ದೇಶದ ಪ್ರಮುಖ ಬ್ಯಾಂಕ್ಗಳಲ್ಲಿ ಒಂದಾಗಿರುವ ಆ್ಯಕ್ಸಿಸ್ ಬ್ಯಾಂಕ್ ಈಗ ಚಿನ್ನದ ಅಡಮಾನ ಇರಿಸಿ ಸಾಲ ಪಡೆಯುವವರಿಗೆ ಸಿಹಿ ಸುದ್ದಿ ನೀಡಿದೆ. ಅದರಲ್ಲೂ, ಅತಿ ಸಣ್ಣ, ಸಣ್ಣ ಹಾಗೂ ಮಧ್ಯಮ ಶ್ರೇಣಿ ಉದ್ದಿಮೆದಾರರು (MSME) ಅಲ್ಪಾವಧಿಯ ವ್ಯಾಪಾರದ ಅಗತ್ಯಗಳಿಗೆ ಚಿನ್ನವನ್ನು ಅಡಮಾನ ಇರಿಸಿ ಸುಲಭವಾಗಿ ಸಾಲ ನೀಡುವ ಯೋಜನೆ ಘೋಷಣೆ ಮಾಡಿದೆ. Gold Loan for MSME ಎಂಬ ಯೋಜನೆ ಘೋಷಣೆ ಮಾಡಿದ್ದು, ಸಣ್ಣ ಹಾಗೂ ಮಧ್ಯಮ ಉದ್ದಿಮೆದಾರರು ಅಗತ್ಯಗಳಿಗೆ ಅನುಗುಣವಾಗಿ ಸುಲಭ ಸಾಲ ಪಡೆಯಲು ಇದು ಅನುಕೂಲವಾಗಲಿದೆ.
ಈ ಯೋಜನೆಯನ್ನು ವಿಶೇಷವಾಗಿ ವೈಯಕ್ತಿಕ ಉದ್ಯಮಿಗಳು ಮತ್ತು ಏಕಮಾತ್ರ ಮಾಲೀಕತ್ವದ ಸಂಸ್ಥೆಗಳ (Proprietorship) ಅಗತ್ಯಗಳನ್ನು ಗಮನದಲ್ಲಿಟ್ಟುಕೊಂಡು ರೂಪಿಸಲಾಗಿದೆ. ಹಳೆಯ ಗ್ರಾಹಕರು ಮಾತ್ರವಲ್ಲದೆ, ಹೊಸ ಗ್ರಾಹಕರು ಕೂಡ ಈ ಸೌಲಭ್ಯವನ್ನು ಬಳಸಿಕೊಳ್ಳಬಹುದು. ಪ್ರಸ್ತುತ ದೇಶಾದ್ಯಂತ ಇರುವ 3,300ಕ್ಕೂ ಹೆಚ್ಚು ಆ್ಯಕ್ಸಿಸ್ ಬ್ಯಾಂಕ್ ಗೋಲ್ಡ್ ಲೋನ್ ಶಾಖೆಗಳಲ್ಲಿ ಈ ಸೇವೆ ಲಭ್ಯವಿದೆ. ಇದು ಗ್ರಾಮೀಣ ಮತ್ತು ನಗರ ಪ್ರದೇಶಗಳ ಸಣ್ಣ ವ್ಯಾಪಾರಿಗಳಿಗೆ ಸಾಲದ ಲಭ್ಯತೆಯನ್ನು ಸುಲಭಗೊಳಿಸಲಿದೆ.
ಅರ್ಹ ಗ್ರಾಹಕರು ಬ್ಯಾಂಕಿಗೆ ಭೇಟಿ ನೀಡಿದ ದಿನವೇ ನೇರವಾಗಿ ಕೌಂಟರ್ ನಲ್ಲಿ ಸಾಲ ಪಡೆಯಬಹುದು. ಮಂಜೂರಾದ ಮೊತ್ತವು ತಕ್ಷಣವೇ ಅವರ ಬ್ಯಾಂಕ್ ಖಾತೆಗಳಿಗೆ ಜಮೆಯಾಗುತ್ತದೆ. ಸಾಲದ ಮಿತಿಯು ಕನಿಷ್ಠ 50,000 ರೂಪಾಯಿಗಳಿಂದ ಗರಿಷ್ಠ 1 ಕೋಟಿ ರೂಪಾಯಿಗಳವರೆಗೆ ಇರುತ್ತದೆ. ವ್ಯಾಪಾರದ ಅಗತ್ಯತೆಗಳು ಮತ್ತು ಅರ್ಜಿದಾರರ ಅರ್ಹತೆಯನ್ನು ಆಧರಿಸಿ ಬ್ಯಾಂಕ್ ಈ ಮೊತ್ತವನ್ನು ನಿರ್ಧರಿಸುತ್ತದೆ. ಇಂತಹ ವೇಗವಾದ ಪ್ರಕ್ರಿಯೆಯು ವ್ಯಾಪಾರ ಚಟುವಟಿಕೆಗಳಿಗೆ ಹೆಚ್ಚಿನ ನೆರವು ನೀಡಲಿದೆ.
ಈ ಸಾಲ ಪಡೆಯಲು ಅಗತ್ಯವಿರುವ ದಾಖಲೆಗಳ ವಿಷಯದಲ್ಲಿ ಬ್ಯಾಂಕ್ ಸರಳ ನಿಯಮಗಳನ್ನು ಜಾರಿಗೆ ತಂದಿದೆ. ಕೆವೈಸಿ (KYC) ದಾಖಲೆಗಳೊಂದಿಗೆ, ಉದ್ಯಮ್ ನೋಂದಣಿ (Udyam Registration) ಅಥವಾ ಅಸಿಸ್ಟ್ ಪ್ರಮಾಣಪತ್ರ ಕಡ್ಡಾಯವಾಗಿದೆ. ಇದರೊಂದಿಗೆ ಐಟಿಆರ್ (ITR) ಅಥವಾ ಜಿಎಸ್ಟಿ (GST) ನೋಂದಣಿ ಪತ್ರಗಳನ್ನು ಸಲ್ಲಿಸಬೇಕಾಗುತ್ತದೆ. ದಾಖಲೆಗಳ ಪರಿಶೀಲನೆ ಅತ್ಯಂತ ವೇಗವಾಗಿ ನಡೆಯುವುದರಿಂದ, ಇತರ ಸಾಲಗಳಂತೆ ತಿಂಗಟ್ಟಲೆ ಕಾಯುವ ಅವಶ್ಯಕತೆ ಇರುವುದಿಲ್ಲ.
ಇದನ್ನೂ ಓದಿ : ಸದ್ದಿಲ್ಲದೇ ನಿಶ್ಚಿತಾರ್ಥ ಮಾಡಿಕೊಂಡ ‘ಗಿಚ್ಚಿ ಗಿಲಿ ಗಿಲಿ’ ಖ್ಯಾತಿಯ ಚಿಲ್ಲರ್ ಮಂಜು.. ಹುಡುಗಿ ಯಾರು?
