ಟ್ರಿಪೋಲಿ : ಲಿಬಿಯಾದ ಮಾಜಿ ಸರ್ವಾಧಿಕಾರಿ ಮುಅಮ್ಮರ್ ಗಡಾಫಿ ಅವರ ಪುತ್ರ ಮತ್ತು ಒಂದು ಕಾಲದಲ್ಲಿ ಅವರ ಉತ್ತರಾಧಿಕಾರಿ ಎಂದೇ ಗುರುತಿಸಲ್ಪಟ್ಟಿದ್ದ ಸೈಫ್ ಅಲ್-ಇಸ್ಲಾಂ ಗಡ್ಡಾಫಿ (53) ಅವರನ್ನು ಗುಂಡಿಕ್ಕಿ ಹತ್ಯೆಗೈಯ್ಯಲಾಗಿದೆ. ಪಶ್ಚಿಮ ಲಿಬಿಯಾದ ಜಿಂಟಾನ್ ನಗರದಲ್ಲಿರುವ ಅವರ ನಿವಾಸಕ್ಕೆ ನುಗ್ಗಿದ ನಾಲ್ವರು ಸಶಸ್ತ್ರಧಾರಿಗಳ ಗುಂಪು ಈ ಭೀಕರ ಹತ್ಯೆ ನಡೆಸಿದೆ.
ಕಮಾಂಡೋ ಮಾದರಿಯಲ್ಲಿ ದಾಳಿ
ಸೈಫ್ ಅಲ್-ಇಸ್ಲಾಂ ಅವರ ವಕೀಲರು ನೀಡಿರುವ ಮಾಹಿತಿಯ ಪ್ರಕಾರ, ಇದೊಂದು ಯೋಜಿತ ಹತ್ಯೆಯಾಗಿದ್ದು, “ನಾಲ್ಕು ಮಂದಿಯ ಕಮಾಂಡೋಗಳ ತಂಡ” ಈ ಕೃತ್ಯ ಎಸಗಿದೆ. ಮನೆಯೊಳಗೆ ನುಗ್ಗಿದ ದುಷ್ಕರ್ಮಿಗಳು ಮತ್ತು ಸೈಫ್ ಅಲ್-ಇಸ್ಲಾಂ ನಡುವೆ ನೇರ ಸಂಘರ್ಷ ನಡೆದಿದ್ದು, ಈ ವೇಳೆ ಅವರು ಗುಂಡೇಟಿನಿಂದ ಸಾವನ್ನಪ್ಪಿದ್ದಾರೆ. ಆದರೆ, ಈ ಹತ್ಯೆಯ ಹಿಂದೆ ಯಾರ ಕೈವಾಡವಿದೆ ಅಥವಾ ದಾಳಿಕೋರರ ಉದ್ದೇಶವೇನಿತ್ತು ಎಂಬುದು ಸದ್ಯಕ್ಕೆ ನಿಗೂಢವಾಗಿದೆ. ಇದೇ ವೇಳೆ, ಸೈಫ್ ಅಲ್-ಇಸ್ಲಾಂ ಅವರ ಸಹೋದರಿ ಲಿಬಿಯಾ ದೂರದರ್ಶನಕ್ಕೆ ಪ್ರತಿಕ್ರಿಯಿಸಿ, ಅವರು ಅಲ್ಜೀರಿಯಾ ಗಡಿಯ ಬಳಿ ಮೃತಪಟ್ಟಿದ್ದಾರೆ ಎಂದು ಹೇಳಿರುವುದು ಗೊಂದಲಕ್ಕೆ ಕಾರಣವಾಗಿದೆ.
ಸೈಫ್ ಅಲ್-ಇಸ್ಲಾಂ ಅವರ ಜೀವನವು ಲಿಬಿಯಾದ ಅಸ್ಥಿರ ರಾಜಕೀಯ ಇತಿಹಾಸದ ಪ್ರತಿಬಿಂಬದಂತಿದೆ. 2011ರಲ್ಲಿ ಅವರ ತಂದೆ ಮುಅಮ್ಮರ್ ಗಡ್ಡಾಫಿ ಅವರ 40 ವರ್ಷಗಳ ಸುದೀರ್ಘ ಆಡಳಿತ ಪತನಗೊಳ್ಳುವವರೆಗೂ ಸೈಫ್ ದೇಶದ ಅತ್ಯಂತ ಪ್ರಭಾವಶಾಲಿ ವ್ಯಕ್ತಿಯಾಗಿದ್ದರು. 2011ರಲ್ಲಿ ಬಂಡುಕೋರರಿಂದ ಬಂಧಿಸಲ್ಪಟ್ಟಿದ್ದ ಅವರು ಸುಮಾರು ಹತ್ತು ವರ್ಷಗಳ ಕಾಲ ಸೆರೆವಾಸ ಅನುಭವಿಸಿದ್ದರು. ಬಿಡುಗಡೆಯ ನಂತರ ಅವರು ಮತ್ತೆ ದೇಶದ ರಾಜಕೀಯದಲ್ಲಿ ಸಕ್ರಿಯರಾಗಲು ಯತ್ನಿಸಿದ್ದರು.
