ಬೆಂಗಳೂರು: ಹೊಸ ಹಣಕಾಸು ವರ್ಷ ಪ್ರಾರಂಭವಾಗಿದೆ. ಮತ್ತೊಂದೆಡೆ, ತೆರಿಗೆದಾರರು 2024-25ನೇ ಸಾಲಿನ ಆದಾಯ ತೆರಿಗೆ ರಿಟರ್ನ್ಸ್ (IT Returns) ಸಲ್ಲಿಸುವ ಪ್ರಕ್ರಿಯೆ ಕೂಡ ಏಪ್ರಿಲ್ 1ರಿಂದಲೇ ಆರಂಭವಾಗಿದೆ. ಆನ್ ಲೈನ್ ಮೂಲಕ ಐಟಿಆರ್ ಸಲ್ಲಿಸಲು 1,2,4,6 ನಂತಹ ಫಾರ್ಮ್ ಗಳು ಲಭ್ಯ ಇವೆ. ಇನ್ನು, ಸುಮಾರು 1 ಸಾವಿರ ರೂ.ನಿಂದ 5 ಸಾವಿರ ರೂ.ವರೆಗಿನ ದಂಡ ತಪ್ಪಿಸಿಕೊಳ್ಳಬೇಕು ಎಂದರೆ ಗಡುವು ಮುಗಿಯುವುದರೊಳಗೆ ಐಟಿಆರ್ ಸಲ್ಲಿಸಬೇಕು.
ಏಪ್ರಿಲ್ 1ರಿಂದಲೇ 2024-25ನೇ ಸಾಲಿನ ಐಟಿಆರ್ ಸಲ್ಲಿಕೆ ಪ್ರಕ್ರಿಯೆ ಆರಂಭವಾಗಿದೆ. ಹಾಗೆ ನೋಡಿದರೆ, ಐಟಿಆರ್ ಸಲ್ಲಿಸಲು ಜುಲೈ 31ರ ಡೆಡ್ ಲೈನ್ ನೀಡಲಾಗಿದೆ. ಆದರೆ, ಕೊನೆಯ ಕ್ಷಣದ ಕಸರತ್ತು, ಗೊಂದಲಗಳಿಂದ ಮುಕ್ತವಾಗಲು ಎಷ್ಟು ಸಾಧ್ಯವೋ ಅಷ್ಟು ಬೇಗನೆ ಐಟಿಆರ್ ಸಲ್ಲಿಸುವುದು ಉತ್ತಮವಾಗಿದೆ. ಆನ್ ಲೈನ್ ಮೂಲಕ ಐಟಿಆರ್ ಸಲ್ಲಿಸುವವರು https://eportal.incometax.gov.in/ ವೆಬ್ ಪೋರ್ಟಲ್ ಗೆ ಭೇಟಿ ನೀಡಬಹುದು.
ಆದಾಯ ತೆರಿಗೆ ಕಾಯ್ದೆಯ ಸೆಕ್ಷನ್ 139 ರ ಪ್ರಕಾರ ಗಡುವು ಮುಗಿಯುವುದರೊಳಗೆ ಐಟಿಆರ್ ಫೈಲಿಂಗ್ ಪೂರ್ಣಗೊಳಿಸಬೇಕು. ಇಲ್ಲದಿದ್ದರೆ, ಸೆಕ್ಷನ್ 234ಎಫ್ ಪ್ರಕಾರ 5 ಸಾವಿರ ರೂ. ದಂಡ ಪಾವತಿಸಬೇಕಾಗುತ್ತದೆ. ವಾರ್ಷಿಕ ಆದಾಯ 5 ಲಕ್ಷ ರೂ.ಗಿಂತ ಹೆಚ್ಚಿದ್ದರೆ 5 ಸಾವಿರ ವಿಳಂಬ ಶುಲ್ಕ ಪಾವತಿಸಬೇಕು. ವಾರ್ಷಿಕ ಆದಾಯ 5 ಲಕ್ಷ ರೂ.ಗಿಂತ ಕಡಿಮೆ ಇದ್ದರೆ 1 ಸಾವಿರ ರೂ. ದಂಡ ವಿಧಿಸಲಾಗುತ್ತದೆ.
ಹಾಗೊಂದು ವೇಳೆ, ಜುಲೈ 31ರ ಗಡುವು ತಪ್ಪಿದರೆ ಆಗಸ್ಟ್ 1 ರಿಂದ ಡಿಸೆಂಬರ್ 31 ರೊಳಗೆ ದಂಡ ಶುಲ್ಕದೊಂದಿದೆ ಬಿಲೇಟೆಡ್ ಐಟಿಆರ್ ಸಲ್ಲಿಸಬಹುದು. ಆದರೆ, ದಂಡ ಮತ್ತು ಬಡ್ಡಿ ಎರಡನ್ನೂ ಪಾವತಿಸಬೇಕಾಗುತ್ತದೆ. ಇದಲ್ಲದೆ ಹಳೆಯ ತೆರಿಗೆ ವ್ಯವಸ್ಥೆಯನ್ನು ಆಯ್ಕೆ ಮಾಡಿಕೊಳ್ಳುವ ಅವಕಾಶ ತಪ್ಪುತ್ತದೆ. ಸ್ವಯಂಚಾಲಿತವಾಗಿ ಹೊಸ ತೆರಿಗೆ ವ್ಯವಸ್ಥೆಯ ಪ್ರಕಾರ ತೆರಿಗೆ ಪಾವತಿಸಬೇಕಾಗುತ್ತದೆ.
