ಲಂಡನ್‌: ಲಂಡನ್‌ನಲ್ಲಿ ಬಲಪಂಥೀಯ ಕಾರ್ಯಕರ್ತ ಟಾಮಿ ರಾಬಿನ್ಸನ್ ಅವರು ವಲಸೆ ವಿರೋಧಿ ರ‍್ಯಾಲಿಗೆ ಕರೆ ಕೊಟ್ಟಿದ್ದು, ಇದು ದೇಶದ ಇತಿಹಾಸದಲ್ಲೇ ಕಂಡುಕೇಳರಿಯದ ಬೃಹತ್ ರ‍್ಯಾಲಿ ಎಂಬ ಖ್ಯಾತಿಗೆ ಪಾತ್ರವಾಗಿದೆ “ಯುನೈಟ್ ದಿ ಕಿಂಗ್‌ಡಮ್” ಹೆಸರಿನ ಈ ರ‍್ಯಾಲಿಯಲ್ಲಿ ಒಂದೂವರೆ ಲಕ್ಷಕ್ಕೂ ಹೆಚ್ಚು ಜನರು ಭಾಗವಹಿಸಿದ್ದು, ಶಾಂತಿಯುತವಾಗಿ ಆರಂಭವಾದ ರ‍್ಯಾಲಿಯು ನಂತರ ಹಿಂಸಾಚಾರಕ್ಕೆ ತಿರುಗಿದ್ದು, ಪ್ರತಿಭಟನಾಕಾರರು ಪೊಲೀಸರೊಂದಿಗೆ ಘರ್ಷಣೆ ನಡೆಸಿದ್ದಾರೆ. ಈ ಸಂದರ್ಭದಲ್ಲಿ ಹಲವು ಪೊಲೀಸ್ ಅಧಿಕಾರಿಗಳು ಗಾಯಗೊಂಡಿದ್ದಾರೆ.
ಪೊಲೀಸರ ಮೇಲೆ ಹಲ್ಲೆ, 25ಕ್ಕೂ ಹೆಚ್ಚು ಬಂಧನ
ಮೆಟ್ರೋಪಾಲಿಟನ್ ಪೊಲೀಸರ ಪ್ರಕಾರ, ರ‍್ಯಾಲಿಯಲ್ಲಿದ್ದ ಕೆಲವರು ಪೊಲೀಸರ ಮೇಲೆ ಬಾಟಲಿಗಳನ್ನು ಎಸೆದು, ಅವರ ಮೇಲೆ ಹಲ್ಲೆ ನಡೆಸಿ, ಒದ್ದಿದ್ದಾರೆ. ಘಟನೆಯಲ್ಲಿ 26 ಪೊಲೀಸ್ ಅಧಿಕಾರಿಗಳು ಗಾಯಗೊಂಡಿದ್ದಾರೆ. ನಾಲ್ವರ ಹಲ್ಲು ಮುರಿದಿದ್ದು, ಕೆಲವರಿಗೆ ಮೂಗಿಗೆ ಗಾಯ ಮತ್ತು ಬೆನ್ನುಮೂಳೆಯ ಗಾಯದಂತಹ ಗಂಭೀರ ಸ್ವರೂಪದ ಗಾಯಗಳಾಗಿವೆ. ಹಿಂಸಾತ್ಮಕ ಕೃತ್ಯ, ಹಲ್ಲೆ ಮತ್ತು ಸಾರ್ವಜನಿಕ ಆಸ್ತಿಗೆ ಹಾನಿ ಮಾಡಿದ ಆರೋಪದ ಮೇಲೆ ಕನಿಷ್ಠ 25 ಜನರನ್ನು ಬಂಧಿಸಲಾಗಿದೆ. “ಅನೇಕರು ಕಾನೂನುಬದ್ಧವಾಗಿ ಪ್ರತಿಭಟಿಸಲು ಬಂದಿದ್ದರೂ, ಹಲವರು ಹಿಂಸಾಚಾರದ ಉದ್ದೇಶದಿಂದಲೇ ಬಂದಿದ್ದರು ಎಂಬುದರಲ್ಲಿ ಸಂದೇಹವಿಲ್ಲ” ಎಂದು ಸಹಾಯಕ ಆಯುಕ್ತ ಮ್ಯಾಟ್ ಟ್ವಿಸ್ಟ್ ಹೇಳಿದ್ದಾರೆ. ಘಟನಾ ಸ್ಥಳದಲ್ಲಿ 1,000ಕ್ಕೂ ಹೆಚ್ಚು ಪೊಲೀಸರನ್ನು ನಿಯೋಜಿಸಲಾಗಿತ್ತು.
