ಬೆಂಗಳೂರು: ದೇಶದ ಅಂಚೆ ಕಚೇರಿಗಳು ಈಗ ಕೇವಲ ಪತ್ರಗಳನ್ನು ರವಾನಿಸುವ ಕೇಂದ್ರಗಳಾಗಿ ಉಳಿದಿಲ್ಲ. ಬದಲಾಗಿ, ಇವು ಬ್ಯಾಂಕ್ ಗಳಾಗಿ, ಉಳಿತಾಯ, ಹೂಡಿಕೆ ಯೋಜನೆಗಳು ಹೊಂದಿರುವ ತಾಣಗಳಾಗಿವೆ. ಅಲ್ಲದೆ, ಸಾರ್ವಜನಿಕರು ಪೋಸ್ಟ್ ಆಫೀಸ್ ಫ್ರಾಂಚೈಸಿಯನ್ನು ಆರಂಭಿಸುವ ಮೂಲಕ ತಿಂಗಳಿಗೆ 50 ಸಾವಿರ ರೂಪಾಯಿ ಗಳಿಸಬಹುದಾಗಿದೆ. ಸ್ವಂತ ಉದ್ಯಮ ಆರಂಭಿಸಬೇಕು ಎನ್ನುವವರಿಗೆ ಇದು ಉತ್ತಮ ಯೋಜನೆಯಾಗಿದೆ.
ನೀವು ಕನಿಷ್ಠ 8ನೇ ತರಗತಿ ಪಾಸಾಗಿದ್ದು, ನಿಮ್ಮ ಊರು ಅಥವಾ ತಾಲೂಕು ಪ್ರದೇಶದಲ್ಲಿ 100 ಚದರ ಅಡಿ ಸ್ವಂತ ಜಾಗ ಹೊಂದಿದ್ದರೆ ಪೋಸ್ಟ್ ಆಫೀಸ್ ಫ್ರಾಂಚೈಸಿ ದೊರೆಯುತ್ತದೆ. ಅಂಚೆ ಇಲಾಖೆಯ ಸೇವೆಗಳನ್ನು ದೇಶದ ಮೂಲೆ ಮೂಲೆಗೂ ಸುಲಭವಾಗಿ ತಲುಪಿಸುವ ಉದ್ದೇಶದಿಂದ ಈ ಫ್ರಾಂಚೈಸಿ ಯೋಜನೆಯನ್ನು ಆರಂಭಿಸಲಾಗಿದೆ. ಇದು ಅಂಚೆ ಕಚೇರಿಯ ವಿಸ್ತರಿತ ಸೇವೆಯಾಗಿದ್ದು, ಫ್ರಾಂಚೈಸಿಗಳು ಅಂಚೆ ಕಚೇರಿ ಒದಗಿಸುವ ಎಲ್ಲ ಪ್ರಮುಖ ಸೇವೆಗಳನ್ನು ಗ್ರಾಹಕರಿಗೆ ಒದಗಿಸಬಹುದು.
ಅಂಚೆ ಕಚೇರಿಯ ಫ್ರಾಂಚೈಸಿಯನ್ನು ಪ್ರಾರಂಭಿಸಲು 5,000 ರೂ. ಭದ್ರತಾ ಠೇವಣಿ ಇರಿಸಬೇಕಾಗುತ್ತದೆ. ಈ ಹಣವನ್ನು ಹಿಂತಿರುಗಿಸಲಾಗುತ್ತದೆ. ನೀವೇ ಜನರಿಗೆ ಸ್ಪೀಡ್ ಪೋಸ್ಟ್, ಮನಿ ಆರ್ಡರ್, ನೋಂದಾಯಿತ ಪತ್ರಗಳು, ಅಂಚೆ ಚೀಟಿ ಮಾರಾಟ, ಇತ್ಯಾದಿ ಸೇವೆಗಳನ್ನು ನೀಡುವ ಮೂಲಕ ಕಮಿಷನ್ ಪಡೆಯಬಹುದು. ಫ್ರಾಂಚೈಸಿಯನ್ನು ಪೆಯಲು www.indiapost.gov.in ವೆಬ್ ಸೈಟ್ ಗೆ ತೆರಳಿ ಅರ್ಜಿ ಸಲ್ಲಿಸಬಹುದು.
ಕಮಿಷನ್ ಲೆಕ್ಕಾಚಾರ ಹೇಗೆ?
ಪ್ರತಿ ರಿಜಿಸ್ಟರ್ಡ್ ಪೋಸ್ಟ್ ಹಾಗೂ ಸ್ಪೀಡ್ ಪೋಸ್ಟ್ ಗೆ 2 ರೂಪಾಯಿ ಕಮಿಷನ್ ಸಿಗುತ್ತದೆ
ಒಂದು ಮನಿ ಆರ್ಡರ್ ಬುಕ್ ಮಾಡಿದರೆ 3.5 ರೂಪಾಯಿ ಕಮಿಷನ್ ನೀಡಲಾಗುತ್ತದೆ
ಮನಿ ಆರ್ಡರ್ ಫಾರ್ಮ್ ಹಾಗೂ ಪೋಸ್ಟಲ್ ಸ್ಟ್ಯಾಂಪ್ ಗಳ ಮಾರಾಟಕ್ಕೆ ಶೇ.5ರಷ್ಟು ಕಮಿಷನ್
1 ಸಾವಿರಕ್ಕೂ ಅಧಿಕ ಸ್ಪೀಡ್ ಪೋಸ್ಟ್ ಬುಕ್ ಆದರೆ, ಶೇ.20ರಷ್ಟು ಹೆಚ್ಚುವರಿ ಕಮಿಷನ್ ನೀಡಲಾಗುತ್ತದೆ
