ಬ್ಲ್ಯೂ ಸ್ಮಾರ್ಟ್, ಓಲಾ, ಊಬರ್ ಕಂಪನಿಗಳನ್ನೇ ಮಕಾಡೆ ಮಲಗಿಸುವ ತಾಕತ್ತಿನ ಕಂಪನಿ ಅಂತಲೇ ಬಿಂಬಿತವಾಗಿದ್ದ ಸ್ಟಾರ್ಟ್ ಆಪ್. 2018ರಲ್ಲಿ ಬೆಂಗಳೂರಲ್ಲೇ ಹುಟ್ಟಕೊಂಡಿತ್ತು. ಈ ವಿದ್ಯುತ್ ಚಾಲಿತ ವಾಹನಗಳ ಸೇವೆಯ ಬ್ಲ್ಯೂ ಸ್ಮಾರ್ಟ್. ಅನ್ಮೋಲ್ ಸಿಂಗ್ ಹಾಗೂ ಪುನೀತ್ ಜಗ್ಗಿ ಎಂಬ ಸಹೋದರರು ಟ್ಯಾಕ್ಸಿ ಸೇವೆ ಲೋಕದಲ್ಲಿ ಕ್ರಾಂತಿಕಾರಕ ಬದಲಾವಣೆ ಎಂಬ ಹೆಸರಿನಲ್ಲಿ ಕಾರ್ಯಾರಂಭ ಮಾಡಿದರು.
ಷೇರುದಾರರ ಗಂಟಲ್ಲಿ ಸದೋರರ ಶೋಕಿ
2018ರಲ್ಲಿ ಕಾರ್ಯಾರಂಭ ಮಾಡಿದ್ದ ಬ್ಲ್ಯೂ ಸ್ಮಾರ್ಟ್ ಕ್ಯಾಬ್ ಸೇವೆ. ಇಕೋ ಫ್ರೆಂಡ್ಲಿ ಹೆಸರಿನಲ್ಲಿ ಇವಿ ವಾಹನಗಳನ್ನು ರಸ್ತೆಗಿಳಿಸಿತ್ತು. ಅಷ್ಟೇ ಅಲ್ಲಾ ಭರ್ಜರಿ ಲಾಭದ ಸ್ಟಾರ್ಟ್ ಅಪ್ ಅಂತಲೇ ಷೇರು ಪೇಟೆ ಪ್ರವೇಶಿಸಿ ಭರ್ಜರಿ ಹೂಡಿಕೆ ಕಂಡಿತ್ತು. 4000 ಸಾವಿರ ಕೋಟಿ ಮೌಲ್ಯದ ಸಂಸ್ಥೆ ಸಹೋದರರ ಶೋಕಿಯಿಂದ ಇವತ್ತು ಮಕಾಡೆ ಮಲಗಿದೆ. ಬ್ಲ್ಯೂ ಸ್ಮಾರ್ಟ್ ಕಂಪನಿ ಸಂಸ್ಥಾಪರದ್ದೇ ಆದ ಜೆನ್ ಸಾಲ್ ಅನ್ನೋ ಸೋಲಾರ್ ಪವರ್ ಕಂಪನಿ ಹೆಸರಲ್ಲಿ ಬ್ಯಾಂಕ್ ಗಳಿಂದ 978 ಕೋಟಿ ರೂ. ಸಾಲವನ್ನು 6 ಸಾವಿರ ಇವಿ ವಾಹನ ಖರೀದಿಗೆ ಅಂತಾ ಪಡೆಯಲಾಗಿರುತ್ತೆ. ಈ ಹಣದಲ್ಲಿ ಸಹೋದರರು ತಮ್ಮ ಸ್ವಂತ ಶೋಕಿಗೆ ಬಳಸಿಕೊಂಡಿದ್ದೇ ಇವತ್ತಿನ ಈ ಪರಿಸ್ಥಿತಿಗೆ ಕಾರಣ. ಸೆಬಿ ನಡೆಸಿರುವ ತನಿಖೆಯಲ್ಲಿ ಸಾಲದ ಮೊತ್ತದಲ್ಲಿ 266 ಕೋಟಿ ರೂ.ಗಳನ್ನು ಜಗ್ಗಿ ಬ್ರದರ್ಸ್ ಗುರುಗ್ರಾಮದಲ್ಲಿ ಐಷಾರಾಮಿ ಬಂಗಲೆ, ತಾಯಿ, ಪತ್ನಿ ಖಾತೆಗೆ ಹಣ ವರ್ಗಾವಣೆ, ಅಪಾರ ಬಂಗಾರ ಖರೀದಿ ಮತ್ತು ದಿನ ನಿತ್ಯದ ಐಷಾರಾಮಿ ಜೀವನಕ್ಕೆ ಅಪಾರ ಹಣ ಖರ್ಚು ಮಾಡಿರುವುದು ಬೆಳಕಿಗೆ ಬಂದಿದೆ. ಅಷ್ಟೇ ಅಲ್ಲಾ 24 ಲಕ್ಷ ಮೌಲ್ಯದ ಗಾಲ್ಫ್ ಕಿಟ್ಟನ್ನೂ ಇದೇ ದುಡ್ಡಲ್ಲಿ ಖರೀದಿಸಿದ್ದಾರೆ.
ದೀಪಿಕಾ ಪಡಕೋಣೆಯ 25 ಕೋಟಿ ನೀರುಪಾಲು!
ಜಗ್ಗಿ ಬ್ರದರ್ಸ್ ನಂಬಿ ಉದ್ಯಮದ ಅತಿರಥರು ಹಣ ಹೂಡಿದ್ದರು. ಮೂಲತ ಬೆಂಗಳೂರಿನವರೇ ಆದ ದೀಪಿಕಾ ಪಡಕೋಣೆ ಬ್ಲ್ಯೂ ಸ್ಮಾರ್ಟ್ ಕಂಪನಿಯಲ್ಲಿ 25 ಕೋಟಿ ಹೂಡಿಕೆ ಮಾಡಿದ್ದರು. ಬಜಾಜ್ ಕ್ಯಾಪಿಟಲ್ ನ ಸಂಜೀವ್ ಬಜಾಜ್ 25 ಕೋಟಿ ಹೂಡಿದ್ದರು. ಇನ್ನು ಧೋನಿ ಕುಟುಂಬದ ಪಾಲುದಾರಿಕೆಯ ಸಂಸ್ಥೆ ಕೂಡಾ 100 ಕೋಟಿ ರೂ. ಗೂ ಹೆಚ್ಚಿನ ಬಂಡವಾಳ ಹಾಕಿದೆ. ಆದರೆ, ಸದ್ಯದ ಮಟ್ಟಿಗೆ ಈ ಹಣದ ಹಕೀಕತ್ತೇನು ಅನ್ನೋದಿನ್ನೂ ಅಸ್ಪಷ್ಟ. ದೇಶದಾದ್ಯಂತ 8 ಸಾವಿರ ವಾಹನಗಳನ್ನು ಹೊಂದಿದ್ದ ಕಂಪನಿ ಏಕಾಏಕಿ ಈ ರೀತಿ ಇನ್ನಿಲ್ಲದಂತೆ ಪಾತಾಳಕ್ಕೆ ಕುಸಿದಿದ್ದು, ಭಾರತದ ಸ್ಟಾರ್ಟ್ ಅಪ್ ಗಳ ಭವಿಷ್ಯದ ಮೇಲೆ ತೂಗುಗತ್ತಿ ನೇತಾಡುವಂತೆ ಮಾಡಿದೆ.
