ಟೆಹ್ರಾನ್ : ಇರಾನ್ನ ಪರಮೋಚ್ಚ ನಾಯಕ ಆಯತೊಲ್ಲಾ ಅಲಿ ಖಮೇನಿ ಆಡಳಿತದ ವಿರುದ್ಧ ನಡೆಯುತ್ತಿರುವ ಬೃಹತ್ ಪ್ರತಿಭಟನೆಗಳನ್ನು ಹತ್ತಿಕ್ಕಲು ಇರಾನ್ ಸರ್ಕಾರ ಅತಿ ಅಮಾನವೀಯ ಕ್ರಮಕ್ಕೆ ಮುಂದಾಗಿದೆ. ಪ್ರತಿಭಟನೆಯಲ್ಲಿ ಭಾಗವಹಿಸಿದ್ದ 26 ವರ್ಷದ ಎರ್ಫಾನ್ ಸೊಲ್ತಾನಿ ಎಂಬವರಿಗೆ ಮರಣದಂಡನೆ ವಿಧಿಸಲಾಗಿದ್ದು, ಸದ್ಯದಲ್ಲೇ ಗಲ್ಲಿಗೇರಿಸುವ ಸಾಧ್ಯತೆಯಿದೆ ಎಂದು ವರದಿಯಾಗಿದೆ. ಖಮೇನಿ ವಿರುದ್ಧದ ಪ್ರತಿಭಟನೆಗೆ ಸಂಬಂಧಿಸಿದಂತೆ ವರದಿಯಾಗುತ್ತಿರುವ ಮೊದಲ ಗಲ್ಲು ಶಿಕ್ಷೆ ಇದಾಗಿದ್ದು, ಇದು ಇರಾನ್ನಾದ್ಯಂತ ತೀವ್ರ ಆತಂಕ ಸೃಷ್ಟಿಸಿದೆ.
ಟೆಹ್ರಾನ್ನ ಉಪನಗರವಾದ ಕರಾಜ್ನ ಫರ್ದಿಸ್ ನಿವಾಸಿಯಾದ ಎರ್ಫಾನ್ ಸೊಲ್ತಾನಿ ಅವರನ್ನು ಜ.8 ರಂದು ಬಂಧಿಸಲಾಗಿತ್ತು. ಜನವರಿ ತಿಂಗಳ ಆರಂಭದಿಂದ ಇರಾನ್ನಾದ್ಯಂತ ಹರಡಿರುವ ಖಮೇನಿ ವಿರೋಧಿ ಪ್ರತಿಭಟನೆಗಳಲ್ಲಿ ಇವರು ಭಾಗವಹಿಸಿದ್ದರು. ಮಾನವ ಹಕ್ಕುಗಳ ಗುಂಪುಗಳು ಮತ್ತು ಮಾಧ್ಯಮ ವರದಿಗಳ ಪ್ರಕಾರ, ಸೊಲ್ತಾನಿ ಅವರಿಗೆ ವಿಧಿಸಲಾಗಿರುವ ಮರಣದಂಡನೆಯನ್ನು ಬುಧವಾರದಂದೇ ಜಾರಿಗೊಳಿಸುವ ಸಾಧ್ಯತೆಯಿದೆ.
ಇರಾನ್ ಈ ಹಿಂದೆಯೂ ಭಿನ್ನಾಭಿಪ್ರಾಯಗಳನ್ನು ಹತ್ತಿಕ್ಕಲು ಮರಣದಂಡನೆಯನ್ನು ಅಸ್ತ್ರವಾಗಿ ಬಳಸಿದೆ. ಆದರೆ, ಆ ಶಿಕ್ಷೆಗಳು ಸಾಮಾನ್ಯವಾಗಿ ಗುಂಡಿನ ದಾಳಿಯ ಮೂಲಕ ನಡೆಯುತ್ತಿದ್ದವು. ಪ್ರಸ್ತುತ ನಡೆಯುತ್ತಿರುವ ಪ್ರತಿಭಟನೆಗಳಿಗೆ ಸಂಬಂಧಿಸಿದಂತೆ ಗಲ್ಲಿಗೇರಿಸುವ ಮೂಲಕ ಮರಣದಂಡನೆ ವಿಧಿಸುತ್ತಿರುವುದು ಇದೇ ಮೊದಲು ಎಂದು ಹೇಳಲಾಗಿದೆ.
