ಹೊಸದಿಲ್ಲಿ: ಕಳಪೆ ಮಾರಾಟದಿಂದಾಗಿ 18 ತಿಂಗಳೊಳಗೆ ಮಾರುಕಟ್ಟೆಯಿಂದ ಕಣ್ಮರೆಯಾಗಿದ್ದ ಹೀರೋ ಮೋಟೋಕಾರ್ಪ್‌ನ ಮಹತ್ವಾಕಾಂಕ್ಷೆಯ ಮ್ಯಾನ್ವರಿಕ್ 440 (Mavrick 440) ಇದೀಗ ಹೊಸ ರೂಪ ಮತ್ತು ವೈಶಿಷ್ಟ್ಯಗಳೊಂದಿಗೆ ಭಾರತಕ್ಕೆ ಮರಳಲು ಸಜ್ಜಾಗಿದೆ. ಇತ್ತೀಚೆಗೆ ನಡೆದ ಟಿವಿ ಜಾಹೀರಾತು ಚಿತ್ರೀಕರಣದ ವೇಳೆ ಸೋರಿಕೆಯಾದ ಚಿತ್ರಗಳು, ಈ ಬೈಕ್ ಪ್ರೀಮಿಯಂ ಅಪ್‌ಗ್ರೇಡ್‌ಗಳೊಂದಿಗೆ ಬರುತ್ತಿದೆ ಎಂಬುದನ್ನು ಖಚಿತಪಡಿಸಿವೆ.
ಹೊಸ ಮ್ಯಾನ್‌ವರಿಕ್‌ನಲ್ಲಿ ಏನೆಲ್ಲಾ ಬದಲಾವಣೆ?
ಮೊದಲ ಆವೃತ್ತಿಯಲ್ಲಿನ ಪ್ರಮುಖ ದೂರುಗಳನ್ನು ಪರಿಹರಿಸಲು ಹೀರೋ ಈ ಬಾರಿ ಗಮನಹರಿಸಿದೆ.
ಈ ಹಿಂದೆ ವೆಚ್ಚ ಕಡಿತಕ್ಕಾಗಿ ಸಾಮಾನ್ಯ ಸಸ್ಪೆನ್ಷನ್ ಬಳಸಲಾಗಿತ್ತು. ಆದರೆ, ಹೊಸ ಆವೃತ್ತಿಯಲ್ಲಿ EICMA 2024ರಲ್ಲಿ ಪ್ರದರ್ಶಿಸಲಾಗಿದ್ದ ಗೋಲ್ಡನ್ ಯುಎಸ್‌ಡಿ ಫೋರ್ಕ್ (Golden USD Fork) ಅನ್ನು ಅಳವಡಿಸಲಾಗಿದೆ. ಇದು ಬೈಕ್‌ನ ಲುಕ್ ಮತ್ತು ರೈಡಿಂಗ್ ಗುಣಮಟ್ಟವನ್ನು ಹೆಚ್ಚಿಸಲಿದೆ..
ಪ್ರೀಮಿಯಂ ಫಿನಿಶ್: ಹಳೆಯ ಹೊಳಪಿನ ಬೂದು ಬಣ್ಣದ ಬದಲು, ಹೊಸದಾಗಿ ಮ್ಯಾಟ್ ಗ್ರೇ ಬಣ್ಣ ಮತ್ತು ಎಂಜಿನ್ ಕವರ್‌ಗೆ ಕಂಚು ಅಥವಾ ತಾಮ್ರದ ಫಿನಿಶ್ ನೀಡಲಾಗಿದೆ. ಇದು ಬೈಕ್‌ಗೆ ಹೆಚ್ಚು ಪ್ರೀಮಿಯಂ ನೋಟವನ್ನು ನೀಡುತ್ತದೆ.
ಮೊದಲ ಪ್ರಯತ್ನ ಏಕೆ ವಿಫಲವಾಗಿತ್ತು?
ಹೀರೋ ಮ್ಯಾನ್ವರಿಕ್ 440 ಮತ್ತು ಹಾರ್ಲೆ-ಡೇವಿಡ್ಸನ್ ಎಕ್ಸ್440 (Harley-Davidson X440) ಎರಡೂ ಒಂದೇ 440cc ಪ್ಲಾಟ್‌ಫಾರ್ಮ್ ಅನ್ನು ಹಂಚಿಕೊಂಡಿದ್ದರೂ, ಹೀರೋ ತನ್ನ ಬೈಕ್‌ನ ಬೆಲೆಯನ್ನು ಕಡಿಮೆ ಮಾಡಲು ಹಲವು ಪ್ರೀಮಿಯಂ ವೈಶಿಷ್ಟ್ಯಗಳನ್ನು ಕೈಬಿಟ್ಟಿತ್ತು. ಇದು ಗ್ರಾಹಕರಿಗೆ ಇಷ್ಟವಾಗಲಿಲ್ಲ. ಬೆಲೆಗೆ ತಕ್ಕ ಮೌಲ್ಯ ಸಿಗುತ್ತಿಲ್ಲ ಎಂದು ಭಾವಿಸಿದ ಖರೀದಿದಾರರು, ಹೆಚ್ಚು ಹಣ ಕೊಟ್ಟು ಹಾರ್ಲೆ-ಡೇವಿಡ್ಸನ್ ಎಕ್ಸ್440 ಖರೀದಿಸಲು ಮುಂದಾದರು ಅಥವಾ ಬೇರೆ ಬ್ರಾಂಡ್‌ಗಳತ್ತ ಮುಖ ಮಾಡಿದರು. ಇದರ ಪರಿಣಾಮವಾಗಿ, ಮಾರಾಟ ಕುಸಿದು, ಹೀರೋ ತನ್ನ ವೆಬ್‌ಸೈಟ್‌ನಿಂದ ಮ್ಯಾನ್ವರಿಕ್ 440 ಅನ್ನು ತೆಗೆದುಹಾಕಿತ್ತು.
