ಬೆಂಗಳೂರು: ಆಸ್ತಿ ತೆರಿಗೆ ಪಾವತಿಸದೇ ಬಾಕಿ ಉಳಿಸಿಕೊಂಡಿರುವ ಸ್ವತ್ತುಗಳ ವಿರುದ್ಧ ಗ್ರೇಟರ್ ಬೆಂಗಳೂರು ಆಡಳಿತ ಕಠಿಣ ಕ್ರಮಕ್ಕೆ ಮುಂದಾಗಿದೆ. ಸುಮಾರು 7,000 ಆಸ್ತಿಗಳಿಂದ 437 ಕೋಟಿ ರೂ. ತೆರಿಗೆ ಬಾಕಿ ಉಳಿದಿರುವುದು ಬೆಳಕಿಗೆ ಬಂದ ಹಿನ್ನೆಲೆಯಲ್ಲಿ ಹರಾಜು ಪ್ರಕ್ರಿಯೆ ಜಾರಿಗೊಳಿಸಲಾಗಿದೆ.
ಬೆಂಗಳೂರು ಉತ್ತರ ನಗರ ಪಾಲಿಕೆ ವ್ಯಾಪ್ತಿಯ ವಲಯ–1 ಮತ್ತು ವಲಯ–2ರಲ್ಲಿ ಆಸ್ತಿ ತೆರಿಗೆ ಪಾವತಿಸದ 107 ಆಸ್ತಿಗಳ ವಿರುದ್ಧ ಕ್ರಮ ಕೈಗೊಳ್ಳಲಾಗಿತ್ತು. ಸುಮಾರು 2.49 ಕೋಟಿ ರೂ. ಬಾಕಿ ತೆರಿಗೆ ವಸೂಲಿಗಾಗಿ ಫೆ. 21ರಂದು ಮಧ್ಯಾಹ್ನ 3 ಗಂಟೆಗೆ ಯಲಹಂಕ ಮಿನಿ ವಿಧಾನಸೌಧ ಸಭಾಂಗಣದಲ್ಲಿ ಹರಾಜು ಪ್ರಕ್ರಿಯೆ ನಡೆಯಿತು. ಈ ಹರಾಜಿನಲ್ಲಿ 10ಕ್ಕೂ ಹೆಚ್ಚು ಬಿಡ್ಡುದಾರರು ಭಾಗವಹಿಸಿದ್ದು, 2 ಆಸ್ತಿಗಳಿಗೆ ಬಿಡ್ ಕೂಗಲಾಯಿತು.
ಅಳ್ಳಾಳಸಂದ್ರದ ಆರ್ಎಂಜೆಡ್ ವಸತಿ ಸಮುಚ್ಛಯದ 2087 ಚದರ ಅಡಿ ಫ್ಲಾಟ್ 84.60 ಲಕ್ಷಕ್ಕೆ ಬಿಡ್ ಮಾಡಲಾಯಿತು. ಯಲಹಂಕ ಓಲ್ಡ್ ಟೌನ್ನ 2069 ಚದರ ಅಡಿ ವಸತಿ ಕಟ್ಟಡ ₹60 ಲಕ್ಷಕ್ಕೆ ಬಿಡ್ ಮಾಡಲಾಯಿತು.
ಎರಡರಲ್ಲಿ ಒಂದೇ ಆಸ್ತಿಗೆ ಡಿ.ಡಿ ಸಲ್ಲಿಕೆಯಾಗಿದ್ದು, ಮತ್ತೊಂದು ಆಸ್ತಿಯ ಹರಾಜು ಡಿ.ಡಿ ಸಲ್ಲಿಕೆಯಾಗದ ಕಾರಣ ರದ್ದುಪಡಿಸಲಾಯಿತು. ಉಳಿದ ಆಸ್ತಿಗಳಿಗೆ ಬಿಡ್ಡುದಾರರು ಮುಂದೆ ಬರದ ಹಿನ್ನೆಲೆಯಲ್ಲಿ ಅವುಗಳನ್ನು ಪಾಲಿಕೆಯ ವಶದಲ್ಲಿರಿಸಿ ಮುಂದಿನ ದಿನಗಳಲ್ಲಿ ಮರುಹರಾಜು ನಡೆಸಲಾಗುವುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಗ್ರೇಟರ್ ಬೆಂಗಳೂರು ಆಡಳಿತ ಕಾಯ್ದೆ–2024 ಅನ್ವಯ ಅಂತಿಮ ಕ್ರಮವಾಗಿ ಹರಾಜು ಕೈಗೊಳ್ಳಲಾಗಿದೆ. ಇಂದಿನ ಹರಾಜಿನಲ್ಲಿ ಉತ್ತರ ನಗರ ಪಾಲಿಕೆ – 2 ಆಸ್ತಿಗಳು, ಪೂರ್ವ ನಗರ ಪಾಲಿಕೆ – 3 ಆಸ್ತಿಗಳು ಸೇರಿ ಒಟ್ಟು 5 ಆಸ್ತಿಗಳು ಹರಾಜು ಮಾರಾಟಗೊಂಡಿವೆ.
ಹರಾಜು ಮೊದಲು ಬಾಕಿದಾರರಿಗೆ ನೋಟಿಸ್, SMS ಹಾಗೂ IVRS ಕರೆಗಳ ಮೂಲಕ ಮಾಹಿತಿ ನೀಡಲಾಗಿತ್ತು. ಜಪ್ತಿ ಆದೇಶ ಹೊರಡಿಸಿದ ಬಳಿಕವೂ 60 ದಿನಗಳಿಗಿಂತ ಹೆಚ್ಚು ಅವಧಿ ಕಳೆದರೂ ತೆರಿಗೆ ಪಾವತಿ ಆಗದ ಹಿನ್ನೆಲೆಯಲ್ಲಿ ಹರಾಜು ಅನಿವಾರ್ಯವಾಯಿತು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಹರಾಜು ನೋಟಿಸ್ ಪಡೆದಿರುವ ಎಲ್ಲಾ ಬಾಕಿದಾರರು ತಕ್ಷಣ ಬಾಕಿ ತೆರಿಗೆಯನ್ನು ಪಾವತಿಸಲು ಮನವಿ ಮಾಡಲಾಗಿದೆ. ಹೆಚ್ಚಿನ ಬಾಕಿ ಪ್ರಕರಣಗಳಿಂದ ಪ್ರಾರಂಭಿಸಿ ಹರಾಜು ಪ್ರಕ್ರಿಯೆ ಮುಂದುವರಿಯಲಿದೆ ಎಂದು ಕಂದಾಯ ವಿಭಾಗದ ವಿಶೇಷ ಆಯುಕ್ತ ಮೂನೀಶ್ ಮೌದ್ಗಿಲ್ ತಿಳಿಸಿದ್ದಾರೆ.
ಇದನ್ನೂ ಓದಿ: ನೋ ಪಾರ್ಕಿಂಗ್ ಸ್ಥಳಗಳಲ್ಲಿ ವೆಹಿಕಲ್ ಪಾರ್ಕಿಂಗ್ | ಸರ್ಕಾರಿ ವಾಹನಕ್ಕೂ ಬಿತ್ತು ಫೈನ್
