ಬೆಂಗಳೂರು: ಇಂಡಿಯಾ ಈಗ ಡಿಜಿಟಲ್ ಇಂಡಿಯಾ ಆಗಿದೆ. ಹಣಕಾಸು ವಹಿವಾಟಿನಿಂದ ಹಿಡಿದು ರೇಷನ್ ಕಾರ್ಡ್ ಗೆ ಅರ್ಜಿ ಸಲ್ಲಿಸುವವರೆಗೆ ಪ್ರತಿಯೊಂದು ಚಟುವಟಿಕೆಗಳನ್ನು ಆನ್ ಲೈನ್ ಮೂಲಕವೇ ಮಾಡಬಹುದಾಗಿದೆ. ದೇಶದ ಬಹುತೇಕ ಜನರ ಕೈಯಲ್ಲಿ ಸ್ಮಾರ್ಟ್ ಫೋನ್, ಇಂಟರ್ ನೆಟ್ ಇರುವುದರಿಂದ ಸರ್ಕಾರದ ಬಹುತೇಕ ಸೇವೆಗಳು ಕೂಡ ಆನ್ ಲೈನ್ ನಲ್ಲಿ ದೊರೆಯುತ್ತವೆ. ಅದರಲ್ಲೂ, ಕೇಂದ್ರ ಸರ್ಕಾರದ ಉಮಂಗ್ ಆ್ಯಪ್ ನಲ್ಲಿ 2,400ಕ್ಕೂ ಅಧಿಕ ಸೌಲಭ್ಯಗಳಿವೆ ಎಂಬುದು ಗಮನಾರ್ಹವಾಗಿದೆ.
ಉಮಂಗ್ (UMANG – Unified Mobile Application for New-age Governance) ಆ್ಯಪ್ ಕೇಂದ್ರ ಸರ್ಕಾರದ ಒಂದು ‘ಮಾಸ್ಟರ್ ಆ್ಯಪ್’ ಆಗಿದೆ. ಇದು ಸಾವಿರಾರು ಸರ್ಕಾರಿ ಸೇವೆಗಳನ್ನು ಒಂದೇ ಸೂರಿನಡಿ ತರುತ್ತದೆ. ಮಾರ್ಚ್ 2026ರ ಹೊತ್ತಿಗೆ ಈ ಆ್ಯಪ್ ನಲ್ಲಿ ಸುಮಾರು 2,446ಕ್ಕೂ ಹೆಚ್ಚು ಸೇವೆಗಳು ಲಭ್ಯ ಇವೆ. ವಿದ್ಯಾರ್ಥಿಗಳಿಂದ ಹಿಡಿದು ಹಿರಿಯ ನಾಗರಿಕರವರೆಗೆ, ಕೇಂದ್ರದಿಂದ ಹಿಡಿದು ರಾಜ್ಯ ಸರ್ಕಾರಗಳ ಯೋಜನೆಗಳವರೆಗೆ ಪ್ರತಿಯೊಂದು ಸೇವೆಗಳು ಇದರಲ್ಲಿಯೇ ದೊರೆಯುತ್ತವೆ.
ಯಾವೆಲ್ಲ ಪ್ರಮುಖ ಸೌಲಭ್ಯಗಳು ಲಭ್ಯ?
ಪಿಎಫ್ ಬ್ಯಾಲೆನ್ಸ್ ವಿತ್ ಡ್ರಾ ಮಾಡುವುದು ಸೇರಿ ಇಪಿಎಫ್ಒ ಹಲವು ಸೌಲಭ್ಯಗಳು, ಡಿಜಿಲಾಕರ್ ಸಹಯೋಗ ಇರುವುದರಿಂದ ಯಾವುದೇ ದಾಖಲೆಗಳ ಸಂಗ್ರಹ, ಆಯುಷ್ಮಾನ್ ಭಾರತ್ ಯೋಜನೆ, ರೇಷನ್ ಕಾರ್ಡ್, ಮಕ್ಕಳ ಲಸಿಕೆ ಕುರಿತು ಮಾಹಿತಿ, ಕೇಂದ್ರ ಸರ್ಕಾರಗಳ ವಿದ್ಯಾರ್ಥಿ ವೇತನ ಯೋಜನೆಗಳ ಮಾಹಿತಿ ಲಭ್ಯವಾಗಲಿದೆ. ಹಾಗೆಯೇ, ಇದೇ ಆ್ಯಪ್ ಮೂಲಕ ವಿದ್ಯುತ್, ನೀರು ಸೇರಿ ವಿವಿಧ ಯುಟಿಲಿಟಿ ಬಿಲ್ ಪಾವತಿಸಬಹುದು. ಅಡುಗೆ ಅನಿಲ ಸಿಲಿಂಡರ್ ಬುಕ್ಕಿಂಗ್ ಕೂಡ ಮಾಡಬಹುದು. ಈ ಆ್ಯಪ್ ಆ್ಯಂಡ್ರಾಯ್ಡ್ ಹಾಗೂ ಐಒಎಸ್ ನಲ್ಲಿ ಲಭ್ಯವಿದೆ. ಕನ್ನಡ ಸೇರಿ ದೇಶದ 13 ಭಾಷೆಗಳಲ್ಲಿ ಇದನ್ನು ಬಳಸಬಹುದಾಗಿದೆ.
ಕರ್ನಾಟಕದವರಿಗೂ ಇವೆ ಸೌಲಭ್ಯಗಳು
ಕರ್ನಾಟಕದ ನಾಗರಿಕರಿಗಾಗಿ ಸುಮಾರು 65ಕ್ಕೂ ಹೆಚ್ಚು ಸೇವೆಗಳು ಲಭ್ಯ ಇವೆ. ಭೂಮಿ (Bhoomi) ಪಹಣಿ ವಿವರಗಳು, ಕಂದಾಯ ಇಲಾಖೆಯ ಸೇವೆಗಳು ಮತ್ತು ಸಕಾಲ (Sakala) ಅಡಿಯಲ್ಲಿ ಬರುವ ಅರ್ಜಿಗಳ ಸ್ಥಿತಿಯನ್ನು ಇಲ್ಲಿ ಪರಿಶೀಲಿಸಬಹುದು. ಈ ಆ್ಯಪ್ ನಲ್ಲಿ ಕೇಂದ್ರ ಸರ್ಕಾರದ 872 ಸೇವೆಗಳು ಇದರಲ್ಲಿ ಲಭ್ಯವಿದ್ದರೆ, ರಾಜ್ಯ ಸರ್ಕಾರಗಳ 1,574 ಸೇವೆಗಳು ಒಂದೇ ಆ್ಯಪ್ ನಲ್ಲಿ ಲಭಿಸುತ್ತವೆ.
ಇದನ್ನೂ ಓದಿ: ಜಿಬಿಎ ವ್ಯಾಪ್ತಿಯಲ್ಲಿ ಮನೆ ಕಟ್ಟುವವರಿಗೆ ಗುಡ್ ನ್ಯೂಸ್ – ಕಟ್ಟಡ ಉಲ್ಲಂಘನೆ ಮಿತಿ ಶೇ. 15ಕ್ಕೆ ಹೆಚ್ಚಳ
