ಜೀಲಾಂಗ್ (ಆಸ್ಟ್ರೇಲಿಯಾ): ಐಪಿಎಲ್ 2026ರ ಆಟಗಾರರ ಹರಾಜು ಪ್ರಕ್ರಿಯೆಗೆ ಕ್ಷಣಗಣನೆ ಆರಂಭವಾಗಿರುವಾಗಲೇ, ನ್ಯೂಜಿಲೆಂಡ್ನ ವಿಕೆಟ್ ಕೀಪರ್ ಮತ್ತು ಸ್ಫೋಟಕ ಬ್ಯಾಟರ್ ಟಿಮ್ ಸೀಫರ್ಟ್ ತಮ್ಮ ಅಬ್ಬರದ ಆಟದ ಮೂಲಕ ಫ್ರಾಂಚೈಸಿಗಳ ನಿದ್ದೆಗೆಡಿಸಿದ್ದಾರೆ. ಆಸ್ಟ್ರೇಲಿಯಾದಲ್ಲಿ ನಡೆಯುತ್ತಿರುವ ಪ್ರತಿಷ್ಠಿತ ಬಿಗ್ ಬ್ಯಾಷ್ ಲೀಗ್ (BBL) ಟೂರ್ನಿಯಲ್ಲಿ ಭಾನುವಾರ ನಡೆದ ಪಂದ್ಯದಲ್ಲಿ ಮೆಲ್ಬೋರ್ನ್ ರೆನೆಗೇಡ್ಸ್ ಪರ ಕಣಕ್ಕಿಳಿದ ಸೀಫರ್ಟ್, ಬ್ರಿಸ್ಬೇನ್ ಹೀಟ್ ಬೌಲರ್ಗಳ ಬೆವರಿಳಿಸಿ ಕೇವಲ 56 ಎಸೆತಗಳಲ್ಲಿ 102 ರನ್ ಗಳಿಸುವ ಮೂಲಕ ಐಪಿಎಲ್ ಹರಾಜಿಗೆ ತಾವೆಷ್ಟು ಸಿದ್ಧ ಎಂದು ಸಾರಿ ಹೇಳಿದರು.
ಜೀಲಾಂಗ್ನ ಸಿಮಂಡ್ಸ್ ಕ್ರೀಡಾಂಗಣದಲ್ಲಿ ನಡೆದ ಈ ಪಂದ್ಯದಲ್ಲಿ ಸೀಫರ್ಟ್ ಅವರ ಬ್ಯಾಟಿಂಗ್ ವೈಭವ ಅನಾವರಣಗೊಂಡಿತು. ಇನ್ನಿಂಗ್ಸ್ ಆರಂಭದಿಂದಲೇ ಆಕ್ರಮಣಕಾರಿ ಆಟಕ್ಕೆ ಒತ್ತು ನೀಡಿದ ಅವರು, ಮೈದಾನದ ಮೂಲೆ ಮೂಲೆಗೂ ಚೆಂಡನ್ನು ಅಟ್ಟಿದರು. ಅವರ ಈ ಸ್ಪೋಟಕ ಇನ್ನಿಂಗ್ಸ್ನಲ್ಲಿ 9 ಬೌಂಡರಿಗಳು ಮತ್ತು 6 ಭರ್ಜರಿ ಸಿಕ್ಸರ್ಗಳು ಸೇರಿದ್ದವು. 182.14 ರ ಸ್ಟ್ರೈಕ್ ರೇಟ್ನಲ್ಲಿ ಬ್ಯಾಟ್ ಬೀಸಿದ ಸೀಫರ್ಟ್, ತಂಡದ ಮೊತ್ತವನ್ನು 212 ರನ್ಗಳ ಗಡಿ ದಾಟಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದರು. ಅಂತಿಮವಾಗಿ ಮೆಲ್ಬೋರ್ನ್ ರೆನೆಗೇಡ್ಸ್ ತಂಡವು 14 ರನ್ಗಳ ರೋಚಕ ಜಯ ಸಾಧಿಸಿತು ಮತ್ತು ಸೀಫರ್ಟ್ ಪಂದ್ಯ ಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು.
