ಬೆಂಗಳೂರು: 2024-25ನೇ ಹಣಕಾಸು ವರ್ಷದ ಆದಾಯ ತೆರಿಗೆ ರಿಟರ್ನ್ಸ್ (ITR Filing) ಸಲ್ಲಿಕೆಯು ಏಪ್ರಿಲ್ 1ರಿಂದಲೇ ಆರಂಭವಾಗಿದೆ. ಐಟಿಆರ್ ಸಲ್ಲಿಸಲು ಫಾರಂ 16 ಅವಶ್ಯಕತೆ ಇದ್ದು, ಹೂಡಿಕೆ ದಾಖಲೆಗಳೊಂದಿಗೆ ಇದನ್ನು ಸಲ್ಲಿಸಲು ತೆರಿಗೆದಾರರು ಸಿದ್ಧರಾಗಿದ್ದಾರೆ. ಆದರೆ, ಕೆಲವು ಸಂದರ್ಭಗಳಲ್ಲಿ ಉದ್ಯೋಗಿಗಳಿಗೆ ಫಾರಂ 16 ಲಭ್ಯವಾಗುವುದಿಲ್ಲ. ಹಾಗಾಗಿ, ಅಂತಹವರು ಆತಂಕಪಡುವ ಅಗತ್ಯವಿಲ್ಲ. ಏಕೆಂದರೆ, ಫಾರಂ 16 ಇಲ್ಲದೆಯೇ ಐಟಿ ರಿಟರ್ನ್ಸ್ ಸಲ್ಲಿಸಬಹುದಾಗಿದೆ.
ಹೌದು, ಫಾರಂ 16 ಇಲ್ಲದೆ, ಕೇವಲ ಸ್ಯಾಲರಿ ಸ್ಲಿಪ್ ಮೂಲಕ ಐಟಿಆರ್ ಸಲ್ಲಿಸಬಹುದಾಗಿದೆ. ಮೊದಲಿಗೆ ಒಂದು ಹಣಕಾಸು ವರ್ಷದಲ್ಲಿ ವಿವಿಧ ಮೂಲಗಳಿಂದ ಬಂದ ಆದಾಯವನ್ನು ಲೆಕ್ಕ ಹಾಕಬೇಕು. ವೇತನದ ಲೆಕ್ಕಾಚಾರಕ್ಕೆ ಸ್ಯಾಲರಿ ಸ್ಲಿಪ್ ಇದ್ದೇ ಇರುತ್ತದೆ. ಎಲ್ಲ ಆದಾಯ ಲೆಕ್ಕ ಹಾಕಿದ ಬಳಿಕ ತೆರಿಗೆಗೆ ಒಳಪಡುವ ಆದಾಯ ಎಷ್ಟು ಎಂಬುದನ್ನು ಗುರುತಿಸಬೇಕು.
ತೆರಿಗೆ ಉಳಿತಾಯದ ದೃಷ್ಟಿಯಿಂದ ಹೆಲ್ತ್ ಇನ್ಶೂರೆನ್ಸ್, ಟರ್ಮ್ ಇನ್ಶೂರೆನ್ಸ್ ಸೇರಿ ಯಾವುದೇ ಮಾದರಿಯ ಹೂಡಿಕೆಗಳ ಮಾಹಿತಿ ಸಂಗ್ರಹಿಸಬೇಕು. ಬಾಡಿಗೆ ಮನೆ ಇದ್ದರೆ ಅದರ ಮಾಹಿತಿಯನ್ನೂ ಒದಗಿಸಬೇಕು. ನಂತರ ಸ್ಯಾಲರಿ ಸ್ಲಿಪ್ ಮೂಲಕವೇ ಫಾರಂ 16 ಇಲ್ಲದೆಯೇ ಐಟಿಆರ್ ಸಲ್ಲಿಸಬಹುದಾಗಿದೆ. ಆದಾಯವು ವಿನಾಯಿತಿ ಮಿತಿಯನ್ನು ಮೀರಿದ್ದರೆ ಮಾತ್ರ ತೆರಿಗೆ ಪಾವತಿಸಬೇಕು.
ಏನಿದು ಫಾರಂ 16? ಯಾವಾಗ ಸಿಗಲ್ಲ?
ಕಂಪನಿಗಳ ಮಾಲೀಕರು ಪ್ರತಿ ವರ್ಷ ಉದ್ಯೋಗಿಗಳಿಗೆ ನೀಡುವ ದಾಖಲೆಯೇ ಫಾರಂ 16. ಉದ್ಯೋಗಿಯ ವಾರ್ಷಿಕ ಆದಾಯ, ಖಚು, ಉಳಿತಾಯ, ಹೂಡಿಕೆ ಸೇರಿ ಟಿಡಿಎಸ್ ಕಡಿತಗೊಳಿಸುವ ವಿವರವನ್ನು ಫಾರಂ 16 ಹೊಂದಿರುತ್ತದೆ. ಇದನ್ನು ಎಲ್ಲ ಕಂಪನಿಗಳು ಕಡ್ಡಾಯವಾಗಿ ಉದ್ಯೋಗಿಗಳಿಗೆ ನೀಡುತ್ತವೆ. ಆದರೆ, ಉದ್ಯೋಗಿಗಳು ಒಂದು ಕಂಪನಿಯಿಂದ ಮತ್ತೊಂದು ಕಂಪನಿಗೆ ಸೇರಿದಾಗ ಕ್ಷಿಪ್ರವಾಗಿ ಫಾರಂ 16 ದೊರೆಯುವುದಿಲ್ಲ. ಅಂತಹ ಸಂದರ್ಭದಲ್ಲಿ ಫಾರಂ 16 ಇಲ್ಲದೆಯೇ ಐಟಿಆರ್ ಸಲ್ಲಿಸಬಹುದಾಗಿದೆ.
