ಬೆಂಗಳೂರು : ಟೀಂ ಇಂಡಿಯಾದ ಯುವ ಆಲ್ರೌಂಡರ್ ಮತ್ತು ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್ಸಿಬಿ) ತಂಡದ ಪ್ರಮುಖ ಆಟಗಾರ್ತಿ ಶ್ರೇಯಾಂಕಾ ಪಾಟೀಲ್, ತಮ್ಮ ಕಠಿಣ ಸಮಯದಲ್ಲಿ ಟೀಂ ಇಂಡಿಯಾದ ವೇಗಿ ಜಸ್ಪ್ರೀತ್ ಬುಮ್ರಾ ಅವರು ನೀಡಿದ ಸಲಹೆಗಳು ಹೇಗೆ ಸ್ಫೂರ್ತಿಯಾದವು ಎಂಬುದನ್ನು ಹಂಚಿಕೊಂಡಿದ್ದಾರೆ. ಕಳೆದ ವರ್ಷದ ಟಿ20 ವಿಶ್ವಕಪ್ ನಂತರ ಸರಣಿ ಗಾಯಗಳ ಸಮಸ್ಯೆಗೆ ತುತ್ತಾಗಿದ್ದ ಶ್ರೇಯಾಂಕಾ, ಸುಮಾರು ಒಂದು ವರ್ಷ ಕಾಲ ಕ್ರಿಕೆಟ್ನಿಂದ ದೂರ ಉಳಿಯುವಂತಾಗಿತ್ತು.
ಪದೇ ಪದೇ ಎದುರಾದ ಗಾಯಗಳಿಂದಾಗಿ ಒಂದು ಹಂತದಲ್ಲಿ ತಮ್ಮ ಕ್ರಿಕೆಟ್ ಭವಿಷ್ಯದ ಬಗ್ಗೆಯೇ ಅವರು ಆತಂಕಗೊಂಡಿದ್ದರು. ಇದೇ ಕಾರಣಕ್ಕಾಗಿ ಕಳೆದ ಮಹಿಳಾ ಪ್ರೀಮಿಯರ್ ಲೀಗ್ (WPL) ಆವೃತ್ತಿಯಿಂದಲೂ ಅವರು ಹೊರಗುಳಿಯಬೇಕಾಯಿತು. 2024ರ ಆವೃತ್ತಿಯಲ್ಲಿ ಆರ್ಸಿಬಿ ಕಪ್ ಗೆಲ್ಲುವಲ್ಲಿ ಮತ್ತು ಪರ್ಪಲ್ ಕ್ಯಾಪ್ ಪಡೆಯುವಲ್ಲಿ ಶ್ರೇಯಾಂಕಾ ಅವರ ಪಾತ್ರ ಮಹತ್ವದ್ದಾಗಿತ್ತು.
ಬುಮ್ರಾ ಸಲಹೆ ಏನಾಗಿತ್ತು?
ನವಿ ಮುಂಬೈನಲ್ಲಿ ಜನವರಿ 9ರಂದು ನಡೆಯಲಿರುವ ಮುಂಬೈ ಇಂಡಿಯನ್ಸ್ ವಿರುದ್ಧದ ಪಂದ್ಯದ ಮೂಲಕ ಶ್ರೇಯಾಂಕಾ ಕಮ್ಬ್ಯಾಕ್ ಮಾಡುತ್ತಿದ್ದಾರೆ. ಈ ವೇಳೆ ಮಾಧ್ಯಮಗಳೊಂದಿಗೆ ಮಾತನಾಡಿದ ಅವರು, ಬೆಂಗಳೂರಿನ ರಾಷ್ಟ್ರೀಯ ಕ್ರಿಕೆಟ್ ಅಕಾಡೆಮಿಯಲ್ಲಿ ತಾವು ಬುಮ್ರಾ ಅವರನ್ನು ಭೇಟಿಯಾದ ಕ್ಷಣವನ್ನು ಸ್ಮರಿಸಿದ್ದಾರೆ.
