ಬೆಂಗಳೂರು : ಭಾರತೀಯ ವಾಹನ ಮಾರುಕಟ್ಟೆಯಲ್ಲಿ ಎಸ್ಯುವಿಗಳಿಗೆ (SUV) ಇರುವ ಕ್ರೇಜ್ ಅಷ್ಟಿಷ್ಟಲ್ಲ. ಅದರಲ್ಲೂ ‘ಬಿಗ್ ಸೈಜ್’ ಎಸ್ಯುವಿಗಳಿಗೆ ಎಲ್ಲಿಲ್ಲದ ಬೇಡಿಕೆ. ಈ ಬೇಡಿಕೆಯನ್ನು ಗಮನದಲ್ಲಿಟ್ಟುಕೊಂಡು ಜೆಎಸ್ಡಬ್ಲ್ಯೂ ಎಂಜಿ ಮೋಟಾರ್ ಇಂಡಿಯಾ (JSW MG Motor India) ತನ್ನ ಬಹುನಿರೀಕ್ಷಿತ, ಐಷಾರಾಮಿ ಎಸ್ಯುವಿ ‘MG ಮೆಜೆಸ್ಟರ್’ ಅನ್ನು ಅನಾವರಣಗೊಳಿಸಿದೆ.
ಹೌದು, ಎಂಜಿ ಕಂಪನಿಯು ಗ್ಲೋಸ್ಟರ್ (Gloster) ನಂತರ ಮತ್ತೊಂದು ಬಲಿಷ್ಠ ಎಸ್ಯುವಿಯನ್ನು ಮಾರುಕಟ್ಟೆಗೆ ಪರಿಚಯಿಸುತ್ತಿದ್ದು, ಇದು ಕಂಪನಿಯ ಹೊಸ ‘ಫ್ಲ್ಯಾಗ್ಶಿಪ್’ (Flagship) ಮಾದರಿಯಾಗಿದೆ. ಅಂದರೆ, ಎಂಜಿ ಬ್ರ್ಯಾಂಡ್ನಲ್ಲೇ ಇದು ಅತ್ಯಂತ ಪ್ರೀಮಿಯಂ ಮತ್ತು ದುಬಾರಿ ಎಸ್ಯುವಿ ಎನಿಸಿಕೊಳ್ಳಲಿದೆ. ಸಾಂಪ್ರದಾಯಿಕ ‘ಡಿ-ಸೆಗ್ಮೆಂಟ್’ (D-segment) ಮತ್ತು ಐಷಾರಾಮಿ ಎಸ್ಯುವಿಗಳ ನಡುವೆ ಹೊಸದೊಂದು ‘ಡಿ ಪ್ಲಸ್’ (D+ segment) ವಿಭಾಗವನ್ನು ಸೃಷ್ಟಿಸುವ ಗುರಿಯನ್ನು ಎಂಜಿ ಹೊಂದಿದೆ.
ಲುಕ್ ಹೇಗಿದೆ?
ಮೆಜೆಸ್ಟರ್ ಮೊದಲ ನೋಟದಲ್ಲೇ “ವಾವ್” ಎನಿಸುವಂತಿದೆ. ಇದು ತನ್ನ ಸೆಗ್ಮೆಂಟ್ನಲ್ಲೇ ಅತಿ ಎತ್ತರದ, ಅತಿ ಉದ್ದದ ಮತ್ತು ಅತಿ ಅಗಲವಾದ ಎಸ್ಯುವಿ ಎಂದು ಕಂಪನಿ ಹೇಳಿಕೊಂಡಿದೆ. ಮುಂಭಾಗದಲ್ಲಿ ಬೃಹದಾಕಾರದ ‘ಮೊಸಾಯಿಕ್ ಮ್ಯಾಟ್ರಿಕ್ಸ್ ಗ್ರಿಲ್’ , ಡ್ರ್ಯಾಗನ್ ಕಣ್ಣುಗಳನ್ನು ಹೋಲುವ ಎಲ್ಇಡಿ ಲೈಟ್ಗಳು ಮತ್ತು ಟ್ರೈ-ಬೀಮ್ ಹೆಡ್ಲ್ಯಾಂಪ್ಗಳು ಕಾರಿಗೆ ರಾಜ ಗಾಂಭೀರ್ಯವನ್ನು ತಂದುಕೊಟ್ಟಿವೆ.
