ವಾಷಿಂಗ್ಟನ್: ಮಂಗಳ ಗ್ರಹದ ನೆಲದಲ್ಲಿ ಓಡಾಡುತ್ತಿರುವ ನಾಸಾದ ಪರ್ಸೆವೆರೆನ್ಸ್ ರೋವರ್(Nasa Rover) ಮಂಗಳನ ಆಗಸದಲ್ಲಿ ಮೊದಲ ಬಾರಿಗೆ ಹಸಿರು ಬಣ್ಣದ ಒಂದು ಅಪೂರ್ವ ಹೊಳಪನ್ನು ಸೆರೆ ಹಿಡಿದಿದೆ. 2024ರ ಮಾರ್ಚ್ 15ರಂದು ಸೂರ್ಯನಲ್ಲಿ ಉಂಟಾದ ಭಾರೀ ಸೌರ ಮಾರುತದಿಂದಾಗಿ ಈ ಘಟನೆ ಸಂಭವಿಸಿದ್ದು, ಈ ಮಾರುತವು ಮಂಗಳದ ವಾತಾವರಣದಲ್ಲಿ ವಿದ್ಯುತ್ ಕಣಗಳನ್ನು ಚಿಮ್ಮಿಸಿ, ಆಗಸದಲ್ಲಿ ಈ ಸುಂದರವಾದ ಹಸಿರು ಬೆಳಕನ್ನು ಸೃಷ್ಟಿಸಿತು ಎಂದು ವಿಜ್ಞಾನಿಗಳು ತಿಳಿಸಿದ್ದಾರೆ. ಈ ಐತಿಹಾಸಿಕ ಕ್ಷಣವನ್ನು ಪರ್ಸೆವೆರೆನ್ಸ್ ರೋವರ್ನ ಮಾಸ್ಟ್ಕ್ಯಾಮ್-ಝಡ್ ಉಪಕರಣವು ಚಿತ್ರೀಕರಿಸಿದ್ದು, ಇದು ವೈಜ್ಞಾನಿಕ ಸಂಶೋಧನೆಗೆ ಹೊಸ ದಿಕ್ಕನ್ನು ತೋರಿದೆ.
2024ರ ಮಾರ್ಚ್ 15ರಂದು ಸೂರ್ಯನಿಂದ ಒಂದು ಶಕ್ತಿಯುತ ಸೌರ ಜ್ವಾಲೆ (ಸೋಲಾರ್ ಫ್ಲೇರ್) ಹಾಗೂ ಕೊರೊನಲ್ ಮಾಸ್ ಇಜೆಕ್ಷನ್ (CME) ಎಂಬ ಗ್ಯಾಸ್ ಮತ್ತು ಕಾಂತೀಯ ಶಕ್ತಿಯ ಭಾರೀ ಸ್ಫೋಟ ಸಂಭವಿಸಿತ್ತು. ಈ ಸ್ಫೋಟವು ಭಾರೀ ಪ್ರಮಾಣದ ಸೌರ ವಿದ್ಯುತ್ ಕಣಗಳನ್ನು (Solar Energetic Particles – SEP) ಬಾಹ್ಯಾಕಾಶಕ್ಕೆ ಚಿಮ್ಮಿಸಿತು. ಈ ಕಣಗಳು ಕೆಲವು ದಿನಗಳಲ್ಲಿ ಮಂಗಳ ಗ್ರಹವನ್ನು ತಲುಪಿದ್ದು, ಅದರ ವಾತಾವರಣದೊಂದಿಗೆ ಸಂಪರ್ಕಕ್ಕೆ ಬಂದಾಗ, ಆಕಾಶದಲ್ಲಿ ಹಸಿರು ಬಣ್ಣದ ಅರೊರಾ (Aurora) ಕಾಣಿಸಿಕೊಂಡಿತು. ಇದು 557.7 ನ್ಯಾನೊಮೀಟರ್ನ ತರಂಗಾಂತರದಲ್ಲಿ ಬೆಳಕನ್ನು ಹೊರಸೂಸಿದ್ದು, ಇದು ಆಕ್ಸಿಜನ್ ಅಯಾನೀಕರಣದಿಂದ ಗೋಚರಿಸುವ ಬೆಳಕಾಗಿದೆ ಎಂದು ವಿಜ್ಞಾನಿಗಳು ಹೇಳಿದ್ದಾರೆ.
ಈ ಅರುಣಶೋಭೆಯ ವಿಶೇಷತೆ ಏನು?
ಅರೋರಾ ಎಂದರೆ ರಾತ್ರಿಯ ಹೊತ್ತು ಆಗಸದಲ್ಲಿ ಕಾಣುವ ವರ್ಣರಂಜಿತ ಬೆಳಕಿವಾಟ. ಭೂಮಿಯಂತೆಯೇ ಮಂಗಳ ಗ್ರಹದಲ್ಲೂ ಈ ಅರೋರಾ ಕಾಣಿಸಿಕೊಳ್ಳುತ್ತವೆ ಎಂದು ವಿಜ್ಞಾನಿಗಳು ಊಹಿಸಿದ್ದರು. ಆದರೆ, ಭೂಮಿಯ ಅರೋರಾಗಳು ಗ್ರಹದ ಕಾಂತಕ್ಷೇತ್ರದಿಂದ ನಿಯಂತ್ರಿತವಾಗಿದ್ದರೆ, ಮಂಗಳ ಗ್ರಹಕ್ಕೆ ಜಾಗತಿಕ ಕಾಂತಕ್ಷೇತ್ರ ಇಲ್ಲದಿರುವುದರಿಂದ, ಇಲ್ಲಿನ ಅರೋರಾಗಳು ವಿಭಿನ್ನವಾಗಿರುತ್ತವೆ. ಮಂಗಳದ ಅರೋರಾಗಳು ಸಾಮಾನ್ಯವಾಗಿ ಅತಿನೇರಳೆ (Ultraviolet) ಬೆಳಕಿನಲ್ಲಿ ಕಾಣಿಸಿಕೊಳ್ಳುತ್ತವೆ, ಆದರೆ ಈ ಬಾರಿ ಮಾನವ ಕಣ್ಣಿಗೆ ಗೋಚರವಾಗುವ ಹಸಿರು ಬೆಳಕಿನ ಅರೋರಾ ರೋವರ್ ಕಣ್ಣಲ್ಲಿ ಸೆರೆಯಾಗಿದೆ. ಇದು ವಿಜ್ಞಾನಿಗಳಿಗೆ ಒಂದು ಆಶ್ಚರ್ಯಕರ ಮತ್ತು ರೋಮಾಂಚಕ ಕ್ಷಣವಾಗಿದೆ.
