ಫ್ಲ್ಯಾಪ್…ಫ್ಲ್ಯಾಪ್…ಫ್ಲ್ಯಾಪ್…ಯೆಸ್….ಇದು ಸಿನಿಮಾ ನೋಡಿ ಬಂದ ತಮಿಳಿನ ಕಟ್ಟರ್ ಕಮಲ್ ಹಾಸನ್ ಅಭಿಮಾನಿಗಳೇ ಕೊಡುತ್ತಿರುವ ಮೆಗಾ ರಿಸಲ್ಟ್….ಕನ್ನಡಿಗರನ್ನು ಕೆಣಕಿ ಕೆಟ್ಟ ಕಮಲ್ ಹಾಸನ್ ತಮ್ಮ ಚಿತ್ರ ಬದುಕಿನ ಅತ್ಯಂತ ದೊಡ್ಡ ಮಕಾಡೆ ಸಿನಿಮಾವನ್ನು ಪ್ರೇಕ್ಷಕರ ಮುಂದಿಟ್ಟು ಛೀ…ಥೂ ಅಂತಾ ಉಗಿಸಿಕೊಳ್ಳುತ್ತಿದ್ದಾರೆ.
ಮೊದಲ ದಿನವೇ ಹೇಳ ಹೆಸರಿಲ್ಲದಂತಾದ ಥಗ್ ಲೈಫ್
ಕನ್ನಡಿಗರೇ ಮಹಾ ಪುಣ್ಯವಂತರೆಂದ ಅಭಿಮಾನಿಗಳು
ಕಮಲ್ ಹಾಸನ್-ಮಣಿರತ್ನಂ ಜೊತೆಯಾಗಿ 3 ದಶಕಗಳ ಬಳಿಕ ನಿರ್ಮಿಸಿದ ಸಿನಿಮಾ ಅದು ಥಗ್ ಲೈಫ್, ನಿನ್ನೆಯಷ್ಟೇ ಜಗತ್ತಿನಾದ್ಯಂತ ತೆರೆಗೆ ಅಪ್ಪಳಿಸಿದೆ. ಈಗ ಥಗ್ ಲೈಫ್ ಭವಿಷ್ಯವನ್ನು ಖುದ್ದು ಕಮಲ್ ರ ಅಚ್ಚುಮೆಚ್ಚಿನ ಅಭಿಮಾನಿಗಳೇ ಬರೆದು ಬಿಸಾಕಿದ್ದಾರೆ. ಥಗ್ ಲೈಫ್ ಕಮಲ್ ಜೀವನದ ಅತ್ಯಂತ ಕೆಟ್ಟ ಸಿನಿಮಾ ಅಂತಾ ಎಲ್ಲೆಡೆ ಟ್ರೆಂಡ್ ಆಗುತ್ತಿದೆ. ಮೊದಲ ದಿನದ ಮೊದಲ ಶೋ ನೋಡಿ ಬರುತ್ತಿದ್ದಂತೆ ಅಭಿಮಾನಿಗಳು ಸಿನಿಮಾಕ್ಕೆ ಛೀ…ಥೂ ಅಂತಾ ಕ್ಯಾಕರಿಸಿ ಉಗಿದಿದ್ದಾರೆ. ಅಷ್ಟೇ ಅಲ್ಲಾ ಕನ್ನಡಿಗರೇ ನೀವೇ ಮಹಾ ಪುಣ್ಯವಂತರು ಎಂದಿದ್ದಾರೆ. ಇಂತಹ ಕೆಟ್ಟ ಸಿನಿಮಾದಿಂದ ನೀವು ಪಾರಾಗಿದ್ದೀರಿ ಅಂತಾ ಅಭಿಪ್ರಾಯಪಟ್ಟಿದ್ದಾರೆ.