19 ಇಂಚಿನ ಡ್ಯುಯಲ್-ಶೇಡ್ ಅಲಾಯ್ ವೀಲ್ಗಳು ಮತ್ತು ಹಿಂಭಾಗದಲ್ಲಿರುವ ಕನೆಕ್ಟೆಡ್ ಎಲ್ಇಡಿ ಟೈಲ್ ಲ್ಯಾಂಪ್ಗಳು ಇದರ ರಸ್ತೆಬದಿಯ ಅಂದವನ್ನು ಹೆಚ್ಚಿಸಿವೆ.
ಒಳಾಂಗಣ ವಿನ್ಯಾಸ
ಕಾರಿನ ಒಳಗೆ ಕಾಲಿಟ್ಟರೆ ವಿಮಾನದ ಬಿಸಿನೆಸ್ ಕ್ಲಾಸ್ನಲ್ಲಿ ಕುಳಿತ ಅನುಭವ ನೀಡುವಂತೆ ‘ಎಂ-ಲೌಂಜ್’ ವಿನ್ಯಾಸ ಮಾಡಲಾಗಿದೆ. ಸ್ಮೋಕ್ಡ್ ಎಬೊನಿ ಬಣ್ಣದ ಒಳಾಂಗಣ, ಸಾಫ್ಟ್ ಟಚ್ ಮೆಟೀರಿಯಲ್ಗಳು ಪ್ರೀಮಿಯಂ ಲುಕ್ ನೀಡುತ್ತವೆ. ಇದು 6 ಮತ್ತು 7 ಸೀಟರ್ ಆಯ್ಕೆಗಳಲ್ಲಿ ಲಭ್ಯವಿದೆ. ಮೂರನೇ ಸಾಲಿನ ಸೀಟುಗಳನ್ನು ಮಡಚಿದರೆ ಬರೋಬ್ಬರಿ 1,350 ಲೀಟರ್ಗಳಷ್ಟು ಲಗೇಜ್ ಸ್ಪೇಸ್ ಸಿಗುತ್ತದೆ.
ಹೈಟೆಕ್ ಫೀಚರ್ಗಳು
ಆಧುನಿಕ ತಂತ್ರಜ್ಞಾನಕ್ಕೆ ಎಂಜಿ ಯಾವಾಗಲೂ ಹೆಸರುವಾಸಿ. ಮೆಜೆಸ್ಟರ್ನಲ್ಲಿಯೂ ಇದಕ್ಕೆ ಕೊರತೆಯಿಲ್ಲ. 8 ಬಗೆಯ ಮಸಾಜ್ ನೀಡಬಲ್ಲ ಸೀಟುಗಳು, ವೆಂಟಿಲೇಟೆಡ್ ಸೀಟುಗಳು ಮತ್ತು ಚಾಲಕನಿಗೆ 12 ರೀತಿಯಲ್ಲಿ ಅಡ್ಜಸ್ಟ್ ಮಾಡಬಹುದಾದ ಮೆಮೊರಿ ಸೀಟ್ಗಳಿವೆ. 