ಸಣ್ಣದೊಂದು ಕಡ್ಡಿ ಪೆಟ್ಟಿಗೆಯಿಂದ ಹಿಡಿದು, ತುಪ್ಪ, ಬೆಣ್ಣೆವರೆಗೂ ಏನೇ ಬೇಕಿದ್ದರೂ ಮನೆಯಿಂದ ನಾಲ್ಕು ಹೆಜ್ಜೆ ಓಡಿ ಹೋದರೆ ಸಾಕು ಎಲ್ಲವೂ ಥಟ್ ಅಂತಾ ಸಿಕ್ಕುಬಿಡ್ತಿತ್ತು. ಅದೆಷ್ಟೋ ಮನೆಯಲ್ಲಿ ಪುಟಾಣಿಗಳಿಗೆ ಅಪ್ಪ, ಅಮ್ಮ, ಅಜ್ಜ, ಅಜ್ಜಿ ಹೀಗೆ ದೊಡ್ಡವರು ಹೇಳಿದ್ದನ್ನು ಪಟ್ ಅಂತಾ ತಂದು ಕೊಡುವುದೇ ಒಂದು ಕೆಲಸವಾಗಿರುತ್ತಿತ್ತು. ಮಧ್ಯಮ ವರ್ಗದ ಅದೆಷ್ಟೋ ಕುಟುಂಬಗಳು ಇಂತಹ ಚಿಲ್ಲರೆ ಅಂಗಡಿಗಳಲ್ಲಿ ತನ್ನದೇ ಆದ ಖಾತೆ ಕೂಡ ಹೊಂದಿದ್ದು ವಿಶೇಷ.
ತಿಂಗಳಿಗೊಮ್ಮೆ ಮನೆ ಯಜಮಾನನಿಗೆ ಸಂಬಳವಾಯಿತು ಅಂದ್ರೆ, ಈ ಲೆಕ್ಕವೆಲ್ಲಾ ಚುಕ್ತಾ ಆಗಿರುತ್ತಿತ್ತು. ಆದರೆ, ಈಗ ಇದು ಕೂಡ ನೆನಪಾಗಿ ಉಳಿಯುವ ಸಮಯ ಬಂದಿದೆ. ಅಂಗೈಯಲ್ಲೇ ಸಮಸ್ತವನ್ನೂ ಖರೀದಿಸುವ ತಾಕತ್ತೂ ಬಂದ ಮೇಲೆ ಈ ಚಿಲ್ಲರೆ ದುನಿಯಾವೇ ಮರೆಯಾಗಿ ಹೋಗುತ್ತಿದೆ.
10 ನಿಮಿಷದ ಗೋಜಿಗೆ ಬಿದ್ದ ನಗರವಾಸಿಗಳು!
ಕೇವಲ ಹತ್ತೇ ಹತ್ತು ನಿಮಿಷ.. ನೀವು ಬಯಸಿದ್ದು ನಿಮ್ಮ ಮನೆ ಬಾಗಿಲಿಗೆ ಬಂದು ತಲುಪುತ್ತದೆ. ಹೌದು! ಡಿಜಿಟಲ್ ಸರ್ವೀಸ್ ಪ್ರಪಂಚ ಅಷ್ಟರ ಮಟ್ಟಿಗೆ ತನ್ನ ಕಬಂಧ ಬಾಹುಗಳನ್ನು ಚಾಚಿಕೊಂಡಿದೆ. ಮನೆಯಲ್ಲೇ ಕೂತು ಏನ್ ಏನ್ ಬೇಕೋ ಆರ್ಡರ್ ಮಾಡಿ ಕೇವಲ ಹತ್ತೇ ನಿಮಿಷದಲ್ಲಿ ಎಲ್ಲವೂ ಹಾಜರು. ಈ ಆನ್ ಲೈನ್ ಖರೀದಿ ಭರಾಟೆಯಲ್ಲಿ 2010ರಿಂದ ಇವತ್ತಿನವರೆಗೂ ಶೇ. 32ರಷ್ಟು ಚಿಲ್ಲರೆ ವ್ಯಾಪಾರ ಸ್ತಬ್ಧವಾಗುವಂತೆ ಮಾಡಿದೆ. ಕೇವಲ 15 ವರ್ಷದ ಈ ಬದಲಾವಣೆ ಚಿಲ್ಲರೆ ದಿನಸಿ ವ್ಯಾಪಾರ ಮಾಡುತ್ತಲೇ ತಮ್ಮ ಜೀವನ ಕಟ್ಟುಕೊಂಡಿದ್ದ ಅದೆಷ್ಟೋ ಕುಟುಂಬಗಳು ಇವತ್ತು ಪರ್ಯಾಯ ಉದ್ಯಮದ ಮೊರೆ ಹೋಗಿವೆ. ಅಷ್ಟೇ ಅಲ್ಲಾ ಇದೇ ವೇಗದಲ್ಲಿ ಆನ್ ಲೈನ್ ಪ್ರಪಂಚ ತನ್ನ ವಹಿವಾಟು ವಿಸ್ತರಿಸ್ತಾ ಹೋದರೆ 2030ರ ಹೊತ್ತಿಗೆ ಚಿಲ್ಲರೆ ವಹಿವಾಟು ಉದ್ಯಮವೇ ಮಕಾಡೆ ಮಲಗುತ್ತೆ ಅಂತಾ ಬಿಯಾನ್ ಅಧ್ಯಯನ ಸಂಸ್ಥೆ ಹೇಳಿದೆ.
ಮೊಬೈಲ್ ಕೈಯಲ್ಲಿದ್ದರೆ ಪ್ರಪಂಚವೇ ಮುಷ್ಠಿಯಲ್ಲಿ
ದೇಶದ 140 ಕೋಟಿ ಜನಸಂಖ್ಯೆಲ್ಲೀಗ ಮೊಬೈಲ್ ಹಾಸುಹೊಕ್ಕಾಗಿದೆ. ಇನ್ನು ಈ ಮೊಬೈಲ್ ಮೂಲಕವೇ ಇವತ್ತು ಕೂತಲ್ಲೇ ಬಾಟೆಲ್ ನೀರಿನಿಂದ ಹಿಡಿದು ಕೋಟ್ಯಂತರ ಬೆಲೆಯ ಕಾರನ್ನೂ ಖರೀದಿಸಬಹುದಾಗಿದೆ. ಈ ಆನ್ ಲೈನ್ ಭರಾಟೆ ನಿಜಕ್ಕೂ ಮಧ್ಯಮ ವರ್ಗದವರ ಬಾಳಲ್ಲಿ ಹಾಸು ಹೊಕ್ಕಾಗಿದ್ದ ಒಂದು ಅನುಬಂಧವನ್ನೇ ಕಡೆದು ಹಾಕಿದೆ. ಈ ಮೂಲಕ ಚಿಲ್ಲರೆ ವಹಿವಾಟಿನೊಟ್ಟಿಗಿದ್ದ ಒಂದು ಬಾಂಧವ್ಯದ ಕೊಂಡಿಯೂ ಕಳಚಿಕೊಂಡು ಹೋಗಿದೆ.
