ಇಸ್ರೋದಿಂದ ‘ಮಂಗಳನ ಅಂಗಳದಲ್ಲಿ ಹಾರಾಟ’ ಸ್ಪರ್ಧೆ : ಜಿಪಿಎಸ್ ಇಲ್ಲದೆ ಡ್ರೋನ್ ಹಾರಿಸಿ ಗೆದ್ದ ವಿದ್ಯಾರ್ಥಿಗಳು!

ನವದೆಹಲಿ: ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ), ಭವಿಷ್ಯದ ಗ್ರಹಾಂತರ ಅನ್ವೇಷಣೆಯತ್ತ ದಿಟ್ಟ ಹೆಜ್ಜೆ ಇರಿಸಿದೆ. ಇತ್ತೀಚೆಗೆ ಆಯೋಜಿಸಲಾಗಿದ್ದ “ಐಆರ್‌ಒಸಿ-ಯು 2025 ರೊಬೊಟಿಕ್ಸ್ ಚಾಲೆಂಜ್” ಸ್ಪರ್ಧೆಯಲ್ಲಿ, ಜಿಪಿಎಸ್‌ನಂತಹ ಯಾವುದೇ ಬಾಹ್ಯ ನೆರವಿಲ್ಲದೆ ಮಂಗಳ ಗ್ರಹದ ವಾತಾವರಣದಲ್ಲಿ ಸ್ವಾಯತ್ತವಾಗಿ ಹಾರಾಟ ನಡೆಸಬಲ್ಲ ಡ್ರೋನ್ ಅನ್ನು ವಿನ್ಯಾಸಗೊಳಿಸುವ ಸವಾಲನ್ನು ವಿದ್ಯಾರ್ಥಿಗಳಿಗೆ ನೀಡಲಾಗಿತ್ತು. ಈ ಸ್ಪರ್ಧೆಯು ಇಸ್ರೋದ ಮಹತ್ವಾಕಾಂಕ್ಷೆಯ ‘ಮಂಗಳಯಾನ-2’ ಯೋಜನೆಗೆ ಪೂರಕ ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸುವ ಗುರಿಯನ್ನು ಹೊಂದಿದೆ.

“ಫ್ಲೈ ಮಿ ಆನ್ ಮಾರ್ಸ್” (ಮಂಗಳನ ಅಂಗಳದಲ್ಲಿ ನನ್ನನ್ನು ಹಾರಿಸು) ಎಂಬ ವಿಷಯದಡಿ ನಡೆದ ಈ ಸ್ಪರ್ಧೆಯು ಬಾಹ್ಯಾಕಾಶ ವಿಜ್ಞಾನದ ಅತ್ಯಂತ ಕಠಿಣ ಸಮಸ್ಯೆಗಳಲ್ಲಿ ಒಂದನ್ನು ಪರಿಹರಿಸುವ ಗುರಿಯನ್ನು ಹೊಂದಿತ್ತು. ಮಂಗಳ ಗ್ರಹದಲ್ಲಿ ಜಿಪಿಎಸ್ ಅಥವಾ ಯಾವುದೇ ರೀತಿಯ ಬಾಹ್ಯ ನ್ಯಾವಿಗೇಷನ್ ವ್ಯವಸ್ಥೆ ಲಭ್ಯವಿಲ್ಲದ ಕಾರಣ, ಅಲ್ಲಿಗೆ ಕಳುಹಿಸುವ ವೈಮಾನಿಕ ವಾಹನಗಳು ತಮ್ಮದೇ ಆದ ಸೆನ್ಸರ್‌ಗಳು ಮತ್ತು ಕೃತಕ ಬುದ್ಧಿಮತ್ತೆಯ ಅಲ್ಗಾರಿದಮ್‌ಗಳನ್ನು ಬಳಸಿ ಹಾರಾಟ ನಡೆಸಬೇಕು, ಸುರಕ್ಷಿತ ಸ್ಥಳವನ್ನು ಗುರುತಿಸಿ ಲ್ಯಾಂಡ್ ಆಗಬೇಕು ಮತ್ತು ಮೂಲಸ್ಥಾನಕ್ಕೆ ಮರಳಬೇಕು. ಈ ಸ್ಪರ್ಧೆಯು ಇಂತಹದ್ದೇ ಒಂದು ಸ್ವಾಯತ್ತ ನ್ಯಾವಿಗೇಷನ್ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸುವ ಸವಾಲನ್ನು ವಿದ್ಯಾರ್ಥಿಗಳ ಮುಂದಿಟ್ಟಿತ್ತು.

