ಲೆಬನಾನ್ ಹಳ್ಳಿಗಳ ಮೇಲೆ ಇಸ್ರೇಲ್‌ನಿಂದ ‘ವೈಟ್ ಫಾಸ್ಫರಸ್’ ದಾಳಿ.. ಏನಿದು ನಿಷೇಧಿತ ಅಸ್ತ್ರ?

ಬೈರೂತ್ : ಮಧ್ಯಪ್ರಾಚ್ಯದಲ್ಲಿ ಇರಾನ್ ಮತ್ತು ಇಸ್ರೇಲ್ ಯುದ್ಧವು ಭೀಕರ ಸ್ವರೂಪ ಪಡೆದಿರುವಂತೆಯೇ ಇಸ್ರೇಲ್ ಸೇನೆಯು ದಕ್ಷಿಣ ಲೆಬನಾನ್‌ನ ಜನವಸತಿ ಪ್ರದೇಶಗಳ ಮೇಲೆ ನಿಷೇಧಿತ ‘ವೈಟ್ ಫಾಸ್ಫರಸ್’ (White Phosphorus) ಬಾಂಬ್‌ಗಳನ್ನು ಬಳಸಿ ದಾಳಿ ನಡೆಸಿದೆ ಎಂದು ಮಾನವ ಹಕ್ಕುಗಳ ಸಂಘಟನೆ(HRW) ಸೋಮವಾರ ಗಂಭೀರ ಆರೋಪ ಮಾಡಿದೆ. ದಕ್ಷಿಣ ಲೆಬನಾನ್‌ನ ಯೋಹ್ಮರ್ ಹಳ್ಳಿಯ ಮೇಲೆ ನಡೆದ ಈ ದಾಳಿಯು ಅಂತಾರಾಷ್ಟ್ರೀಯ ಮಾನವೀಯ ಕಾನೂನುಗಳ ನೇರ ಉಲ್ಲಂಘನೆ ಎಂದು ಸಂಸ್ಥೆ ಕಿಡಿಕಾರಿದೆ.

ಹ್ಯೂಮನ್ ರೈಟ್ಸ್ ವಾಚ್ ಬಿಡುಗಡೆ ಮಾಡಿದ ವರದಿಯ ಪ್ರಕಾರ, ಇಸ್ರೇಲ್ ಮಿಲಿಟರಿಯು ಯೋಹ್ಮರ್ ಗ್ರಾಮದ ಮೇಲೆ ವೈಟ್ ಫಾಸ್ಫರಸ್ ಯುಕ್ತ ಫಿರಂಗಿ ಗುಂಡುಗಳನ್ನು ಅಕ್ರಮವಾಗಿ ಹಾರಿಸಿದೆ. ಈ ದಾಳಿಗೆ ಸಂಬಂಧಿಸಿದ ಏಳು ವಿಭಿನ್ನ ಚಿತ್ರಗಳನ್ನು ಸಂಸ್ಥೆಯು ಪರಿಶೀಲಿಸಿದ್ದು, ಅವುಗಳನ್ನು ಜಿಯೋಲೋಕೇಟ್ ಮಾಡುವ ಮೂಲಕ ದಾಳಿ ನಡೆದಿರುವುದು ದೃಢಪಟ್ಟಿದೆ. ವಿಶೇಷವೆಂದರೆ, ಇಸ್ರೇಲ್ ಸೇನೆಯು ಈ ಗ್ರಾಮದ ನಿವಾಸಿಗಳಿಗೆ ಸ್ಥಳ ಖಾಲಿ ಮಾಡುವಂತೆ ಸೂಚನೆ ನೀಡಿದ ಕೆಲವೇ ಗಂಟೆಗಳಲ್ಲಿ ಈ ದಾಳಿ ಸಂಭವಿಸಿದೆ. ದಾಳಿಯ ಸಮಯದಲ್ಲಿ ಅಲ್ಲಿ ಎಷ್ಟು ಜನ ನಾಗರಿಕರು ಉಳಿದುಕೊಂಡಿದ್ದರು ಅಥವಾ ಎಷ್ಟು ಮಂದಿಗೆ ಗಾಯಗಳಾಗಿವೆ ಎಂಬುದು ಇನ್ನು ಸ್ಪಷ್ಟವಾಗಿಲ್ಲವಾದರೂ, ಜನವಸತಿ ಪ್ರದೇಶದಲ್ಲಿ ಇಂತಹ ರಾಸಾಯನಿಕ ಬಳಕೆಯು ಅತ್ಯಂತ ಆತಂಕಕಾರಿ ವಿಷಯವಾಗಿದೆ.

