ವಾಷಿಂಗ್ಟನ್: “ನಾನೇ ಮುಂದಿನ ಪೋಪ್ ಆಗಲು ಇಷ್ಟಪಡುತ್ತೇನೆ” ಎಂದು ತಮಾಷೆಯಾಗಿ ಹೇಳಿದ್ದ ಕೆಲವೇ ದಿನಗಳ ಬಳಿಕ, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್(Donald Trump) ಅವರು ಈಗ ಪೋಪ್(Pope)ರನ್ನು ಹೋಲುವ ವೇಷಭೂಷಣ ಧರಿಸಿರುವಂಥ ಎಐ-ರಚಿತ ತಮ್ಮದೇ ಚಿತ್ರವೊಂದನ್ನು ಪೋಸ್ಟ್ ಮಾಡುವ ಮೂಲಕ ಅಚ್ಚರಿ ಮೂಡಿಸಿದ್ದಾರೆ.
ಶ್ವೇತಭವನದ ಅಧಿಕೃತ ಹ್ಯಾಂಡಲ್‌ನಲ್ಲಿ ಈ ಚಿತ್ರವನ್ನು ಅವರು ಅಪ್ ಲೋಡ್ ಮಾಡಿದ್ದಾರೆ. ಅವರ ಈ ಪೋಸ್ಟ್‌ಗೆ ಸಾಮಾಜಿಕ ಜಾಲತಾಣಗಳ ಬಳಕೆದಾರರಿಂದ ಭಾರೀ ಆಕ್ಷೇಪ ವ್ಯಕ್ತವಾಗಿದೆ. ಪೋಪ್ ಫ್ರಾನ್ಸಿಸ್ ಅವರ ನಿಧನದ ನಂತರ ಟ್ರಂಪ್ ಅವರು ಸಂವೇದನಾರಹಿತವಾಗಿ ಈ ರೀತಿಯ ಪೋಸ್ಟ್ ಹಂಚಿಕೊಂಡಿದ್ದಾರೆ ಎಂದು ಅನೇಕರು ಕಿಡಿಕಾರಿದ್ದಾರೆ.
ಚಿತ್ರದಲ್ಲಿ ಟ್ರಂಪ್ ಅವರು ಪೋಪ್‌ರಂತೆಯೇ ವೇಷಭೂಷಣ ಧರಿಸಿ, ಕುತ್ತಿಗೆಗೆ ಶಿಲುಬೆಯನ್ನು ಧರಿಸಿರುವುದನ್ನು ತೋರಿಸುತ್ತದೆ. ಕೆಲವು ಬಳಕೆದಾರರು ಇದನ್ನು ಹಾಸ್ಯವಾಗಿ ಪರಿಗಣಿಸಿದರೆ, ಇತರರು ಪೋಪೋ ಫ್ರಾನ್ಸಿಸ್ ಅವರ ಅಂತ್ಯಕ್ರಿಯೆಯಲ್ಲಿ ಭಾಗವಹಿಸಿ ವಾಪಸಾದ ಟ್ರಂಪ್ ಈಗ ಅವರ ಸಾವನ್ನು ಅಪಹಾಸ್ಯ ಮಾಡಿದ್ದಾರೆ ಎಂದು ಆರೋಪಿಸಿದ್ದಾರೆ.
ರೋಮನ್ ಕ್ಯಾಥೊಲಿಕ್ ಚರ್ಚ್ ಅನ್ನು ಮುನ್ನಡೆಸಿದ ಮೊದಲ ಲ್ಯಾಟಿನ್ ಅಮೆರಿಕನ್ ಎಂಬ ಖ್ಯಾತಿಗೆ ಪಾತ್ರರಾಗಿದ್ದ ಪೋಪ್ ಫ್ರಾನ್ಸಿಸ್ ಅವರು ಏಪ್ರಿಲ್ 22 ರಂದು ತಮ್ಮ 88ನೇ ವಯಸ್ಸಿನಲ್ಲಿ ನಿಧನರಾದರು. ಏಪ್ರಿಲ್ 26 ರಂದು ಸೇಂಟ್ ಪೀಟರ್ಸ್ ಸ್ಕ್ವೇರ್‌ನಲ್ಲಿ ನಡೆದ ಪೋಪ್ ಅವರ ಅಂತ್ಯಕ್ರಿಯೆಯಲ್ಲಿ ಭಾಗವಹಿಸಿದ ಜಾಗತಿಕ ನಾಯಕರಲ್ಲಿ ಟ್ರಂಪ್ ಕೂಡ ಒಬ್ಬರಾಗಿದ್ದರು.
