ಟೆಕ್ಸಾಸ್: ಭಾರತೀಯ ಅಮೆರಿಕನ್ ವಿದ್ಯಾರ್ಥಿ, 13 ವರ್ಷದ ಫೈಜಾನ್ ಜಾಕಿ 2025ರ ಸ್ಕ್ರಿಪ್ಸ್ ನ್ಯಾಷನಲ್ ಸ್ಪೆಲಿಂಗ್ ಬೀಯಲ್ಲಿ ಕಠಿಣ ಫ್ರೆಂಚ್ ಪದವಾದ “éclaircissement” ಅನ್ನು ಸರಿಯಾಗಿ ಉಚ್ಚರಿಸುವ ಮೂಲಕ ಈ ಸ್ಫರ್ದೆಯ ವಿಜೇತನಾಗಿ ಹೊರಹೊಮ್ಮಿದ್ದಾನೆ. ಈ ಮೂಲಕ ಈ ಬಾರಿಯೂ ಭಾರತೀಯರ ಮುಡಿಗೇ ಸ್ಪೆಲ್ಲಿಂಗ್ ಬೀ ಕಿರೀಟ ಏರಿದಂತಾಗಿದೆ. ಈ ಗೆಲುವಿನೊಂದಿಗೆ ಫೈಜಾನ್ ಸ್ಕ್ರಿಪ್ಸ್ ಕಪ್ ಟ್ರೋಫಿ, ಪದಕ ಮತ್ತು $50,000 ನಗದು ಬಹುಮಾನವನ್ನು ತನ್ನದಾಗಿಸಿಕೊಂಡಿದ್ದಾನೆ.
ಸಿ.ಎಂ. ರೈಸ್ ಮಿಡಲ್ ಸ್ಕೂಲ್‌ನ ಏಳನೇ ತರಗತಿಯ ವಿದ್ಯಾರ್ಥಿಯಾಗಿರುವ ಫೈಜಾನ್, ತನ್ನ ಕಾಗುಣಿತ ಪ್ರಯಾಣವನ್ನು 7 ವರ್ಷದ ವಯಸ್ಸಿನಲ್ಲಿ ಆರಂಭಿಸಿದ್ದ. ಕುಟುಂಬದೊಂದಿಗೆ ಒಂದು ಮನರಂಜನಾತ್ಮಕ ಚಟುವಟಿಕೆಯಾಗಿ ಪ್ರಾರಂಭವಾದದ್ದು ನಂತರದಲ್ಲಿ ಗಂಭೀರ ಉತ್ಸಾಹವಾಗಿ ಮಾರ್ಪಟ್ಟಿತು. “ಅವನಿಗೆ ಹೊಸ ಪದಗಳನ್ನು ಕಲಿಯುವುದು ಇಷ್ಟ. ಸಹಜವಾಗಿಯೇ ಅವನು ಸ್ಪೆಲ್ಲಿಂಗ್ ಬೀಯತ್ತ ಆಕರ್ಷಿತನಾದ,” ಎಂದು ಫೈಜಾನ್‌ನ ತಾಯಿ ಆರ್ಶಿಯಾ ಖಾದ್ರಿ ಹೇಳಿದ್ದಾರೆ.
ಅವನ ತಂದೆ ಜಾಕಿ ಅನ್ವರ್ ಅವರು, “ನಾವು ಅವನು ಸ್ಪರ್ಧೆಯ ಅನುಭವವನ್ನು ಆನಂದಿಸಲಿ ಎಂದು ಯೋಚಿಸಿದ್ದೆವು. ಕೆಲವು ಸುತ್ತುಗಳನ್ನು ಸಾಧಿಸಿ ವಾಪಸಾಗಬಹುದು ಎಂದು ಅಂದುಕೊಂಡಿದ್ದೆವು. ಆದರೆ, ಅವನು ಅದ್ಭುತವಾದುದನ್ನೇ ಸಾಧಿಸಿದ್ದಾನೆ. ಟ್ರೋಫಿಯನ್ನೇ ಗೆದ್ದಿದ್ದಾನೆ!” ಎಂದು ಅಚ್ಚರಿ ವ್ಯಕ್ತಪಡಿಸಿದ್ದಾರೆ.