ಕಮ್‌ಬ್ಯಾಕ್ ಏಕೆ ಅರ್ಥಪೂರ್ಣ?
ಮ್ಯಾನ್‌ವರಿಕ್‌ನ ಮೂಲ ಪ್ಲಾಟ್‌ಫಾರ್ಮ್‌ನಲ್ಲಿ ಯಾವುದೇ ದೋಷವಿರಲಿಲ್ಲ. ಹಾರ್ಲೆ-ಡೇವಿಡ್ಸನ್ ಎಕ್ಸ್440 ಯಶಸ್ಸು, ಅದರ ಎಂಜಿನಿಯರಿಂಗ್ ಉತ್ತಮವಾಗಿದೆ ಎಂಬುದನ್ನು ಸಾಬೀತುಪಡಿಸಿದೆ. ಸಮಸ್ಯೆ ಇದ್ದದ್ದು ವೈಶಿಷ್ಟ್ಯಗಳ ಆಯ್ಕೆ ಮತ್ತು ಬೆಲೆ ನಿಗದಿಯಲ್ಲಿ ಮಾತ್ರ. ಈಗ, ಯುಎಸ್‌ಡಿ ಫೋರ್ಕ್ ಮತ್ತು ಉತ್ತಮ ವಿನ್ಯಾಸದೊಂದಿಗೆ ಈ ದೂರುಗಳನ್ನು ಸರಿಪಡಿಸಲಾಗಿದೆ.
ಪ್ರಸ್ತುತ, 440cc ವಿಭಾಗದಲ್ಲಿ ಕೆಟಿಎಂ, ಬಜಾಜ್, ಮತ್ತು ರಾಯಲ್ ಎನ್‌ಫೀಲ್ಡ್‌ನಂತಹ ಬ್ರಾಂಡ್‌ಗಳಿಂದ ತೀವ್ರ ಪೈಪೋಟಿಯಿದೆ. ಈ ಸ್ಪರ್ಧೆಯು ಗ್ರಾಹಕರ ನಿರೀಕ್ಷೆಯನ್ನು ಹೆಚ್ಚಿಸಿದೆ. ಈ ಸಮಯದಲ್ಲಿ, ನವೀಕರಿಸಿದ ಮ್ಯಾನ್ವರಿಕ್ 440 ಸರಿಯಾದ ಬೆಲೆ ಮತ್ತು ವೈಶಿಷ್ಟ್ಯಗಳೊಂದಿಗೆ ಬಂದರೆ, ಮಾರುಕಟ್ಟೆಯಲ್ಲಿ ಯಶಸ್ಸು ಸಾಧಿಸುವ ಎಲ್ಲ ಸಾಧ್ಯತೆಗಳಿವೆ.
ಮುಂದೇನು?
ಹೊಸ ಮ್ಯಾನ್ವರಿಕ್ 440ರ ಯಶಸ್ಸು ಅದರ ಬೆಲೆ ಮತ್ತು ರೂಪಾಂತರಗಳ ಮೇಲೆ ನಿಂತಿದೆ. ಹಾರ್ಲೆ-ಡೇವಿಡ್ಸನ್ ಎಕ್ಸ್440ಗಿಂತ ಸ್ವಲ್ಪ ಕಡಿಮೆ ಬೆಲೆಯಲ್ಲಿ, ಆದರೆ ಕೊಟ್ಟ ಹಣಕ್ಕೆ ತಕ್ಕ ಮೌಲ್ಯ ನೀಡುವಂತೆ ಇದನ್ನು ಬಿಡುಗಡೆ ಮಾಡಿದರೆ, ಗ್ರಾಹಕರನ್ನು ಸೆಳೆಯಬಹುದು. ಹಳೆಯ ತಪ್ಪುಗಳಿಂದ ಪಾಠ ಕಲಿತಿರುವ ಹೀರೋ, ಈ ಬಾರಿ ಮಾರುಕಟ್ಟೆಯಲ್ಲಿ ಸಂಚಲನ ಮೂಡಿಸುವ ನಿರೀಕ್ಷೆಯಿದೆ. ಈ ನವೀಕೃತ ಬೈಕ್ ಶೀಘ್ರದಲ್ಲೇ ಬಿಡುಗಡೆಯಾಗುವ ಸಾಧ್ಯತೆಯಿದೆ, ಏಕೆಂದರೆ ಅದರ ಜಾಹೀರಾತು ಚಿತ್ರೀಕರಣ ಈಗಾಗಲೇ ಪ್ರಾರಂಭವಾಗಿದೆ.