ಕಮಲ್ ಹಾಸನ್ ರ 300 ಕೋಟಿ ನೀರಿನಲ್ಲಿ ಹೋಮ
ಕಿತ್ತೋದ ಕತೆ, ಭಾವಹೀನ ನಟನೆ, ನಿದ್ರೆಗೆ ಒಳ್ಳೆ ಮಾತ್ರೆ
ಥಗ್ ಲೈಫ್ ನ ಭವಿಷ್ಯ ಬರೆದಿರುವ ಅಭಿಮಾನಿಗಳು, ಇದೊಂದು ಅತ್ಯಂತ ಕೆಟ್ಟದ್ದರಲ್ಲೇ ಕೆಟ್ಟ ಸಿನಿಮಾ ಎಂದಿದ್ದಾರೆ. ತಮಿಳಿನ ಸದ್ಯದವರೆಗಿನ ಅತ್ಯಂತ ಕಿತ್ತೋದ ಸಿನಿಮಾ ಅಂದ್ರೆ ಅದು ವಾರಿಸು ಹೆಸರಲ್ಲಿತ್ತು. ಅದನ್ನೂ ಥಗ್ ಲೈಫ್ ಬೀಟ್ ಮಾಡಿದೆ ಅಂತಾ ಅಭಿಮಾನಿಗಳು ಶರಾ ಬರೆದಿದ್ದಾರೆ. ಥಗ್ ಲೈಫ್ ಗಿಂತಾ ಇಂಡಿಯನ್ 2 ಸಾವಿರ ಪಟ್ಟು ಬೆಟರ್ ಎಂದಿದ್ದಾರೆ.
ಅಷ್ಟೇ ಅಲ್ಲಾ ಥಗ್ ಲೈಫ್ ಗೆ ಬಂದ್ರೆ ನಿದ್ರೆ ಮಾತ್ರೆಯೇ ಬೇಡ ಚೆನ್ನಾಗಿ ಮಲಗಬಹುದು ಅಂತಾ ಕಾಲೆಳೆದಿದ್ದಾರೆ. ಅಭಿಮಾನಿಗಳ ಈ ಫಲಿತಾಂಶ ನಿಜಕ್ಕೂ ಕಮಲ್ ಪಾಲಿಗೆ ಬರಸಿಡಿಲಾಗುತ್ತಿದೆ. ಥಗ್ ಲೈಫ್ ಗೆ ಕಮಲ್ ನಟನೆಗೆ ಹಣ ಪಡೆಯದೆ ನಿರ್ಮಾಪಕನ ಪಾತ್ರ ನಿರ್ವಹಿಸಿದ್ದಾರೆ. ಇನ್ನು ನಟ ಸಿಂಬುಗೆ 40 ಕೋಟಿ ರೂ. ಸಂಭಾವನೆ ನೀಡಿರುವ ಮಾತುಗಳಿವೆ. ಉಳಿದಂತೆ ತ್ರಿಶಾಗೆ 12 ಕೋಟಿ ರೂ., ಅಶೋಕ್ ಸೆಲ್ವನ್, ಜೀಜು ಜಾರ್ಜ್ ಗೆ ತಲಾ 1 ಕೋಟಿ ರೂ., ಅಭಿರಾಮಿಗೆ 50 ಲಕ್ಷ ರೂ. ಸಂಭಾವನೆ ನೀಡಲಾಗಿದೆ. ಎ.ಆರ್. ರೆಹಮಾನ್ ಸಂಗೀತ, ಚಿತ್ರದ ಪ್ರಚಾರ ಹೀಗೆ ಎಲ್ಲವನ್ನೂ ಒಟ್ಟು ಮಾಡಿದರೆ 300 ಕೋಟಿ ರೂ. ಗಡಿದಾಟುತ್ತೆ.
ಆದರೆ ಸಿನಿಮಾದ ಮೊದಲ ದಿನದ ಕಲೆಕ್ಷನ್ 12 ಕೋಟಿ ರೂ. ದಾಟಿಲ್ಲ. ಹಾಗೆ ನೋಡಿದರೆ ಇಂಡಿಯನ್ 2 ಸಿನಿಮಾ ಮೊದಲ ದಿನ 25 ಕೋಟಿ ರೂ ಮೀರಿದ ಆದಾಯ ಗಳಿಸಿತ್ತು. ಅಲ್ಲಿಗೆ ಸಿನಿಮಾ ತನ್ನ ಲೈಫ್ ಟೈಮ್ ಬಾಕ್ಸ್ ಆಫೀಸ್ ಕಲೆಕ್ಷನ್ ಆಗಿ 100 ಕೋಟಿ ರೂ ಹತ್ತಿರಕ್ಕೆ ಹೋಗುವುದು ಬಲು ಕಷ್ಟವಿದೆ. ಹೀಗಾಗಿ ಕಮಲ್ ರ ಬಂಡವಾಳ ನೀರಿನಲ್ಲಿ ಹೋಮದಂತಾಗಲಿದೆ. ಈ ಮೂಲಕ ಕನ್ನಡಿಗರ ಕೆಣಕಿದ ತಪ್ಪಿಗೆ ಮಿಸ್ಟರ್ ಕಮಲ್ ಗೆ ದೊಡ್ಡ ಶಾಸ್ತಿಯಾಗಿದೆ.
