ಹಾಂಕಾಂಗ್ : ಯಾರೋ ನಿಮಗೆ ಬಹಳಷ್ಟು ನೋವು ಕೊಟ್ಟಿರುತ್ತಾರೆ, ಜೀವನದಲ್ಲಿ ಜಿಗುಪ್ಸೆ ಬರುವಷ್ಟು ಕಿರಿಕಿರಿ ಉಂಟುಮಾಡಿರುತ್ತಾರೆ. ಅಂಥವರಿಗೆ ನಾವೆಲ್ಲ ಸಾಮಾನ್ಯವಾಗಿ ಮನಸ್ಸಿನಲ್ಲೇ ಬೈದುಕೊಂಡು ಹಿಡಿಶಾಪ ಹಾಕುತ್ತೇವೆ. ಆದರೆ, ಹಾಂಕಾಂಗ್ನಲ್ಲಿ ಇಂಥ ಹತಾಶೆಯನ್ನು ಹೊರಹಾಕಲು ಒಂದು ವಿಶಿಷ್ಟ ದಾರಿಯಿದೆಂತೆ. ಸುಮಾರು 600 ರೂಪಾಯಿ (50 ಹಾಂಗ್ ಕಾಂಗ್ ಡಾಲರ್) ಕೊಟ್ಟರೆ ಸಾಕು, ಅಲ್ಲಿನ ವೃದ್ಧೆಯರು ನಿಮ್ಮ ಶತ್ರುಗಳ ಹೆಸರನ್ನು ಬರೆದ ಕಾಗದವನ್ನು ಚಪ್ಪಲಿಯಿಂದ ಚಚ್ಚಿ, ಅವರಿಗೆ ಶಾಪ ಹಾಕುವ ವಿಚಿತ್ರ ಸಂಪ್ರದಾಯವೊಂದು ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸದ್ದು ಮಾಡುತ್ತಿದೆ.
ಏನಿದು ‘ವಿಲನ್ ಹಿಟ್ಟಿಂಗ್’ ಸಂಪ್ರದಾಯ?
ಕ್ಯಾಂಟೋನೀಸ್ ಜಾನಪದ ಸಂಸ್ಕೃತಿಯಲ್ಲಿ ಇದನ್ನು ‘ದಾ ಸಿಯು ಯಾನ್’ ಅಥವಾ ‘ವಿಲನ್ ಹಿಟ್ಟಿಂಗ್’ ಎಂದು ಕರೆಯಲಾಗುತ್ತದೆ. ಇದು ಕೇವಲ ಮಂತ್ರ-ತಂತ್ರವಲ್ಲ, ಬದಲಿಗೆ ಶತಮಾನಗಳಷ್ಟು ಹಳೆಯದಾದ ಒಂದು ಸಾಮಾಜಿಕ ಆಚರಣೆ. ಕಚೇರಿಯಲ್ಲಿ ಕಿರುಕುಳ ನೀಡುವ ಮೇಲಧಿಕಾರಿ, ವಂಚಿಸಿದ ಸಂಗಾತಿ ಅಥವಾ ಜೀವನದಲ್ಲಿ ಎದುರಾಗುವ ದುರದೃಷ್ಟ – ಹೀಗೆ ಯಾರ ವಿರುದ್ಧ ನಿಮಗೆ ಕೋಪವಿದೆಯೋ, ಅವರ ಹೆಸರನ್ನು ಕಾಗದದ ಮೇಲೆ ಬರೆದು ಈ ‘ವಿಲನ್ ಹಿಟ್ಟರ್ಸ್’ ಬಳಿ ನೀಡಬೇಕು. ಅಲ್ಲಿನ ವೃದ್ಧೆಯರು ಧೂಪ ಹಾಕಿ, ಮಂತ್ರಗಳನ್ನು ಪಠಿಸುತ್ತಾ, ಆ ಕಾಗದವನ್ನು ಪದೇ ಪದೇ ಚಪ್ಪಲಿಯಿಂದ ಹೊಡೆಯುತ್ತಾರೆ. ಈ ಮೂಲಕ ನಿಮ್ಮ ಸಂಕಷ್ಟಗಳು ದೂರವಾಗುತ್ತವೆ ಎಂಬುದು ಇಲ್ಲಿನ ಜನರ ನಂಬಿಕೆ.
