ರಾಂಚಿ: ಭಾರತ ಮತ್ತು ದಕ್ಷಿಣ ಆಫ್ರಿಕಾ ನಡುವಿನ ಮೊದಲ ಏಕದಿನ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ ತಮ್ಮ 52ನೇ ಶತಕ ಸಿಡಿಸಿ ದಾಖಲೆ ಬರೆದಿದ್ದಾರೆ. ಈ ಐತಿಹಾಸಿಕ ಕ್ಷಣದಲ್ಲಿ ಡ್ರೆಸಿಂಗ್ ರೂಮ್ನಲ್ಲಿದ್ದ ಮಾಜಿ ನಾಯಕ ರೋಹಿತ್ ಶರ್ಮಾ ಅವರ ಆಕ್ರೋಶಭರಿತ ಹಾಗೂ ಸಂಭ್ರಮದ ಪ್ರತಿಕ್ರಿಯೆ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ವಿರಾಟ್ ಕೊಹ್ಲಿ ಮಾರ್ಕೊ ಜಾನ್ಸನ್ ಎಸೆತದಲ್ಲಿ ಬೌಂಡರಿ ಬಾರಿಸುವ ಮೂಲಕ ತಮ್ಮ 52ನೇ ಏಕದಿನ ಶತಕವನ್ನು ಪೂರೈಸಿದರು. ಚೆಂಡು ಬೌಂಡರಿ ಗೆರೆ ದಾಟುತ್ತಿದ್ದಂತೆಯೇ, ಡ್ರೆಸಿಂಗ್ ರೂಮ್ನಲ್ಲಿ ಕುಳಿತಿದ್ದ ರೋಹಿತ್ ಶರ್ಮಾ ಎದ್ದು ನಿಂತು ಕುಣಿದಾಡಿದರು. ಕೈಮುಷ್ಟಿ ಬಿಗಿದು ಗಾಳಿಯಲ್ಲಿ ತೂರಾಡುತ್ತಾ, ಬಾಯಿ ತುಂಬಾ ಏನನ್ನೋ ಕೂಗುತ್ತಾ (ಬಹುಶಃ ಆಕ್ರೋಶಭರಿತ ಶಬ್ದಗಳು!) ತಮ್ಮ ದೀರ್ಘಕಾಲದ ಗೆಳೆಯನ ಸಾಧನೆಯನ್ನು ಸಂಭ್ರಮಿಸಿದರು. ಜೆಎಸ್ಸಿಎ (JSCA) ಸ್ಟೇಡಿಯಂನಲ್ಲಿ ಅಭಿಮಾನಿಗಳ ಹರ್ಷೋದ್ಗಾರ ಮುಗಿಲು ಮುಟ್ಟಿದ್ದರೆ, ಆನ್ಲೈನ್ನಲ್ಲಿ ರೋಹಿತ್ ಅವರ ಈ ರಿಯಾಕ್ಷನ್ ಅಷ್ಟೇ ಸದ್ದು ಮಾಡುತ್ತಿದೆ.
ದಾಖಲೆಗಳ ಸರದಾರರಾದ ರೋಹಿತ್-ವಿರಾಟ್
ಈ ಪಂದ್ಯದಲ್ಲಿ ಇಬ್ಬರೂ ದಿಗ್ಗಜರು ಮಹತ್ವದ ಮೈಲಿಗಲ್ಲುಗಳನ್ನು ಸ್ಥಾಪಿಸಿದರು:
ವಿರಾಟ್ ಕೊಹ್ಲಿ: 120 ಎಸೆತಗಳಲ್ಲಿ 135 ರನ್ (7 ಸಿಕ್ಸರ್, 11 ಬೌಂಡರಿ) ಗಳಿಸುವ ಮೂಲಕ ಏಕದಿನ ಕ್ರಿಕೆಟ್ನಲ್ಲಿ ತಮ್ಮ 52ನೇ ಶತಕ ಪೂರೈಸಿದರು. ಈ ಮೂಲಕ ಒಂದೇ ಮಾದರಿಯ ಕ್ರಿಕೆಟ್ನಲ್ಲಿ ಅತಿ ಹೆಚ್ಚು ಶತಕ ಬಾರಿಸಿದ ಆಟಗಾರ ಎಂಬ ಸಚಿನ್ ತೆಂಡೂಲ್ಕರ್ (ಟೆಸ್ಟ್ನಲ್ಲಿ 51 ಶತಕ) ಅವರ ದಾಖಲೆಯನ್ನು ಮುರಿದರು.
ರೋಹಿತ್ ಶರ್ಮಾ: 51 ಎಸೆತಗಳಲ್ಲಿ 57 ರನ್ ಗಳಿಸಿದ ರೋಹಿತ್, ಏಕದಿನ ಕ್ರಿಕೆಟ್ನಲ್ಲಿ ಅತಿ ಹೆಚ್ಚು ಸಿಕ್ಸರ್ (352) ಬಾರಿಸಿದ ಆಟಗಾರ ಎಂಬ ಶಾಹಿದ್ ಅಫ್ರಿದಿ ಅವರ ದಾಖಲೆಯನ್ನು ಅಳಿಸಿಹಾಕಿದರು.
ಒಂದಾದ ರೋ-ಕೋ ಜೋಡಿ
ಇತ್ತೀಚಿನ ದಿನಗಳಲ್ಲಿ ರೋಹಿತ್ ಮತ್ತು ಕೊಹ್ಲಿ ನಡುವಿನ ಬಾಂಧವ್ಯ ಹೆಚ್ಚು ಆಪ್ತವಾಗಿ ಗೋಚರಿಸುತ್ತಿದೆ. ಮೈದಾನದಲ್ಲಿ ಮತ್ತು ಹೊರಗಡೆ ಇಬ್ಬರೂ ಪರಸ್ಪರ ಬೆಂಬಲ ನೀಡುತ್ತಿದ್ದು, ತಂಡದ ಏಳಿಗೆಗೆ ಶ್ರಮಿಸುತ್ತಿದ್ದಾರೆ. 2027ರ ವಿಶ್ವಕಪ್ ದೃಷ್ಟಿಯಿಂದ ಈ ಇಬ್ಬರ ಫಾರ್ಮ್ ಮತ್ತು ಒಡನಾಟ ಭಾರತ ತಂಡಕ್ಕೆ ಶುಭ ಸೂಚನೆಯಾಗಿದೆ.
ಇದನ್ನೂ ಓದಿ: ವಿರಾಟ್-ರೋಹಿತ್ ಎದುರಾಳಿಗಳನ್ನು ಅಸಹಾಯಕರನ್ನಾಗಿಸುತ್ತಾರೆ ; ಕೆ.ಎಲ್. ರಾಹುಲ್
