ಚೆನ್ನೈ : ತಮಿಳು ಚಿತ್ರರಂಗದ ಖ್ಯಾತ ನಟ ಅರುಣ್ ವಿಜಯ್ ಅವರ ಚೆನ್ನೈ ನಿವಾಸಕ್ಕೆ ಬಾಂಬ್ ಬೆದರಿಕೆ ಬಂದಿದ್ದು, ನಗರ ಪೊಲೀಸರು ಮತ್ತು ಬಾಂಬ್ ನಿಷ್ಕ್ರಿಯ ದಳ ತಕ್ಷಣ ಕಾರ್ಯಾಚರಣೆ ನಡೆಸಿದೆ.
ಡಿಜಿಪಿ ಕಚೇರಿಗೆ ನಿಗೂಢ ವ್ಯಕ್ತಿಯಿಂದ ಬೆದರಿಕೆ ಇಮೇಲ್ ಬಂದ ನಂತರ, ಪೊಲೀಸ್ ತಂಡಗಳು ಕಾರ್ಯಾಚರಿಸಿದವು. ಎಕ್ಕಾಟ್ಟುತಂಗಲ್ ಪ್ರದೇಶದಲ್ಲಿರುವ ಅರುಣ್ ವಿಜಯ್ ಅವರ ಚೆನ್ನೈ ನಿವಾಸದಲ್ಲಿ ಬಾಂಬ್ ಇಡಲಾಗುತ್ತಿದೆ ಎಂದು ಬೆದರಿಕೆ ಇಮೇಲ್ ತಿಳಿಸಿತ್ತು.
ಮಾಹಿತಿ ಪಡೆದ ನಂತರ, ಬಾಂಬ್ ಪತ್ತೆ ದಳ, ಪೊಲೀಸ್ ಸಿಬ್ಬಂದಿ ತಂಡದೊಂದಿಗೆ ನಟನ ಮನೆಗೆ ಧಾವಿಸಿ ಸಂಪೂರ್ಣ ಶೋಧ ನಡೆಸಿತು. ಅಧಿಕಾರಿಗಳು ಪ್ರಸ್ತುತ ಬೆದರಿಕೆ ಇಮೇಲ್‌ನ ಮೂಲದ ಬಗ್ಗೆ ತನಿಖೆ ನಡೆಸುತ್ತಿದ್ದಾರೆ. ಹೆಚ್ಚಿನ ವಿಚಾರಣೆ ನಡೆಯುತ್ತಿದೆ.
ಯೆನ್ನೈ ಅರಿಂದಾಲ್ (2015), ಚೆಕ್ಕ ಚಿವಂತ ವಾನಂ (2018) ಮತ್ತು ಚಕ್ರವ್ಯೂಹ (2016) ಸೇರಿ ಕೆಲ ಸಿನಿಮಾಗಳಲ್ಲಿ ನಟ ಅರುಣ್ ವಿಜಯ್ ಕಾಣಿಸಿಕೊಂಡಿದ್ದಾರೆ. ಮುಂದೆ ಕ್ರಿಸ್ ತಿರುಕುಮಾರನ್ ಅವರ ‘ರೆಟ್ಟ ಥಳ’ ಚಿತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಬಾಬಿ ಬಾಲಚಂದ್ರನ್ ತಮ್ಮ ಬಿಟಿಜಿ ಯೂನಿವರ್ಸಲ್ ಬ್ಯಾನರ್ ಅಡಿ ನಿರ್ಮಿಸಿದ್ದಾರೆ. ಚಿತ್ರದಲ್ಲಿ ಅರುಣ್ ವಿಜಯ್ ಜೊತೆಗೆ ಸಿಧಿ ಇದ್ನಾನಿ, ತಾನ್ಯಾ ರವಿಚಂದ್ರನ್, ಯೋಗಿ ಸಾಮಿ, ಜಾನ್ ವಿಜಯ್, ಹರೀಶ್ ಪೆರಾಡಿ ಮತ್ತು ಬಾಲಾಜಿ ಮುರುಗದಾಸ್ ಕೂಡಾ ಇದ್ದಾರೆ. ಬಿಡುಗಡೆ ದಿನಾಂಕ ಇನ್ನಷ್ಟೇ ಘೋಷಣೆಯಾಗಬೇಕಿದೆ.
ಇದನ್ನೂ ಓದಿ : ಭ್ರಷ್ಟಚಾರ ಆರೋಪ | ಬೆಂಗಳೂರಿನ 6 RTO ಕಚೇರಿಗಳ ಮೇಲೆ ಲೋಕಾಯುಕ್ತ ರೇಡ್‌
