ಕಾರಿನೊಳಗೆ ಕುಳಿತೇ ಪ್ಲೇ-ಸ್ಟೇಷನ್ ಗೇಮ್ ಆಡಬಹುದು! ಸೋನಿ-ಹೋಂಡಾ ಎಲೆಕ್ಟ್ರಿಕ್ ಕಾರು ‘ಅಫೀಲಾ’ದ ವಿಶೇಷತೆಗಳೇನು?

ನವದೆಹಲಿ: ಟ್ರಾಫಿಕ್ ಜಾಮ್‌ನಲ್ಲಿ ಸಿಲುಕಿಕೊಂಡಾಗ ಅಥವಾ ಲಾಂಗ್ ಡ್ರೈವ್ ಹೋಗುವಾಗ ಬೋರ್ ಆಗುತ್ತಿದೆಯೇ? ಹಾಗಾದರೆ ಜಪಾನಿನ ಟೆಕ್ ದೈತ್ಯ ‘ಸೋನಿ’ (Sony) ನಿಮಗಾಗಿಯೇ ಒಂದು ತಂತ್ರಜ್ಞಾನವನ್ನು ಕಾರಿನೊಳಗೆ ತರುತ್ತಿದೆ. ಕಾರು ಕೇವಲ ಪ್ರಯಾಣಕ್ಕಷ್ಟೇ ಅಲ್ಲ, ಮನರಂಜನೆಗೂ ಒಂದು ಅತ್ಯುತ್ತಮ ತಾಣವಾಗಬೇಕು ಎಂಬ ಉದ್ದೇಶದಿಂದ ಸೋನಿ ಮತ್ತು ಹೋಂಡಾ ಕಂಪನಿಗಳು ಕೈಜೋಡಿಸಿ ಅಭಿವೃದ್ಧಿಪಡಿಸುತ್ತಿರುವ ಬಹುನಿರೀಕ್ಷಿತ ಎಲೆಕ್ಟ್ರಿಕ್ ಕಾರು ‘ಅಫೀಲಾ’ (Afeela) ಶೀಘ್ರದಲ್ಲೇ ಮಾರುಕಟ್ಟೆಗೆ ಲಗ್ಗೆ ಇಡಲಿದೆ.

ಈ ಎಲೆಕ್ಟ್ರಿಕ್ ಕಾರಿನ ಪ್ರಮುಖ ಹೈಲೈಟ್ ಏನೆಂದರೆ, ಇದರಲ್ಲಿ ನೀವು ‘ಪ್ಲೇ-ಸ್ಟೇಷನ್’ (PlayStation) ಗೇಮ್‌ಗಳನ್ನು ಆಡಬಹುದು! ಹೌದು, ಸೋನಿ ಹೋಂಡಾ ಮೊಬಿಲಿಟಿ (SHM) ಸಂಸ್ಥೆ ಅಧಿಕೃತವಾಗಿ ಈ ವಿಚಾರವನ್ನು ಘೋಷಿಸಿದ್ದು, ಕಾರಿನ ಇನ್ಫೋಟೈನ್‌ಮೆಂಟ್ ಸಿಸ್ಟಮ್ ಜೊತೆಗೆ ಪ್ಲೇ-ಸ್ಟೇಷನ್ ಅನ್ನು ಸಂಪೂರ್ಣವಾಗಿ ಇಂಟಿಗ್ರೇಟ್ ಮಾಡಲಾಗಿದೆ.

ಏನಿದು ‘ಪಿಎಸ್ ರಿಮೋಟ್ ಪ್ಲೇ’ (PS Remote Play)?

ಸೋನಿ ಪರಿಚಯಿಸುತ್ತಿರುವ ಈ ತಂತ್ರಜ್ಞಾನದ ಹೆಸರು ‘ಪಿಎಸ್ ರಿಮೋಟ್ ಪ್ಲೇ’. ಇದು ವಿಶ್ವದ ಮೊದಲ ಅಂತಹ ಕಾರು ಎಂಬ ಹೆಗ್ಗಳಿಕೆಗೆ ಪಾತ್ರವಾಗಲಿದೆ.

ಹೇಗೆ ಕೆಲಸ ಮಾಡುತ್ತೆ?: ಬಳಕೆದಾರರು ತಮ್ಮ ಮನೆಯಲ್ಲಿರುವ PS5 ಅಥವಾ PS4 ಕನ್ಸೋಲ್ ಅನ್ನು ಕಾರಿನ ಡಿಸ್‌ಪ್ಲೇ ಮೂಲಕ ರಿಮೋಟ್ ಆಗಿ ಕನೆಕ್ಟ್ ಮಾಡಿಕೊಂಡು ಗೇಮ್ ಆಡಬಹುದು.

ಆಡಿಯೋ ಅನುಭವ: ಕಾರಿನ ಅತ್ಯಾಧುನಿಕ ಸರೌಂಡ್ ಸೌಂಡ್ ಸಿಸ್ಟಮ್ ಜೊತೆಗೆ ಗೇಮ್ ಆಡಿಯೋ ಕೂಡ ಸಿಂಕ್ ಆಗಲಿದ್ದು, ಥಿಯೇಟರ್ ಮಾದರಿಯ ಗೇಮಿಂಗ್ ಅನುಭವ ಸಿಗಲಿದೆ.

