ಮುಂಬಯಿ: ಪ್ರೊ. ಕಬಡ್ಡಿಯ 11ನೇ ಆವೃತ್ತಿಯ ಆಟಗಾರರ ಹರಾಜು ಪ್ರಕ್ರಿಯೆ ನಡೆದಿದೆ. ಹಲವಾರು ಪ್ರತಿಭೆಗಳನ್ನು ಸೆಳೆದುಕೊಳ್ಳುವಲ್ಲಿ ತಂಡಗಳು ಯಶಸ್ವಿಯಾಗಿವೆ. ಈ ಪೈಕಿ ರೈಡರ್ ಸಚಿನ್ ಹೆಚ್ಚು ಮೊತ್ತಕ್ಕೆ ಬಿಡ್ ಆಗಿ ದಾಖಲೆ ಬರೆದಿದ್ದಾರೆ.
ಈ ಮೂಲಕ ಸಚಿನ್ ಪ್ರೊ ಕಬಡ್ಡಿ ಇತಿಹಾಸದಲ್ಲೇ 11ನೇ ಅತಿ ದುಬಾರಿ ಭಾರತೀಯ ಆಟಗಾರ ಎಂಬ ಖ್ಯಾತಿ ಗಳಿಸಿದ್ದಾರೆ. ಗುರುವಾರ ನಡೆದ ಹರಾಜಿನಲ್ಲಿ 25 ವರ್ಷದ ಸಚಿನ್ ರನ್ನು ತಮಿಳ್‌ ತಲೈವಾಸ್‌ ತಂಡ ಬರೋಬ್ಬರಿ 2.15 ಕೋಟಿ ರೂ. ನೀಡಿ ತನ್ನ ಬುಟ್ಟಿಗೆ ಹಾಕಿಕೊಂಡಿದೆ.
ಬೆಂಗಳೂರು ಬುಲ್ಸ್‌ ತಂಡವು ರೈಡರ್ ಅಜಿಂಕ್ಯ ಪವಾರ್ ರನ್ನು 1.10 ಕೋಟಿ ರೂ. ನೀಡಿ ತಂಡಕ್ಕೆ ಸೇರಿಸಿಕೊಂಡಿದೆ. ಅಲ್ಲದೇ, ಡುಬ್ಕಿ ಸ್ಪೆಷಲಿಸ್ಟ್‌ ಪ್ರದೀಪ್ ನರ್ವಾಲ್ ಅವರನ್ನು 70 ಲಕ್ಷ ರೂ. ನೀಡಿ ಬೆಂಗಳೂರು ಬುಲ್ಸ್‌ ತನ್ನ ತೆಕ್ಕೆಗೆ ಪಡೆದಿದೆ.
ಹಿಂದಿನ ಸೀಸನ್ ನಲ್ಲಿ ಪವನ್ ಸೆಹ್ರಾವತ್ ರನ್ನು ತೆಲುಗು ಟೈಟಾನ್ಸ್ ತಂಡ 2.6 ಕೋಟಿ ರೂ. ನೀಡಿ ಖರೀದಿಸಿತ್ತು. ಆದರೆ, ಪ್ರೊ ಕಬಡ್ಡಿಯ ದುಬಾರಿ ಆಟಗಾರ ಎನಿಸಿಕೊಂಡಿದ್ದ ಪವನ್ ರನ್ನು ಈ ಬಾರಿ ಟೈಟಾನ್ಸ್ ತಂಡ ಹರಾಜಿಗೂ ಮುನ್ನ ಕೈಬಿಟ್ಟಿತ್ತು. ಹರಾಜಿನಲ್ಲಿ ಟೈಟಾನ್ಸ್ ತಂಡ ಎಫ್‌ಬಿಎಂ(ಫೈನಲ್‌ ಬಿಡ್ ಮ್ಯಾಚ್‌) ಕಾರ್ಡ್‌ ಮೂಲಕ ಮತ್ತೆ ತನ್ನಲ್ಲಿಯೇ ಉಳಿಸಿಕೊಂಡಿತು. ಆದರೆ, ಈ ಬಾರಿ ಸೆಹ್ರಾವತ್ 1.725 ಕೋಟಿ ರೂ.ಗೆ ಬಿಡ್ ಆದರು.
