ಬೆಂಗಳೂರು: ಭಾರತದ ಅತಿದೊಡ್ಡ ಕಾರು ತಯಾರಕ ಸಂಸ್ಥೆ ಮಾರುತಿ ಸುಜುಕಿ (Maruti Suzuki) ತನ್ನ ಜನಪ್ರಿಯ ಕಾಂಪ್ಯಾಕ್ಟ್ ಎಸ್ಯುವಿ (SUV) ‘ಬ್ರೆಝಾ’ದ (Brezza) 2026ರ ಹೊಸ ಫೇಸ್ಲಿಫ್ಟ್ ಆವೃತ್ತಿಯನ್ನು ಬಿಡುಗಡೆ ಮಾಡಲು ಸಿದ್ಧತೆ ನಡೆಸಿದೆ.
ಇತ್ತೀಚೆಗಷ್ಟೇ ಹೈವೇಯಲ್ಲಿ ಯಾವುದೇ ಮರೆಮಾಚುವಿಕೆ (Camouflage) ಇಲ್ಲದೆ ಪರೀಕ್ಷಾರ್ಥ ಸಂಚಾರ (Testing) ನಡೆಸುತ್ತಿದ್ದ ಬಿಳಿ ಬಣ್ಣದ ಹೊಸ ಬ್ರೆಝಾದ ಸ್ಪೈ ಚಿತ್ರಗಳು ‘ರಶ್ಲೇನ್’ (RushLane) ವೆಬ್ಸೈಟ್ನಲ್ಲಿ ಸೋರಿಕೆಯಾಗಿವೆ. ಈ ಚಿತ್ರಗಳು ಮುಂಬರುವ 2026ರ ಬ್ರೆಝಾದಲ್ಲಿನ ಕೆಲವು ಕುತೂಹಲಕಾರಿ ಬದಲಾವಣೆಗಳ ಸುಳಿವು ನೀಡಿವೆ.
ಬದಲಾಗದ ಹೊರನೋಟ, ನವೀಕೃತ ಒಳಾಂಗಣ
ಸೋರಿಕೆಯಾದ ಚಿತ್ರಗಳನ್ನು ಗಮನಿಸಿದರೆ, 2026ರ ಬ್ರೆಝಾದ ಬಾಹ್ಯ ವಿನ್ಯಾಸದಲ್ಲಿ ಮಾರುತಿ ಸುಜುಕಿ ಯಾವುದೇ ಪ್ರಮುಖ ಬದಲಾವಣೆಗಳನ್ನು ಮಾಡಿಲ್ಲ ಎಂಬುದು ಸ್ಪಷ್ಟವಾಗುತ್ತದೆ. ಪ್ರಸ್ತುತ ಮಾರುಕಟ್ಟೆಯಲ್ಲಿರುವ ಮಾದರಿಯಂತೆಯೇ ಪ್ರೊಜೆಕ್ಟರ್ ಹೆಡ್ಲ್ಯಾಂಪ್ಗಳು, ಎಲ್ಇಡಿ ಡಿಆರ್ಎಲ್ಗಳು, ಫಾಕ್ಸ್ ಸ್ಕಿಡ್ ಪ್ಲೇಟ್ ಮತ್ತು ಫಾಗ್ ಲ್ಯಾಂಪ್ಗಳು ಮುಂಭಾಗದಲ್ಲಿ ಮುಂದುವರಿದಿವೆ. ಬದಿಯ ಮತ್ತು ಹಿಂಭಾಗದ ವಿನ್ಯಾಸವೂ ಬಹುತೇಕ ಹಿಂದಿನಂತೆಯೇ ಇದೆ. ಆದರೆ, ಕ್ಯಾಬಿನ್ನೊಳಗೆ ಮಹತ್ವದ ಬದಲಾವಣೆಗಳನ್ನು ನಿರೀಕ್ಷಿಸಲಾಗಿದೆ.