ಭೀತಿ ಹುಟ್ಟಿಸುವ ತಂತ್ರವೇ?
ಇಸ್ರೇಲ್ ಮತ್ತು ಅಮೆರಿಕ ಮೂಲದ ಸುದ್ದಿ ಸಂಸ್ಥೆ ‘ಜೆಫೀಡ್’ ವರದಿ ಮಾಡಿರುವಂತೆ, ಸೊಲ್ತಾನಿ ಅವರ ಗಲ್ಲು ಶಿಕ್ಷೆಯು ಪ್ರತಿಭಟನಾಕಾರರಲ್ಲಿ ಭೀತಿ ಹುಟ್ಟಿಸುವ ತಂತ್ರವಾಗಿರಬಹುದು. ಮುಂದಿನ ದಿನಗಳಲ್ಲಿ ಇನ್ನಷ್ಟು ಮಂದಿಯನ್ನು ತ್ವರಿತಗತಿಯಲ್ಲಿ ಗಲ್ಲಿಗೇರಿಸುವ ಸರಣಿ ಆರಂಭವಾಗುವ ಮುನ್ಸೂಚನೆ ಇದಾಗಿದೆ ಎಂದು ವಿಶ್ಲೇಷಿಸಲಾಗಿದೆ.
ನಾರ್ವೆ ಮೂಲದ ‘ಹೆಂಗಾವ್ ಆರ್ಗನೈಸೇಶನ್ ಫಾರ್ ಹ್ಯೂಮನ್ ರೈಟ್ಸ್’ ಸಂಸ್ಥೆಯು, ಈ ಕಾನೂನು ಪ್ರಕ್ರಿಯೆಯಲ್ಲಿ ಪಾರದರ್ಶಕತೆಯ ಕೊರತೆಯ ಬಗ್ಗೆ ಕಳವಳ ವ್ಯಕ್ತಪಡಿಸಿದೆ. ಲೆಬನಾನ್-ಆಸ್ಟ್ರೇಲಿಯನ್ ಉದ್ಯಮಿ ಮಾರಿಯೋ ನೌಫಾಲ್ ಅವರು ಸಾಮಾಜಿಕ ಜಾಲತಾಣ ಎಕ್ಸ್ನಲ್ಲಿ (ಟ್ವಿಟರ್) ಪೋಸ್ಟ್ ಮಾಡಿ, “ಜನಸಮೂಹವನ್ನು ನಿಯಂತ್ರಿಸಲು ಅಧಿಕಾರಿಗಳು ಭಯವನ್ನು ಬಳಸುತ್ತಿದ್ದಾರೆ. ಸೊಲ್ತಾನಿ ಸಾವು ಇಂತಹ ಅನೇಕ ಮರಣದಂಡನೆಗಳಲ್ಲಿ ಮೊದಲನೆಯದಾಗಬಹುದು,” ಎಂದು ಎಚ್ಚರಿಸಿದ್ದಾರೆ.
