ಹೊಸ ಕಾರು ಕೊಳ್ಳುವ ಪ್ಲಾನ್ ಇದೆಯಾ? ಹಾಗಾದ್ರೆ ಸ್ವಲ್ಪ ದಿನ ಕಾಯಿರಿ.. ಬರ್ತಿದೆ ಹೊಸ ಅವತಾರದಲ್ಲಿ ಮಾರುತಿ ಬ್ರೆಝಾ!

ಬೆಂಗಳೂರು : ನೀವು ಮಾರುತಿ ಸುಜುಕಿ ಬ್ರೆಝಾ (Maruti Suzuki Brezza) ಕಾರನ್ನು ಖರೀದಿಸಲು ಯೋಜಿಸುತ್ತಿದ್ದೀರಾ? ಹಾಗಿದ್ದರೆ ಸ್ವಲ್ಪ ದಿನ ಕಾಯುವುದು ಜಾಣತನ. ಏಕೆಂದರೆ, ಶೀಘ್ರದಲ್ಲೇ ಮಾರುಕಟ್ಟೆಗೆ ಲಗ್ಗೆ ಇಡಲಿರುವ ಬ್ರೆಝಾ ಫೇಸ್‌ಲಿಫ್ಟ್ ಆವೃತ್ತಿಯು ಪ್ರಮುಖವಾದ ಯಾಂತ್ರಿಕ ಬದಲಾವಣೆಗಳೊಂದಿಗೆ ಬರಲಿದೆ ಎಂದು ವರದಿಯಾಗಿದೆ.

ಇತ್ತೀಚೆಗೆ ಸೋರಿಕೆಯಾದ ಸ್ಪೈ ಶಾಟ್‌ಗಳ (Spy Shots) ಪ್ರಕಾರ, ಹೊಸ ಬ್ರೆಝಾ ಕಾರಿನಲ್ಲಿ 6-ಸ್ಪೀಡ್ ಮ್ಯಾನುವಲ್ ಗೇರ್‌ಬಾಕ್ಸ್ ಮತ್ತು ಟರ್ಬೊ-ಪೆಟ್ರೋಲ್ ಎಂಜಿನ್ ಆಯ್ಕೆ ಲಭ್ಯವಾಗುವ ಸಾಧ್ಯತೆಯಿದೆ. ಇದು ಕಾರಿನ ಮೌಲ್ಯ ಮತ್ತು ಕಾರ್ಯಕ್ಷಮತೆಯನ್ನು ಹೆಚ್ಚಿಸಲಿದೆ.

6-ಸ್ಪೀಡ್ ಗೇರ್‌ಬಾಕ್ಸ್ ಮತ್ತು ಟರ್ಬೊ ಎಂಜಿನ್

ಪ್ರಸ್ತುತ ಮಾರುಕಟ್ಟೆಯಲ್ಲಿರುವ ಬ್ರೆಝಾ ಕಾರು 5-ಸ್ಪೀಡ್ ಮ್ಯಾನುವಲ್ ಗೇರ್‌ಬಾಕ್ಸ್ ಹೊಂದಿದೆ. ಆದರೆ, ಪರೀಕ್ಷಾರ್ಥ ಸಂಚಾರದ ವೇಳೆ ಕಂಡುಬಂದ ಹೊಸ ಮಾದರಿಯ ಕಾರಿನ ಒಳಾಂಗಣದಲ್ಲಿ 6-ಸ್ಪೀಡ್ ಗೇರ್ ಲಿವರ್ ಇರುವುದು ಗಮನಕ್ಕೆ ಬಂದಿದೆ.

ಅಷ್ಟೇ ಅಲ್ಲದೆ, ಈ ಹೊಸ ಗೇರ್‌ಬಾಕ್ಸ್ ಅನ್ನು ಮಾರುತಿ ಫ್ರಾಂಕ್ಸ್‌ನಲ್ಲಿ (Fronx) ಬಳಸಲಾಗಿರುವ 1.0-ಲೀಟರ್ ಬೂಸ್ಟರ್‌ಜೆಟ್ ಟರ್ಬೊ-ಪೆಟ್ರೋಲ್ ಎಂಜಿನ್‌ನೊಂದಿಗೆ ಜೋಡಿಸುವ ಸಾಧ್ಯತೆಯಿದೆ. ಪ್ರಸ್ತುತ ಬ್ರೆಝಾ ಕೇವಲ 1.5-ಲೀಟರ್ ನ್ಯಾಚುರಲಿ ಆಸ್ಪಿರೇಟೆಡ್ ಪೆಟ್ರೋಲ್ ಎಂಜಿನ್ ಹೊಂದಿದೆ. ಈ ವಿಭಾಗದ ಇತರೆ ಕಾರುಗಳಲ್ಲಿ ಟರ್ಬೊ ಎಂಜಿನ್ ಸಾಮಾನ್ಯವಾಗಿದ್ದು, ಬ್ರೆಝಾದಲ್ಲಿ ಈ ಕೊರತೆ ಎದ್ದು ಕಾಣುತ್ತಿತ್ತು. ಹೊಸ ಅಪ್‌ಡೇಟ್ ಮೂಲಕ ಮಾರುತಿ ಈ ಕೊರತೆಯನ್ನು ನೀಗಿಸಲಿದೆ.

