ಬೆಂಗಳೂರು : ಭಾರತದ ಅತಿದೊಡ್ಡ ಕಾರು ತಯಾರಕ ಕಂಪನಿಯಾದ ಮಾರುತಿ ಸುಜುಕಿ, ಕೊನೆಗೂ ಸಂಪೂರ್ಣ ಎಲೆಕ್ಟ್ರಿಕ್ ಎಸ್ಯುವಿ ಮಾರುಕಟ್ಟೆಗೆ ಕಾಲಿಡಲು ಸಜ್ಜಾಗಿದೆ. ಬಹುನಿರೀಕ್ಷಿತ ‘ಇ-ವಿಟಾರಾ’ (eVitara) ಇದೇ ಫೆಬ್ರವರಿ 2026ರಲ್ಲಿ ಬಿಡುಗಡೆಯಾಗುವ ಸಾಧ್ಯತೆಯಿದೆ. ಆದರೆ ಈ ಕಾರಿನ ಬಿಡುಗಡೆಯಷ್ಟೇ ಮುಖ್ಯವಾದ ವಿಷಯವೆಂದರೆ, ಇದರ ಬೆಲೆ ಎಷ್ಟು ಎಂಬುದು. ಮಾರುಕಟ್ಟೆಯ ಚರ್ಚೆಗಳ ಪ್ರಕಾರ, ಈ ಕಾರಿನ ಬೆಲೆ 15 ಲಕ್ಷದಿಂದ 25 ಲಕ್ಷ ರೂಪಾಯಿ ನಡುವೆ ಇರಬಹುದು ಎಂದು ಅಂದಾಜಿಸಲಾಗಿದೆ.
ಇದು ಭಾರತದ ಎಸ್ಯುವಿ ಮಾರುಕಟ್ಟೆಯಲ್ಲಿ ಅತಿ ಹೆಚ್ಚು ಮಾರಾಟವಾಗುವ ಬೆಲೆಯ ಶ್ರೇಣಿಯಾಗಿದೆ. ಆದರೆ, ಬ್ಯಾಟರಿ, ಮೋಟಾರ್ ಮತ್ತು ಎಲೆಕ್ಟ್ರಾನಿಕ್ಸ್ ಬಿಡಿಭಾಗಗಳನ್ನು ಆಮದು ಮಾಡಿಕೊಳ್ಳಬೇಕಾಗಿರುವುದರಿಂದ, ಎಲೆಕ್ಟ್ರಿಕ್ ವಾಹನಗಳನ್ನು ಕಡಿಮೆ ಬೆಲೆಯಲ್ಲಿ ನೀಡುವುದು ಕಂಪನಿಗಳಿಗೆ ಸವಾಲಿನ ಕೆಲಸವಾಗಿದೆ.
‘ಇ-ವಿಟಾರಾ’ದ ಪ್ರಮುಖ ವೈಶಿಷ್ಟ್ಯಗಳು ಮತ್ತು ನಿರೀಕ್ಷೆಗಳು :
ವರದಿಗಳ ಪ್ರಕಾರ, ಮಾರುತಿ ಸುಜುಕಿ ಈ ಕಾರಿನಲ್ಲಿ ಗ್ರಾಹಕರಿಗೆ ಚಿರಪರಿಚಿತವಾಗಿರುವ ಅನುಭವವನ್ನೇ ನೀಡಲು ಉದ್ದೇಶಿಸಿದೆ. ಇದು ಪ್ರಮುಖವಾಗಿ ಎರಡು ಬ್ಯಾಟರಿ ಆಯ್ಕೆಗಳಲ್ಲಿ ಲಭ್ಯವಿರುವ ಸಾಧ್ಯತೆಯಿದೆ.
ಚಿಕ್ಕ ಬ್ಯಾಟರಿ : ಸುಮಾರು 49 kWh ಸಾಮರ್ಥ್ಯದ ಬ್ಯಾಟರಿ, ಇದು 142 bhp ಶಕ್ತಿಯನ್ನು ಉತ್ಪಾದಿಸಬಹುದು.
ದೊಡ್ಡ ಬ್ಯಾಟರಿ : ಸುಮಾರು 61.1 kWh ಸಾಮರ್ಥ್ಯದ ಬ್ಯಾಟರಿ, ಇದು 172 bhp ಶಕ್ತಿಯನ್ನು ನೀಡಲಿದ್ದು, ಆಲ್-ವೀಲ್-ಡ್ರೈವ್ (AWD) ಆಯ್ಕೆಯನ್ನೂ ಹೊಂದುವ ನಿರೀಕ್ಷೆಯಿದೆ. ಇದರ ಗರಿಷ್ಠ ರೇಂಜ್ (ಒಮ್ಮೆ ಚಾರ್ಜ್ ಮಾಡಿದರೆ ಓಡುವ ದೂರ) ಸುಮಾರು 543 ಕಿ.ಮೀ. ಇರಬಹುದು ಎಂದು ಹೇಳಲಾಗುತ್ತಿದೆ.
