿರುವು ಪಡೆಯಲು ಸಾಧ್ಯವಾಗುತ್ತಿದೆ. ಅಲ್ಲದೆ ಅವರ ಸ್ಲೈಡರ್ ಎಸೆತಗಳು ಈಗ ಬ್ಯಾಟ್ಸ್‌ಮನ್‌ಗಳಿಗೆ ಹೆಚ್ಚು ಅಪಾಯಕಾರಿಯಾಗಿ ಪರಿಣಮಿಸುತ್ತಿವೆ.

ಎಕಾನಮಿ ಬೌಲಿಂಗ್​

ಈ ಬದಲಾವಣೆಗಳ ಫಲಿತಾಂಶ ದೇಶೀಯ ಕ್ರಿಕೆಟ್‌ನಲ್ಲಿ ತಕ್ಷಣವೇ ಗೋಚರಿಸಿತು. ಸೈಯದ್ ಮುಷ್ತಾಕ್ ಅಲಿ ಟ್ರೋಫಿಯಲ್ಲಿ ಏಳು ಪಂದ್ಯಗಳಿಂದ ಒಂಬತ್ತು ವಿಕೆಟ್ ಪಡೆದರೆ, ವಿಜಯ್ ಹಜಾರೆ ಟ್ರೋಫಿಯಲ್ಲಿ ಹನ್ನೆರಡು ಪಂದ್ಯಗಳಿಂದ ಹನ್ನೆರಡು ವಿಕೆಟ್ ಪಡೆದರು. ಇಲ್ಲಿ ಅವರು ನೀಡಿದ ಎಕಾನಮಿ ದರ ಅವರ ನಿಯಂತ್ರಣಕ್ಕೆ ಸಾಕ್ಷಿಯಾಗಿತ್ತು. ನ್ಯೂಜಿಲೆಂಡ್ ವಿರುದ್ಧದ ಉಳಿದ ಪಂದ್ಯಗಳಲ್ಲೂ ಬಿಷ್ಣೋಯಿ ಮಿಂಚುವ ವಿಶ್ವಾಸವಿದ್ದು, ಮುಂಬರುವ ಟಿ20 ವಿಶ್ವಕಪ್ ತಂಡದಲ್ಲಿ ಸ್ಥಾನ ಪಡೆಯಲು ಪ್ರಬಲ ಪೈಪೋಟಿ ನೀಡಲಿದ್ದಾರೆ ಎಂದು ಅವರ ಕೋಚ್‌ಗಳು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಇದನ್ನೂ ಓದಿ : ರಾಂಚಿ ನೆಟ್ಸ್‌ನಲ್ಲಿ ‘ತಲಾ’ ದರ್ಶನ | ಐಪಿಎಲ್-2026ಕ್ಕೆ M.S. ಧೋನಿ ಭರ್ಜರಿ ತಯಾರಿ.. ಯುವ ಪ್ರತಿಭೆಗಳಿಗೆ ಪಾಠ!