ವಾಷಿಂಗ್ಟನ್: ಸರ್ಕಾರ ನೀಡಿರುವಂತಹ ಮೊಬೈಲ್ ಗಳಲ್ಲಿ ವಾಟ್ಸ್ಆ್ಯಪ್ ಬಳಕೆ ಮಾಡುವಂತಿಲ್ಲ ಎಂದು ಅಮೆರಿಕವು ತನ್ನ ಸಂಸತ್ ಸದಸ್ಯರಿಗೆ ಆದೇಶ ನೀಡಿದೆ. ಸೈಬರ್ ಭದ್ರತೆಗೆ ಸಂಬಂಧಿಸಿದ ಕಳವಳಗಳ ಹಿನ್ನೆಲೆಯಲ್ಲಿ ಈ ಆದೇಶ ಹೊರಡಿಸಲಾಗಿದ್ದು, ವಾಟ್ಸ್ ಆ್ಯಪ್ ಡೇಟಾ ಸಂರಕ್ಷಣೆಯಲ್ಲಿ ಪಾರದರ್ಶಕತೆಯ ಕೊರತೆ, ಶೇಖರಿತ ದತ್ತಾಂಶದ ಎನ್‌ಕ್ರಿಪ್ಶನ್ ಇಲ್ಲದಿರುವಿಕೆ ಮತ್ತು ಇತರ ಸಂಭಾವ್ಯ ಭದ್ರತಾ ಅಪಾಯಗಳನ್ನು ಇದಕ್ಕೆ ಕಾರಣಗಳೆಂದು ಉಲ್ಲೇಖಿಸಲಾಗಿದೆ.
ಮೊಬೈಲ್ ಫೋನ್ ಗಳು, ಡೆಸ್ಕ್ ಟಾಪ್ ಕಂಪ್ಯೂಟರ್ ಗಳು ಮತ್ತು ವೆಬ್ ಬ್ರೌಸರ್ ಗಳಿಂದ ವಾಟ್ಸ್ ಆ್ಯಪ್ ಅನ್ನು ತೆಗೆದುಹಾಕುವಂತೆ ಖಡಕ್ ಸೂಚನೆ ನೀಡಲಾಗಿದೆ.
ಇತ್ತೀಚೆಗಷ್ಟೇ ಇರಾನ್ ಸರ್ಕಾರವು ತನ್ನ ನಾಗರಿಕರಿಗೆ ಮೊಬೈಲ್, ಡೆಸ್ಕ್ ಟಾಪ್ ಗಳಿಂದ ವಾಟ್ಸಾಪ್ ತೆಗೆದುಹಾಕಲು ಸೂಚಿಸಿತ್ತು. ಈ ಆ್ಯಪ್ ಇಸ್ರೇಲ್‌ಗೆ ಬಳಕೆದಾರರ ಡೇಟಾವನ್ನು ಹಂಚಿಕೊಳ್ಳುತ್ತಿದೆ ಎಂದು ಆರೋಪಿಸಿತ್ತು. ಈ ಆರೋಪವನ್ನು ವಾಟ್ಸಾಪ್ ತಿರಸ್ಕರಿಸಿದೆಯಾದರೂ, ಈಗ ಅಮೆರಿಕದ ಸಂಸತ್ ಕೈಗೊಂಡಿರುವ ಕ್ರಮವು ಇರಾನ್ ಆರೋಪಕ್ಕೆ ಪುಷ್ಟಿ ನೀಡಿದಂತಾಗಿದೆ.
“ಸೈಬರ್ ಭದ್ರತಾ ಕಚೇರಿಯು ವಾಟ್ಸಾಪ್‌ನ ಬಳಕೆಯನ್ನು ಹೆಚ್ಚಿನ ಅಪಾಯವೆಂದು ಪರಿಗಣಿಸಿದೆ. ಡೇಟಾ ಸಂರಕ್ಷಣೆಯಲ್ಲಿ ಪಾರದರ್ಶಕತೆಯ ಕೊರತೆ, ಶೇಖರಿತ ಡೇಟಾದ ಎನ್‌ಕ್ರಿಪ್ಶನ್ ಇಲ್ಲದಿರುವಿಕೆ ಮತ್ತು ಇತರ ಭದ್ರತಾ ಸಮಸ್ಯೆಗಳು ಇದಕ್ಕೆ ಕಾರಣವಾಗಿವೆ” ಎಂದು ಸಂಸತ್ ಸದಸ್ಯರಿಗೆ ರವಾನಿಸಲಾದ ಇಮೇಲ್ ನಲ್ಲಿ ಅಮೆರಿಕ ಸರ್ಕಾರ ತಿಳಿಸಿದೆ.
ಸಂಸತ್ ಸದಸ್ಯರು, ಸಿಬ್ಬಂದಿಗೆ ವಾಟ್ಸಾಪ್‌ನ ಯಾವುದೇ ಆವೃತ್ತಿಯನ್ನು (ಮೊಬೈಲ್, ಡೆಸ್ಕ್‌ಟಾಪ್ ಅಥವಾ ವೆಬ್) ತಮ್ಮ ಸರ್ಕಾರಿ ಸಾಧನಗಳಲ್ಲಿ ಇರಿಸಿಕೊಳ್ಳದಂತೆ ಸೂಚಿಸಲಾಗಿದೆ. ಒಂದು ವೇಳೆ ವಾಟ್ಸಾಪ್ ಇದ್ದರೆ, ಅದನ್ನು ತೆಗೆದುಹಾಕುವಂತೆಯೂ ಸೂಚಿಸಲಾಗಿದೆ.
ಇದಕ್ಕೆ ಪರ್ಯಾಯವಾಗಿ, ಸಂಸತ್ ಸಿಬ್ಬಂದಿಗೆ ಸಿಗ್ನಲ್, ಮೈಕ್ರೋಸಾಫ್ಟ್ ಟೀಮ್ಸ್, ವಿಕರ್, ಐಮೆಸೇಜ್ ಮತ್ತು ಫೇಸ್‌ಟೈಮ್‌ನಂತಹ ಆ್ಯಪ್‌ಗಳನ್ನು ಬಳಸಲು ಶಿಫಾರಸು ಮಾಡಲಾಗಿದೆ. ಈ ಕ್ರಮವು ಡಿಜಿಟಲ್ ಭದ್ರತೆಯನ್ನು ಬಲಪಡಿಸುವ ಪ್ರಯತ್ನಗಳ ಭಾಗವಾಗಿದೆ ಎಂದು ತಿಳಿಸಿದೆ. ಈ ವರ್ಷದ ಆರಂಭದಲ್ಲಿ, ಪೆಗಾಸಸ್ ಸ್ಪೈವೇರ್‌ನಂತಹ ಭದ್ರತಾ ದೋಷಗಳು ವಾಟ್ಸಾಪ್‌ನಲ್ಲಿ ಕಂಡುಬಂದಿದ್ದವು, ಇದು ಈ ನಿರ್ಧಾರಕ್ಕೆ ಒಂದು ಕಾರಣವಾಗಿರಬಹುದು ಎಂದೂ ವಿಶ್ಲೇಷಿಸಲಾಗುತ್ತಿದೆ. ಈ ಬೆಳವಣಿಗೆಯು ಜಾಗತಿಕವಾಗಿ ವಾಟ್ಸಾಪ್‌ನ ಭದ್ರತಾ ವಿಶ್ವಾಸಾರ್ಹತೆಯ ಬಗ್ಗೆ ಚರ್ಚೆಗೆ ಕಾರಣವಾಗಿದೆ.