ಕುಟುಂಬಸ್ಥರಿಗೆ ಮಾಹಿತಿ ಇಲ್ಲ, ವಕೀಲರಿಗೂ ಅವಕಾಶವಿಲ್ಲ
ಬಂಧನದ ನಂತರ ಸೊಲ್ತಾನಿ ಅವರಿಗೆ ಕಾನೂನು ಹೋರಾಟ ನಡೆಸಲು ವಕೀಲರ ನೆರವು ಸೇರಿದಂತೆ ಮೂಲಭೂತ ಹಕ್ಕುಗಳನ್ನು ನಿರಾಕರಿಸಲಾಗಿದೆ ಎಂದು ಆರೋಪಿಸಲಾಗಿದೆ. ಅವರನ್ನು ಯಾರು ಬಂಧಿಸಿದರು ಎಂಬ ಮಾಹಿತಿಯನ್ನೂ ಕುಟುಂಬಕ್ಕೆ ನೀಡಿಲ್ಲ. ಜನವರಿ 11 ರಂದು ಕುಟುಂಬಕ್ಕೆ ಮರಣದಂಡನೆಯ ವಿಷಯ ತಿಳಿಸಲಾಯಿತು. ಶಿಕ್ಷೆಯ ವಿಷಯ ತಿಳಿದ ನಂತರ ಕೇವಲ 10 ನಿಮಿಷಗಳ ಭೇಟಿಗೆ ಮಾತ್ರ ಅವಕಾಶ ನೀಡಲಾಗಿದೆ. ಸೊಲ್ತಾನಿ ಅವರ ಸಹೋದರಿ ಸ್ವತಃ ವಕೀಲರಾಗಿದ್ದರೂ, ಅವರಿಗೆ ಕೇಸ್ ಫೈಲ್ ನೋಡಲು ಅಥವಾ ತಮ್ಮ ಸಹೋದರನ ಪರವಾಗಿ ವಾದಿಸಲು ಅವಕಾಶ ನೀಡಿಲ್ಲ. ಶಿಕ್ಷೆಯು ಅಂತಿಮವಾಗಿದ್ದು, ನಿಗದಿತ ಸಮಯಕ್ಕೆ ಜಾರಿಯಾಗಲಿದೆ ಎಂದಷ್ಟೇ ಅಧಿಕಾರಿಗಳು ಕುಟುಂಬಕ್ಕೆ ತಿಳಿಸಿದ್ದಾರೆ.
ಪ್ರತಿಭಟನೆಗೆ ಕಾರಣವೇನು?
ಇರಾನ್ನಲ್ಲಿ ಕಳೆದ ಡಿಸೆಂಬರ್ ಅಂತ್ಯದಿಂದ ತೀವ್ರ ಆರ್ಥಿಕ ಸಂಕಷ್ಟ ಎದುರಾಗಿದೆ. ಇರಾನ್ ಕರೆನ್ಸಿ (ರಿಯಾಲ್) ಮೌಲ್ಯ ಕುಸಿತ, ಏರುತ್ತಿರುವ ಹಣದುಬ್ಬರ ಮತ್ತು ಅಗತ್ಯ ವಸ್ತುಗಳ ಬೆಲೆ ಏರಿಕೆಯಿಂದ ರೋಸಿಹೋದ ಜನರು ಬೀದಿಗಿಳಿದಿದ್ದಾರೆ. ಟೆಹ್ರಾನ್ನ ಮಾರುಕಟ್ಟೆಗಳಲ್ಲಿ ಪ್ರಾರಂಭವಾದ ಈ ಪ್ರತಿಭಟನೆ ಈಗ ದೇಶಾದ್ಯಂತ ಹಬ್ಬಿದ್ದು, ಇದು ಕೇವಲ ವ್ಯಾಪಾರಿಗಳ ಪ್ರತಿಭಟನೆಯಾಗಿ ಉಳಿಯದೆ, ಖಮೇನಿ ಆಡಳಿತವನ್ನು ಉರುಳಿಸುವ ರಾಜಕೀಯ ಚಳವಳಿಯಾಗಿ ಮಾರ್ಪಟ್ಟಿದೆ.
ಇದನ್ನೂ ಓದಿ : ಮಗಳ ಜನನದ ಮೊದಲು ಯೋಧ ವೀರಮರಣ | ಪತ್ನಿಯ ಕಣ್ಣೀರ ವಿದಾಯ