2025ರ ಸ್ಪೆಲಿಂಗ್ ಬೀಗೆ ಈ ಬಾರಿ 100ನೇ ವಾರ್ಷಿಕೋತ್ಸವ. ಮೇ 27ರಿಂದ 30 ರವರೆಗೆ ಮೇರಿಲ್ಯಾಂಡ್‌ನ ಗೇಲಾರ್ಡ್ ನ್ಯಾಷನಲ್ ರೆಸಾರ್ಟ್ ಮತ್ತು ಕನ್ವೆನ್ಷನ್ ಸೆಂಟರ್‌ನಲ್ಲಿ ಈ ಸ್ಪರ್ಧೆ ನಡೆಯಿತು. ಇದರಲ್ಲಿ ಜಗತ್ತಿನ ಮೂಲೆ ಮೂಲೆಗಳ 8ರಿಂದ 14 ವರ್ಷದ 243 ಮಕ್ಕಳು ಭಾಗವಹಿಸಿದ್ದರು. ಈ ಪೈಕಿ ಕೇವಲ 9 ಮಂದಿ ಫೈನಲ್ ಸುತ್ತಿಗೆ ತಲುಪಿದ್ದರು. ಫೈಜಾನ್‌ನ ಈ ಸ್ಪರ್ಧೆಯಲ್ಲಿ ಭಾಗವಹಿಸಿದ್ದು ಇದು ನಾಲ್ಕನೇ ಬಾರಿ. ಕಳೆದ ವರ್ಷ, ಟೈಬ್ರೇಕರ್ ಸುತ್ತಿನಲ್ಲಿ ತನ್ನ ಸ್ನೇಹಿತ ಬೃಹತ್ ಸೋಮ ವಿರುದ್ಧ ಸೋತಿದ್ದ. ಫೈಜಾನ್ 2019ರಲ್ಲಿ 370ನೇ ಸ್ಥಾನ, 2023ರಲ್ಲಿ 21ನೇ ಸ್ಥಾನ ಮತ್ತು 2024ರಲ್ಲಿ ಎರಡನೇ ಸ್ಥಾನವನ್ನು ಪಡೆದಿದ್ದ. 2025ರಲ್ಲಿ, ನಾಲ್ಕನೇ ಪ್ರಯತ್ನದಲ್ಲಿ ಅವನು ಚಾಂಪಿಯನ್ ಆಗಿ ಹೊರಹೊಮ್ಮಿದ್ದಾನೆ.
1999ರಿಂದ ಈವರೆಗೆ ನಡೆದ ಸ್ಕ್ರಿಪ್ಸ್ ನ್ಯಾಷನಲ್ ಸ್ಪೆಲಿಂಗ್ ಬೀಯಲ್ಲಿ ಕಳೆದ 36 ಚಾಂಪಿಯನ್‌ಗಳಲ್ಲಿ 30 ಮಂದಿ ಭಾರತೀಯ-ಅಮೆರಿಕನ್‌ಗಳಾಗಿದ್ದಾರೆ. ಫೈಜಾನ್‌ನ ಹೆತ್ತವರು ದಕ್ಷಿಣ ಭಾರತದ ಹೈದರಾಬಾದ್‌ನಿಂದ ವಲಸೆ ಬಂದವರು. ಈ ಯಶಸ್ಸು ಭಾರತೀಯ-ಅಮೆರಿಕನ್ ಸಮುದಾಯದ ಶೈಕ್ಷಣಿಕ ಶ್ರೇಷ್ಠತೆಯನ್ನು ಎತ್ತಿ ತೋರಿಸುತ್ತದೆ.