ತಂತ್ರಜ್ಞಾನದ ಪರೀಕ್ಷೆ

ಈ ಸ್ಪರ್ಧೆಯು ಕೇವಲ ಡ್ರೋನ್ ಹಾರಾಟದ ಕೌಶಲ್ಯವನ್ನು ಪರೀಕ್ಷಿಸಲಿಲ್ಲ, ಬದಲಿಗೆ ಅದರ ಸಾಫ್ಟ್‌ವೇರ್ ಬುದ್ಧಿಮತ್ತೆಗೆ ಹೆಚ್ಚಿನ ಒತ್ತು ನೀಡಿತ್ತು. ಸ್ಪರ್ಧಿಗಳು ವಿನ್ಯಾಸಗೊಳಿಸಿದ ಡ್ರೋನ್‌ಗಳು, ಮಾನವನ ನಿಯಂತ್ರಣವಿಲ್ಲದೆ, ಮಂಗಳನ ಮೇಲ್ಮೈಯನ್ನು ಹೋಲುವ ಕೃತಕ ಅಂಗಳದಲ್ಲಿ ಸ್ವಾಯತ್ತವಾಗಿ ಟೇಕ್-ಆಫ್ ಆಗುವುದು, ಸ್ಥಿರವಾಗಿ ಹಾರುವುದು (ಹೋವರ್), ಸುತ್ತಮುತ್ತಲಿನ ಪ್ರದೇಶವನ್ನು ಸ್ಕ್ಯಾನ್ ಮಾಡುವುದು ಮತ್ತು ಸುರಕ್ಷಿತ ಲ್ಯಾಂಡಿಂಗ್ ತಾಣವನ್ನು ಗುರುತಿಸಿ ಇಳಿಯುವ ಸಾಮರ್ಥ್ಯವನ್ನು ಪ್ರದರ್ಶಿಸಬೇಕಿತ್ತು. ಸ್ಪರ್ಧೆಯ ಸಮಯದಲ್ಲಿ ಕೆಲವು ಡ್ರೋನ್‌ಗಳು ಗುರಿ ತಪ್ಪಿದರೆ, ಮತ್ತೆ ಕೆಲವು ಪತನಗೊಂಡು ವಿಫಲವಾದವು.

ವಿಜೇತ ತಂಡದ ಸಾಧನೆ

ಈ ಕಠಿಣ ಸ್ಪರ್ಧೆಯಲ್ಲಿ ಪುಣೆ ಇನ್‌ಸ್ಟಿಟ್ಯೂಟ್ ಆಫ್ ಕಂಪ್ಯೂಟರ್ ಟೆಕ್ನಾಲಜಿ (PICT) ಯ ‘ಗ್ಯಾಲಾಕ್ಟಿಕ್ ಗೇರ್‌ಹೆಡ್ಸ್’ ತಂಡವು ಅಗ್ರಸ್ಥಾನವನ್ನು ಪಡೆದುಕೊಂಡಿದೆ. ಈ ತಂಡದ ಡ್ರೋನ್, ತಿರುಗುವ LiDAR (ಲೈಟ್ ಡಿಟೆಕ್ಷನ್ ಮತ್ತು ರೇಂಜಿಂಗ್) ವ್ಯವಸ್ಥೆಯನ್ನು ಬಳಸಿ, ನೈಜ ಸಮಯದಲ್ಲಿ ಮಂಗಳನ ಕೃತಕ ಅಂಗಳದ ನಕ್ಷೆಯನ್ನು ತಯಾರಿಸಿ, ಸ್ವಾಯತ್ತವಾಗಿ ಸುರಕ್ಷಿತ ಮಾರ್ಗ ಮತ್ತು ಲ್ಯಾಂಡಿಂಗ್ ಅನುಕ್ರಮಗಳನ್ನು ರೂಪಿಸಿತ್ತು. ಹಾರಾಟದ ಸಮಯದಲ್ಲಿ ಎದುರಾದ ಅನಿರೀಕ್ಷಿತ ಅಡಚಣೆಗಳನ್ನು ಯಶಸ್ವಿಯಾಗಿ ನಿಭಾಯಿಸಿ, ಸ್ಥಿರತೆಯನ್ನು ಪ್ರದರ್ಶಿಸಿದ್ದು ತೀರ್ಪುಗಾರರ ಮೆಚ್ಚುಗೆಗೆ ಪಾತ್ರವಾಯಿತು.

ಭವಿಷ್ಯದ ಯೋಜನೆಗಳಿಗೆ ಬುನಾದಿ

2028ರ ಸುಮಾರಿಗೆ ಉಡಾವಣೆ ಮಾಡಲು ಯೋಜಿಸಲಾಗಿರುವ ‘ಮಂಗಳಯಾನ-2’ ಮಿಷನ್‌ನಲ್ಲಿ, ರೋವರ್ ಜೊತೆಗೆ ಒಂದು ವೈಮಾನಿಕ ವಾಹನವನ್ನೂ ಕಳುಹಿಸಲು ಇಸ್ರೋ ಚಿಂತನೆ ನಡೆಸಿದೆ. ಈ ಸ್ಪರ್ಧೆಯಿಂದ ಕಲಿತ ಪಾಠಗಳು ಮತ್ತು ಅಭಿವೃದ್ಧಿಪಡಿಸಿದ ತಂತ್ರಜ್ಞಾನಗಳು, ಬೇರೆ ಗ್ರಹದಲ್ಲಿ ಹಾರಾಟ ನಡೆಸಲಿರುವ ಭಾರತದ ಮೊದಲ ವೈಮಾನಿಕ ಅನ್ವೇಷಕನ ವಿನ್ಯಾಸಕ್ಕೆ ಮಾರ್ಗದರ್ಶನ ನೀಡಲಿವೆ. ಈ ಮೂಲಕ, ಇಸ್ರೋ ದೇಶದ ಯುವ ಪ್ರತಿಭೆಗಳನ್ನು ಬಾಹ್ಯಾಕಾಶ ಅನ್ವೇಷಣೆಯ ನೈಜ ಸವಾಲುಗಳನ್ನು ಎದುರಿಸಲು ಪ್ರೇರೇಪಿಸುತ್ತಿದೆ.

ಇದನ್ನೂ ಓದಿ: ಗುಂಡಿನ ಸದ್ದು, ಸೇತುವೆ ಕುಸಿತ | ಕಾಂಗೋ ತಾಮ್ರ ಗಣಿಯಲ್ಲಿ ಪ್ರಾಣ ಕಳೆದುಕೊಂಡ 32 ಕಾರ್ಮಿಕರು!