ಬೆಲೆ ನಿರ್ಧಾರವೇ ಅತಿ ದೊಡ್ಡ ಸವಾಲು :
2025-26ರ ಆರ್ಥಿಕ ಸಮೀಕ್ಷೆಯು ಭಾರತದ ಎಲೆಕ್ಟ್ರಿಕ್ ವಾಹನ (EV) ವಲಯದ ಹಿಂದಿರುವ ವಿರೋಧಾಭಾಸವನ್ನು ಎತ್ತಿ ತೋರಿಸಿದೆ. ದೇಶದಲ್ಲಿ ಎಲೆಕ್ಟ್ರಿಕ್ ವಾಹನಗಳ ಬಳಕೆ ಹೆಚ್ಚುತ್ತಿದ್ದರೂ, ಅವುಗಳ ದುಬಾರಿ ಬಿಡಿಭಾಗಗಳ ಸರಬರಾಜು ಸರಪಳಿ ಇನ್ನೂ ಸ್ಥಳೀಯವಾಗಿಲ್ಲ. ಹೀಗಾಗಿ, ಮಾರುತಿ ಸುಜುಕಿಯು ತನ್ನ ಈ ಮೊದಲ ಎಲೆಕ್ಟ್ರಿಕ್ ಎಸ್ಯುವಿಗೆ ಯಾವ ಬೆಲೆಯನ್ನು ನಿಗದಿಪಡಿಸುತ್ತದೆ ಎಂಬುದು ಕುತೂಹಲ ಕೆರಳಿಸಿದೆ.
ಒಂದು ವೇಳೆ ಆರಂಭಿಕ ಮಾದರಿಯ ಬೆಲೆ ₹18 ಲಕ್ಷಕ್ಕಿಂತ ಕಡಿಮೆ ಇದ್ದರೆ, ಮಾರುತಿ ಸುಜುಕಿ ಆರಂಭದಲ್ಲಿ ಕಡಿಮೆ ಲಾಭಾಂಶ ಇಟ್ಟುಕೊಂಡು, ಹೆಚ್ಚು ವಾಹನಗಳನ್ನು ಮಾರಾಟ ಮಾಡುವ ತಂತ್ರ ಅನುಸರಿಸುತ್ತಿದೆ ಎಂದರ್ಥ. ಒಂದು ವೇಳೆ ಬೆಲೆ 23 ರಿಂದ 25 ರೂಪಾಯಿ ಲಕ್ಷದ ಆಸುಪಾಸಿನಲ್ಲಿದ್ದರೆ, ಆಮದು ಮಾಡಿಕೊಳ್ಳುವ ಬಿಡಿಭಾಗಗಳ ವೆಚ್ಚವನ್ನು ಸರಿದೂಗಿಸಲು ಮತ್ತು ಲಾಭವನ್ನು ಕಾಪಾಡಿಕೊಳ್ಳಲು ಕಂಪನಿ ಆದ್ಯತೆ ನೀಡಿದೆ ಎಂದು ಅರ್ಥೈಸಬಹುದು. ಆದರೆ ಈ ಬೆಲೆಯಲ್ಲಿ, ಮಾರುತಿಯಿಂದ ಕಡಿಮೆ ದರದ ನಿರೀಕ್ಷೆ ಇಟ್ಟುಕೊಂಡಿರುವ ಗ್ರಾಹಕರನ್ನು ಸೆಳೆಯುವುದು ಕಷ್ಟವಾಗಬಹುದು.
ಸ್ಪರ್ಧೆ ಮತ್ತು ಭವಿಷ್ಯದ ದಾರಿ :
ಈ ಬೆಲೆಯ ಶ್ರೇಣಿಯಲ್ಲಿ ‘ಇ-ವಿಟಾರಾ’ ಹ್ಯುಂಡೈ ಮತ್ತು ಎಂಜಿ ಮೋಟಾರ್ಸ್ನ ಎಲೆಕ್ಟ್ರಿಕ್ ಎಸ್ಯುವಿಗಳಿಗೆ ನೇರ ಪೈಪೋಟಿ ನೀಡಲಿದೆ. ಮಾರುತಿ ಸುಜುಕಿಗೆ ಇರುವ ಅತಿದೊಡ್ಡ ಬಲವೆಂದರೆ ಅದರ ವ್ಯಾಪಕವಾದ ಸರ್ವಿಸ್ ನೆಟ್ವರ್ಕ್ ಮತ್ತು ಗ್ರಾಹಕರ ನಂಬಿಕೆ. ಆದರೆ, ದುಬಾರಿ ಎಲೆಕ್ಟ್ರಾನಿಕ್ಸ್ ಮತ್ತು ಬ್ಯಾಟರಿಗಳ ವೆಚ್ಚವನ್ನು ಸರಿದೂಗಿಸಿಕೊಂಡು ಸ್ಪರ್ಧಾತ್ಮಕ ಬೆಲೆಯಲ್ಲಿ ಕಾರನ್ನು ನೀಡುವುದು ಕಂಪನಿಗೆ ಸವಾಲಾಗಿದೆ. ಫೆಬ್ರವರಿ 2026ರಲ್ಲಿ ಬೆಲೆ ಪ್ರಕಟವಾದ ನಂತರವೇ ಮಾರುತಿ ಸುಜುಕಿಯ ನಿಜವಾದ ತಂತ್ರಗಾರಿಕೆ ಏನೆಂಬುದು ತಿಳಿಯಲಿದೆ. ಒಂದು ವೇಳೆ ಈ ಕಾರನ್ನು ರಫ್ತು ಮಾಡಲೂ ಉದ್ದೇಶಿಸಿದ್ದರೆ, ಉತ್ಪಾದನಾ ವೆಚ್ಚ ಕಡಿಮೆಯಾಗಿ ಭವಿಷ್ಯದಲ್ಲಿ ಭಾರತೀಯ ಗ್ರಾಹಕರಿಗೂ ಇದರ ಲಾಭ ಸಿಗಬಹುದು.
ಇದನ್ನೂ ಓದಿ : ರಾಜ್ಯ ಟೆನ್ಪಿನ್ ಬೌಲಿಂಗ್ ಚಾಂಪಿಯನ್ಶಿಪ್ | ರೋಚಕ ಹೋರಾಟದಲ್ಲಿ ವಿಜಯ್ ಪಂಜಾಬೀಗೆ ಪ್ರಶಸ್ತಿಯ ಗರಿ
