ನವದೆಹಲಿ: ಭಾರತದ ಕಾಂಪ್ಯಾಕ್ಟ್ ಎಸ್‌ಯುವಿ ಮಾರುಕಟ್ಟೆಯಲ್ಲಿ ಹೊಸ ಸಂಚಲನ ಸೃಷ್ಟಿಸಲು, ಹ್ಯುಂಡೈ ಮೋಟರ್ ಇಂಡಿಯಾ (HMIL) ತನ್ನ ಅತ್ಯಂತ ಜನಪ್ರಿಯ ಮಾದರಿಯಾದ ಹೊಸ ತಲೆಮಾರಿನ ಹ್ಯುಂಡೈ ವೆನ್ಯೂ (New Hyundai Venue) ಅನ್ನು ಅಧಿಕೃತವಾಗಿ ಅನಾವರಣಗೊಳಿಸಿದೆ. ನವೆಂಬರ್ 4ರಂದು ಬಿಡುಗಡೆಯಾಗಲಿರುವ ಈ ಹೊಸ ವೆನ್ಯೂ, ಹಿಂದಿನ ಮಾದರಿಗಿಂತ ದೊಡ್ಡದಾಗಿದ್ದು, ಹೆಚ್ಚು ವಿಶಾಲವಾದ ಒಳಾಂಗಣ, ಅತ್ಯಾಧುನಿಕ ತಂತ್ರಜ್ಞಾನ ಮತ್ತು ಹೊಸ ವಿನ್ಯಾಸದೊಂದಿಗೆ ಗ್ರಾಹಕರನ್ನು ಸೆಳೆಯಲು ಸಜ್ಜಾಗಿದೆ.
ದೇಶಾದ್ಯಂತ ಇರುವ ಹ್ಯುಂಡೈ ಡೀಲರ್‌ಶಿಪ್‌ಗಳಲ್ಲಿ ಮತ್ತು ಆನ್‌ಲೈನ್‌ನಲ್ಲಿ ₹25,000 ಪಾವತಿಸಿ, ಹೊಸ ವೆನ್ಯೂವನ್ನು ಕಾಯ್ದಿರಿಸಲು (Bookings) ಅವಕಾಶ ಕಲ್ಪಿಸಲಾಗಿದೆ. “ಟೆಕ್ ಅಪ್, ಗೋ ಬಿಯಾಂಡ್” (Tech up. Go beyond) ಎಂಬ ಧ್ಯೇಯವಾಕ್ಯದೊಂದಿಗೆ ಬಿಡುಗಡೆಯಾಗುತ್ತಿರುವ ಈ ಕಾರು, ಫೈಟರ್ ಜೆಟ್‌ನ ನಿಖರತೆ ಮತ್ತು ಶಕ್ತಿಯಿಂದ ಸ್ಫೂರ್ತಿ ಪಡೆದಿದೆ ಎಂದು ಕಂಪನಿ ಹೇಳಿದೆ.
ಹೊಸ ವೆನ್ಯೂ ವಿಶೇಷತೆಗಳೇನು?
ಹೊಸ ವೆನ್ಯೂ, ಹಿಂದಿನ ಮಾದರಿಗಿಂತ 48mm ಹೆಚ್ಚು ಎತ್ತರ, 30mm ಹೆಚ್ಚು ಅಗಲ ಮತ್ತು 20mm ಉದ್ದದ ವೀಲ್‌ಬೇಸ್ ಹೊಂದಿದೆ. ಇದು ಕಾರಿಗೆ ಬಲಿಷ್ಠ “ರೋಡ್ ಪ್ರೆಸೆನ್ಸ್” ನೀಡುವುದಲ್ಲದೆ, ಒಳಾಂಗಣವನ್ನು ಹೆಚ್ಚು ವಿಶಾಲವಾಗಿಸಿದೆ. ಕ್ವಾಡ್-ಬೀಮ್ ಎಲ್‌ಇಡಿ ಹೆಡ್‌ಲ್ಯಾಂಪ್‌ಗಳು, ಹರೈಸನ್-ಶೈಲಿಯ ಎಲ್‌ಇಡಿ ಟೈಲ್ ಲ್ಯಾಂಪ್‌ಗಳು, ಡಾರ್ಕ್ ಕ್ರೋಮ್ ಗ್ರಿಲ್ ಮತ್ತು R16 ಡೈಮಂಡ್-ಕಟ್ ಅಲಾಯ್ ವೀಲ್‌ಗಳು ಇದರ ಪ್ರಮುಖ ವಿನ್ಯಾಸದ ಆಕರ್ಷಣೆಗಳಾಗಿವೆ.