“ಬುಮ್ರಾ ಅವರು ಕೂಡ ಸಾಕಷ್ಟು ಬಾರಿ ಗಾಯದ ಸಮಸ್ಯೆಯಿಂದ ಬಳಲಿದ್ದರು. ಹೀಗಾಗಿ ಅವರಿಂದ ಸಲಹೆ ಪಡೆಯಲು ನಾನು ಕಾತರಳಾಗಿದ್ದೆ. ಅವರು ನನಗೆ, ‘ನೀನು ಎದುರಿಸುತ್ತಿರುವ ಸಮಸ್ಯೆ ಸಹಜವಾದುದು, ಪ್ರತಿಯೊಬ್ಬ ಆಟಗಾರನೂ ಇದನ್ನು ಎದುರಿಸಲೇಬೇಕು. ನೀನು ಚಿಕ್ಕ ವಯಸ್ಸಿನಲ್ಲೇ ಇದನ್ನು ಅನುಭವಿಸುತ್ತಿದ್ದೀಯಾ ಅಷ್ಟೇ. ಇದರ ವಿರುದ್ಧ ಹೋರಾಡುವ ಬದಲು, ಪರಿಸ್ಥಿತಿಯನ್ನು ಒಪ್ಪಿಕೊಂಡು ಮುನ್ನಡೆಯಬೇಕು,’ ಎಂದು ಕಿವಿಮಾತು ಹೇಳಿದರು,” ಎಂದು ಶ್ರೇಯಾಂಕಾ ತಿಳಿಸಿದ್ದಾರೆ.
ಡೆತ್ ಓವರ್ ಬೌಲಿಂಗ್ ಟಿಪ್ಸ್
ಸ್ಪಿನ್ನರ್ ಆಗಿದ್ದರೂ ಡೆತ್ ಓವರ್ಗಳಲ್ಲಿ ಬೌಲಿಂಗ್ ಮಾಡುವ ಶ್ರೇಯಾಂಕಾ, ಒತ್ತಡದ ಸಮಯದಲ್ಲಿ ಯಾರ್ಕರ್ ಎಸೆಯುವುದು ಹೇಗೆ ಮತ್ತು ಅಭ್ಯಾಸದ ಕ್ರಮಗಳ ಬಗ್ಗೆ ಬುಮ್ರಾ ಅವರಿಂದ ಮಾಹಿತಿ ಪಡೆದಿದ್ದಾರೆ. “ಅವರು ವೇಗದ ಬೌಲರ್ ಆಗಿರಬಹುದು, ಆದರೆ ಒತ್ತಡವನ್ನು ನಿಭಾಯಿಸುವ ಅವರ ರೀತಿ ನನಗೆ ಮಾದರಿ. ಬ್ಯಾಟರ್ಗಳಿಗೆ ಬೌಲ್ ಮಾಡಬೇಕೇ ಅಥವಾ ಸ್ಪಾಟ್ ಬೌಲಿಂಗ್ ಮಾಡಬೇಕೇ ಎಂಬ ನನ್ನೆಲ್ಲ ಪ್ರಶ್ನೆಗಳಿಗೆ ಅವರು ಅದ್ಭುತವಾಗಿ ಉತ್ತರಿಸಿದರು,” ಎಂದು ಶ್ರೇಯಾಂಕಾ ಹೇಳಿದ್ದಾರೆ. ಗಾಯದಿಂದ ಚೇತರಿಸಿಕೊಂಡ ಬಳಿಕ ಮಹಿಳಾ ಕೆರಿಬಿಯನ್ ಪ್ರೀಮಿಯರ್ ಲೀಗ್ ಮತ್ತು ಕರ್ನಾಟಕ ರಾಜ್ಯ ತಂಡದ ಪರವಾಗಿ ಆಡಿರುವ ಶ್ರೇಯಾಂಕಾ, ಇದೀಗ ಡಬ್ಲ್ಯುಪಿಎಲ್ನಲ್ಲಿ ಆರ್ಭಟಿಸಲು ಸಜ್ಜಾಗಿದ್ದಾರೆ.
ಇದನ್ನೂ ಓದಿ : ಲೈಂಗಿಕ ದೌರ್ಜನ್ಯ ಪ್ರಕರಣ | ಮ್ಯೂಸಿಕ್ ಮೈಲಾರಿ ಜಾಮೀನು ಅರ್ಜಿ ವಜಾ!
