ಐಪಿಎಲ್ ಇತಿಹಾಸದಲ್ಲಿ ಅತ್ಯಂತ ಸ್ಥಿರ ಪ್ರದರ್ಶನ ನೀಡಿದ ವಿದೇಶಿ ಆಟಗಾರರಲ್ಲಿ ಒಬ್ಬರಾದ ಫಾಫ್ ಡು ಪ್ಲೆಸಿಸ್, ಡಿಸೆಂಬರ್ 15 ರಂದು ಅಬುಧಾಬಿಯಲ್ಲಿ ನಡೆಯಲಿರುವ ಹರಾಜು ಪ್ರಕ್ರಿಯೆಯಿಂದ ಹಿಂದೆ ಸರಿದಿದ್ದಾರೆ. ಸುಮಾರು 14 ವರ್ಷಗಳ ಕಾಲ ಐಪಿಎಲ್ನಲ್ಲಿ ಮಿಂಚಿದ್ದ ಅವರು, ಈ ಬಾರಿ ಪಾಕಿಸ್ತಾನದಲ್ಲಿ ಹೊಸ ಸವಾಲು ಸ್ವೀಕರಿಸಲು ಸಜ್ಜಾಗಿದ್ದಾರೆ.
ಈ ಬಗ್ಗೆ ಸಾಮಾಜಿಕ ಜಾಲತಾಣದಲ್ಲಿ ಹೇಳಿಕೆ ನೀಡಿರುವ ಫಾಫ್, “14 ಸೀಸನ್ಗಳ ನಂತರ ಈ ಬಾರಿ ಹರಾಜಿನಲ್ಲಿ ನನ್ನ ಹೆಸರನ್ನು ನೋಂದಾಯಿಸದಿರಲು ನಿರ್ಧರಿಸಿದ್ದೇನೆ. ನನ್ನ ವೃತ್ತಿಜೀವನದ ಈ ಹಂತದಲ್ಲಿ ಕೆಲಸದ ಒತ್ತಡವನ್ನು (Workload) ನಿರ್ವಹಿಸುವುದು ಮುಖ್ಯ. ಪಿಎಸ್ಎಲ್ ವೇಳಾಪಟ್ಟಿ ನನಗೆ ಅನುಕೂಲಕರವಾಗಿದೆ,” ಎಂದು ತಿಳಿಸಿದ್ದಾರೆ. ಐಪಿಎಲ್ ಮತ್ತು ಪಿಎಸ್ಎಲ್ ವೇಳಾಪಟ್ಟಿಗಳು ಒಂದಕ್ಕೊಂದು ಘರ್ಷಣೆಯಾಗುತ್ತಿರುವುದು ಕೂಡ ಅವರ ಈ ನಿರ್ಧಾರಕ್ಕೆ ಕಾರಣ ಎನ್ನಲಾಗಿದೆ.
ಐಪಿಎಲ್ ಪಯಣ
2012ರಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ (CSK) ಮೂಲಕ ಐಪಿಎಲ್ ಪ್ರವೇಶಿಸಿದ ಫಾಫ್, ಮೂರು ಬಾರಿ ಚಾಂಪಿಯನ್ ತಂಡದ ಭಾಗವಾಗಿದ್ದರು. 2021ರಲ್ಲಿ ಸಿಎಸ್ಕೆ ಕಪ್ ಗೆಲ್ಲುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ನಂತರ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ತಂಡದ ನಾಯಕರಾಗಿ ಎರಡು ಬಾರಿ ಪ್ಲೇ-ಆಫ್ ಹಂತಕ್ಕೆ ಕೊಂಡೊಯ್ದಿದ್ದರು. ಕಳೆದ ಸೀಸನ್ನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ (DC) ಪರ ಆಡಿದ್ದ ಅವರು ನಿರೀಕ್ಷಿತ ಪ್ರದರ್ಶನ ನೀಡಲು ವಿಫಲರಾಗಿದ್ದರು. 154 ಪಂದ್ಯಗಳಲ್ಲಿ 35.09ರ ಸರಾಸರಿಯಲ್ಲಿ 4,773 ರನ್ ಗಳಿಸಿದ ಕೀರ್ತಿ ಇವರದ್ದು.
ವಿದಾಯವಲ್ಲ
“ಭಾರತ ನನ್ನ ಹೃದಯದಲ್ಲಿ ವಿಶೇಷ ಸ್ಥಾನ ಪಡೆದಿದೆ. ಇದು ಖಂಡಿತವಾಗಿಯೂ ವಿದಾಯವಲ್ಲ. ನಾವು ಮತ್ತೆ ಸಿಗೋಣ,” ಎಂದು ಫಾಫ್ ಅಭಿಮಾನಿಗಳಿಗೆ ಭರವಸೆ ನೀಡಿದ್ದಾರೆ. ಸದ್ಯಕ್ಕೆ ಐಪಿಎಲ್ನಿಂದ ವಿರಾಮ ಪಡೆದಿರುವ ಅವರು, ಪಿಎಸ್ಎಲ್ನಲ್ಲಿ ಪೆಶಾವರ್ ಝಲ್ಮಿ ಮತ್ತು ಕ್ವೆಟ್ಟಾ ಗ್ಲಾಡಿಯೇಟರ್ಸ್ ತಂಡಗಳ ಪರ ಆಡಿದ ಅನುಭವ ಹೊಂದಿದ್ದಾರೆ.
ಹೊಸ ಸವಾಲು
“ಹೊಸ ದೇಶ, ಹೊಸ ವಾತಾವರಣ ಮತ್ತು ಹೊಸ ಸವಾಲು. ಪಾಕಿಸ್ತಾನದ ಆತಿಥ್ಯವನ್ನು ಎದುರು ನೋಡುತ್ತಿದ್ದೇನೆ,” ಎಂದು ಫಾಫ್ ಹೇಳಿಕೊಂಡಿದ್ದಾರೆ. ಐಪಿಎಲ್ನಿಂದ ದೂರ ಉಳಿಯುವ ಮೂಲಕ ಅವರು ತಮ್ಮ ವೃತ್ತಿಜೀವನದಲ್ಲಿ ‘ಸ್ಮಾರ್ಟ್ ಆಯ್ಕೆ’ ಮಾಡಿಕೊಂಡಿದ್ದಾರೆ ಎಂದು ವಿಶ್ಲೇಷಿಸಲಾಗುತ್ತಿದೆ.
ಇದನ್ನೂ ಓದಿ: ಗಂಭೀರ್ ಪ್ರಯೋಗ ಶಾಲೆ : ‘ಸಂಗೀತ ಕುರ್ಚಿ’ ಆಟ ರಾಂಚಿಯಲ್ಲೂ ಮುಂದುವರಿಯುವುದೇ?
