ಬೀಜಿಂಗ್ : ಅಮೆರಿಕ-ಇರಾನ್ ನಡುವಿನ ಯುದ್ಧವು ಜಗತ್ತನ್ನು ಆತಂಕಕ್ಕೆ ತಳ್ಳಿರುವ ಬೆನ್ನಲ್ಲೇ, ಚೀನಾ ಮೂಲದ ಪ್ರೊಫೆಸರ್ ಕ್ಸುಕಿನ್ ಜಿಯಾಂಗ್ (Xueqin Jiang) ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸಂಚಲನ ಮೂಡಿಸುತ್ತಿದ್ದಾರೆ. 2024ರಲ್ಲಿಯೇ ಅವರು ಅಮೆರಿಕದ ರಾಜಕೀಯ ಮತ್ತು ಭೌಗೋಳಿಕ ರಾಜಕೀಯದ ಕುರಿತು ನುಡಿದಿದ್ದ ಮೂರು ಪ್ರಮುಖ ಭವಿಷ್ಯಗಳಲ್ಲಿ ಎರಡು ಈಗಾಗಲೇ ನಿಜವಾಗಿದ್ದು, ನೆಟ್ಟಿಗರು ಇವರನ್ನು ‘ಚೀನಾದ ನಾಸ್ಟ್ರಾಡಾಮಸ್’ ಎಂದು ಕರೆಯುತ್ತಿದ್ದಾರೆ.
ಯೆಲ್ ಕಾಲೇಜಿನ ಪದವೀಧರರಾಗಿರುವ ಜಿಯಾಂಗ್, ಬೀಜಿಂಗ್ನಲ್ಲಿ ತತ್ವಶಾಸ್ತ್ರ ಮತ್ತು ಇತಿಹಾಸ ಬೋಧಿಸುತ್ತಾರೆ. ಇವರು ನಡೆಸುವ ‘ಪ್ರೆಡಿಕ್ಟಿವ್ ಹಿಸ್ಟರಿ’ (Predictive History) ಎಂಬ ಯೂಟ್ಯೂಬ್ ಚಾನೆಲ್ ಈಗ ಜಾಗತಿಕ ಗಮನ ಸೆಳೆದಿದೆ. 2024ರ ಮೇ ತಿಂಗಳಲ್ಲಿ ಅವರು ನೀಡಿದ್ದ ಉಪನ್ಯಾಸದಲ್ಲಿ ಅಮೆರಿಕದ ಭವಿಷ್ಯದ ಬಗ್ಗೆ ಮೂರು ಮಹತ್ವದ ಮುನ್ಸೂಚನೆಗಳನ್ನು ನೀಡಿದ್ದರು. ಮೊದಲನೆಯದಾಗಿ ಡೊನಾಲ್ಡ್ ಟ್ರಂಪ್ ಮತ್ತೆ ಅಧಿಕಾರಕ್ಕೆ ಬರುತ್ತಾರೆ ಎಂಬುದು ಮತ್ತು ಎರಡನೆಯದಾಗಿ ಟ್ರಂಪ್ ಬಂದ ಕೂಡಲೇ ಇರಾನ್ ವಿರುದ್ಧ ಯುದ್ಧ ಆರಂಭಿಸುತ್ತಾರೆ ಎಂಬುದು. ಈ ಎರಡೂ ಭವಿಷ್ಯಗಳು ಈಗ ಅಕ್ಷರಶಃ ನಿಜವಾಗಿವೆ.
ಅಮೆರಿಕದ ಪತನದ ಮುನ್ಸೂಚನೆ?
ಜಿಯಾಂಗ್ ಅವರ ಮೂರನೇ ಮತ್ತು ಅತ್ಯಂತ ಆತಂಕಕಾರಿ ಭವಿಷ್ಯವೆಂದರೆ, ಈ ಯುದ್ಧದಲ್ಲಿ ಅಮೆರಿಕ ಸೋಲನ್ನು ಅನುಭವಿಸಲಿದೆ ಎಂಬುದು. ಅಮೆರಿಕದ ಈ ಇರಾನ್ ದಾಳಿಯನ್ನು ಅವರು ಪುರಾತನ ಅಥೆನ್ಸ್ ನಡೆಸಿದ್ದ ‘ಸಿಸಿಲಿಯನ್ ಎಕ್ಸ್ಪೆಡಿಶನ್’ಗೆ ಹೋಲಿಸಿದ್ದಾರೆ. ಆ ಕಾಲದಲ್ಲಿ ಅತಿದೊಡ್ಡ ಮಿಲಿಟರಿ ಅಭಿಯಾನಕ್ಕೆ ಕೈಹಾಕಿದ್ದ ಅಥೆನ್ಸ್ ಅಂತಿಮವಾಗಿ ವಿನಾಶವನ್ನು ಎದುರಿಸಿತ್ತು. ಅದೇ ರೀತಿ, ಇರಾನ್ನ ಪರ್ವತಮಯ ಭೂಪ್ರದೇಶ, ದೀರ್ಘಕಾಲದ ಪೂರೈಕೆ ಮಾರ್ಗಗಳು ಮತ್ತು ಆಂತರಿಕ ಪ್ರತಿರೋಧವು ಅಮೆರಿಕದ ಮಿಲಿಟರಿ ಯಶಸ್ಸನ್ನು ಕಾರ್ಯತಂತ್ರದ ವೈಫಲ್ಯವಾಗಿ ಪರಿವರ್ತಿಸಲಿದೆ ಎಂದು ಅವರು ಎಚ್ಚರಿಸಿದ್ದಾರೆ.