ಅಪರೂಪದ ದಾಖಲೆ
ಈ ಶತಕದ ಮೂಲಕ ಟಿಮ್ ಸೀಫರ್ಟ್ ಅಪರೂಪದ ದಾಖಲೆಯೊಂದನ್ನು ತಮ್ಮ ಹೆಸರಿಗೆ ಬರೆದುಕೊಂಡರು. ಬಿಗ್ ಬ್ಯಾಷ್ ಲೀಗ್ ಇತಿಹಾಸದಲ್ಲಿ ಮೆಲ್ಬೋರ್ನ್ ರೆನೆಗೇಡ್ಸ್ ಪರ ಶತಕ ಸಿಡಿಸಿದ ಕೇವಲ ಎರಡನೇ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು. ಇದಕ್ಕೂ ಮುನ್ನ ಆಸ್ಟ್ರೇಲಿಯಾದ ಮಾಜಿ ನಾಯಕ ಆರನ್ ಫಿಂಚ್ ಮಾತ್ರ ಈ ತಂಡದ ಪರ ಎರಡು ಬಾರಿ ಶತಕ ಸಿಡಿಸಿದ್ದರು. ಸೀಫರ್ಟ್ ಅವರ ಈ ಇನ್ನಿಂಗ್ಸ್ ಒಲಿವರ್ ಪೀಕ್ ಮತ್ತು ಜೇಕ್ ಫ್ರೇಸರ್-ಮೆಕ್ಗುರ್ಕ್ ಅವರಂತಹ ಯುವ ಆಟಗಾರರ ಪ್ರದರ್ಶನವನ್ನೂ ಮಸುಕುಗೊಳಿಸಿತು.
ಐಪಿಎಲ್ 2026ರ ಮಿನಿ ಹರಾಜು ನಾಳೆ (ಡಿಸೆಂಬರ್ 16) ಅಬುಧಾಬಿಯಲ್ಲಿ ನಡೆಯಲಿದ್ದು, ಸೀಫರ್ಟ್ ಅವರು 1.50 ಕೋಟಿ ರೂಪಾಯಿ ಮೂಲ ಬೆಲೆಯೊಂದಿಗೆ ನೋಂದಾಯಿಸಿಕೊಂಡಿದ್ದಾರೆ. ಈ ಹಿಂದೆ ಕೋಲ್ಕತ್ತಾ ನೈಟ್ ರೈಡರ್ಸ್ ಮತ್ತು ಡೆಲ್ಲಿ ಕ್ಯಾಪಿಟಲ್ಸ್ ತಂಡಗಳ ಪರ ಆಡಿದ್ದರೂ, ಅವರಿಗೆ ತಮ್ಮ ಸಾಮರ್ಥ್ಯ ಪ್ರದರ್ಶಿಸಲು ಹೆಚ್ಚಿನ ಅವಕಾಶಗಳು ಸಿಕ್ಕಿರಲಿಲ್ಲ. 2022ರ ನಂತರ ಅವರು ಯಾವುದೇ ಐಪಿಎಲ್ ಪಂದ್ಯ ಆಡಿಲ್ಲ. ಆದರೆ, ಈಗ ಹರಾಜಿನ ಹೊಸ್ತಿಲಲ್ಲಿ ಸಿಡಿಸಿರುವ ಈ ಶತಕವು ಐಪಿಎಲ್ ಫ್ರಾಂಚೈಸಿಗಳ ಗಮನ ಸೆಳೆಯುವುದು ಖಚಿತವಾಗಿದೆ. ಒಟ್ಟಾರೆ 293 ಟಿ20 ಪಂದ್ಯಗಳಲ್ಲಿ 6,698 ರನ್ ಕಲೆಹಾಕಿರುವ ಈ 30 ವರ್ಷದ ಆಟಗಾರ, ತಾವು ಮ್ಯಾಚ್ ವಿನ್ನರ್ ಎಂಬುದನ್ನು ಮತ್ತೊಮ್ಮೆ ಸಾಬೀತುಪಡಿಸಿದ್ದಾರೆ.
ಇದನ್ನೂ ಓದಿ: ಐಪಿಎಲ್ 2026ಕ್ಕೆ ದಿನಗಣನೆ ಆರಂಭ : ಮಾರ್ಚ್ 26ರಿಂದ ಕ್ರಿಕೆಟ್ ಹಬ್ಬ – ಚಿನ್ನಸ್ವಾಮಿಯಲ್ಲಿ ಪಂದ್ಯ ಅನುಮಾನ?
