ಬೆಂಗಳೂರು : ಕಾರು ಕೊಳ್ಳುವಾಗ ಬಹುತೇಕ ಭಾರತೀಯರು ಮಧ್ಯಮ ಅಥವಾ ಉನ್ನತ ಶ್ರೇಣಿಯ (Mid or Top End) ಮಾಡೆಲ್ಗಳನ್ನೇ ಹೆಚ್ಚು ಇಷ್ಟಪಡುತ್ತಾರೆ. ಏಕೆಂದರೆ ಬೇಸ್ ಮಾಡೆಲ್ ಎಂದರೆ ಅದರಲ್ಲಿ ಏನೂ ಇರುವುದಿಲ್ಲ, ಬರೀ ಖಾಲಿ ಡಬ್ಬಾ ಎಂಬ ಭಾವನೆ ಅನೇಕರಲ್ಲಿದೆ. ಆದರೆ, ಈ ಮಾತನ್ನು ಸುಳ್ಳು ಮಾಡಲು ಹೊರಟಿದೆ ಕಿಯಾ ಮೋಟಾರ್ಸ್.
ಕಿಯಾ ತನ್ನ ಜನಪ್ರಿಯ ಎಸ್ಯುವಿ ಸೆಲ್ಟೋಸ್ನ 2026ರ ಆವೃತ್ತಿಯ ‘ಎಚ್ಟಿಇ’ ಎಂಬ ಆರಂಭಿಕ ಮಾಡೆಲ್ನಲ್ಲಿ (Base Variant) ನೀಡಿರುವ ಫೀಚರ್ಗಳನ್ನು ನೋಡಿದರೆ ನೀವು ನಿಜಕ್ಕೂ ಅಚ್ಚರಿ ಪಡುತ್ತೀರಿ. 12.59 ಲಕ್ಷ ರೂ. (ಎಕ್ಸ್ ಶೋರೂಂ) ಬೆಲೆಯ ಈ ಡೀಸೆಲ್ ಎಸ್ಯುವಿ, ಹಣಕ್ಕೆ ತಕ್ಕ ಮೌಲ್ಯ ನೀಡುವ ವಾಹನವಾಗಿ ಹೊರಹೊಮ್ಮಿದೆ. ಇದರ ಸಂಪೂರ್ಣ ವಿವರ ಇಲ್ಲಿದೆ.
ಎಂಜಿನ್ ಮತ್ತು ಕಾರ್ಯಕ್ಷಮತೆ
ಎಚ್ಟಿಇ ಬೇಸ್ ಮಾಡೆಲ್ನಲ್ಲಿ ಕಂಪನಿಯು ತನ್ನ ವಿಶ್ವಾಸಾರ್ಹ 1.5 ಲೀಟರ್ CRDi ಟರ್ಬೊ ಡೀಸೆಲ್ ಎಂಜಿನ್ ಅಳವಡಿಸಿದೆ. ಇದು 115 PS ಪವರ್ ಮತ್ತು 250 Nm ಟಾರ್ಕ್ ಉತ್ಪಾದಿಸುವ ಸಾಮರ್ಥ್ಯ ಹೊಂದಿದೆ. ವಿಶೇಷವೆಂದರೆ, ಬೇಸ್ ಮಾಡೆಲ್ ಆದರೂ ಇದರಲ್ಲಿ ಬಾನೆಟ್ಗೆ ಹೈಡ್ರಾಲಿಕ್ ಸ್ಟ್ರಟ್ಗಳನ್ನು ನೀಡಲಾಗಿದೆ. ಸಾಮಾನ್ಯವಾಗಿ ಇದನ್ನು ಪ್ರೀಮಿಯಂ ಕಾರುಗಳಲ್ಲಿ ಮಾತ್ರ ಕಾಣಬಹುದು.
ಹೊರವಿನ್ಯಾಸ : ಬೇಸ್ ಮಾಡೆಲ್ ಎನಿಸುವುದಿಲ್ಲ!