ಪರೀಕ್ಷಾರ್ಥ ವಾಹನದ ಡ್ಯಾಶ್ಬೋರ್ಡ್ನ ಟಚ್ಸ್ಕ್ರೀನ್ ಇನ್ಫೋಟೈನ್ಮೆಂಟ್ ಸಿಸ್ಟಮ್ ಅಳವಡಿಸುವ ಜಾಗವನ್ನು ಭಾಗಶಃ ಮುಚ್ಚಿರುವುದು ಕಂಡುಬಂದಿದೆ. ಪ್ರಸ್ತುತ ಬ್ರೆಝಾದಲ್ಲಿರುವ 9-ಇಂಚಿನ ಪರದೆಯ ಬದಲು, ಇತ್ತೀಚೆಗೆ ಬಿಡುಗಡೆಯಾದ ವಿಕ್ಟೋರಸ್ ಕಾರಿನಲ್ಲಿರುವಂತೆಯೇ ದೊಡ್ಡದಾದ 10.2-ಇಂಚಿನ ಟಚ್ಸ್ಕ್ರೀನ್ ಅನ್ನು ಈ ಹೊಸ ಆವೃತ್ತಿಯಲ್ಲಿ ಅಳವಡಿಸುವ ಸಾಧ್ಯತೆ ದಟ್ಟವಾಗಿದೆ. ಇದರ ಜೊತೆಗೆ 360-ಡಿಗ್ರಿ ಕ್ಯಾಮೆರಾ, ಎಲೆಕ್ಟ್ರಿಕ್ ಸನ್ರೂಫ್, ಕ್ರೂಸ್ ಕಂಟ್ರೋಲ್, ಸ್ವಯಂಚಾಲಿತ ಕ್ಲೈಮೇಟ್ ಕಂಟ್ರೋಲ್ ಮತ್ತು ಮುಂಭಾಗದ ಪಾರ್ಕಿಂಗ್ ಸೆನ್ಸಾರ್ಗಳಂತಹ ಪ್ರೀಮಿಯಂ ಫೀಚರ್ಗಳು ಲಭ್ಯವಾಗಲಿವೆ.
ಕ್ರಾಂತಿಕಾರಿ ಅಂಡರ್ಬಾಡಿ ಸಿಎನ್ಜಿ ತಂತ್ರಜ್ಞಾನ
ಹೊಸ ಬ್ರೆಝಾದಲ್ಲಿನ ಅತ್ಯಂತ ಗಮನಾರ್ಹ ಬದಲಾವಣೆ ಎಂದರೆ, ಸಿಎನ್ಜಿ (CNG) ರೂಪಾಂತರದಲ್ಲಿ ಬರಲಿರುವ ‘ಅಂಡರ್ಬಾಡಿ ಸಿಎನ್ಜಿ ಟ್ಯಾಂಕ್’ ತಂತ್ರಜ್ಞಾನ. ಸಾಧಾರಣವಾಗಿ ಸಿಎನ್ಜಿ ಕಾರುಗಳಲ್ಲಿ ಟ್ಯಾಂಕ್ಗಳು ಬೂಟ್ ಸ್ಪೇಸ್ನ (ಡಿಕ್ಕಿಯ) ಬಹುಪಾಲು ಜಾಗವನ್ನು ಆಕ್ರಮಿಸಿಕೊಳ್ಳುತ್ತವೆ. ಇದರಿಂದ ಲಗೇಜ್ ಇಡಲು ಸ್ಥಳಾವಕಾಶದ ಕೊರತೆ ಎದುರಾಗುತ್ತಿತ್ತು. ಆದರೆ, ಮಾರುತಿ ವಿಕ್ಟೋರಸ್ ಸಿಎನ್ಜಿಯಲ್ಲಿ ಅಳವಡಿಸಿದಂತೆ, ಮುಂಬರುವ ಬ್ರೆಝಾ ಸಿಎನ್ಜಿಯಲ್ಲೂ ಟ್ಯಾಂಕ್ ಅನ್ನು ವಾಹನದ ತಳಭಾಗದಲ್ಲಿ ಅಳವಡಿಸುವ ವಿನೂತನ ತಂತ್ರಜ್ಞಾನ ಪರಿಚಯಿಸುವ ನಿರೀಕ್ಷೆಯಿದೆ. ಇದರಿಂದ ಗ್ರಾಹಕರು ಸಿಎನ್ಜಿಯ ಇಂಧನ ದಕ್ಷತೆಯನ್ನು ಪಡೆಯುವುದರ ಜೊತೆಗೆ, ಬೂಟ್ ಸ್ಪೇಸ್ನಲ್ಲೂ ಯಾವುದೇ ರಾಜಿಯಾಗದೆ ಲಗೇಜ್ ಇಡಲು ಸಂಪೂರ್ಣ ಸ್ಥಳಾವಕಾಶವನ್ನು ಪಡೆಯಲಿದ್ದಾರೆ.