ಬೃಹತ್ ಜನಸ್ತೋಮ ಮತ್ತು ಪ್ರತಿ-ಪ್ರತಿಭಟನೆ
ಪೊಲೀಸರ ಅಂದಾಜಿನ ಪ್ರಕಾರ, ಈ ರ‍್ಯಾಲಿಯಲ್ಲಿ 1,10,000 ದಿಂದ 1,50,000 ಜನರು ಭಾಗವಹಿಸಿದ್ದರು, ಇದು ನಿರೀಕ್ಷೆಗಿಂತಲೂ ಹೆಚ್ಚಿನ ಸಂಖ್ಯೆಯಾಗಿದೆ. ಇದೇ ವೇಳೆ, ‘ಸ್ಟ್ಯಾಂಡ್ ಅಪ್ ಟು ರೇಸಿಸಂ’ ಸಂಘಟನೆಯು ಆಯೋಜಿಸಿದ್ದ ‘ಫ್ಯಾಸಿಸಂ ವಿರೋಧಿ ಮೆರವಣಿಗೆ’ಯಲ್ಲಿ ಸುಮಾರು 5,000 ಜನರು ಭಾಗವಹಿಸಿದ್ದರು. ಟಾಮಿ ರಾಬಿನ್ಸನ್, ಇಸ್ಲಾಂ ವಿರೋಧಿ ‘ಇಂಗ್ಲಿಷ್ ಡಿಫೆನ್ಸ್ ಲೀಗ್’ನ ಸಂಸ್ಥಾಪಕರಾಗಿದ್ದು, ಬ್ರಿಟನ್‌ನ ಅತ್ಯಂತ ಪ್ರಭಾವಶಾಲಿ ಬಲಪಂಥೀಯ ವ್ಯಕ್ತಿಗಳಲ್ಲಿ ಒಬ್ಬರಾಗಿದ್ದಾರೆ.
ವಿವಾದಾತ್ಮಕ ಹೇಳಿಕೆಗಳು
ರ‍್ಯಾಲಿಯನ್ನುದ್ದೇಶಿಸಿ ವೀಡಿಯೋ ಮೂಲಕ ಮಾತನಾಡಿದ ಎಕ್ಸ್ (ಟ್ವಿಟರ್) ಮಾಲೀಕ ಎಲಾನ್ ಮಸ್ಕ್, “ಬ್ರಿಟನ್‌ನ ನಾಶವನ್ನು ನಾನು ನೋಡುತ್ತಿದ್ದೇನೆ. ಬೃಹತ್ ಅನಿಯಂತ್ರಿತ ವಲಸೆಯಿಂದ ಬ್ರಿಟನ್‌ನ ಸವೆತ ವೇಗವಾಗಿ ಹೆಚ್ಚುತ್ತಿದೆ” ಎಂದು ಹೇಳಿದ್ದಾರೆ. ಜೊತೆಗೆ, ಹಿಂಸಾಚಾರಕ್ಕೆ ಸಜ್ಜಾಗಿ ಎಂದೂ ಬ್ರಿಟನ್ ಸರ್ಕಾರಕ್ಕೆ ಬೆದರಿಕೆಯೊಡ್ಡಿದ್ದಾರೆ. ಫ್ರಾನ್ಸ್‌ನ ಬಲಪಂಥೀಯ ರಾಜಕಾರಣಿ ಎರಿಕ್ ಜೆಮ್ಮೂರ್, “ದಕ್ಷಿಣದಿಂದ ಬರುವ ಮುಸ್ಲಿಂ ಸಂಸ್ಕೃತಿಯವರು ನಮ್ಮ ಯುರೋಪಿಯನ್ ಜನರನ್ನು ಬದಲಾಯಿಸುತ್ತಿದ್ದಾರೆ” ಎಂದು ಹೇಳಿದ್ದಾರೆ. ಟಾಮಿ ರಾಬಿನ್ಸನ್, “ಈ ದೇಶವನ್ನು ಕಟ್ಟಿದ ಬ್ರಿಟಿಷ್ ಜನರಿಗಿಂತ ವಲಸಿಗರಿಗೆ ನ್ಯಾಯಾಲಯದಲ್ಲಿ ಹೆಚ್ಚಿನ ಹಕ್ಕುಗಳಿವೆ” ಎಂದು ಆರೋಪಿಸಿದ್ದಾರೆ.
ಪ್ರತಿಭಟನಾಕಾರರು “ವಲಸಿಗರ ದೋಣಿಗಳ ಆಗಮನವನ್ನು ನಿಲ್ಲಿಸಿ,” “ಅವರನ್ನು ವಾಪಸ್ ಕಳುಹಿಸಿ” ಮತ್ತು “ನಮ್ಮ ದೇಶವನ್ನು ನಮಗೆ ಹಿಂದಿರುಗಿಸಿ” ಎಂಬಂತಹ ಘೋಷಣೆಗಳನ್ನು ಕೂಗುತ್ತಾ ಮೆರವಣಿಗೆಯಲ್ಲಿ ಪಾಲ್ಗೊಂಡಿದ್ದಾರೆ. ಇದಕ್ಕೆ ಪ್ರತಿಯಾಗಿ, ಪ್ರತಿ-ಪ್ರತಿಭಟನಾಕಾರರು “ನಿರಾಶ್ರಿತರಿಗೆ ಸ್ವಾಗತ” ಮತ್ತು “ಬಲಪಂಥೀಯರನ್ನು ಸದೆಬಡಿಯಿರಿ” ಎಂಬ ಫಲಕಗಳನ್ನು ಪ್ರದರ್ಶಿಸಿದ್ದಾರೆ. ಇಂಗ್ಲಿಷ್ ಕರಾವಳಿಗೆ ದೋಣಿಗಳ ಮೂಲಕ ಅಕ್ರಮವಾಗಿ ವಲಸಿಗರು ಆಗಮಿಸುತ್ತಿರುವ ವಿಷಯವು ಬ್ರಿಟನ್‌ನಲ್ಲಿ ದೊಡ್ಡ ಚರ್ಚೆಗೆ ಕಾರಣವಾಗಿದ್ದು, ಈ ಹಿನ್ನೆಲೆಯಲ್ಲಿ ಈ ರ‍್ಯಾಲಿಯನ್ನು ಆಯೋಜಿಸಲಾಗಿತ್ತು.