ಏನಿದು ‘ವೈಟ್ ಫಾಸ್ಫರಸ್?

ವೈಟ್ ಫಾಸ್ಫರಸ್ ಎಂಬುದು ಮೇಣದಂತಹ ಒಂದು ರಾಸಾಯನಿಕ ವಸ್ತುವಾಗಿದ್ದು, ಇದು ಆಮ್ಲಜನಕದ ಸಂಪರ್ಕಕ್ಕೆ ಬಂದ ತಕ್ಷಣ ಅತ್ಯಂತ ವೇಗವಾಗಿ ಉರಿಯಲು ಪ್ರಾರಂಭಿಸುತ್ತದೆ. ಇದು ಉರಿಯುವಾಗ ಸುಮಾರು 800 ಡಿಗ್ರಿ ಸೆಲ್ಸಿಯಸ್‌ಗಿಂತಲೂ ಹೆಚ್ಚಿನ ತಾಪಮಾನ ಉತ್ಪಾದಿಸುತ್ತದೆ ಮತ್ತು ದಟ್ಟವಾದ ಬಿಳಿ ಹೊಗೆಯನ್ನು ಹೊರಸೂಸುತ್ತದೆ. ಯುದ್ಧಭೂಮಿಯಲ್ಲಿ ಸೈನ್ಯದ ಚಲನವಲನಗಳನ್ನು ಮರೆಮಾಚಲು ‘ಹೊಗೆಯ ಪರದೆ’ ನಿರ್ಮಿಸಲು ಇದನ್ನು ಬಳಸಲಾಗುತ್ತದೆ. ಆದರೆ, ಇದನ್ನು ನೇರವಾಗಿ ಜನರ ಮೇಲೆ ಅಥವಾ ಜನವಸತಿ ಪ್ರದೇಶಗಳಲ್ಲಿ ಬಳಸುವುದನ್ನು ಅಂತಾರಾಷ್ಟ್ರೀಯ ಕಾನೂನುಗಳು ಕಟ್ಟುನಿಟ್ಟಾಗಿ ನಿಷೇಧಿಸಿವೆ.

ದೇಹವನ್ನು ಮೂಳೆಯವರೆಗೂ ಸುಡುವ ಭೀಕರ ಶಕ್ತಿ

ವೈಟ್ ಫಾಸ್ಫರಸ್‌ನಿಂದಾಗುವ ಅಪಾಯಗಳು ಅತ್ಯಂತ ಭಯಾನಕ. ಇದು ಒಮ್ಮೆ ಮನುಷ್ಯನ ಚರ್ಮಕ್ಕೆ ತಗುಲಿದರೆ, ಅದು ಆಮ್ಲಜನಕದ ಸಂಪರ್ಕ ಇರುವವರೆಗೂ ಉರಿಯುತ್ತಲೇ ಇರುತ್ತದೆ. ಇದು ಕೇವಲ ಮೇಲ್ಪದರದ ಗಾಯಗಳನ್ನು ಮಾಡುವುದಲ್ಲದೆ, ದೇಹದ ಮಾಂಸವನ್ನು ಸೀಳಿ ನೇರವಾಗಿ ಮೂಳೆಯವರೆಗೂ ಸುಡುವ ಶಕ್ತಿ ಹೊಂದಿದೆ. ಈ ಸುಟ್ಟ ಗಾಯಗಳು ಗುಣವಾಗುವುದು ಅತ್ಯಂತ ಕಷ್ಟಕರವಾಗಿದ್ದು, ಭವಿಷ್ಯದಲ್ಲಿ ಸೋಂಕುಗಳಿಗೆ ದಾರಿ ಮಾಡಿಕೊಡುತ್ತವೆ. ಇಷ್ಟೇ ಅಲ್ಲದೆ, ಇದರ ಹೊಗೆಯನ್ನು ಉಸಿರಾಡುವುದರಿಂದ ಶ್ವಾಸಕೋಶದ ವೈಫಲ್ಯ ಉಂಟಾಗಬಹುದು ಮತ್ತು ದೇಹದ ರಕ್ತಕ್ಕೆ ಸೇರಿದರೆ ಯಕೃತ್ತು, ಮೂತ್ರಪಿಂಡಗಳಂತಹ ಪ್ರಮುಖ ಅಂಗಗಳು ಸಂಪೂರ್ಣವಾಗಿ ಹಾನಿಗೊಳಗಾಗಬಹುದು.