ಇದನ್ನೂ ಓದಿ: Sunita Williams: ಸುನೀತಾ ವಿಲಿಯಮ್ಸ್ ಭೂಮಿಗೆ ಬರಲು ದಿನಾಂಕ ನಿಗದಿ; ನಾಸಾ ಮಹತ್ವದ ಹೇಳಿಕೆ
ವೈಜ್ಞಾನಿಕ ಮಹತ್ವವೇನು?
ಪರ್ಸೆವೆರೆನ್ಸ್ ರೋವರ್ನ ಸೂಪರ್ಕ್ಯಾಮ್ ಸ್ಪೆಕ್ಟ್ರೋಮೀಟರ್ ಮತ್ತು ಮಾಸ್ಟ್ಕ್ಯಾಮ್-ಝಡ್ ಕ್ಯಾಮೆರಾಗಳನ್ನು ಬಳಸಿಕೊಂಡು ವಿಜ್ಞಾನಿಗಳ ತಂಡವು ಈ ಅರೋರಾವನ್ನು ದೃಶ್ಯ ಬೆಳಕಿನಲ್ಲಿ ಚಿತ್ರೀಕರಿಸಿದೆ. ಈ ಆವಿಷ್ಕಾರವು ಕೆಂಪು ಗ್ರಹದ ವಾತಾವರಣ ಮತ್ತು ಅದರ ಹವಾಮಾನ ಅಧ್ಯಯನಕ್ಕೆ ಹೊಸ ದಾರಿಯನ್ನು ತೆರೆಯುತ್ತದೆ. ಒಸ್ಲೋ ವಿಶ್ವವಿದ್ಯಾಲಯದ ಸಂಶೋಧಕಿ ಎಲೀಸ್ ಕ್ನಟ್ಸೆನ್ ಅವರು, “ಈ ಆವಿಷ್ಕಾರವು ಅರೊರಾ ಸಂಶೋಧನೆಗೆ ಹೊಸ ಸಾಧ್ಯತೆಗಳನ್ನು ತೆರೆಯುತ್ತದೆ ಮತ್ತು ಭವಿಷ್ಯದಲ್ಲಿ ಮಂಗಳದ ಮೇಲ್ಮೈಯಿಂದ ಗಗನಯಾತ್ರಿಗಳಿಗೆ ಈ ವರ್ಣರಂಜಿತ ಬೆಳಕಿನಾಟ ಗೋಚರವಾಗಬಹುದು ಎಂಬುದನ್ನು ಖಚಿತಪಡಿಸುತ್ತದೆ” ಎಂದು ತಿಳಿಸಿದ್ದಾರೆ. ಈ ದೃಶ್ಯವು ಮಂಗಳದ ವಾತಾವರಣದ ಸಂಯೋಜನೆ, ಅದರ ರಾಸಾಯನಿಕ ಕ್ರಿಯೆಗಳು ಮತ್ತು ಕಾಲಾನಂತರದ ಬದಲಾವಣೆಗಳನ್ನು ಅರ್ಥಮಾಡಿಕೊಳ್ಳಲು ಸಹಾಯಕವಾಗಿದೆ. ಪರ್ಸೆವೆರೆನ್ಸ್ ರೋವರ್ ಸೆರೆಹಿಡಿದಿರುವ ಈ ಅದ್ಭುತ ಚಿತ್ರವು ಕೇವಲ ವೈಜ್ಞಾನಿಕ ಸಾಧನೆಯಷ್ಟೇ ಅಲ್ಲ, ಭವಿಷ್ಯದ ಯೋಜನೆಗಳಿಗೂ ಸ್ಫೂರ್ತಿಯಾಗಿದೆ. ಪರ್ಸೆವೆರೆನ್ಸ್ ರೋವರ್ನ ಈ ಆವಿಷ್ಕಾರವು ಮಂಗಳ ಗ್ರಹದ ಅಧ್ಯಯನದಲ್ಲಿ ಒಂದು ಮಹತ್ವದ ಮೈಲಿಗಲ್ಲಾಗಿದೆ. ಈ ಹಸಿರು ಬೆಳಕಿನಾಟದ ಚಿತ್ರವು ಕೇವಲ ವೈಜ್ಞಾನಿಕವಾಗಿ ಮಾತ್ರವಲ್ಲ, ಭಾವನಾತ್ಮಕವಾಗಿಯೂ ಒಂದು ಸ್ಫೂರ್ತಿದಾಯಕ ಕ್ಷಣವಾಗಿದೆ ಎಂದಿದ್ದಾರೆ ವಿಜ್ಞಾನಿಗಳು.
