ಬೆಂಗಳೂರು: ಪೋಸ್ಟ್ ಆಫೀಸ್ ನಲ್ಲಿ ರೆಕರಿಂಗ್ ಡೆಪಾಸಿಟ್ ಅಥವಾ ಆರ್ ಡಿ ಖಾತೆ ಮೂಲಕ ಹೂಡಿಕೆ ಮಾಡಿದರೆ ನಿಯಮಿತವಾಗಿ ಹೆಚ್ಚಿನ ಲಾಭ ಗಳಿಸಬಹುದಾಗಿದೆ. ಆರ್ ಡಿ (Post Office RD Investment) ಹೂಡಿಕೆಯು ಷೇರು ಮಾರುಕಟ್ಟೆ ಆಧಾರಿತವಾಗಿಲ್ಲ. ಮೇಲಾಗಿ ಇದು ಕೇಂದ್ರ ಸರ್ಕಾರದ ಬೆಂಬಲ ಇರುವ ಯೋಜನೆಯಾಗಿರುವ ಕಾರಣ ವರ್ಷಕ್ಕೆ ಶೇ.6.7ರಷ್ಟು ಖಚಿತ ಬಡ್ಡಿ ನೀಡಲಾಗುತ್ತದೆ. ಅದರಲ್ಲೂ, ಪ್ರತಿ ದಿನ 333 ರೂಪಾಯಿ ಹೂಡಿಕೆ ಮಾಡಿದರೆ, 5 ವರ್ಷಗಳಲ್ಲಿಯೇ 7 ಲಕ್ಷ ರೂಪಾಯಿ ಗಳಿಸಬಹುದಾಗಿದೆ.
ಹೌದು, ಪೋಸ್ಟ್ ಆಫೀಸ್ ಆರ್ ಡಿಯಲ್ಲಿ ದಿನಕ್ಕೆ 333 ರೂಪಾಯಿ ಅಂದರೆ, ಮಾಸಿಕ 10 ಸಾವಿರ ರೂ. ಹೂಡಿಕೆಯಾಗುತ್ತದೆ. 5 ವರ್ಷಗಳವರೆಗೆ ಸತತವಾಗಿ ಹೂಡಿಕೆ ಮಾಡಿದರೆ ಐದು ವರ್ಷಗಳಲ್ಲಿ ಒಟ್ಟು ಹೂಡಿಕೆ 6 ಲಕ್ಷ ರೂ. ಹೂಡಿಕೆ ಮಾಡಿದಂತಾಗುತ್ತದೆ. ಅಲ್ಲದೆ ಇದಕ್ಕೆ 1.13 ಲಕ್ಷ ರೂ. ಬಡ್ಡಿ ದೊರೆಯುತ್ತದೆ. ಅಲ್ಲಿಗೆ ನೀವು 5 ವರ್ಷದಲ್ಲಿ 7.13 ಲಕ್ಷ ರೂಪಾಯಿ ಗಳಿಸಿದಂತೆ ಆಗುತ್ತದೆ. ಹಾಗಾಗಿ, ಪೋಸ್ಟ್ ಆಫೀಸ್ ಆರ್ ಡಿಯು ನಿಮ್ಮ ಹೂಡಿಕೆಗೆ ಸುರಕ್ಷಿತ ಮಾರ್ಗವಾಗಿದೆ.
ಪೋಸ್ಟ್ ಆಫೀಸ್ ಆರ್ ಡಿಯಲ್ಲಿ ಹೆಚ್ಚಿನ ಲಾಭ ಗಳಿಸಬೇಕು ಎಂದರೆ, ನೀವು ಹೆಚ್ಚಿನ ಅವಧಿಗೆ ಹೂಡಿಕೆ ಮಾಡಬೇಕು. ಐದು ವರ್ಷದ ಜತೆಗೆ ಇನ್ನೂ ಐದು ವರ್ಷ ಮುಂದುವರಿಸಿದರೆ, ಒಟ್ಟು 12 ಲಕ್ಷ ಹೂಡಿಕೆ ಯಾಗುತ್ತದೆ. ಇದಕ್ಕೆ 5.08 ಲಕ್ಷ ರೂ. ಬಡ್ಡಿ ಸಿಗುತ್ತದೆ. ಅಂದರೆ 10 ವರ್ಷಗಳಲ್ಲಿ ನಿಮಗೆ 17,08,546 ರೂಪಾಯಿ ದೊರೆಯುತ್ತದೆ.
ಹಾಗೊಂದು ವೇಳೆ, ನಿಮ್ಮ ಉಳಿತಾಯದ ಮೊತ್ತ ಕಡಿಮೆ ಇದ್ದರೆ ಮತ್ತು ನೀವು ಪ್ರತಿ ತಿಂಗಳು ಕೇವಲ 5,000 ರೂ. ಹೂಡಿಕೆ ಮಾಡಬಹುದು. ಇದರಿಂದ 10 ವರ್ಷಗಳಲ್ಲಿ ನೀವು 8.54 ಲಕ್ಷ ರೂ. ಗಳಿಕೆ ಮಾಡಬಹುದು. ಇದರಲ್ಲಿ ನಿಮಗೆ 2.54 ಲಕ್ಷ ರೂಪಾಯಿ ಬಡ್ಡಿಯಿಂದಲೇ ಸಿಗುತ್ತದೆ ಎಂಬುದು ಗೊತ್ತಿರಲಿ.