12.3 ಇಂಚಿನ ಎರಡು ದೊಡ್ಡ ಸ್ಕ್ರೀನ್ಗಳು (ಒಂದು ಇನ್ಫೋಟೈನ್ಮೆಂಟ್, ಇನ್ನೊಂದು ಡ್ರೈವರ್ ಡಿಸ್ಪ್ಲೇ), 12 ಸ್ಪೀಕರ್ ಇರುವ ಜೆಬಿಎಲ್ ಆಡಿಯೋ ಸಿಸ್ಟಮ್ ಮತ್ತು 64 ಬಣ್ಣಗಳ ಆಂಬಿಯೆಂಟ್ ಲೈಟಿಂಗ್ ಇದೆ. ರಿಲಯನ್ಸ್ ಜಿಯೋ ಜೊತೆಗೂಡಿ ಅಭಿವೃದ್ಧಿಪಡಿಸಿದ ‘ಐ-ಸ್ಮಾರ್ಟ್ 2.0’ (i-Smart 2.0) ತಂತ್ರಜ್ಞಾನವಿದೆ. ಇದು ಜಿಯೋ ಫೈಬರ್ ಮೂಲಕ ಮನೆ ಮತ್ತು ಕಾರನ್ನು ಸಂಪರ್ಕಿಸುತ್ತದೆ. ಜಿಯೋ ಸಾವನ್ ಮ್ಯೂಸಿಕ್, ಡಿಜಿಟಲ್ ಕೀ ಶೇರಿಂಗ್ (ಮೊಬೈಲ್ ಮೂಲಕವೇ ಕಾರು ಲಾಕ್/ಅನ್ಲಾಕ್, ಸ್ಟಾರ್ಟ್ ಮಾಡುವ ಸೌಲಭ್ಯ) ಮುಂತಾದ 75ಕ್ಕೂ ಹೆಚ್ಚು ಕನೆಕ್ಟೆಡ್ ಫೀಚರ್ಗಳಿವೆ. ಟೈಲ್ಗೇಟ್, ವೈರ್ಲೆಸ್ ಆಂಡ್ರಾಯ್ಡ್ ಆಟೋ ಮತ್ತು ಆಪಲ್ ಕಾರ್ಪ್ಲೇ, ಪನೋರಾಮಿಕ್ ಸನ್ರೂಫ್ ಕೂಡ ಇದೆ.
ಎಂಜಿನ್ ಮತ್ತು ಪವರ್
ಈ ದೈತ್ಯ ಎಸ್ಯುವಿಯನ್ನು ಚಲಾಯಿಸಲು ಅಷ್ಟೇ ಪವರ್ಫುಲ್ ಎಂಜಿನ್ ಬೇಕಲ್ಲವೇ? ಇದರಲ್ಲಿ 2.0 ಲೀಟರ್ ಟ್ವಿನ್-ಟರ್ಬೊ ಡೀಸೆಲ್ ಎಂಜಿನ್ ಇದ್ದು, ಇದು 215 bhp ಶಕ್ತಿಯನ್ನು ಉತ್ಪಾದಿಸುತ್ತದೆ. ಆಟೋಮ್ಯಾಟಿಕ್ ಗೇರ್ಬಾಕ್ಸ್ ಜೊತೆಗೆ 4×2 ಮತ್ತು 4×4 ಆಯ್ಕೆಗಳಿವೆ.
ಆಫ್-ರೋಡ್ ಕಿಂಗ್!