ಇದಾದ ಬಳಿಕ, ಸುದ್ದಿಗಾರರ ಪ್ರಶ್ನೆಯೊಂದಕ್ಕೆ ಉತ್ತರಿಸುವ ವೇಳೆ ಟ್ರಂಪ್ ಅವರು ಜೋಕ್ ಎಂಬಂತೆ, ನಾನೇ ಮುಂದಿನ ಪೋಪ್ ಆಗಲು ಇಷ್ಟಪಡುತ್ತೇನೆ ಎಂದಿದ್ದರು. “ಪೋಪ್? ನಾನೇ ಪೋಪ್ ಆಗಲು ಬಯಸುತ್ತೇನೆ. ಅದೇ ನನ್ನ ಮೊದಲ ಆಯ್ಕೆಯಾಗಿದೆ” ಎಂದು ಟ್ರಂಪ್ ಹೇಳಿದ್ದರು. ಇದರ ಬೆನ್ನಲ್ಲೇ ಟ್ರಂಪ್ ಅವರು ಪೋಸ್ಟ್ ಮಾಡಿರುವ ತಮ್ಮ ಹೊಸ “ಅವತಾರ”ಕ್ಕೆ ಸಾಮಾಜಿಕ ಮಾಧ್ಯಮ ಬಳಕೆದಾರರ ಒಂದು ವರ್ಗ ತೀವ್ರ ಆಕ್ರೋಶ ವ್ಯಕ್ತಪಡಿಸಿದೆ. ಇನ್ನೊಂದು ವರ್ಗ, ಇದು “ವ್ಯಾಟಿಕನ್ ಅನ್ನು ಮತ್ತೆ ಶ್ರೇಷ್ಠಗೊಳಿಸುವ ಸಮಯ” ಎಂದು ಹೇಳುವ ಮೂಲಕ ಟ್ರಂಪ್ ಪರ ಬ್ಯಾಟಿಂಗ್ ಮಾಡಿದ್ದಾರೆ.
ಈ ಪೋಸ್ಟ್ ಚರ್ಚ್ ಮತ್ತು ಸ್ವತಃ ದೇವರಿಗೆ ತೋರಿರುವ ಅಗೌರವ ಎಂದು ಕೆಲವರು ಹೇಳಿದ್ದಾರೆ. ಜತೆಗೆ ರಿಪಬ್ಲಿಕನ್ನರು ನಿಜವಾಗಿಯೂ ಇಂಥದ್ದಕ್ಕೆ ಮತ ಚಲಾಯಿಸಿದರೇ ಎಂದೂ ಪ್ರಶ್ನಿಸಿದ್ದಾರೆ. “ಹೊಸ ಪೋಪ್ ಅನ್ನು ಆಯ್ಕೆ ಮಾಡಲು ಕ್ಯಾಥೊಲಿಕರಾದ ನಾವು ನಡೆಸುವ ಪ್ರಕ್ರಿಯೆಯನ್ನು ಅಣಕಿಸಲು ನಿಮಗೆ ಎಷ್ಟು ಧೈರ್ಯ?” ಎಂದು ಮತ್ತೊಬ್ಬರು ಪ್ರಶ್ನಿಸಿದ್ದಾರೆ.
2,000 ವರ್ಷಗಳಷ್ಟು ಹಳೆಯದಾದ ಕ್ಯಾಥೊಲಿಕ್ ಚರ್ಚ್ ಫ್ರಾನ್ಸಿಸ್ ಅವರ ನಿಧನದ ನಂತರ ಮುಂದಿನ ಪೋಪ್ ಅನ್ನು ಇನ್ನೂ ಘೋಷಿಸಿಲ್ಲ. ಕೆಲವೇ ದಿನಗಳಲ್ಲಿ ಹೊಸ ಪೋಪ್ ಆಯ್ಕೆ ಪ್ರಕ್ರಿಯೆ ಆರಂಭವಾಗಲಿದೆ.
