ವಾಷಿಂಗ್ಟನ್: ಅಮೆರಿಕ ಹೊಸ ಹೊಸ ಅನ್ವೇಷಣೆಗಳಿಗೆ ಯಾವಾಗಲೂ ತೆರೆದುಕೊಂಡಿರುತ್ತದೆ. ಅಲ್ಲದೇ, ಅದನ್ನು ಸೇನೆಗೆ ಪರಿಚಯಿಸುವ ಪರಿಪಾಟವನ್ನು ಯಾವಾಗಲೂ ನಡೆಸಿಕೊಂಡು ಬಂದಿದೆ. ಈಗ ರೋಬೋಟ್ ಗಳನ್ನು ಸೇನೆಗೆ ಪರಿಚಯಿಸಲು ಮಂದಾಗಿದೆ.
ಕೃತಕ ಬುದ್ದಿಮತ್ತೆ ತಂತ್ರಜ್ಞಾನ ಬಳಕೆ ಮಾಡಿಕೊಂಡು ಸೇನೆಯ ಬಲವರ್ಧನೆ ಮಾಡುವ ಚಿಂತನೆ ಅಮೆರಿಕದಲ್ಲಿ ನಡೆಯುತ್ತಿದೆ. ಅದರಲ್ಲೂ ಎಐ ತಂತ್ರಜ್ಞಾನ ಆಧರಿತ ರೋಬೋಟ್‌ಗಳನ್ನ ಸೇನೆಗೆ ಪರಿಚಯಿಸಲು ಸಾಕಷ್ಟು ರೀತಿಯಲ್ಲಿ ಪ್ರಯತ್ನಿಸಲಾಗುತ್ತಿದೆ.
ಅಮೆರಿಕ ಸೇನೆಯ ನಿವೃತ್ತ ಜನರಲ್ ಮಾರ್ಕ್ ಮಿಲ್ಲೆ ಈ ಕುರಿತು ಪ್ರತಿಕ್ರಿಯೆ ನೀಡಿದ್ದು, ಮುಂದಿನ ಹತ್ತರಿಂದ ಹದಿನೈದು ವರ್ಷಗಳಲ್ಲಿ ಅಮೆರಿಕ ಸೇನೆಯ ಒಟ್ಟು ಸೈನಿಕರ ಪೈಕಿ ಶೇ. 25 ರಷ್ಟು ಸೈನಿಕರು ಕೃತಕ ಬುದ್ದಿಮತ್ತೆ ತಂತ್ರಜ್ಞಾನ ಹೊಂದಿರುವ ರೋಬೋಟ್ ಗಳನ್ನೇ ಕೆಲಸಕ್ಕೆ ನಿಯೋಜಿಸುವ ಸಾಧ್ಯತೆ ಇವೆ ಎಂದು ಹೇಳಿದ್ದಾರೆ.
ಸೈನ್ಯದಲ್ಲಿ ಕೃತಕ ಬುದ್ದಿಮತ್ತೆ ತಂತ್ರಜ್ಞಾನ ಆಧರಿತ ರೋಬೋಟ್ ಕೆಲಸಕ್ಕೆ ನಿಯೋಜಿಸಿದರೆ ಹಲವು ರೀತಿಯ ಅನುಕೂಲಗಳಿವೆ. ಅತ್ಯಂತ ಕ್ಲಿಷ್ಟಕರ ಹಾಗೂ ಸಂಕೀರ್ಣವಾದ ಮಿಲಿಟರಿ ಆಪರೇಷನ್‌ ರೋಬೋಟ್‌ಗಳು ಸಮರ್ಥವಾಗಿ ನಿಭಾಯಿಸಬಲ್ಲವು. ಎಐ ತಂತ್ರಜ್ಞಾನ ಆಧರಿತ ರೋಬೋಟ್‌ಗಳು ಮಾನವನಿಗಿಂತಲೂ ಅತ್ಯಂತ ನಿಖರವಾಗಿ ಹಾಗೂ ಪರಿಣಾಮಕಾರಿಯಾಗಿ ಸಮಸ್ಯೆನ್ನ ಎದುರಿಸಬಹುದು. ಅಹಿತಕರ ವಾತಾವರಣದಲ್ಲೂ ಸುದೀರ್ಘ ಕಾಲ ಕಾರ್ಯ ನಿರ್ವಹಿಸಬಲ್ಲವು. ಈ ಮೂಲಕ ಸಾಂಪ್ರದಾಯಿಕ ಯುದ್ಧದ ಚಿತ್ರಣವನ್ನೇ ಬದಲಾಯಿಸಬಹುದು ಎಂಬ ಅಭಿಪ್ರಾಯ ಈಗ ಅಮೆರಿಕದ್ದಾಗಿದೆ.
ರೋಬೋಟ್ ಗಳನ್ನು ಸೇನೆಗೆ ನಿಯೋಜಿಸುವ ಸಂಖ್ಯೆ ಹೆಚ್ಚಾದಷ್ಟೂ ಮಾನವರ ನಿಯೋಜನೆ ಕಡಿಮೆಯಾಗುತ್ತಾ ಹೋಗುತ್ತದೆ. ಈ ಕುರಿತಾಗಿ ಅಮೆರಿಕ ಸೇನೆ ಹಲವು ದಶಕಗಳಿಂದ ರೋಬೋಟಿಕ್ ಹಾಗೂ ಎಐ ತಂತ್ರಜ್ಞಾನದ ಕುರಿತಾಗಿ ಅಧ್ಯಯನ ನಡೆಸುತ್ತಿದೆ ಎಂದು ಕೂಡ ಅವರು ಹೇಳಿದ್ದಾರೆ.
ರೋಬೋಟ್‌ಗಳು ಎಂದ ಮಾತ್ರಕ್ಕೆ ಅವು ಮಾನವನ ರೂಪದಲ್ಲೇ ಇರುತ್ತವೆ ಎಂದು ಭಾವಿಸಬೇಕಿಲ್ಲ. ಶಸ್ತ್ರ ಸಜ್ಜಿತ ಡ್ರೋನ್‌ಗಳು, ರೋಬೋಟಿಕ್ ನಾಯಿಗಳು.. ಹೀಗೆ ಹಲವು ವಿಧದ ರೋಬೋಟ್ ನಿಯೋಜಿಸುವ ಉದ್ಧೇಶವಿದೆ ಎಂದು ಹೇಳಿದ್ದಾರೆ.