ತೆರಿಗೆ ಲಾಭ ಮತ್ತು ಬೆಲೆ

ಒಂದು ವೇಳೆ 1.0-ಲೀಟರ್ ಟರ್ಬೊ ಎಂಜಿನ್ ಅಳವಡಿಸಿದರೆ, ಇದು ಗ್ರಾಹಕರಿಗೆ ಬೆಲೆಯ ವಿಚಾರದಲ್ಲಿ ಲಾಭದಾಯಕವಾಗಬಹುದು. ನಿಯಮಗಳ ಪ್ರಕಾರ, 4 ಮೀಟರ್‌ಗಿಂತ ಕಡಿಮೆ ಉದ್ದದ ಮತ್ತು 1,200 ಸಿಸಿಗಿಂತ ಕಡಿಮೆ ಸಾಮರ್ಥ್ಯದ ಪೆಟ್ರೋಲ್ ಕಾರುಗಳು ಶೇ. 18ರಷ್ಟು ಜಿಎಸ್‌ಟಿ ವ್ಯಾಪ್ತಿಗೆ ಬರುತ್ತವೆ. ಪ್ರಸ್ತುತವಿರುವ 1.5-ಲೀಟರ್ ಎಂಜಿನ್ ಶೇ. 40ರಷ್ಟು ಹೆಚ್ಚಿನ ತೆರಿಗೆ ವ್ಯಾಪ್ತಿಯಲ್ಲಿದೆ. ಈ ತೆರಿಗೆ ಕಡಿತದ ಲಾಭವನ್ನು ಕಂಪನಿ ಗ್ರಾಹಕರಿಗೆ ವರ್ಗಾಯಿಸಿದರೆ, ಟರ್ಬೊ ಮಾದರಿಯ ಬೆಲೆ ಸ್ಪರ್ಧಾತ್ಮಕವಾಗಿರಲಿದೆ.

ಇತರೆ ಬದಲಾವಣೆಗಳೇನು?

ಕೇವಲ ಎಂಜಿನ್ ಅಷ್ಟೇ ಅಲ್ಲ, ಒಳಾಂಗಣ ಮತ್ತು ಹೊರಭಾಗದಲ್ಲೂ ಕೆಲವು ಬದಲಾವಣೆಗಳನ್ನು ನಿರೀಕ್ಷಿಸಲಾಗಿದೆ. ಪ್ರಸ್ತುತವಿರುವ 9 ಇಂಚಿನ ಸ್ಕ್ರೀನ್ ಬದಲು ದೊಡ್ಡದಾದ 10.1 ಇಂಚಿನ ಇನ್ಫೋಟೈನ್‌ಮೆಂಟ್ ಸಿಸ್ಟಮ್, ಹೊಸ ಅಪ್‌ಹೋಲ್ಸ್ಟರಿ ಮತ್ತು ಹೆಚ್ಚಿನ ಫೀಚರ್‌ಗಳು ಇರಲಿವೆ. ಹೊಸ ವಿನ್ಯಾಸದ ಮುಂಭಾಗದ ಬಂಪರ್, ಫಾಗ್ ಲ್ಯಾಂಪ್ ಹೌಸಿಂಗ್, ಹೊಸ ಅಲಾಯ್ ವೀಲ್‌ಗಳು ಮತ್ತು ಕನೆಕ್ಟೆಡ್ ಎಲ್‌ಇಡಿ ಟೈಲ್ ಲ್ಯಾಂಪ್‌ಗಳು ಕಾರಿನ ಅಂದ ಹೆಚ್ಚಿಸಲಿವೆ. ಈ ಹೊಸ ಬ್ರೆಝಾ ಹಬ್ಬದ ಋತುವಿನಲ್ಲಿ ಅಥವಾ 2 ಟಾಟಾ ನೆಕ್ಸಾನ್, ಕಿಯಾ ಸಾನ್, ಹ್ಯುಂಡೈ ವೆನ್ಯೂ ಮತ್ತು ಮಹೀಂದ್ರಾ ಎಕ್ಸ್‌ಯುವಿ 3XO ಕಾರುಗಳಿಗೆ ಪ್ರಬಲ ಪೈಪೋಟಿ ನೀಡಲಿದೆ.

ಇದನ್ನೂ ಓದಿ ; ಡ್ರಗ್ ಪೆಡ್ಲಿಂಗ್‌ | ವಿದೇಶಿ ಫುಟ್ಬಾಲ್ ಆಟಗಾರ ಬೆಂಗಳೂರಲ್ಲಿ ಬಂಧನ..!