ಕೇವಲ ಸಿಟಿ ರೈಡ್ಗಷ್ಟೇ ಅಲ್ಲ, ಎಂತಹ ಕಠಿಣ ರಸ್ತೆಗಳಿಗೂ ಇದು ಸೈ. ಇದರಲ್ಲಿ ‘ಎಂ-ಹಬ್’ (M-Hub) ಆಫ್-ರೋಡ್ ಕಮಾಂಡ್ ಸೆಂಟರ್ ಇದೆ. ಮರಳು, ಕೆಸರು, ಹಿಮ, ಬಂಡೆಗಳಂತಹ ರಸ್ತೆಗಳಲ್ಲಿ ಚಲಿಸಲು ಸ್ಯಾಂಡ್, ಮಡ್, ಸ್ನೋ, ರಾಕ್ ಸೇರಿದಂತೆ ಬರೋಬ್ಬರಿ 10 ಆಫ್-ರೋಡ್ ಮೋಡ್ಗಳು ಇವೆ. ಅತ್ಯಂತ ವಿಶೇಷವೆಂದರೆ, ಇದರಲ್ಲಿ ಮೂರು ಡಿಫರೆನ್ಷಿಯಲ್ ಲಾಕ್ (ಮುಂಭಾಗ, ಹಿಂಭಾಗ ಮತ್ತು ಸೆಂಟರ್) ನೀಡಲಾಗಿದೆ. ಇದು ಈ ಸೆಗ್ಮೆಂಟ್ನಲ್ಲೇ ಮೊದಲು! ಅಷ್ಟೇ ಅಲ್ಲ, 810 ಎಂಎಂ ಆಳದ ನೀರಿನಲ್ಲೂ ಇದು ಸರಾಗವಾಗಿ ಚಲಿಸಬಲ್ಲದು.
ಸುರಕ್ಷತೆ
ಸುರಕ್ಷತೆಯ ವಿಷಯದಲ್ಲಿ ಎಂಜಿ ರಾಜಿ ಮಾಡಿಕೊಂಡಿಲ್ಲ. ಲೆವೆಲ್-2 ADAS (ಅಡ್ವಾನ್ಸ್ಡ್ ಡ್ರೈವರ್ ಅಸಿಸ್ಟೆನ್ಸ್ ಸಿಸ್ಟಮ್) ಇದ್ದು, ಅಡಾಪ್ಟಿವ್ ಕ್ರೂಸ್ ಕಂಟ್ರೋಲ್, ಆಟೋ ಎಮರ್ಜೆನ್ಸಿ ಬ್ರೇಕಿಂಗ್, ಲೇನ್ ಕೀಪ್ ಅಸಿಸ್ಟ್ ಮುಂತಾದವು ಸೇರಿವೆ. ಜೊತೆಗೆ 6 ಏರ್ಬ್ಯಾಗ್ಗಳು, 360 ಡಿಗ್ರಿ ಕ್ಯಾಮೆರಾ, ಹಿಲ್ ಹೋಲ್ಡ್ ಕಂಟ್ರೋಲ್ ಸೇರಿದಂತೆ 30ಕ್ಕೂ ಹೆಚ್ಚು ಸುರಕ್ಷತಾ ವೈಶಿಷ್ಟ್ಯಗಳಿವೆ.
ಬೆಲೆ ಮತ್ತು ಲಭ್ಯತೆ
ಸದ್ಯ ಎಂಜಿ ಮೆಜೆಸ್ಟರ್ಗೆ ಬುಕ್ಕಿಂಗ್ ಆರಂಭವಾಗಿದೆ. ಇದರ ಬೆಲೆಯನ್ನು ಇದೇ ಏಪ್ರಿಲ್ ತಿಂಗಳಲ್ಲಿ ಘೋಷಿಸಲಾಗುವುದು. ಮೇ 2026ರ ಹೊತ್ತಿಗೆ ಗ್ರಾಹಕರ ಕೈಗೆ ಕಾರು ಸಿಗುವ ನಿರೀಕ್ಷೆಯಿದೆ. ಟೊಯೋಟಾ ಫಾರ್ಚುನರ್ ಮತ್ತು ಜೀಪ್ ಮೆರಿಡಿಯನ್ನಂತಹ ದಿಗ್ಗಜಗಳಿಗೆ ಇದು ಪ್ರಬಲ ಪೈಪೋಟಿ ನೀಡುವ ಸಾಧ್ಯತೆಯಿದೆ.
ಇದನ್ನೂ ಓದಿ : ಮೈಸೂರು | ವೃದ್ಧನ ಬ*ಲಿ ಪಡೆದಿದ್ದ ದೃಷ್ಟಿಹೀನ ಒಂಟಿ ಸಲಗ ಸೆರೆ