ಸಾಮಾನ್ಯವಾಗಿ ಆರಂಭಿಕ ಆವೃತ್ತಿಯ ಕಾರುಗಳಲ್ಲಿ ಹ್ಯಾಲೋಜನ್ ಲೈಟ್, ಕಪ್ಪು ಬಣ್ಣದ ಬಂಪರ್ಗಳಿರುತ್ತವೆ. ಆದರೆ 2026ರ ಸೆಲ್ಟೋಸ್ ಎಚ್ಟಿಇ ಹಾಗಲ್ಲ:
- ಮುಂಭಾಗ : ಟಾಪ್ ಎಂಡ್ ಕಾರಿನಂತೆಯೇ ಕಾಣುವ ಥಂಡರ್ಬೋಲ್ಟ್ LED DRLಗಳು ಮತ್ತು ಮ್ಯಾಟ್ ಬ್ಲ್ಯಾಕ್ ಫಿನಿಶಿಂಗ್ ಇರುವ ಸಿಗ್ನೇಚರ್ ಟೈಗರ್ ನೋಸ್ ಗ್ರಿಲ್ ಇದರಲ್ಲಿದೆ. ಸರಳವಾದ ಎಲ್ಇಡಿ ಹೆಡ್ಲ್ಯಾಂಪ್ ಸೆಟಪ್ ಇದ್ದರೂ, ಅದು ಆಕರ್ಷಕವಾಗಿದೆ. ಬಂಪರ್ನಲ್ಲಿ ಸಿಲ್ವರ್ ಬಣ್ಣದ ವಿನ್ಯಾಸ ನೀಡಲಾಗಿದೆ.
- ಪಾರ್ಶ್ವ : ಬಾಡಿ ಕಲರ್ ಡೋರ್ ಹ್ಯಾಂಡಲ್ಗಳು ಮತ್ತು ಮಿರರ್ಗಳು (ORVM) ಹಾಗೂ ಅವುಗಳ ಮೇಲೆ ಎಲ್ಇಡಿ ಇಂಡಿಕೇಟರ್ಗಳಿವೆ. 16 ಇಂಚಿನ ಸ್ಟೀಲ್ ವೀಲ್ಗಳಿಗೆ ಕಿಯಾ ಕ್ಯಾರೆನ್ಸ್ ಶೈಲಿಯ ಕಪ್ಪು ವೀಲ್ ಕವರ್ ನೀಡಲಾಗಿದೆ.
- ಹಿಂಭಾಗ : ಕನೆಕ್ಟೆಡ್ ಲೈಟ್ ಬಾರ್ ಇಲ್ಲದಿದ್ದರೂ, ಎಲ್ಇಡಿ ಟೈಲ್ ಲ್ಯಾಂಪ್ಗಳಿವೆ. ಮುಖ್ಯವಾಗಿ, ಬೇಸ್ ಮಾಡೆಲ್ ಆದರೂ ಇದರಲ್ಲಿ ರಿವರ್ಸ್ ಪಾರ್ಕಿಂಗ್ ಕ್ಯಾಮೆರಾ ಮತ್ತು 4 ಪಾರ್ಕಿಂಗ್ ಸೆನ್ಸಾರ್ಗಳನ್ನು ನೀಡಿರುವುದು ಮೆಚ್ಚುಗೆಗೆ ಪಾತ್ರವಾಗಿದೆ.
- ಒಳಾಂಗಣ : ಹೈಟೆಕ್ ಫೀಚರ್ಗಳ ಸುರಿಮಳೆ. ಕಾರಿನ ಒಳಗೆ ಕುಳಿತರೆ ಇದು ಆರಂಭಿಕ ಆವೃತ್ತಿ ಎಂದು ನಂಬಲು ಕಷ್ಟವಾಗುತ್ತದೆ.