ಬಿಡುಗಡೆಯ ನಂತರ ಸೈಫ್ ಅಲ್-ಇಸ್ಲಾಂ ಲಿಬಿಯಾದ ಅಧ್ಯಕ್ಷೀಯ ಚುನಾವಣೆಗೆ ಸ್ಪರ್ಧಿಸುವುದಾಗಿ ಘೋಷಿಸಿದ್ದರು. ಈ ನಿರ್ಧಾರವು ಲಿಬಿಯಾದಲ್ಲಿ ಒಗ್ಗಟ್ಟಿನ ಚುನಾವಣೆ ನಡೆಸುವ ಪ್ರಯತ್ನಗಳಿಗೆ ಅಡ್ಡಿಯಾಗಿತ್ತು ಎಂದು ವಿಶ್ಲೇಷಿಸಲಾಗಿತ್ತು. ಯಾವುದೇ ಅಧಿಕೃತ ಸರ್ಕಾರಿ ಹುದ್ದೆ ಹೊಂದಿಲ್ಲದಿದ್ದರೂ, ವಿವಿಧ ರಾಜಕೀಯ ಬಣಗಳ ನಡುವೆ ಒಪ್ಪಂದ ಮಾಡಿಸುವಲ್ಲಿ ಅವರು ಪ್ರಮುಖ ಪಾತ್ರ ವಹಿಸುತ್ತಿದ್ದರು. ಈ ಹಿಂದೆ ಲಿಬಿಯಾದ ಸಮೂಹ ನಾಶಕ ಶಸ್ತ್ರಾಸ್ತ್ರ ಕಾರ್ಯಕ್ರಮವನ್ನು ಕೈಬಿಡುವ ಮಾತುಕತೆ ಮತ್ತು 1988ರ ಪಾನ್ ಆಮ್ ವಿಮಾನ ಸ್ಫೋಟದ ಸಂತ್ರಸ್ತರಿಗೆ ಪರಿಹಾರ ನೀಡುವ ಪ್ರಕ್ರಿಯೆಯಲ್ಲಿ ಅವರು ಪ್ರಮುಖ ರಾಯಭಾರಿಯಾಗಿ ಕೆಲಸ ಮಾಡಿದ್ದರು.
ತನ್ನನ್ನು ತಾನು ಸುಧಾರಣಾವಾದಿ ಎಂದು ಬಿಂಬಿಸಿಕೊಳ್ಳಲು ಯತ್ನಿಸುತ್ತಿದ್ದ ಸೈಫ್, ಲಿಬಿಯಾಕ್ಕೆ ಹೊಸ ಸಂವಿಧಾನ ಮತ್ತು ಮಾನವ ಹಕ್ಕುಗಳ ರಕ್ಷಣೆಯ ಅಗತ್ಯವಿದೆ ಎಂದು ಪ್ರತಿಪಾದಿಸಿದ್ದರು. ಅವರ ಹತ್ಯೆಯು ಈಗ ಲಿಬಿಯಾದಲ್ಲಿ ಮತ್ತಷ್ಟು ರಾಜಕೀಯ ಅಸ್ಥಿರತೆಗೆ ಕಾರಣವಾಗುವ ಸಾಧ್ಯತೆಯಿದೆ ಎಂದು ಹೇಳಲಾಗಿದೆ.
ಇದನ್ನೂ ಓದಿ : ವಂಟಮೂರಿ ಮಹಿಳೆ ವಿವಸ್ತ್ರ ಕೇಸ್ | 12 ಆರೋಪಿಗಳಿಗೆ ಐದು ವರ್ಷ ಕಠಿಣ ಜೈಲುಶಿಕ್ಷೆ!