ಸುರಕ್ಷತೆ ಬಗ್ಗೆ ಚಿಂತೆ ಬೇಡ!

ಡ್ರೈವಿಂಗ್ ಮಾಡುವಾಗ ಗೇಮ್ ಆಡುವುದು ಅಪಾಯಕಾರಿಯಲ್ಲವೇ ಎಂಬ ಪ್ರಶ್ನೆ ನಿಮ್ಮಲ್ಲಿ ಮೂಡಬಹುದು. ಇದಕ್ಕೆ ಸೋನಿ ಸ್ಪಷ್ಟ ಉತ್ತರ ನೀಡಿದೆ:
ಚಾಲಕರಿಗೆ: ಕಾರು ಪಾರ್ಕ್ ಮಾಡಿದ್ದಾಗ (Parked Mode) ಮಾತ್ರ ಡ್ರೈವರ್‌ಗೆ ಗೇಮ್ ಆಡಲು ಅವಕಾಶವಿರುತ್ತದೆ.

ಪ್ರಯಾಣಿಕರಿಗೆ: ಹಿಂಬದಿ ಸೀಟಿನಲ್ಲಿ ಕುಳಿತು ಪ್ರಯಾಣಿಸುವವರು ಚಲಿಸುವ ಕಾರಿನಲ್ಲಿಯೂ (On the go) ಆಟವನ್ನು ಆನಂದಿಸಬಹುದು.

ಒಳಾಂಗಣ ವಿನ್ಯಾಸ (Interiors):

‘ಅಫೀಲಾ’ ಕಾರಿನ ಡ್ಯಾಶ್‌ಬೋರ್ಡ್ ಪೂರ್ತಿ ಸ್ಕ್ರೀನ್‌ಗಳಿಂದ ತುಂಬಿರಲಿದೆ. ಮುಂಭಾಗದಲ್ಲಿ ವಾಹನ ಮಾಹಿತಿ ಮತ್ತು ಮನರಂಜನೆಗಾಗಿ ಒಟ್ಟು ಮೂರು ಡಿಸ್‌ಪ್ಲೇಗಳು ಇರಲಿದ್ದು, ಹಿಂಬದಿ ಪ್ರಯಾಣಿಕರಿಗೂ ಪ್ರತ್ಯೇಕ ಎರಡು ಸ್ಕ್ರೀನ್‌ಗಳನ್ನು ನೀಡಲಾಗಿದೆ.

ಬೆಲೆ ಮತ್ತು ಲಭ್ಯತೆ:

ಈ ಕಾರು 2026ರಲ್ಲಿ ಬಿಡುಗಡೆಯಾಗುವ ನಿರೀಕ್ಷೆಯಿದೆ.

ಬೆಲೆ: ಅಮೆರಿಕ ಮಾರುಕಟ್ಟೆಯಲ್ಲಿ ಇದರ ಆರಂಭಿಕ ಬೆಲೆ 1,02,000 ಡಾಲರ್ (ಭಾರತೀಯ ರೂಪಾಯಿಗಳಲ್ಲಿ ಅಂದಾಜು 91.40 ಲಕ್ಷ ರೂಪಾಯಿ).
ರೇಂಜ್: 91kWh ಸಾಮರ್ಥ್ಯದ ಬ್ಯಾಟರಿ ಪ್ಯಾಕ್ ಹೊಂದಿರಲಿದ್ದು, ಒಂದು ಬಾರಿ ಚಾರ್ಜ್ ಮಾಡಿದರೆ ಸುಮಾರು 482 ಕಿ.ಮೀ (300 ಮೈಲಿ) ಓಡುವ ಸಾಮರ್ಥ್ಯ ಹೊಂದಿದೆ ಎಂದು ಕಂಪನಿ ಹೇಳಿಕೊಂಡಿದೆ.

ಭಾರತಕ್ಕೆ ಬರುತ್ತಾ?

ಸದ್ಯದ ಮಾಹಿತಿಯ ಪ್ರಕಾರ, ‘ಅಫೀಲಾ’ ಭಾರತೀಯ ಮಾರುಕಟ್ಟೆಗೆ ಬರುವ ಸಾಧ್ಯತೆ ತೀರಾ ಕಡಿಮೆ. ಆದರೆ, ಈ ಹಿಂದೆ 2003ರಲ್ಲಿ ಟಾಟಾ ಸಫಾರಿ (Tata Safari) ಲಿಮಿಟೆಡ್ ಎಡಿಷನ್‌ನಲ್ಲಿ ಫ್ಯಾಕ್ಟರಿ ಫಿಟೆಡ್ ಪ್ಲೇ-ಸ್ಟೇಷನ್ 2 ಅನ್ನು ನೀಡಲಾಗಿತ್ತು ಎಂಬುದು ಆಟೋ ಪ್ರಿಯರಿಗೆ ನೆನಪಿರಬಹುದು. ಈಗ ಸೋನಿ ಅದನ್ನು ಮುಂದಿನ ಹಂತಕ್ಕೆ ಕೊಂಡೊಯ್ಯುತ್ತಿದೆ.

ಇದನ್ನೂ ಓದಿ : ತಂಗಿಯ ಮದುವೆಗೆ ಭಿಕ್ಷುಕರನ್ನೇ ಅತಿಥಿಗಳಾಗಿ ಕರೆಸಿದ ಅಣ್ಣ | ವಿಡಿಯೋ ವೈರಲ್‌