ಬಿಬಿಎಂಪಿ ಮಾರುಕಟ್ಟೆಗಳನ್ನು ಲೋಕಲ್ ಮಾಫಿಯಾ ನಿಯಂತ್ರಿಸುತ್ತಿವೆ ಎಂಬ ಆರೋಪ ಕೇಳಿ ಬಂದಿದೆ.
ಮಾಫಿಯಾದಿಂದಾಗಿ ಮಾರುಕಟ್ಟೆಯಲ್ಲಿನ ಅಂಗಡಿಗಳ ಬಾಡಿಗೆ ಬರುತ್ತಿಲ್ಲ. ಬಿಬಿಎಂಪಿಗೆ ಮಾರುಕಟ್ಟೆಯಲ್ಲಿನ ಅಂಗಡಿಗಳಿಂದ ಬರೋಬ್ಬರಿ 170 ಕೋಟಿ ರೂ. ಬಾಕಿ ಬಾಡಿಗೆ ಬರಬೇಕು. ಆದರೆ, ವಸೂಲಿಗೆ ಹೋದರೆ ರೌಡಿಗಳ ಕಾಟ ಎದುರಾಗುತ್ತಿದೆ ಎಂಬ ಗಂಭೀರ ಆರೋಪ ಕೇಳಿ ಬಂದಿದೆ.
ರೌಡಿಗಳು ಸ್ಥಳೀಯ ಕಂದಾಯ ಇಲಾಖೆಯ ಅಧಿಕಾರಿಗಳಿಗೆ ಬೆದರಿಕೆ ಹಾಕುತ್ತಿದ್ದಾರೆ ಎನ್ನಲಾಗಿದೆ. ನಗರದ ಕೆ.ಅರ್. ಮಾರುಕಟ್ಟೆ, ರಸಲ್ ಮಾರುಕಟ್ಟೆ, ಜಯನಗರ ಮಾರುಕಟ್ಟೆ, ಮಡಿವಾಳ ಮಾರುಕಟ್ಟೆ ಸೇರಿದಂತೆ 123 ಮಾರುಕಟ್ಟೆಗಳಿಂದ 170 ಕೋಟಿ ರೂ. ಬಾಕಿ ಬರಬೇಕು.
123 ಮಾರುಕಟ್ಟೆಗಳಲ್ಲಿ ಸುಮಾರು 6 ಸಾವಿರ ಮಳಿಗೆಗಳಿವೆ. ಆದರೆ, ಮಳಿಗೆ ಬಾಡಿಗೆ ಪಡೆದವರು ಸರಿಯಾಗಿ ಬಾಡಿಗೆ ಪಾವತಿ ಮಾಡುತ್ತಿಲ್ಲ. ಬಾಡಿಗೆ ವಸೂಲಿಗೆ ಹೋದರೆ ರಾಜಕಾರಣಿಗಳು, ವಿವಿಧ ಸಂಘಟನೆಯ ಪದಾಧಿಕಾರಿಗಳ ನಿಯಂತ್ರಣ ಹೊಂದಿದವರಂತೆ ಅಧಿಕಾರಿಗಳಿಗೆ ತೊಂದರೆ ಮಾಡುತ್ತಿದ್ದಾರೆ ಎನ್ನಲಾಗಿದೆ.
ಮಾಫಿಯಾಗಳ ನಿಯಂತ್ರಣದಲ್ಲಿ ನಗರದ ಮಾರುಕಟ್ಟೆಗಳು ಇರುವುದರಿಂದ ಬಿಬಿಎಂಪಿಗೆ ತೊಂದರೆಯಾಗುತ್ತಿದೆ. ಹಲವು ಮಳಿಗೆಗಳ ಮಾಲೀಕರು ಕಳೆದ ಹತ್ತಾರು ವರ್ಷಗಳಿಂದಲೂ ಬಾಡಿಗೆ ಪಾವತಿ ಮಾಡಿಲ್ಲ ಎನ್ನಲಾಗಿದೆ.