ಇರಾನ್ ಸಿದ್ಧತೆ ಮತ್ತು ಗೆಲುವಿನ ತಂತ್ರ
ಇತ್ತೀಚೆಗೆ ಅಮೆರಿಕದ ‘ಬ್ರೇಕಿಂಗ್ ಪಾಯಿಂಟ್ಸ್’ ಕಾರ್ಯಕ್ರಮದಲ್ಲಿ ಮಾತನಾಡಿದ ಜಿಯಾಂಗ್, ಇರಾನ್ ಕಳೆದ 20 ವರ್ಷಗಳಿಂದ ಈ ಸಂಘರ್ಷಕ್ಕಾಗಿ ತಯಾರಿ ನಡೆಸಿದೆ ಎಂದು ಪ್ರತಿಪಾದಿಸಿದ್ದಾರೆ. “ಇದು ಅಮೆರಿಕ ಮತ್ತು ಇರಾನ್ ನಡುವಿನ ಸುದೀರ್ಘ ಯುದ್ಧ (War of attrition). ಇರಾನ್ನ ಮಿತ್ರ ಪಡೆಗಳಾದ ಹೌತಿಗಳು, ಹೆಜ್ಬುಲ್ಲಾ ಮತ್ತು ಹಮಾಸ್ ಅಮೆರಿಕನ್ನರ ಮಾನಸಿಕತೆಯನ್ನು ಚೆನ್ನಾಗಿ ಅರಿತುಕೊಂಡಿವೆ. ಅಮೆರಿಕದ ಸಾಮ್ರಾಜ್ಯವನ್ನು ದುರ್ಬಲಗೊಳಿಸಲು ಮತ್ತು ಅಂತಿಮವಾಗಿ ಅದನ್ನು ನಾಶಪಡಿಸಲು ಅವರು ಅತ್ಯುತ್ತಮ ತಂತ್ರವನ್ನು ಹೊಂದಿದ್ದಾರೆ,” ಎಂದು ಅವರು ವಿಶ್ಲೇಷಿಸಿದ್ದಾರೆ.
ಜಿಯಾಂಗ್ ಅವರ ಪ್ರಕಾರ, ಕಳೆದ ಜೂನ್ನಲ್ಲಿ ನಡೆದ 12 ದಿನಗಳ ಸಂಘರ್ಷವು ಇರಾನ್ಗೆ ಅಮೆರಿಕ ಮತ್ತು ಇಸ್ರೇಲ್ನ ದಾಳಿ ಸಾಮರ್ಥ್ಯವನ್ನು ವಿಶ್ಲೇಷಿಸಲು ನೆರವಾಗಿದೆ. ಈ ಯುದ್ಧವು ಸುದೀರ್ಘ ಕಾಲ ಮುಂದುವರಿಯಲಿದ್ದು, ಇದು ಕೊನೆಗೊಂಡಾಗ ಜಗತ್ತು ಈಗಿರುವಂತೆ ಇರುವುದಿಲ್ಲ ಎಂದು ಅವರು ಭವಿಷ್ಯ ನುಡಿದಿದ್ದಾರೆ. ಇತಿಹಾಸದ ಪುನರಾವರ್ತಿತ ಮಾದರಿಗಳು ಮತ್ತು ಗೇಮ್ ಥಿಯರಿ ಆಧಾರಿತ ಅವರ ಈ ಭವಿಷ್ಯವಾಣಿಗಳು ಈಗ ಜಾಗತಿಕ ಮಟ್ಟದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿವೆ.
ಇದನ್ನೂ ಓದಿ : ಸೆಮಿಫೈನಲ್ ಫೈಟ್ | ಬಟ್ಲರ್ ಫಾರ್ಮ್ ಬಗ್ಗೆ ಭಾರತಕ್ಕೆ ಎಚ್ಚರಿಕೆ.. ‘ನಿದ್ರಿಸುತ್ತಿರುವ ಸಿಂಹ’ ಎಚ್ಚರಗೊಳ್ಳುವ ಭೀತಿ!