ಹೊಸ ವೆನ್ಯೂನ ಒಳಾಂಗಣವು ಡಾರ್ಕ್ ನೇವಿ ಮತ್ತು ಡವ್ ಗ್ರೇ ಬಣ್ಣದ ಡ್ಯುಯಲ್-ಟೋನ್ ಥೀಮ್‌ನೊಂದಿಗೆ ಅತ್ಯಂತ ಪ್ರೀಮಿಯಂ ಆಗಿದೆ. ಇದರ ಪ್ರಮುಖ ಆಕರ್ಷಣೆ ಎಂದರೆ, ಡ್ಯಾಶ್‌ಬೋರ್ಡ್‌ನಲ್ಲಿರುವ ಬಾಗಿದ ಡ್ಯುಯಲ್ 12.3-ಇಂಚಿನ ಪನೋರಮಿಕ್ ಡಿಸ್‌ಪ್ಲೇ. ಇದು ಇನ್ಫೋಟೈನ್‌ಮೆಂಟ್ ಸಿಸ್ಟಮ್ ಮತ್ತು ಡಿಜಿಟಲ್ ಇನ್‌ಸ್ಟ್ರುಮೆಂಟ್ ಕ್ಲಸ್ಟರ್ ಎರಡನ್ನೂ ಒಳಗೊಂಡಿದೆ. ಇದರೊಂದಿಗೆ, ಆಂಬಿಯೆಂಟ್ ಮೂನ್ ವೈಟ್ ಲೈಟಿಂಗ್, 4-ವೇ ಎಲೆಕ್ಟ್ರಿಕ್ ಡ್ರೈವರ್ ಸೀಟ್, ಹಿಂಬದಿ ಪ್ರಯಾಣಿಕರಿಗೆ ಎಸಿ ವೆಂಟ್‌ಗಳು ಮತ್ತು 2-ಹಂತದಲ್ಲಿ ಓರೆಯಾಗಿಸಬಹುದಾದ ಆಸನಗಳು (2-step reclining rear seats) ಇದರ ಪ್ರಮುಖ ಫೀಚರ್‌ಗಳಾಗಿವೆ
ಹೊಸ ವೆನ್ಯೂ, ಸಾಬೀತಾಗಿರುವ ಮೂರು ಇಂಜಿನ್ ಆಯ್ಕೆಗಳಲ್ಲಿ ಲಭ್ಯವಿರುತ್ತದೆ:
- 1.2-ಲೀಟರ್ ಕಪ್ಪಾ MPi ಪೆಟ್ರೋಲ್ (83 PS ಪವರ್, 114 Nm ಟಾರ್ಕ್)
- 1.0-ಲೀಟರ್ ಕಪ್ಪಾ ಟರ್ಬೊ GDi ಪೆಟ್ರೋಲ್ (120 PS ಪವರ್, 172 Nm ಟಾರ್ಕ್)
- 1.5-ಲೀಟರ್ U2 CRDi ಡೀಸೆಲ್ (116 PS ಪವರ್, 250 Nm ಟಾರ್ಕ್).
- ಮ್ಯಾನುಯಲ್, ಆಟೋಮ್ಯಾಟಿಕ್ ಮತ್ತು ಡ್ಯುಯಲ್-ಕ್ಲಚ್ ಟ್ರಾನ್ಸ್‌ಮಿಷನ್ (DCT) ಆಯ್ಕೆಗಳು ಲಭ್ಯವಿರುತ್ತವೆ.
- ಹೊಸ ‘HX’ ವೇರಿಯೆಂಟ್‌ಗಳು: ಹ್ಯುಂಡೈ, ತನ್ನ ಹೊಸ ವೇರಿಯೆಂಟ್ “HX” (Hyundai Experience) ಅನ್ನು ಪರಿಚಯಿಸಿದೆ. ಪೆಟ್ರೋಲ್ ಶ್ರೇಣಿಯಲ್ಲಿ HX2, HX4, HX5, HX6, HX6T, HX8 ಮತ್ತು HX10 ಎಂಬ 7 ವೇರಿಯೆಂಟ್‌ಗಳು ಹಾಗೂ ಡೀಸೆಲ್ ಶ್ರೇಣಿಯಲ್ಲಿ HX2, HX5, HX7 ಮತ್ತು HX10 ಎಂಬ 4 ವೇರಿಯೆಂಟ್‌ಗಳು ಲಭ್ಯವಿರಲಿವೆ.
ಹೇಜಲ್ ಬ್ಲೂ ಮತ್ತು ಮಿಸ್ಟಿಕ್ ಸಫೈರ್ ಎಂಬ ಎರಡು ಹೊಸ ಬಣ್ಣಗಳು ಸೇರಿದಂತೆ ಒಟ್ಟು ಆರು ಏಕವರ್ಣ ಮತ್ತು ಎರಡು ದ್ವಿವರ್ಣ ಬಣ್ಣಗಳ ಆಯ್ಕೆಯಲ್ಲಿ ಹೊಸ ವೆನ್ಯೂ ಲಭ್ಯವಾಗಲಿದೆ. ಈಗಾಗಲೇ ಭಾರತದಲ್ಲಿ 7 ಲಕ್ಷಕ್ಕೂ ಹೆಚ್ಚು ಗ್ರಾಹಕರನ್ನು ತಲುಪಿರುವ ವೆನ್ಯೂ, ತನ್ನ ಈ ಹೊಸ ಅವತಾರದೊಂದಿಗೆ ಕಾಂಪ್ಯಾಕ್ಟ್ ಎಸ್‌ಯುವಿ ವಿಭಾಗದಲ್ಲಿ ಹೊಸ ಮಾನದಂಡಗಳನ್ನು ಸ್ಥಾಪಿಸುವ ನಿರೀಕ್ಷೆಯಿದೆ.