ಇರಾನ್‌ ನ ಆಲ್ ರೌಂಡರ್ ಮೊಹಮದ್‌ ರೆಜಾ ಶಾದ್ಲೂ 2.07 ಕೋಟಿ ರೂ.ಗೆ ಹರಿಯಾಣ ಸ್ಟೀಲರ್ಸ್ ಪಾಲಾದರು. ಕಳೆದ ವರ್ಷ ಅವರನ್ನು ಪುಣೇರಿ ಪಲ್ಟನ್‌ ತಂಡ 2.35 ಕೋಟಿ ರೂ. ನೀಡಿ ಖರೀದಿಸಿತ್ತು. ತಂಡವನ್ನು ಚಾಂಪಿಯನ್‌ ಪಟ್ಟಕ್ಕೇರಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರೂ ತಂಡ ಅವರನ್ನು ಹರಾಜಿಗೂ ಮುನ್ನ ಕೈಬಿಟ್ಟಿತ್ತು. ಸಿಕ್ಕ ಅವಕಾಶವನ್ನು ಹರಿಯಾಣ ಸ್ಟೀಲರ್ಸ್ ಯಶಸ್ವಿಯಾಗಿ ಬಳಸಿಕೊಂಡಿತು.
ರೈಡರ್ ಗುಮಾನ್‌ ಸಿಂಗ್ ಗುಜರಾತ್‌ ಜೈಂಟ್ಸ್‌ ತಂಡಕ್ಕೆ 1.97 ಕೋಟಿ ರೂ. ಗೆ ಹರಾಜಾದರು. ಬೆಂಗಳೂರು ಬುಲ್ಸ್‌ನ ಪ್ರಮುಖ ಆಟಗಾರನಾಗಿದ್ದ ಭರತ್‌ ಹೂಡಾ ಅವರನ್ನು ಯುಪಿ ಯೋಧಾಸ್‌ ತಂಡ 1.30 ಕೋಟಿ ರು. ನೀಡಿ ತನ್ನತ್ತ ಸೆಳೆದುಕೊಂಡಿತು. ಮಣೀಂದರ್‌ ಸಿಂಗ್ 1.15 ಕೋಟಿ ರೂ.ಗೆ ರನ್ನು ಬೆಂಗಾಲ್‌ ವಾರಿಯರ್ಸ್‌ ತಂಡಕ್ಕೆ ಫೈನಲ್‌ ಬಿಡ್ ಮ್ಯಾಚ್‌ ಕಾರ್ಡ್‌ ಮೂಲಕ ಮತ್ತೆ ಹೋದರು. ಡಿಫೆಂಡರ್‌ ಗಳಾದ ಸುನಿಲ್‌ ಕುಮಾರ್‌ 1.015 ಕೋಟಿ ರೂ.ಗೆ ಮುಂಬಾ ಪಾಲಾದರು. ಕೃಷನ್‌ ತೆಲುಗು ಟೈಟಾನ್ಸ್‌ಗೆ 70 ಲಕ್ಷ ರೂ.ಗೆ, ಫಜಲ್‌ ಅಟ್ರಾಚಲಿ 50 ಲಕ್ಷ ರೂ.ಗೆ ಬೆಂಗಾಲ್‌ ವಾರಿಯರ್ಸ್‌ ಪಾಲದರು.
ಈ ಬಾರಿ ಹೆಚ್ಚು ಮೊತ್ತದಲ್ಲಿ ಬಿಡ್ ಆದವರ ಪಟ್ಟಿಯನ್ನು ಗಮನಿಸುವುದಾದರೆ, ಸಚಿನ್ 2.15 ಕೋಟಿ ರೂ. ತಲೈವಾಸ್‌, ಶಾದ್ಲೂ 2.07 ಕೋಟ ರೂ. ಹರಿಯಾಣ, ಗುಮಾನ್‌ 1.97 ಕೋಟಿ ರೂ. ಗುಜರಾತ್‌, ಪವನ್ 1.72 ಕೋಟಿ ರೂ. ಟೈಟಾನ್ಸ್, ಭರತ್‌ 1.30 ಕೋಟಿ ರೂ. ಯುಪಿ ಪಾಲಾಗಿ ಮಿಂಚಲು ಸಿದ್ಧರಾಗಿದ್ದಾರೆ.
