ಬೆಳಗಾವಿ: ಮಧ್ಯಪ್ರಾಚ್ಯ ರಾಷ್ಟ್ರಗಳಲ್ಲಿನ ಯುದ್ಧದ ಕಾರ್ಮೋಡ ಇದೀಗ ಬೆಳಗಾವಿ ಜನರ ನೆಮ್ಮದಿ ಕೆಡಿಸಿದೆ. ಇಸ್ರೇಲ್, ಇರಾನ್ ಮತ್ತು ಅಮೆರಿಕ ನಡುವಿನ ಉದ್ವಿಗ್ನತೆಯಿಂದಾಗಿ ಪೆಟ್ರೋಲ್ ಮತ್ತು ಡೀಸೆಲ್ ಪೂರೈಕೆಯಲ್ಲಿ ಭಾರಿ ವ್ಯತ್ಯಯವಾಗಲಿದೆ ಎಂಬ ವದಂತಿ ಹಬ್ಬಿದ್ದು, ಜಿಲ್ಲೆಯಾದ್ಯಂತ ಪೆಟ್ರೋಲ್ ಬಂಕ್ಗಳಿಗೆ ಜನ ಸಾಗರವೇ ಹರಿದುಬರುತ್ತಿದೆ.
ಕಳೆದ ಎರಡು ದಿನಗಳಿಂದ ಸಾಮಾಜಿಕ ಜಾಲತಾಣಗಳಲ್ಲಿ, ವಿಶೇಷವಾಗಿ ವಾಟ್ಸಾಪ್ನಲ್ಲಿ “ಮುಂದಿನ 4-5 ದಿನಗಳ ಕಾಲ ಇಂಧನ ಪೂರೈಕೆ ಸ್ಥಗಿತಗೊಳ್ಳಲಿದೆ” ಎಂಬ ಸಂದೇಶಗಳು ಭಾರಿ ವೇಗದಲ್ಲಿ ಹರಿದಾಡುತ್ತಿವೆ. ಯುದ್ಧದ ಪರಿಣಾಮವಾಗಿ ಎಲ್ಪಿಜಿ ಮತ್ತು ಪೆಟ್ರೋಲಿಯಂ ಉತ್ಪನ್ನಗಳ ಕೊರತೆಯಾಗಲಿದೆ ಎಂಬ ಆತಂಕ ಸವಾರರನ್ನು ಪೆಟ್ರೋಲ್ ಬಂಕ್ಗಳತ್ತ ಓಡುವಂತೆ ಮಾಡಿದೆ.
ಬೆಳಗಾವಿಯ ಪ್ರಮುಖ ಬಡಾವಣೆಗಳಾದ ಸದಾಶಿವ ನಗರ, ಅಜಮ್ ನಗರ, ವೈಭವ್ ನಗರ, ಕೊಲ್ಲಾಪುರ ಸರ್ಕಲ್, ನೆಹರು ನಗರ, ಗಾಂಧಿ ನಗರ ಹಾಗೂ ಚೆನ್ನಮ್ಮ ಸರ್ಕಲ್ ವ್ಯಾಪ್ತಿಯ ಪೆಟ್ರೋಲ್ ಬಂಕ್ಗಳಲ್ಲಿ ನೂರಾರು ಮೀಟರ್ಗಳಷ್ಟು ಉದ್ದದ ಸಾಲುಗಳು ಕಂಡುಬಂದಿವೆ.
ಜನರು ಕೇವಲ ವಾಹನಗಳಿಗೆ ಮಾತ್ರವಲ್ಲದೆ, ಭವಿಷ್ಯದ ಮುನ್ನೆಚ್ಚರಿಕೆಯಾಗಿ ವಾಟರ್ ಬಾಟಲ್ ಮತ್ತು ಪ್ಲಾಸ್ಟಿಕ್ ಕ್ಯಾನ್ಗಳಲ್ಲಿಯೂ ಪೆಟ್ರೋಲ್, ಡೀಸೆಲ್ ತುಂಬಿಸಿಕೊಳ್ಳುತ್ತಿದ್ದಾರೆ. ಈಗಾಗಲೇ ಅಡುಗೆ ಅನಿಲದ (LPG) ಕೊರತೆಯ ಭೀತಿ ಎದುರಿಸುತ್ತಿರುವ ಜನರಿಗೆ, ಈಗ ವಾಹನ ಸಂಚಾರವೂ ಸ್ಥಗಿತಗೊಳ್ಳಬಹುದು ಎಂಬ ಗೊಂದಲ ತೀವ್ರವಾಗಿದೆ. ಸದ್ಯಕ್ಕೆ ಪೆಟ್ರೋಲ್ ಮತ್ತು ಡೀಸೆಲ್ ಪೂರೈಕೆಯಲ್ಲಿ ಅಂತಹ ಯಾವುದೇ ಗಂಭೀರ ವ್ಯತ್ಯಯ ಉಂಟಾಗಿರುವ ಬಗ್ಗೆ ಅಧಿಕೃತ ಮಾಹಿತಿ ಲಭ್ಯವಾಗಿಲ್ಲ. ವದಂತಿಗಳಿಂದಾಗಿ ಜನರು ಅನಗತ್ಯವಾಗಿ ಗಾಬರಿಗೊಂಡು ಬಂಕ್ಗಳಿಗೆ ಮುಗಿಬೀಳುತ್ತಿರುವುದು ಸಂಚಾರ ದಟ್ಟಣೆಗೂ ಕಾರಣವಾಗುತ್ತಿದೆ.
ಇದನ್ನೂ ಓದಿ : ಪೆಟ್ರೋಲ್ ಸುರಿದು ಮಹಿಳೆಯ ಕೊಲೆ ಯತ್ನ : ಚಿಕಿತ್ಸೆ ಫಲಿಸದೆ ವೃದ್ಧೆ ಸಾವು