ಇಸ್ರೇಲ್ ಸಮರ್ಥನೆ

ಈ ಆರೋಪಗಳ ಬಗ್ಗೆ ಇಸ್ರೇಲ್ ಮಿಲಿಟರಿ ಇನ್ನೂ ಅಧಿಕೃತ ಪ್ರತಿಕ್ರಿಯೆ ನೀಡಿಲ್ಲ. ಆದರೆ ಈ ಹಿಂದಿನ ಇಂತಹ ಘಟನೆಗಳ ಸಂದರ್ಭದಲ್ಲಿ, ತಾವು ವೈಟ್ ಫಾಸ್ಫರಸ್ ಅನ್ನು ಶತ್ರುಗಳಿಗೆ ದಾರಿ ಕಾಣದಂತೆ ಹೊಗೆ ನಿರ್ಮಿಸಲು ಬಳಸುತ್ತಿದ್ದೇವೆಯೇ ಹೊರತು ನಾಗರಿಕರನ್ನು ಗುರಿಯಾಗಿಸಿಕೊಂಡಿಲ್ಲ ಎಂದು ಇಸ್ರೇಲ್ ಸಮರ್ಥಿಸಿಕೊಂಡಿತ್ತು. ಆದರೆ ಆಮ್ನೆಸ್ಟಿ ಇಂಟರ್ನ್ಯಾಷನಲ್ ಸೇರಿದಂತೆ ಹಲವು ಮಾನವ ಹಕ್ಕುಗಳ ಸಂಘಟನೆಗಳು, ಕಳೆದ ಒಂದು ವರ್ಷದಲ್ಲಿ ಇಸ್ರೇಲ್ ಮತ್ತು ಹೆಜ್ಬುಲ್ಲಾ ನಡುವಿನ ಸಂಘರ್ಷದಲ್ಲಿ ಇಸ್ರೇಲ್ ಈ ನಿಷೇಧಿತ ಅಸ್ತ್ರವನ್ನು ಪದೇ ಪದೇ ಬಳಸುತ್ತಿದೆ ಎಂದು ಸಾಕ್ಷ್ಯ ಸಮೇತ ವರದಿ ಮಾಡಿವೆ. ಲೆಬನಾನ್ ಸಂಶೋಧಕ ರಮ್ಜಿ ಕೈಸ್ ಹೇಳುವಂತೆ, ಈ ದಾಳಿಗಳು ನಾಗರಿಕರ ಮೇಲೆ ಭೀಕರ ಪರಿಣಾಮ ಬೀರಲಿದ್ದು, ಇಸ್ರೇಲ್‌ನ ಈ ಕ್ರಮವು ಯುದ್ಧಾಪರಾಧದ ವ್ಯಾಪ್ತಿಗೆ ಬರಬಹುದು ಎಂದು ಹೇಳಿದ್ದಾರೆ.

ಇದನ್ನೂ ಓದಿ : ಟಿ20 ವಿಶ್ವಕಪ್ ಗೆಲುವಿನ ಬೆನ್ನಲ್ಲೇ ಒಲಿಂಪಿಕ್ಸ್ ಚಿನ್ನದತ್ತ ಕಣ್ಣಿಟ್ಟ ಭಾರತ.. ಕ್ಯಾಪ್ಟನ್‌ ಸೂರ್ಯಕುಮಾರ್ ಮಹತ್ವಾಕಾಂಕ್ಷೆ!