ಎಲ್ಲಿವೆ ಈ ‘ಶಾಪ’ದ ಅಂಗಡಿಗಳು
ಹಾಂಕಾಂಗ್ನ ಅತ್ಯಂತ ಜನನಿಬಿಡ ಪ್ರದೇಶವಾದ ಕಾಸ್ವೇ ಬೇ (Causeway Bay) ನಲ್ಲಿರುವ ಕೆನಾಲ್ ರೋಡ್ ಫ್ಲೈಓವರ್ ಅಡಿಯಲ್ಲಿ ಈ ಆಚರಣೆ ನಡೆಯುತ್ತದೆ. ಇಲ್ಲಿ ಸರಿಸುಮಾರು 15 ರಿಂದ 20 ಮಂದಿ ವೃದ್ಧೆಯರು ಸಣ್ಣ ಸ್ಟಾಲ್ಗಳನ್ನು ಹಾಕಿಕೊಂಡು ಕುಳಿತಿರುತ್ತಾರೆ. ಪ್ರತಿ ವರ್ಷ ಮಾರ್ಚ್ ತಿಂಗಳ ಸುಮಾರಿಗೆ ಬರುವ ‘ಜಿಂಗ್ ಝೆ’ (Jing Zhe) ಎಂಬ ಸಾಂಪ್ರದಾಯಿಕ ಅವಧಿಯಲ್ಲಿ ಇಲ್ಲಿ ನೂರಾರು ಜನರು ಸಾಲುಗಟ್ಟಿ ನಿಲ್ಲುತ್ತಾರೆ. ಇತ್ತೀಚೆಗೆ ಪ್ರವಾಸಿಗರು ಕೂಡ ಈ ವಿಲನ್ ಹಿಟ್ಟಿಂಗ್ ಅನುಭವ ಪಡೆಯಲು ಮುಗಿಬೀಳುತ್ತಿದ್ದು, ಟಿಕ್ಟಾಕ್ ಮತ್ತು ಇನ್ಸ್ಟಾಗ್ರಾಮ್ಗಳಲ್ಲಿ ಇದರ ವಿಡಿಯೋಗಳು ವೈರಲ್ ಆಗುತ್ತಿವೆ.
ಚಿಕಿತ್ಸೆಗಿಂತಲೂ ಅಗ್ಗದ ಮಾನಸಿಕ ನೆಮ್ಮದಿ?
.ಹಾಂಕಾಂಗ್ನಂತಹ ಅತಿ ಹೆಚ್ಚು ಒತ್ತಡವಿರುವ ನಗರಗಳಲ್ಲಿ, ಜನರ ಮಾನಸಿಕ ನೆಮ್ಮದಿಗೆ ಇದೊಂದು ಸುಲಭ ದಾರಿಯಾಗಿದೆ. ಇಲ್ಲಿ ಭಾಗವಹಿಸುವ ಬಹುತೇಕ ಜನರು ತಮ್ಮ ಶತ್ರುಗಳಿಗೆ ನಿಜವಾಗಿಯೂ ಅಪಾಯವಾಗಲಿ ಎಂದು ಬಯಸುವುದಿಲ್ಲ. ಬದಲಿಗೆ, ಯಾರದೋ ಮೇಲೆ ಇರುವ ಸಿಟ್ಟನ್ನು ಚಪ್ಪಲಿಯಿಂದ ಹೊಡೆಯುವ ಮೂಲಕ ಹೊರಹಾಕಿದಾಗ ಸಿಗುವ ಸಮಾಧಾನಕ್ಕಾಗಿ ಇಲ್ಲಿಗೆ ಬರುತ್ತಾರೆ. “600 ರೂಪಾಯಿ ಕೊಟ್ಟು ಚಪ್ಪಲಿ ಏಟು ಹಾಕಿಸುವುದು ಮಾನಸಿಕ ತಜ್ಞರ ಬಳಿ ಹೋಗಿ ಚಿಕಿತ್ಸೆ ಪಡೆಯುವುದಕ್ಕಿಂತಲೂ ಅಗ್ಗ ಮತ್ತು ಪರಿಣಾಮಕಾರಿ” ಎಂಬುದು ಕೆಲವರ ಹಾಸ್ಯಭರಿತ ಅಭಿಪ್ರಾಯ. ಒಟ್ಟಿನಲ್ಲಿ, ಪ್ರಾಚೀನ ನಂಬಿಕೆ ಮತ್ತು ಆಧುನಿಕ ಒತ್ತಡದ ನಡುವಿನ ಈ ಸಂಘರ್ಷ ಹಾಂಕಾಂಗ್ನ ಈ ವಿಚಿತ್ರ ಕಲೆ ಇಂದಿಗೂ ಜೀವಂತವಾಗಿರುವಂತೆ ಮಾಡಿದೆ.
ಇದನ್ನೂ ಓದಿ : ಚೆಂಡು ಅಂತಾ ಬ್ಯಾಟ್ನಿಂದ ಹೊಡೆದಾಗ ಸ್ಫೋ*ಟ!