ಎಂಜಿನ್ ಮತ್ತು ಹೊಸ ಗೇರ್ಬಾಕ್ಸ್
ಇನ್ನು ಎಂಜಿನ್ ಮತ್ತು ಟ್ರಾನ್ಸ್ಮಿಷನ್ ವಿಚಾರಕ್ಕೆ ಬಂದರೆ, 2026ರ ಬ್ರೆಝಾದಲ್ಲಿ ಪ್ರಸ್ತುತ ಬಳಕೆಯಲ್ಲಿರುವ ಅದೇ 1.5-ಲೀಟರ್ ನ್ಯಾಚುರಲಿ ಆಸ್ಪಿರೇಟೆಡ್ ಪೆಟ್ರೋಲ್ ಎಂಜಿನ್ ಮುಂದುವರಿಯಲಿದೆ. ಇದು ಸದ್ಯದ ಆವೃತ್ತಿಯಷ್ಟೇ ಶಕ್ತಿ ಮತ್ತು ಟಾರ್ಕ್ ಉತ್ಪಾದಿಸಲಿದೆ. ಆದಾಗ್ಯೂ, ಪ್ರಸ್ತುತ ಇರುವ 5-ಸ್ಪೀಡ್ ಮ್ಯಾನುವಲ್ ಗೇರ್ಬಾಕ್ಸ್ ಬದಲಿಗೆ, ಹೊಸ ಆವೃತ್ತಿಯಲ್ಲಿ ಸುಧಾರಿತ 6-ಸ್ಪೀಡ್ ಮ್ಯಾನುವಲ್ ಟ್ರಾನ್ಸ್ಮಿಷನ್ ನೀಡುವ ನಿರೀಕ್ಷೆಯಿದೆ. ಇದರೊಂದಿಗೆ 6-ಸ್ಪೀಡ್ ಆಟೋಮ್ಯಾಟಿಕ್ ಟ್ರಾನ್ಸ್ಮಿಷನ್ ಆಯ್ಕೆಯೂ ಲಭ್ಯವಿರಲಿದೆ.
ಸಿಎನ್ಜಿಯತ್ತ ಹೆಚ್ಚುತ್ತಿರುವ ಗ್ರಾಹಕರ ಒಲವು
ಪೆಟ್ರೋಲ್ ಬೆಲೆ ಏರಿಕೆ ಮತ್ತು ಮಾರುಕಟ್ಟೆಯಲ್ಲಿ ಡೀಸೆಲ್ ಎಂಜಿನ್ ಆಯ್ಕೆಗಳು ಕಡಿಮೆಯಾಗುತ್ತಿರುವ ಪ್ರಸ್ತುತ ದಿನಗಳಲ್ಲಿ, ಗ್ರಾಹಕರು ಇಂಧನ-ದಕ್ಷ ವಾಹನಗಳತ್ತ ಮುಖ ಮಾಡುತ್ತಿದ್ದಾರೆ. ಪೆಟ್ರೋಲ್ ಮತ್ತು ಡೀಸೆಲ್ ಕಾರುಗಳಿಗೆ ಹೋಲಿಸಿದರೆ ಸಿಎನ್ಜಿ ವಾಹನಗಳು ಹೆಚ್ಚಿನ ಮೈಲೇಜ್ ನೀಡುವುದಲ್ಲದೆ, ಕಡಿಮೆ ಮಾಲಿನ್ಯ ಹೊರಸೂಸುತ್ತವೆ. ನಗರಗಳು ಮತ್ತು ಹೆದ್ದಾರಿಗಳ ಗುಂಟ ಸಿಎನ್ಜಿ ಭರ್ತಿ ಮಾಡುವ ಕೇಂದ್ರಗಳ ಜಾಲ ವಿಸ್ತಾರವಾಗುತ್ತಿರುವುದರಿಂದ, ಅನೇಕ ರಾಜ್ಯಗಳಲ್ಲಿ ಸಿಎನ್ಜಿ ಈಗ ಅತ್ಯಂತ ಜನಪ್ರಿಯ ಪರ್ಯಾಯ ಇಂಧನ ಆಯ್ಕೆಯಾಗಿ ಹೊರಹೊಮ್ಮುತ್ತಿದೆ.
ಇದನ್ನೂ ಓದಿ: ಗೊಂಬೆಯಲ್ಲೇ ಅಮ್ಮನನ್ನು ಹುಡುಕಿದ್ದ ಅನಾಥ ಕೋತಿಮರಿಯನ್ನು ಖರೀದಿಸಲು ಟೇಟ್ ಸಹೋದರರ ಚಿಂತನೆ
