ಬೆಂಗಳೂರು : ‘786’ ಸಂಖ್ಯೆಯ ಲಾಲಸೆ ತೋರಿಸಿ ಮಹಿಳೆಯೊಬ್ಬರಿಂದ ಸಾವಿರಾರು ರೂಪಾಯಿಯನ್ನು ಸೈಬರ್ ವಂಚಕರು ವಂಚಿಸಿರುವ ಘಟನೆ ಬೆಂಗಳೂರಿನಲ್ಲಿ ಬೆಳಕಿಗೆ ಬಂದಿದೆ. ಈ ಸಂಬಂಧ ಬಾಣಸವಾಡಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಸುಮಿತ್ರಾ ದೇವಿ ಎಂಬುವವರು ಹಳೆ ನೋಟುಗಳು ಹಾಗೂ ಕಾಯಿನ್ಗಳನ್ನು ಹೊಂದಿದ್ದು, ಅವುಗಳನ್ನು ಮಾರಾಟ ಮಾಡಲು ಮುಂದಾಗಿದ್ದರು. 786 ಸಂಖ್ಯೆಗೆ ಮುಸ್ಲಿಂ ಸಮುದಾಯದಲ್ಲಿ ಮುಸ್ಲಿಂ ಸಮುದಾಯದಲ್ಲಿ ಡಿಮ್ಯಾಂಡ್ ಇದೆ ಎಂದು ದುರುಪಯೋಗಪಡಿಸಿಕೊಂಡ ಸೈಬರ್ ವಂಚಕರು, ಯೂಟ್ಯೂಬ್ ಹಾಗೂ ಫೇಸ್ಬುಕ್ನಲ್ಲಿ ಜಾಹೀರಾತು ನೀಡಿ ಬಲೆಗೆ ಬೀಳಿಸಿದ್ದಾರೆ.
ಪಂಕಜ್ ಬದೋರಿಯಾ ಎಂಬ ಹೆಸರಿನಲ್ಲಿ “ಓಲ್ಡ್ ಕಾಯಿನ್ ಬೈಯರ್” ಎಂದು ಜಾಹೀರಾತು ಹಾಕಿದ್ದ ವಂಚಕರು, ವಿಶೇಷ ಸಂಖ್ಯೆಯ ನೋಟುಗಳು ಹಾಗೂ ಹಳೆ ಕಾಯಿನ್ಗಳಿದ್ದರೆ ಸಂಪರ್ಕಿಸಲು ಹೇಳಿದ್ದರು. ಈ ಜಾಹೀರಾತು ನೋಡಿ ಮಹಿಳೆ ತಮ್ಮ ಬಳಿ ಇರುವ ನೋಟುಗಳನ್ನು ಮಾರಲು ಸಂಪರ್ಕಿಸಿದ್ದಾರೆ.
ಮೊದಲಿಗೆ ನೋಟಿನ ಫೋಟೋಗಳನ್ನು ಕಳುಹಿಸಲು ಹೇಳಿ, ಬಳಿಕ ಮೂರು ದಿನಗಳ ನಂತರ ಕರೆ ಮಾಡಿದ ವಂಚಕರು, “ಸರ್ಕಾರದ ವತಿಯಿಂದ 80 ಲಕ್ಷ ರೂ. ಹಣ ವಿಮಾನದ ಮೂಲಕ ಬಂದಿದೆ, ಕಸ್ಟಮ್ಸ್ ಕ್ಲಿಯರೆನ್ಸ್ಗೆ ಹಣ ಬೇಕು” ಎಂದು ಹೇಳಿ 8 ಸಾವಿರ ರೂ. ಆನ್ಲೈನ್ ಮೂಲಕ ಪಡೆದುಕೊಂಡಿದ್ದಾರೆ.
ನಂತರ ಮತ್ತಷ್ಟು ಹಣಕ್ಕಾಗಿ ಸೈನಿಕನ ಮೂಲಕ ಹಣ ಕಳುಹಿಸುವುದಾಗಿ ಹೇಳಿ ಒತ್ತಾಯಿಸಿದ್ದಾರೆ. ಮಹಿಳೆಗೆ ಅನುಮಾನ ಬಂದಾಗ ಹಣ ನೀಡಲು ನಿರಾಕರಿಸಿದರೂ, ನಿಮ್ಮ ಫೋಟೋ ನಮ್ಮ ಬಳಿ ಇದೆ ಎಂದು ಬೆದರಿಕೆ ಹಾಕಿದ್ದಾರೆ.
ಇದೇ ವೇಳೆ ಏರ್ಪೋರ್ಟ್ ಪೊಲೀಸ್ ಎಂದು ಹೇಳಿಕೊಂಡ ಪಂಕಜ್ ಸಿಂಗ್ ಎಂಬಾತ ಕರೆ ಮಾಡಿ ಜಿಎಸ್ಟಿ ಹಾಗೂ ಇತರೆ ತೆರಿಗೆಗಳ ಹೆಸರಿನಲ್ಲಿ ಸುಮಾರು 50 ಸಾವಿರ ರೂ. ಹಣ ವರ್ಗಾವಣೆ ಮಾಡಿಸಿಕೊಂಡಿದ್ದಾನೆ.
ಈ ರೀತಿ ಹಳೆ ನೋಟು ಹಾಗೂ ವಿಶೇಷ ಸಂಖ್ಯೆಗಳ ಮಾರಾಟದ ಹೆಸರಿನಲ್ಲಿ ಮಹಿಳೆಯಿಂದ ಲಕ್ಷಾಂತರ ರೂಪಾಯಿ ವಂಚನೆ ನಡೆದಿದೆ. ಪ್ರಕರಣದ ಕುರಿತು ಪೊಲೀಸರು ತನಿಖೆ ಮುಂದುವರೆಸಿದ್ದಾರೆ.
ಇದನ್ನೂ ಓದಿ : ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ಹೈಟೆಕ್ ಕ್ರಾಂತಿ.. ರಸ್ತೆ ಗುಂಡಿ ಪತ್ತೆಗೆ AI ಡ್ಯಾಶ್ಕ್ಯಾಮ್ ನಿಯೋಜಿಸಿದ NHAI
