ಕೊಲಂಬೊ: ವಿಶ್ವದ ಅಪಾಯಕಾರಿ ವೇಗಿಗಳಲ್ಲಿ ಒಬ್ಬರೆಂದು ಗುರುತಿಸಿಕೊಂಡಿರುವ ಪಾಕಿಸ್ತಾನದ ಶಾಹೀನ್ ಷಾ ಅಫ್ರಿದಿ ಅವರಿಗೆ ಭಾರತದ ವಿರುದ್ಧದ ಪಂದ್ಯವು ಮರೆಯಲಾಗದ ದುಸ್ವಪ್ನವಾಗಿ ಪರಿಣಮಿಸಿದೆ. ಇಡೀ ಪಂದ್ಯದುದ್ದಕ್ಕೂ ಲಯ ಕಂಡುಕೊಳ್ಳಲು ಪರದಾಡಿದ ಅಫ್ರಿದಿ, ಅಂತಿಮ ಓವರ್ಗಳಲ್ಲಿ ಭಾರತೀಯ ಬ್ಯಾಟರ್ಗಳ ಅಬ್ಬರಕ್ಕೆ ತತ್ತರಿಸಿದರು.
ಅಫ್ರಿದಿ ಅವರ ಕಳಪೆ ಪ್ರದರ್ಶನವು ಕೇವಲ ಮೈದಾನಕ್ಕೆ ಸೀಮಿತವಾಗದೆ, ಸಾಮಾಜಿಕ ಜಾಲತಾಣಗಳಲ್ಲಿ ಪಾಕಿಸ್ತಾನಿ ಅಭಿಮಾನಿಗಳ ಆಕ್ರೋಶಕ್ಕೆ ಮತ್ತು ಭಾರತೀಯ ಅಭಿಮಾನಿಗಳ ಲೇವಡಿಗೆ ಗುರಿಯಾಗಿದೆ.
ಪಂದ್ಯದ ಅಂತಿಮ ಓವರ್ ಎಸೆಯಲು ಬಂದ ಅಫ್ರಿದಿ, ರನ್ ವೇಗಕ್ಕೆ ಬ್ರೇಕ್ ಹಾಕುವಲ್ಲಿ ಸಂಪೂರ್ಣ ವಿಫಲರಾದರು. ಭಾರತದ ಸ್ಫೋಟಕ ಬ್ಯಾಟರ್ಗಳಾದ ಶಿವಂ ದುಬೆ ಮತ್ತು ರಿಂಕು ಸಿಂಗ್ ಅವರು ಅಫ್ರಿದಿ ಎಸೆದ ಸ್ಲೋಯರ್ ಮತ್ತು ಯಾರ್ಕರ್ ಎಸೆತಗಳನ್ನು ಮನಬಂದಂತೆ ದಂಡಿಸಿದರು. ಅಫ್ರಿದಿ ಎಸೆದ ಸ್ಲೋಯರ್ ಬಾಲ್ ಅನ್ನು ಶಿವಂ ದುಬೆ ಬೌಂಡರಿಗಟ್ಟಿದರೆ, ರಿಂಕು ಸಿಂಗ್ ಅವರು ಮಿಸ್ಪ್ಲೇಸ್ಡ್ ಯಾರ್ಕರ್ ಅನ್ನು ಮಿಡ್-ವಿಕೆಟ್ ಮೇಲೆ ಭರ್ಜರಿ ಸಿಕ್ಸರ್ ಆಗಿ ಪರಿವರ್ತಿಸಿದರು. ನಂತರದ ಎಸೆತದಲ್ಲೂ ರಿಂಕು ಚಾಣಾಕ್ಷತನದಿಂದ ಬೌಂಡರಿ ಬಾರಿಸುವ ಮೂಲಕ ಅಫ್ರಿದಿ ಅವರ ಆತ್ಮವಿಶ್ವಾಸವನ್ನು ಕುಗ್ಗಿಸಿದರು. ಅಂತಿಮವಾಗಿ ಅಕ್ಷರ್ ಪಟೇಲ್ ಅವರ ವಿಕೆಟ್ ಪಡೆಯುವಲ್ಲಿ ಯಶಸ್ವಿಯಾದರೂ, ಅಷ್ಟರಲ್ಲಾಗಲೇ ಶಾಹೀನ್ ಅಫ್ರಿದಿ ದುಬಾರಿ ಬೌಲರ್ ಎನಿಸಿಕೊಂಡಿದ್ದರು.
ಟ್ರೋಲ್ಗೆ ಒಳಗಾದ ಅಫ್ರಿದಿ
ಅಫ್ರಿದಿ ಅವರ ಈ ಕಳಪೆ ಬೌಲಿಂಗ್ ಪ್ರದರ್ಶನವು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಟ್ರೋಲ್ಗಳಿಗೆ ಕಾರಣವಾಗಿದೆ. ಪಾಕಿಸ್ತಾನದ ಅನೇಕ ಅಭಿಮಾನಿಗಳು ಶಾಹೀನ್ ಅವರನ್ನು “ಭಾರತದ 12ನೇ ಆಟಗಾರ” ಎಂದು ಟೀಕಿಸಿದರೆ, ಇನ್ನು ಕೆಲವರು ಹಾಸ್ಯಮಯವಾಗಿ ಅವರನ್ನು “ಇಂಡಿಯನ್ ಏಜೆಂಟ್” ಎಂದು ಕರೆದು ಕಾಲೆಳೆದಿದ್ದಾರೆ. ಬಾಲಿವುಡ್ ನಟ ರಣವೀರ್ ಸಿಂಗ್ ಅವರ ‘ಧುರಂಧರ್’ ಚಿತ್ರದ ಪಾತ್ರಕ್ಕೆ ಅಫ್ರಿದಿ ಅವರನ್ನು ಹೋಲಿಸಿ ಅನೇಕ ಮೀಮ್ಗಳು ಹರಿದಾಡುತ್ತಿವೆ. ಅಫ್ರಿದಿ ತಮ್ಮ ಹಳೆಯ ವೇಗ ಮತ್ತು ನಿಖರತೆಯನ್ನು ಕಳೆದುಕೊಂಡಿದ್ದಾರೆ ಎಂಬ ಮಾತುಗಳು ಕ್ರಿಕೆಟ್ ವಲಯದಲ್ಲಿ ಕೇಳಿಬರುತ್ತಿದ್ದು, ಪಾಕಿಸ್ತಾನದ ಮಾಜಿ ಕ್ರಿಕೆಟಿಗರು ಕೂಡ ಈ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಇದನ್ನೂ ಓದಿ : ಸೂರ್ಯಕುಮಾರ್ಗೆ ‘ಸೆಂಡ್-ಆಫ್ ನೀಡಿದ ಉಸ್ಮಾನ್ ತಾರಿಕ್ ; ಕ್ರೀಡಾಂಗಣದಲ್ಲಿ 2007ರ ನೆನಪು ಮರುಕಳಿಸಿದ ಕ್ಷಣ!