- ಇನ್ಫೋಟೈನ್ಮೆಂಟ್ : ನಂಬಿದರೆ ನಂಬಿ, ಬಿಟ್ಟರೆ ಬಿಡಿ! ಈ ಬೇಸ್ ಮಾಡೆಲ್ನಲ್ಲಿ ಬರೋಬ್ಬರಿ 10.25 ಇಂಚಿನ ಟಚ್ಸ್ಕ್ರೀನ್ ಇನ್ಫೋಟೈನ್ಮೆಂಟ್ ಸಿಸ್ಟಮ್ ಇದೆ. ವೈರ್ಲೆಸ್ ಆಂಡ್ರಾಯ್ಡ್ ಆಟೋ ಮತ್ತು ಆಪಲ್ ಕಾರ್ಪ್ಲೇ ಕನೆಕ್ಟಿವಿಟಿ ಕೂಡ ಲಭ್ಯ!
- ಡ್ಯಾಶ್ಬೋರ್ಡ್ : ಕಿಯಾ ಸೈರೋಸ್ (Syros) ನಲ್ಲಿರುವಂತಹ ಡಿಜಿಟಲ್ ಇನ್ಸ್ಟ್ರುಮೆಂಟ್ ಕ್ಲಸ್ಟರ್ ಇದರಲ್ಲಿದೆ. ಡಿಜಿಟಲ್ ಸ್ಪೀಡೋಮೀಟರ್ ಮತ್ತು ಟ್ಯಾಕೋಮೀಟರ್ ಜೊತೆಗೆ ವಾಹನದ ಮಾಹಿತಿಗಾಗಿ MID ಡಿಸ್ಪ್ಲೇ ಇದೆ.
- ಇತರೆ ಸೌಲಭ್ಯಗಳು : ಮಲ್ಟಿಫಂಕ್ಷನ್ ಸ್ಟೀರಿಂಗ್ ವೀಲ್, ಅದರಲ್ಲಿ ಮ್ಯೂಸಿಕ್ ಕಂಟ್ರೋಲ್ ಬಟನ್ಗಳು ಮತ್ತು ಕ್ರೂಸ್ ಕಂಟ್ರೋಲ್ ಕೂಡ ಇದೆ! ಬೇಸ್ ಮಾಡೆಲ್ನಲ್ಲಿ ಕ್ರೂಸ್ ಕಂಟ್ರೋಲ್ ಸಿಗುವುದು ತೀರಾ ಅಪರೂಪ.
- ಸ್ಪೇಸ್ : 447 ಲೀಟರ್ಗಳ ಬೃಹತ್ ಬೂಟ್ ಸ್ಪೇಸ್ ಮತ್ತು ಬೂಟ್ ಲ್ಯಾಂಪ್ ಇದೆ. ಆದರೆ ಪಾರ್ಸೆಲ್ ಟ್ರೇ ಇದರಲ್ಲಿ ಲಭ್ಯವಿಲ್ಲ.
ಒಟ್ಟಾರೆಯಾಗಿ, ನೀವೇನಾದರೂ ಬಜೆಟ್ ಸ್ನೇಹಿ ಬೆಲೆಯಲ್ಲಿ ಪ್ರೀಮಿಯಂ ಫೀಚರ್ಗಳಿರುವ ಡೀಸೆಲ್ ಎಸ್ಯುವಿ ಹುಡುಕುತ್ತಿದ್ದರೆ, 2026ರ ಕಿಯಾ ಸೆಲ್ಟೋಸ್ ಎಚ್ಟಿಇ ಒಂದು ಅತ್ಯುತ್ತಮ ಆಯ್ಕೆಯಾಗಬಲ್ಲದು. ನೋಯ್ಡಾದಲ್ಲಿ ಇದರ ಆನ್-ರೋಡ್ ಬೆಲೆ ಸುಮಾರು 14.5 ಲಕ್ಷ ರೂ. ಎಂದು ಅಂದಾಜಿಸಲಾಗಿದೆ.
ಇದನ್ನೂ ಓದಿ : ಪುರುಷರನ್ನು ಬೀದಿನಾಯಿಗೆ ಹೋಲಿಸಿದ್ರಾ ನಟಿ ರಮ್ಯಾ? ಹೊಸ ವಿವಾದ ಎಬ್ಬಿಸಿದ ಸ್ಯಾಂಡಲ್ವುಡ್ ಕ್ವೀನ್.. ಹೇಳಿದ್ದೇನು?
